ನೆಲೆ ಸಿಗದೆ 395 ಅಲೆಮಾರಿ ಕುಟುಂಬ ಪರದಾಟ!

ತುಮಕೂರು, ಚಿಕ್ಕನಾಯಕನಹಳ್ಳಿ, ತಿಪಟೂರು, ಪಾವಗಡ, ಕೊರಟಗೆರೆ, ಕುಣಿಗಲ್​, ಗುಬ್ಬಿ ತಾಲೂಕುಗಳಲ್ಲಿ ಪಿಂಜಾರ, ಕೊರಮ, ಕೊರಚ, ಹಂದಿಜೋಗಿ, ಸಿಳ್ಳೆಕ್ಯಾತ, ದೊಂಬಿದಾಸ, ಚನ್ನದಾಸ, ದೊಂಬರು, ಉಳುವ, ಕರಡಿಕುಂದಲ್​, ಮಂಡೊರು, ಸಿಂದೊಳ್ಳಿ, ಗಂಡಿಚೌರ್​ ಸೇರಿದಂತೆ ವಿವಿಧ 12ಕ್ಕೂ ಹೆಚ್ಚು ಅಲೆಮಾರಿ ಸಮುದಾಯಗಳು ಒಂದೆಡೆ ನೆಲೆಕಂಡುಕೊಳ್ಳಲು ಅಂಗೈ ಅಗಲ ಜಾಗ ನೀಡಲು ಜಿಲ್ಲಾಡಳಿತಕ್ಕೆ ಸಾಧ್ಯವಾಗಿಲ್ಲ.

ತುಮಕೂರು ತಾಲೂಕಿನ ಕಲ್ಯಾಣಪುರ, ಅಣ್ಣೇನಹಳ್ಳಿ, ಅಮರಾಪುರ, ಚಿಕ್ಕನಾಯಕನಹಳ್ಳಿ ತಾಲೂಕು ದಬ್ಬೇಟ್ಟ, ಕೆಂಕೆರೆ, ತಿಪಟೂರು ತಾಲೂಕು ಹಳೇಪಾಳ್ಯ, ಕಿಬ್ಬನಹಳ್ಳಿ, ಪಾವಗಡ ತಾಲೂಕಿನ ಗಂಗಸಾಗರ, ಕೊರಟಗೆರೆಯ ಹುಲಿಕುಂಟೆ, ಕುಣಿಗಲ್​ ತಾಲೂಕು ಜಲಧಿಗೆರೆ ಕಾಲೋನಿ, ಗುಬ್ಬಿ ತಾಲೂಕು ಸಾತೇನಹಳ್ಳಿಯಲ್ಲಿ ಅಲೆಮಾರಿಗಳಿಗೆ ನಿವೇಶನ ನಿರ್ಮಿಸಲು ಸರ್ಕಾರದಿಂದ ಜಾಗ ಮಂಜೂರಾಗಿ ವರ್ಷಗಳೇ ಕಳೆದರೂ ಈವರೆಗೂ ಭೂಮಿಯನ್ನು ಸಮತಟ್ಟು ಮಾಡಿಲ್ಲ.

ತುಮಕೂರು ತಾಲೂಕು ಸಿರಿವರ, ಹೆಬ್ಬೂರು, ಶ್ರೀಕಂಠಯ್ಯನಪಾಳ್ಯ, ಗಂಗೋನಹಳ್ಳಿ, ಅರಕರೆ (ಅಮಲಾಪುರ), ಹೆಗ್ಗೆರೆ ಗ್ರಾಮಗಳ ರಸ್ತೆ ಪಕ್ಕದಲ್ಲಿಯೇ ಪ್ಲಾಸ್ಟಿಕ್​ ಕವರ್​ಗಳ ಟೆಂಟ್​ಗಳಲ್ಲಿ ವಾಸಿಸುತ್ತಿರುವ ಅಲೆಮಾರಿಗಳು ಪ್ರತಿದಿನ ವಿಷಜಂತುಗಳಾದ ಹಾವು, ಜರಿ, ಚೇಳು, ಚಿರತೆ, ಕರಡಿ, ಹಂದಿ ಹಾವಳಿಗಳ ಸಹಿಸಿಕೊಂಡು ಮಳೆ, ಬಿಸಿಲು, ಚಳಿ ಸಹಿಸಿಕೊಂಡು ಬದುಕು ದೂಡುವಂತಾಗಿದೆ.

ತುಮಕೂರು ತಾಲೂಕಿನ ಸಿರಿವಾರ, ಹೆಬೂರು, ಶ್ರೀಕಂಠಯ್ಯನಪಾಳ್ಯ, ಗಂಗೋನಹಳ್ಳಿ, ಗ್ರಾಮಗಳಲ್ಲಿ ವಾಸವಿರುವ ಶೀಳ್ಳೆಕ್ಯಾತ ಮತ್ತು ಸುಡುಗಾಡು ಸಿದ್ದ ಸಮುದಾಯದವರಿಗೆ ನಿವೇಶನ ಸೌಲಭ್ಯ ಕಲ್ಪಿಸಲು ತಾಲೂಕಿನ ಕಲ್ಯಾಣಪುರ ಗ್ರಾಮದ ಸ.ನಂ.83 ರಲ್ಲಿ 2 ಎಕರೆ ಸರ್ಕಾರಿ ಜಮೀನು 2024ರ ಮಾರ್ಚ್​ನಲ್ಲಿಯೇ ತುಮಕೂರು ಜಿಲ್ಲಾಧಿಕಾರಿ ಮುಂಜೂರು ಮಾಡಿದ್ದಾರೆ.

ಕಲ್ಲು, ಬಂಡೆಗಳಿರುವ ಈ ಸರ್ಕಾರಿ ಜಮೀನು ಭೂ ಸಮತಟ್ಟು ಮಾಡಲು ಜಿಪಂ ಇಂಜಿನಿಯರಿಂಗ್​ ತುಮಕೂರು ವಿಭಾಗ ಸಲ್ಲಿಸಿದ್ದ ಅಂದಾಜು ಪಟ್ಟಿಗೆ ಅನುಗುಣವಾಗಿ ಸಮಾಜ ಕಲ್ಯಾಣ ಇಲಾಖೆಯ ಅಲೆಮಾರಿ ಅಭಿವೃದ್ಧಿ ನಿಗಮ ಈಗಾಗಲೇ 13.20 ಲಕ್ಷ ರೂ. ಅನುದಾನ ಕೂಡ ಬಿಡುಗಡೆ ಮಾಡಿದ್ದರೂ ನಿವೇಶನ ನಿರ್ಮಿಸದಿರುವುದು ಫಲಾನುಭವಿಗಳಿಗೆ ಹಕ್ಕುಪತ್ರ ನೀಡುವಂತೆ ರಾಜೀವ್​ಗಾಂಧಿ ವಸತಿ ನಿಗಮದ ವ್ಯವಸ್ಥಾಪಕ ನಿರ್ದೇಶಕರಿಗೆ ಜಿಲ್ಲಾಧಿಕಾರಿ ಸಲ್ಲಿಸಿರುವ ಪ್ರಸ್ತಾವನೆ ಧೂಳು ತಿನ್ನುವಂತಾಗಿದೆ.

ಅರಕೆರೆ (ಅಮಲಾಪುರ) ಗ್ರಾಮದಲ್ಲಿ ವಾಸವಿರುವ ಶಿಳ್ಳೇಕ್ಯಾತ, ಹಂದಿಜೋಗಿ ಹಾಗೂ ಹಕ್ಕಿಪಿಕ್ಕಿ ಸಮುದಾಯದ 78 ಫಲಾಪೇಕ್ಷಿಗಳಿಗೆ ನಿವೇಶನ ಸೌಲಭ್ಯ ಕಲ್ಪಿಸುವ ಸಲುವಾಗಿ ಅಮಲಾಪುರ ಗ್ರಾಮದ ಸ.ನಂ 31ರಲ್ಲಿ 2.35 ಎಕರೆ ಜಮೀನು ಮಂಜೂರು ಮಾಡಿರುವ ಜಿಲ್ಲಾಧಿಕಾರಿ ಲೇಔಟ್​ ನಿರ್ಮಿಸಲು ರಾಜೀವ್​ಗಾಂಧಿ ವಸತಿ ನಿಗಮ ಕೋರಿದ್ದಾರೆ.

ಹಳ್ಳಿಹಳ್ಳಿಗಳನ್ನು ಸುತ್ತಿ ಮನೆ ಮುಂದೆ ಹೋಗಿ ತಲೆಕೂದಲು ಪಡೆದು ಹೇರ್​ಪಿನ್​, ಸೂಜಿ, ಅರಿಶಿಣ, ಕುಂಕುಮ ಮತ್ತಿತರ ಸಣ್ಣಪುಟ್ಟ ವಸ್ತುಗಳನ್ನು ಮಾರಾಟ ಮಾಡುವ ಅಕ್ಷರದ ನಂಟಿಲ್ಲದ ಪರಿಶಿಷ್ಟ ಅಲೆಮಾರಿಗಳು ಇತ್ತೀಚೆಗೆ ಬಾಗಿಲಿಗೆ ಹಾಕುವ ತೋರಣದ ಮಾದರಿಯ ವಿವಿಧ ಗೃಹಅಲಂಕಾರಕ ವಸ್ತುಗಳನ್ನು ಮಾಡುವುದನ್ನು ಅಭ್ಯಾಸ ಮಾಡಿಕೊಂಡು ಕಷ್ಟದ ಜೀವನ ನಡೆಸುತ್ತಿದ್ದಾರೆ.

ಮಕ್ಕಳ ಭವಿಷ್ಯದ ಕಾರಣಕ್ಕೆ ಸಣ್ಣ ವ್ಯಾಪಾರದಲ್ಲಿಯೇ ಒಂದೆಡೆ ನೆಲೆ ಕಂಡುಕೊಳ್ಳಲು ಮನಸ್ಸು ಮಾಡಿರುವ ಅಲೆಮಾರಿಗಳೆಲ್ಲರೂ ಭೂರಹಿತರೇ ಆಗಿದ್ದು ಅವರಿಗೆ ನಿವೇಶನ ಹಾಗೂ ವಸತಿ ನೀಡುವುದು ಸರ್ಕಾರದ ಆದ್ಯತೆಯ ಕರ್ತವ್ಯವಾಗಬೇಕಿದೆ. ಅಂದು ದುಡಿದು ಅಂದೇ ಊಟ ಮಾಡುವ ನೂರಾರು ಅಲೆಮಾರಿ ಕುಟುಂಬಗಳು ಒಪ್ಪತ್ತಿನ ಊಟಕ್ಕೆ ಪರದಾಡುವ ಸ್ಥಿತಿಯಲ್ಲಿದ್ದು ಮಕ್ಕಳು, ವೃದ್ಧರು, ಮಹಿಳೆಯರ ಸಂಕಷ್ಟಕ್ಕೆ ಆಳುವ ಸರ್ಕಾರ ಹಾಗೂ ಅಧಿಕಾರಿಗಳು ಮಿಡಿಯಬೇಕಿದೆ.

ಜಿಲ್ಲೆಯ ಚಿಕ್ಕನಾಯಕನಹಳ್ಳಿ ತಾಲೂಕಿನಲ್ಲಿ ಬರೋಬ್ಬರಿ 26 ಗ್ರಾಮದಲ್ಲಿ ಪಿಂಜಾರ, ಕೊರಮ, ಕೊರಚ, ಹಂದಿಜೋಗಿ, ಸಿಳ್ಳೆಕ್ಯಾತ, ದೊಂಬಿದಾಸ, ಚನ್ನದಾಸ, ದೊಂಬರು, ಉಳುವ, ಕರಡಿಕುಂದಲ್​, ಮಂಡೊರು, ಸಿಂದೊಳ್ಳಿ, ಗಂಡಿಚೌರ್​ ಸೇರಿದಂತೆ ವಿವಿಧ 12ಕ್ಕೂ ಹೆಚ್ಚು ಅಲೆಮಾರಿ ಸಮುದಾಯಗಳು ನೆಲೆಕಂಡಿಕೊಂಡು ಬದುಕುಕಟ್ಟಿಕೊಳ್ಳುತ್ತಿವೆ.

ಹನುಮಂತಪುರ, ಡಿಂಕನಹಳ್ಳಿ, ಹುಳಿಯಾರು, ಬೋರನಕಣಿವೆ, ಸಿಂಗದಹಳ್ಳಿ, ಚಿನಾಹಳ್ಳಿ, ಗಾಂಧಿನಗರ, ಬೇವಿನಹಳ್ಳಿ, ಬಡಕೆಗುಡ್ಲು, ಸೋರಲಮಾವು, ಕಾತ್ರಿಕೆಹಾಳ್​ ಸೇರಿದಂತೆ ವಿವಿಧ ಗ್ರಾಮಗಳಲ್ಲಿ ನೆಲೆನಿಂತಿದ್ದಾರೆ. ಈ ಗ್ರಾಮಗಳಲ್ಲಿರುವ ಅಲೆಮಾರಿಗಳಲ್ಲಿ ಕೆಲವರಿಗೆ ಇನ್ನೂ ವಸತಿ ಭಾಗ್ಯ ಸಿಕ್ಕಿಲ್ಲ. ಕೆಲವು ಗ್ರಾಮಗಳಲ್ಲಿ ಸರ್ಕಾರ ಜಮೀನು ಗುರುತಿಸಿ ನಿವೇಶನ ನಿರ್ಮಿಸಲು ಜಿಲ್ಲಾಡಳಿತಕ್ಕೆ ಸೂಚನೆ ನೀಡಿದ್ದು ಅಧಿಕಾರಿಗಳು ಮನಸ್ಸು ಮಾಡಬೇಕಷ್ಟೇ.