ತುಮಕೂರಿನಲ್ಲಿ 8,323 ಎಕರೆ "ಪಡಾ' ಜಮೀನು

ಮೂಲ ಸಾಗುವಳಿದಾರರು ಸರ್ಕಾರಕ್ಕೆ ಸಲ್ಲಿಸಲಾಗದ ಕಂದಾಯ ಬಾಕಿಗಾಗಿ ಸರ್ಕಾರ ಮುಟ್ಟುಗೋಲು ಹಾಕಿಕೊಂಡ ಬೀಳು (ಪಡ) ಎಂದು ದಾಖಲೆಗಳಲ್ಲಿ ದಾಖಲಾಗಿರುವ ಜಮೀನುಗಳ ಖಾತೆಗಳನ್ನು ಮೂಲ ಖಾತೆದಾರರ ಹೆಸರಿಗೆ ಮರುಸ್ಥಾಪನೆ (ರೀಸ್ಟೋರೇಷನ್​)ಗೆ ಸರ್ಕಾರ 2014ರ ಸೆ.6ರವರೆಗೆ ಕಾಲಾವಕಾಶ ನೀಡಿತ್ತು. 12 ವರ್ಷದ ಹಿಂದೆ ಸರ್ಕಾರ ನಿಗದಿಪಡಿಸಿದ್ದ ಈ ಕಾಲಾವಕಾಶದ ಬಗ್ಗೆ ರೈತರಿಗೆ ಸೂಕ್ತ ಮಾಹಿತಿ ಅಥವಾ ವ್ಯಾಪಕ ಪ್ರಚಾರದ ಕೊರತೆಯಿಂದ ಅರ್ಜಿ ಸಲ್ಲಿಸಲು ಸಾಧ್ಯವಾಗದ ಸಾವಿರಾರು ರೈತರು ಮತ್ತೊಮ್ಮೆ ಅರ್ಜಿ ಸಲ್ಲಿಸಲು ಅವಕಾಶ ನೀಡಬೇಕು ಎಂದು ಸರ್ಕಾರಕ್ಕೆ ಪದೇಪದೆ ಮನವಿ ಮಾಡಿಕೊಳ್ಳುತ್ತಿದ್ದರೂ ಪ್ರಯೋಜನವಾಗಿಲ್ಲ. ರಾಜ್ಯಾದ್ಯಂತ ಕಂದಾಯ ಬಾಕಿಗಾಗಿ ಬೀಳು ಬಿದ್ದಿರುವ ಜಮೀನುಗಳ ಪೈಕಿ ಈವರೆಗೆ ಕೆಲವೇ ಕೆಲವು ಪ್ರಕರಣ ಇತ್ಯರ್ಥಪಡಿಸಲಾಗಿದೆ. ಆದರೆ, ಇನ್ನೂ ಸಾಕಷ್ಟು ಪ್ರಕರಣಗಳು ಇತ್ಯರ್ಥಕ್ಕಾಗಿ ಕಾದಿವೆ.

ಭೌಗೋಳಿಕವಾಗಿಯೂ ದೊಡ್ಡದು ಎನ್ನಿಸಿಕೊಂಡಿರುವ ತುಮಕೂರು ಜಿಲ್ಲೆಯಲ್ಲಿ 8,323 ಎಕರೆ ಭೂಮಿ ದಾಖಲೆಗಳಲ್ಲಿ ಬೀಳು(ಪಡಾ) ಎಂದು ನಮೂದಾಗಿದೆ. ಸಾಗುವಳಿದಾರರ ಹೆಸರು ಮತ್ತೆ ಸ್ಥಾಪನೆಗೆ 2014ರಲ್ಲಿ ಸರ್ಕಾರ ನೀಡಿದ್ದ ಅವಕಾಶ ಬಳಸಿಕೊಂಡು ಜಿಲ್ಲೆಯಲ್ಲಿ 374 ರೈತರು ಅರ್ಜಿ ಸಲ್ಲಿಸಿ ದಶಕ ಕಳೆದರೂ ಕೇವಲ 4 ಅರ್ಜಿಗೆ ಮಾತ್ರ ಮುಕ್ತಿ ಸಿಕ್ಕಿದೆ. ಇನ್ನೂ 370 ರೈತರು ಉಳುಮೆ ಮಾಡುತ್ತಿರುವ ಭೂಮಿಗೆ ಕಂದಾಯ ಕಟ್ಟಲು ಸಿದ್ಧರಾಗಿ ದಾಖಲೆಗಾಗಿ ಹಾಗೂ ಇನ್ನೂ ಸಾವಿರಾರು ರೈತರು ಅರ್ಜಿ ಸಲ್ಲಿಸಲು ಮತ್ತೊಂದು ಅವಕಾಶಕ್ಕಾಗಿ ಚಾತಕ ಪಕ್ಷಿಯಂತೆ ಕಾಯುತ್ತಿದ್ದಾರೆ.