ಪ್ರೇಯಸಿ ಕೊಲೆಗೆ ಮೊದಲೇ ಸಂಚು ರೂಪಿಸಿದ್ದ ಭಗ್ನಪ್ರೇಮಿ

ಈ ನಡುವೆ ಕಾರಿನಿಂದ ಹೊರಗೆ ಎಸೆಯಲಾಗಿದ್ದ ಎರಡು ನಾಡ ಬಾಂಬ್​ಗಳನ್ನು ಬಾಂಬ್​ ನಿಷ್ಕ್ರಿಯ ದಳ ಶನಿವಾರ ರಾತ್ರಿ ಶಿರಾ ಕೈಗಾರಿಕಾ ಪ್ರದೇಶದಲ್ಲಿ ನಿಷ್ಕ್ರಿಯಗೊಳಿಸಿದೆ. ಬಾಂಬ್​ಗಳು ಹೇಗೆ ಸಿಕ್ಕಿತೆಂಬುದರ ಬಗ್ಗೆ ಪೊಲೀಸರು ತನಿಖೆ ಮುಂದುವರೆಸಿದ್ದಾರೆ.

ಜಿಲ್ಲಾ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದ ಯುವತಿ ರಮ್ಯಾ ಕೊಟ್ಟ ದೂರಿನ ಹಿನ್ನೆಲೆ ಶಿರಾ ತಾಲೂಕು ಕಳ್ಳಂಬೆಳ್ಳ ಪೊಲೀಸ್​ ಠಾಣೆಯಲ್ಲಿ ದೂರು ದಾಖಲಾಗಿದೆ. 4 ಪುಟಗಳ ದೂರಿನಲ್ಲಿ ರಮ್ಯಾ ತನ್ನ ಹಾಗೂ ನಾಗೇಂದ್ರ ಗೌಡನ 6 ವರ್ಷದ ಪ್ರೀತಿ ಬಗ್ಗೆ ಸಂಪೂರ್ಣವಾಗಿ ಬಿಚ್ಚಿಟ್ಟಿದ್ದಾಳೆ. ಪ್ರೀತಿ ಆರಂಭವಾದ ಎರಡು ವರ್ಷದ ಬಳಿಕ ನಾಗೇಂದ್ರನ ಕಿರುಕುಳ ಕೊಡಲಾರಂಭಿಸಿದ್ದ. ಕಳೆದ 4 ವರ್ಷಗಳಿಂದ ಬದಲಾದ ಆತನ ನಡವಳಿಕೆಯಿಂದ ಬೇಸತ್ತು ಇತ್ತೀಚೆಗೆ ಆತನ ಹಿಂಸೆ, ಕಿರುಕುಳ ಮಿತಿಮೀರಿದ್ದರಿಂದ ಬ್ರೇಕ್​ ಅಪ್​ ಮಾಡಿಕೊಳ್ಳಲು ರಮ್ಯಾ ಮುಂದಾಗಿದ್ದಳು ಎಂಬುದು ದೂರಿನಲ್ಲಿ ಬಯಲಾಗಿದೆ.

ಗಾಯಗೊಂಡಿದ್ದ ರಮ್ಯಾ ಜಿಲ್ಲಾ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದು ಆಕೆಯನ್ನು ಪೋಷಕರು ಡಿಸ್​ಜಾರ್ಜ್​ ಮಾಡಿಸಿಕೊಂಡು ಅಂಕೋಲಕ್ಕೆ ಕರೆದೊಯ್ಯದಿದ್ದಾರೆ.

ಡಿಎನ್​ಎ ಪರೀಕ್ಷೆ : ನಾಡಬಾಂಬ್​ ಸ್ಫೋಟಿಸಿಕೊಂಡು ಸಜೀವವಾಗಿ ದಹಿಸಿಕೊಂಡಿದ್ದ ನಾಗೇಂದ್ರನ ಸುಟ್ಟುಕರಕಲಾದ ದೇಹವನ್ನು ಜಿಲ್ಲಾ ಆಸ್ಪತ್ರೆಯಲ್ಲಿ ಮರಣೋತ್ತರ ಪರೀಕ್ಷೆ ಒಳಪಡಿಸಿದ್ದಲ್ಲದೆ, ಡಿಎನ್​ಎ ಪರೀಕ್ಷೆಗೆ ಅಂಗಾಂಗ ಮಾದರಿ ಪಡೆಯಲಾಯಿತು. ನಂತರ ಮಧ್ಯಾಹ್ನ ಕಳ್ಳಂಬೆಳ್ಳ ಠಾಣೆ ಪೊಲೀಸರು ನಾಗೇಂದ್ರ ಮೃತದೇಹವನ್ನು ಕುಟುಂಬಸ್ಥರಿಗೆ ಹಸ್ತಾಂತರಿಸಿದರು. ರಮ್ಯಾ ನೀಡಿದ ದೂರಿನ ಹಿನ್ನೆಲೆ ಕಳ್ಳಂಬೆಳ್ಳ ಠಾಣೆಯಲ್ಲಿ ಕೊಲೆಯತ್ನ, ಸ್ಫೋಟಕ ವಸ್ತುಗಳ ಕಾಯ್ದೆ ಅಡಿ ಪ್ರಕರಣ ದಾಖಲಿಸಿಕೊಂಡು ತನಿಖೆ ಮುಂದುವರೆಸಲಾಗಿದೆ.