ಮುಂಗಾರು ಮಳೆ ಅಬ್ಬರದಲ್ಲೂ ವಿಜಯಪುರ ಜಿಲ್ಲೆಯಲ್ಲಿ ವಿಧಾನಸಭೆ ಚುನಾವಣೆ ಕಾವು ಇಮ್ಮಡಿಗೊಳ್ಳುತ್ತಿದೆ! ಸದ್ಯ ಎಂಟು ಕ್ಷೇತ್ರಗಳಲ್ಲಿ ನಾಲ್ಕು ಬಿಜೆಪಿ, ಮೂರು ಕಾಂಗ್ರೆಸ್, ಒಂದು ಜೆಡಿಎಸ್ ಹಿಡಿತದಲ್ಲಿವೆ. ನಾಗಠಾಣ ಎಸ್ಸಿ ಮೀಸಲು ಕ್ಷೇತ್ರ ಹಾಗೂ ಸಿಂದಗಿ ಹೊರತುಪಡಿಸಿ ಇನ್ನುಳಿದ 6 ಕ್ಷೇತ್ರಗಳಲ್ಲಿ ‘ಪಾಟೀಲ’ರೇ ಅಧಿಕಾರದಲ್ಲಿದ್ದು, ಮುಂಬರುವ ಚುನಾವಣೆಯಲ್ಲೂ ಅವರೇ ಅಖಾಡಕ್ಕಿಳಿಯುವುದು ಖಚಿತ. ಎದುರಾಳಿ ಯಾರು? ಎಂಬುದೇ ಸದ್ಯದ ಕುತೂಹಲ. ಕಾಂಗ್ರೆಸ್ ‘ಲೀಡರ್ ಬೇಸ್ಡ್’, ಬಿಜೆಪಿ ‘ಕೇಡರ್ ಬೇಸ್ಡ್’ ಪಕ್ಷ. ಕಾಂಗ್ರೆಸ್ ನಾಯಕರು ಯಾವುದೇ ಪಕ್ಷ ಹಾಗೂ ಕ್ಷೇತ್ರದಿಂದ ಸ್ಪರ್ಧಿಸಿದರೂ ಗೆಲ್ಲುವ ಉಮೇದಿನಲ್ಲಿದ್ದಾರೆ. ಬಿಜೆಪಿ ಅಭ್ಯರ್ಥಿಗಳಿಗೆ ಪಕ್ಷವೇ ಗೆಲುವಿನ ಮಾನದಂಡ. 2018ರ ಚುನಾವಣೆಯಲ್ಲಿ 2 ಕ್ಷೇತ್ರ(ನಾಗಠಾಣ, ಸಿಂದಗಿ)ದಲ್ಲಿ ಜಯಗಳಿಸಿ ಮೂರರಲ್ಲಿ ದ್ವಿತೀಯ ಸ್ಥಾನದಲ್ಲಿದ್ದ ಜೆಡಿಎಸ್ನಿಂದ ಈ ಬಾರಿ ಪ್ರಮುಖ ನಾಯಕರು ವಿಮುಖರಾಗಿದ್ದಾರೆ. ಆಮ್ ಆದ್ಮಿ ಸಕ್ರಿಯವಾಗಿದೆ.
