ಮಕ್ಕಳಿಗೆ ಹಿಂದೂ ಧರ್ಮದ ಅರಿವು ಮೂಡಿಸಿ

 ಸಾಗರ:  ಯುವಜನರಿಗೆ ನಾವು ಸಂಸ್ಕೃತಿ, ಸಂಸ್ಕಾರದ ಮಹತ್ವವನ್ನು ಪರಿಚಯಿಸದಿದ್ದಲ್ಲಿ ಅವರಿಗೆ ಹಿಂದು ಧರ್ಮದ ಮಹತ್ವ ಅರಿವಿಗೆ ಬರುವುದಿಲ್ಲ. ಈ ಕುರಿತಂತೆ ಚಿಕ್ಕಂದಿನಿಂದಲೇ ಅವರಿಗೆ ಸರಿಯಾದ ಮಾರ್ಗದರ್ಶನ ನೀಡುವುದು ಎಲ್ಲರ ಕರ್ತವ್ಯ ಎಂದು ಸಾಗರ ಸಮೀಪ ಬಳಸಗೋಡಿನ ಶ್ರೀ ಭೃಂಗೀಶ್ವರ ಮಠದ ಶ್ರೀ ಗುರುನೀಲಕಂಠ ಶಿವಾಚಾರ್ಯ ಸ್ವಾಮೀಜಿ ಹೇಳಿದರು. 

ಸಾಗರದಲ್ಲಿ ಆಯೋಜಿಸಿದ್ದ ಹಿಂದು ಸಂಗಮ ಕಾರ್ಯಕ್ರಮದ ದಿವ್ಯ ಸಾನಿಧ್ಯ ವಹಿಸಿ ಗಾಂಧಿ ಮೈದಾನದಲ್ಲಿ ಶನಿವಾರ ಸಂಜೆ ಆಯೋಜಿಸಿದ್ದ ಸಭಾ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದರು.

ಪ್ರತಿಯೊಬ್ಬರು ಗುರು ಮುಖೇನ ಸಂಸ್ಕಾರ, ಸಂಪ್ರದಾಯವನ್ನು ಅರಿತುಕೊಳ್ಳಬೇಕು. ಭಾರತದ ಪುಣ್ಯ ನೆಲಕ್ಕೆ ತನ್ನದೇ ಆದ ಮಹತ್ವವಿದೆ. ಕೆಳದಿಯ ಅರಸರು ಹಿಂದು ಧರ್ಮಕ್ಕೆ ನೀಡಿದ ಕೊಡುಗೆ ದೊಡ್ಡದು. ಸಮರ್ಥ ಆಡಳಿತದೊಂದಿಗೆ ನಮ್ಮ ಶೃದ್ಧಾಭಕ್ತಿ ಕೇಂದ್ರಗಳಿಗೆ ನೀಡಿದ ಕೊಡುಗೆ ಸ್ಮರಣೀಯ. ಕೆಳದಿ ಚನ್ನಮ್ಮ , ಕೆಳದಿಯ ಶಿವಪ್ಪನಾಯಕ , ವೆಂಕಟಪ್ಪ ನಾಯಕ ಮುಂತಾದವರ ಕೊಡುಗೆ ಹಿರಿದು ಎಂದರು.

ಕರ್ನಾಟಕ ದಕ್ಷಿಣ ಪ್ರಾಂತ ಕಾರ್ಯವಾಹ ಡಾ. ಜಯಪ್ರಕಾಶ್ ದಿಕ್ಸೂಚಿ ಭಾಷಣ ಮಾಡಿ, ದೇಶಕ್ಕೆ ಎದುರಾಗುತ್ತಿರುವ ಸವಾಲುಗಳು ಮತ್ತು ಅಪಾಯಗಳ ಬಗ್ಗೆ ಹಿಂದು ಧರ್ಮೀಯರು ಸಂಘಟಿತವಾಗಿ ಚಿಂತಿಸಲು ಇಂತಹ  ಸಮಾವೇಶಗಳ ಅವಶ್ಯಕತೆ ಇದೆ ಎಂದರು.

 ದೇಶದ ಎಂಬತ್ತು ಸಾವಿರ ಕಡೆಗಳಲ್ಲಿ ಈ ರೀತಿಯ ಸಂಗಮ, ಸಮಾವೇಶಗಳು ನಡೆಯುತ್ತಿವೆ. ಹಿಂದುಗಳು ತಮ್ಮತನವನ್ನು ಉಳಿಸಿಕೊಳ್ಳಬೇಕು. ಕೇವಲ ಭಾಷಣ ಘೋಷಣೆಗಳಿಂದ ಧರ್ಮ ಉಳಿಸಿಕೊಳ್ಳಲು ಸಾಧ್ಯವಿಲ್ಲ. ಸಾಮರಸ್ಯ, ಸಂಘಟನೆ, ಆಧ್ಯಾತ್ಮದ ಮಹತ್ವ, ಆತ್ಮ ಉನ್ನತಿಗಾಗಿ ಇಂತಹ ಸಮಾವೇಶಕ್ಕೆ ಪ್ರತಿಯೊಬ್ಬರೂ ಸಮಯ ನೀಡಬೇಕು. ನಾವು ಅತ್ಯಂತ ಉತ್ತಮ ಕಾಲದಲ್ಲಿದ್ದೇವೆ. ಕಾಶಿ, ಮಥುರಾ ಮುಂತಾದ ಶೃದ್ಧಾಭಕ್ತಿ ಕೇಂದ್ರಗಳು ಅತ್ಯಂತ ವ್ಯವಸ್ಥಿತವಾಗಿ ಕಟ್ಟಲಾಗಿದೆ ಎಂದರು.

ರಾಮ ಜನ್ಮ ಭೂಮಿಯಲ್ಲಿ ರಾಮಲಲ್ಲಾನ ಪ್ರತಿಷ್ಠಾಪನೆಯಾಗಿದೆ. ಇದು ನಮ್ಮ ಹಿಂದು ಧರ್ಮೀಯರ ಸಮಷ್ಟಿಯ ಸಂಕಲ್ಪ ಸಿದ್ಧಿಯಾದ ಸಂಕೇತ. ರಾಮಾಯಣ, ಮಹಾಭಾರತದ  ಭಗವದ್ಗೀತೆ ಎಲ್ಲದರ ಶ್ಲೋಕಗಳನ್ನು ಅರ್ಥೈಸಿಕೊಂಡರೆ ಸಾಲದು. ಅವುಗಳಲ್ಲಿರುವ ಮಹತ್ವವನ್ನು ಜೀವನದಲ್ಲಿ ಅಳವಡಿಸಿಕೊಳ್ಳಬೇಕು ಎಂದು ಹೇಳಿದರು.

ಕೌಟುಂಬಿಕವಾಗಿ ಒಟ್ಟಾಗಿ ಬದುಕುವ ಮನೋಪ್ರವೃತ್ತಿ ಕ್ಷೀಣಿಸುತ್ತಿದೆ . ಭಜನ್, ಭೋಜನ್, ಭಾಷಾ, ಭೂಷಾ, ಭವನ್, ಭ್ರಮಣ್ ಇವೆಲ್ಲವೂ ಸಾಂಘಿಕವಾಗಿ ನಡೆಯಬೇಕು. ಪಾಪ ಕರ್ಮ ಮಾಡಿ, ಪುಣ್ಯದ ಫಲ ಬೇಕು ಎಂದರೆ ಸಾಧ್ಯವಿಲ್ಲ. ಪರಿಸರ ಸಂರಕ್ಷಣೆ , ನಾಗರಿಕ ಶಿಷ್ಟಾಚಾರ ಪಾಲನೆ,  ಪ್ಲಾಸ್ಟಿಕ್‌ಮುಕ್ತ ದೇಶವನ್ನಾಗಿ ಪರಿವರ್ತಿಸಬೇಕಾಗಿದೆ. ಧರ್ಮ ಜಾಗೃತಿ , ಸಂಸ್ಕೃತಿ ರಕ್ಷಣೆ ಮತ್ತು ಸನಾತ ಧರ್ಮದ ಮೌಲ್ಯವನ್ನು ಪರಿಚಯಿಸುವಲ್ಲಿ ಹಿಂದು ಸಂಗಮದ ಪಾತ್ರ ಮಹತ್ತರವಾದದ್ದು ಎಂದರು.

ವೇದಿಕೆಯಲ್ಲಿ ಹಿಂದು ಸಂಗಮ ಆಯೋಜನಾ ಸಮಿತಿಯ ಅಧ್ಯಕ್ಷ ರಾಘವೇಂದ್ರ ಶೇಟ್, ಕೃಷ್ಣಮೂರ್ತಿ, ವಾಸುಕಿ ರಾಘವೇಂದ್ರ, ವಿಶ್ವ ಹಿಂದು ಪರಿಷತ್ ಜಿಲ್ಲಾಧ್ಯಕ್ಷರಾದ ಪ್ರತಿಮಾ ಜೋಗಿ, ಆರಗ ಚಂದ್ರಶೇಖರ್, ಜೀವನ್ ಬಾಂಬೆ, ಗಿರೀಶ್ ಪ್ರಭು , ಮೈತ್ರಿ ಪಾಟೀಲ್, ಸವಿತಾ ವಾಸು, ಬಿ.ಎಚ್.ಲಿಂಗರಾಜ್, ವಕೀಲ ಪ್ರವೀಣ್ , ಸಂತೋಷ್ ಶೇಟ್, ರಾಜೇಂದ್ರ ಪೈ, ಡಾ. ರಾಜ ನಂದಿನಿ ಕಾಗೋಡು ಇತರರಿದ್ದರು.

ಸಾಗರ ಪಟ್ಟಣದ ಪ್ರಮುಖ ಬೀದಿಯಲ್ಲಿ ಹಿಂದು ಸಂಗಮ ಅಂಗವಾಗಿ ಸಂಕೀರ್ತನೆಯೊಂದಿಗೆ ನಡೆದ ಬೃಹತ್ ಶೋಭಾ ಯಾತ್ರೆ ಅತ್ಯಂತ ಯಶಸ್ವಿಯಾಗಿ ನಡೆಯಿತು.

-----------