ಬೇಸಿಗೆ ಸಂದರ್ಭ ರಸ್ತೆಬದಿ ಅಗೆದು ಕೇಬಲ್ ಅಳವಡಿಕೆ ಹಾಗೂ ನೀರಿನ ಪೈಪ್ಲೈನ್ ಕಾಮಗಾರಿ ನಡೆಸಿದ ಪರಿಣಾಮ ರಾಷ್ಟ್ರೀಯ, ರಾಜ್ಯ ಹೆದ್ದಾರಿ ಸೇರಿ ಗ್ರಾಮೀಣ ಭಾಗದ ರಸ್ತೆಗಳಲ್ಲೇ ಮಳೆ ನೀರು ಹರಿಯುತ್ತಿದ್ದು, ವಾಹನ ಸವಾರರ ಸಹಿತ ಪಾದಚಾರಿಗಳು ಸಮಸ್ಯೆ ಎದುರಿಸುವಂತಾಗಿದೆ.
ರಾಷ್ಟ್ರೀಯ ಹೆದ್ದಾರಿ 66 ಸೇರಿ ಕಟಪಾಡಿಯಿಂದ ಶಂಕರಪುರ, ಬಂಟಕಲ್ಲು, ಶಿರ್ವ ಮಾರ್ಗವಾಗಿ ಬೆಳ್ಮಣ್ ಜಂಕ್ಷನ್ ಜೋಡಿಸುವ 21 ಕಿ.ಮೀ ಉದ್ದದ ಮುಖ್ಯ ಹೆದ್ದಾರಿಯಲ್ಲಿ ಪ್ರತಿನಿತ್ಯ ಸಾವಿರಾರು ವಾಹನ ಸವಾರರ ಸಹಿತ ಪಾದಚಾರಿಗಳು ಸಂಕಟ ಅನುಭವಿಸುವಂತಾಗಿದೆ. ನಿತ್ಯ ಸಾವಿರಾರು ವಾಹನಗಳು ಓಡಾಡುವ ಸಂದರ್ಭ ಕೆಸರು ತುಂಬಿದ ಮಳೆ ನೀರು ಮೈಮೇಲೆ ಹಾರುವುದು ಮಾಮೂಲಾಗಿದೆ. ಜೋರಾಗಿ ಮಳೆ ಸುರಿದರೆ ಚರಂಡಿಯಲ್ಲಿ ಹರಿಯಬೇಕಾಗಿದ್ದ ಮಳೆ ನೀರು ರಸ್ತೆಯಲ್ಲೇ ಹರಿಯುವುದರಿಂದ ಸಾಲು ಸಾಲು ಸಮಸ್ಯೆ ಸೃಷ್ಟಿಯಾಗಿವೆೆ. ಕೆಲವೊಂದು ಬಾರಿ ವೇಗವಾಗಿ ಸಂಚರಿಸುವ ವಾಹನ ಸವಾರರು ಮಳೆ ನೀರು ತುಂಬಿದ ರಸ್ತೆ ಹೊಂಡದ ಬಗ್ಗೆ ಅರಿವಿಲ್ಲದೆ ಸಮಸ್ಯೆ ಎದುರಿಸುತ್ತಿದ್ದಾರೆ. ಬೈಕ್ ಸವಾರರು ಬಿದ್ದು ಗಾಯಗೊಂಡ ನಿದರ್ಶನವೂ ಬಹಳಷ್ಟಿದೆ.
