"ಆಧಾರ್​ ಕಾರ್ಡ್​' ಪಡೆದ ಅಲೆಮಾರಿಗಳ ಹರ್ಷ

ಶಾಲೆಯ ಮುಖವನ್ನೇ ನೋಡದೆ ಊರೂರು ಅಲೆದು ಬದುಕಿದ ಬಂಡಿ ಸಾಗಿಸುತ್ತಿರುವ ಅಲೆಮಾರಿ ಕುಟುಂಬವೀಗ ಒಂದೆಡೆ ನೆಲೆಯೂರಿ ಬದುಕಿಗೆ ಅಗತ್ಯವಾದ ಸರ್ಕಾರಗಳ ಕನಿಷ್ಟ ಸೌಲಭ್ಯಕ್ಕಾಗಿ ಅಗತ್ಯವಾಗಿರುವ ಆಧಾರ್​ ಸಂಖ್ಯೆಗೆ ಅರ್ಜಿ ಸಲ್ಲಿಸಿ ಕಂದಾಯ ಇಲಾಖೆ ಕಚೇರಿಗೆ ಅಲೆದಾಡುತ್ತಿದ್ದ ಬಗ್ಗೆ ಮಾ.8ರಂದು ವಿಜಯವಾಣಿ ವರದಿ ಪ್ರಕಟಿಸಿ ಸಂಬಂಧಪಟ್ಟವರ ಗಮನ ಸೆಳೆದಿತ್ತು.

ಪತ್ರಿಕೆಯ ವರದಿ ಓದಿದ್ದ ಜಿಲ್ಲಾಧಿಕಾರಿ ಶುಭಕಲ್ಯಾಣ್​ ಹಾಗೂ ಚಿಕ್ಕನಾಯಕನಹಳ್ಳಿ ತಹಸೀಲ್ದಾರ್​ ಮಮತಾ ವಿಶೇಷ ಆಸಕ್ತಿವಹಿಸಿ ಅಲೆಮಾರಿ ಕುಟುಂಬಕ್ಕೆ ಅಗತ್ಯವಾಗಿದ್ದ ಆಧಾರ್​ ಹಾಗೂ ಪಡಿತರ ಕಾರ್ಡ್​ ಮಾಡಿಕೊಟ್ಟು ಬಡಕುಟುಂಬಕ್ಕೆ ಆಸರೆಯಾಗಿದ್ದಾರೆ. ಆಧಾರ್​ ಕಾರ್ಡ್​ ಇಲ್ಲದೆ ವಸತಿ ಶಾಲೆಯಲ್ಲಿ ದಾಖಲಾತಿ ಹಾಗೂ ಶಿಷ್ಯವೇತನ ಕೂಡ ಪಡೆಯಲಾಗದೆ ಸಂಕಷ್ಟ ಅನುಭವಿಸಿದ್ದ ಅಲೆಮಾರಿ ಕುಟುಂಬದ ಮಕ್ಕಳಿಗೂ ಈಗ ವಿದ್ಯಾಭ್ಯಾಸಕ್ಕೆ ನೆರವು ಸಿಕ್ಕಿದೆ.

ಕುರುಬರಹಳ್ಳಿಯಲ್ಲಿ ನೆಲೆಸಿರುವ ಚನ್ನದಾಸ ಅಲೆಮಾರಿ ಸಮುದಾಯದ ಉಮಾ ಹಾಗೂ ಮಹೇಶ್​ ದಂಪತಿ ಈವರೆಗೂ ಮತದಾರರ ಪಟ್ಟಿಗೆ ಹೆಸರು ಸೇರ್ಪಡೆ ಮಾಡಿಕೊಳ್ಳಲು ಸಾಧ್ಯವಾಗಿಲ್ಲ. ಆಧಾರ್​ ಸಂಖ್ಯೆ ಇಲ್ಲದೆ ಜಾತಿ ಪ್ರಮಾಣಪತ್ರ ಕೂಡ ಪಡೆಯುವುದು ಸಾಧ್ಯವಿರಲಿಲ್ಲ, 55 ವರ್ಷದ ಅನಾಥೆ ಕಿಡಮ್ಮ ಕೂಡ ಆಧಾರ್​ ಸಂಖ್ಯೆ ಸಿಗದೆ ಈವರೆಗೂ ರೇಷನ್​ ಕಾರ್ಡ್​ ಕೂಡ ಪಡೆಯಲು ಸಾಧ್ಯವಾಗದೆ ಭಿೆ ಬೇಡಿಕೊಂಡು ಬದುಕುತ್ತಿದ್ದರು.

ತಂದೆ, ತಾಯಿ ಇಲ್ಲದ ಅನಾಥ, ದಾಸ ಅಲೆಮಾರಿ ಸಮುದಾಯದ 22 ವರ್ಷದ ಗುಂಡ ಕೂಡ ಆಧಾರ್​ ಸಂಖ್ಯೆ ಪಡೆದಿದ್ದು ಸರ್ಕಾರದ ಸೌಲಭ್ಯಗಳನ್ನು ಪಡೆಯುವ ವಿಶ್ವಾಸ ಪಡೆದಿದ್ದಾನೆ.