30 ಮಾಜಿ ಕಾರ್ಪೊರೇಟರ್‌ಗಳ ವಿರುದ್ಧ ಪೊಲೀಸರಿಗೆ ದೂರು; ಕಾರಣ ಈ ರಸ್ತೆಗಳಲ್ಲಿದೆ..

ಬೆಂಗಳೂರು: ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆಯ 30 ಮಾಜಿ ಕಾರ್ಪೊರೇಟರ್​ಗಳ ವಿರುದ್ಧ ಪೊಲೀಸರಿಗೆ ದೂರು ನೀಡಲಾಗಿದೆ. ಮಾತ್ರವಲ್ಲದೆ, ಅವರ ವಿರುದ್ಧ ಶೀಘ್ರದಲ್ಲೇ ಅಭಿಯಾನ ನಡೆಯಲಿದ್ದು, ಬಿಬಿಎಂಪಿಗೆ ಮುತ್ತಿಗೆ ಕೂಡ ಹಾಕಲಾಗುವುದು ಎಂಬ ಎಚ್ಚರಿಕೆಯನ್ನು ನೀಡಲಾಗಿದೆ. ಹಾಗೆ ದೂರು ನೀಡಲಿಕ್ಕೆ ಕಾರಣ ಒಂದೆರಡಲ್ಲ, ಅಂಥ ನೂರಾರು ಕಾರಣಗಳು ನಗರದ ರಸ್ತೆಗಳಲ್ಲಿವೆ.

ಅಂದಹಾಗೆ ಈ ದೂರನ್ನು ನೀಡಿರುವುದು ಆಮ್​ ಆದ್ಮಿ ಪಕ್ಷ. ಬೆಂಗಳೂರಿನ ರಸ್ತೆ ಗುಂಡಿಗಳಿಗೆ ಸಂಬಂಧಪಟ್ಟಂತೆ ತಪ್ಪಿತಸ್ಥ ಅಧಿಕಾರಿ ಹಾಗೂ ಜನಪ್ರತಿನಿಧಿಗಳ ವಿರುದ್ಧ ಪೊಲೀಸ್‌ ಠಾಣೆಯಲ್ಲಿ ದೂರು ದಾಖಲಿಸುವ ಆಮ್‌ ಆದ್ಮಿ ಪಾರ್ಟಿಯ ಅಭಿಯಾನವು ಭರದಿಂದ ಸಾಗುತ್ತಿದ್ದು, ಮುಂದಿನ ದಿನಗಳಲ್ಲಿ ಬೃಹತ್‌ ಜನಸ್ತೋಮದೊಂದಿಗೆ ಬಿಬಿಎಂಪಿ ಕಚೇರಿಗೆ ಮುತ್ತಿಗೆ ಹಾಕಿ ಬೀಗ ಜಡಿದು ಪ್ರತಿಭಟನೆ ನಡೆಸಲಾಗುತ್ತದೆ ಎಂದು ಪಕ್ಷದ ಬೆಂಗಳೂರು ಅಧ್ಯಕ್ಷ ಮೋಹನ್‌ ದಾಸರಿ ಹೇಳಿದ್ದಾರೆ.

ನಗರದ ಪ್ರೆಸ್‌ಕ್ಲಬ್‌ನಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಮೋಹನ್‌ ದಾಸರಿ, ರಸ್ತೆ ಗುಂಡಿಗಳ ವಿರುದ್ಧ ಆಮ್‌ ಆದ್ಮಿ ಪಾರ್ಟಿ ನಡೆಸಿದ ಹಲವು ಪ್ರತಿಭಟನೆಗಳು ಹಾಗೂ ರಸ್ತೆ ಗುಂಡಿ ಹಬ್ಬ ಎಂಬ ವಿನೂತನ ಚಳವಳಿಗೆ ಉತ್ತಮ ಜನಮನ್ನಣೆ ದೊರೆತಿದೆ. ಸಾಮಾಜಿಕ ಜಾಲತಾಣಗಳಲ್ಲೂ ಜನಬೆಂಬಲ ವ್ಯಕ್ತವಾಗುತ್ತಿದ್ದು, ಟ್ವಿಟರ್‌ನಲ್ಲಿ ನಮ್ಮ ಅಭಿಯಾನಗಳು ಟ್ರೆಂಡ್​ ಆಗುತ್ತಿವೆ. ವಾಹನ ಸವಾರರ ಜೀವ ತೆಗೆಯುತ್ತಿರುವ ಗುಂಡಿಗಳ ಬಗ್ಗೆ ಜನರು ಪಕ್ಷಕ್ಕೆ ಮಾಹಿತಿ ನೀಡುತ್ತಿದ್ದು, ಪಕ್ಷದ ಕಾರ್ಯಕರ್ತರು ಹಾಗೂ ಮುಖಂಡರು ಗುಂಡಿಗಳಿಗೆ ಕಾರಣರಾದವರ ವಿರುದ್ಧ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಿಸುತ್ತಿದ್ದಾರೆ. 75ಕ್ಕೂ ಹೆಚ್ಚು ಅಪರಾಧ ಪ್ರಕರಣಗಳನ್ನು ಈವರೆಗೆ ದಾಖಲಿಸಲಾಗಿದ್ದು, 30 ಕಾರ್ಪೊರೇಟರ್‌ಗಳನ್ನು ಆರೋಪಿಗಳನ್ನಾಗಿ ಮಾಡಲಾಗಿದೆ ಎಂದು ತಿಳಿಸಿದರು.

ಇದನ್ನೂ ಓದಿ: ‘ನನ್ನ ಹಾಗೂ ಮಗು ಲೈಫ್ ಹಾಳು ಮಾಡಿದ್ದಿ’ ಎಂದು ವಾಟ್ಸ್​​ಆ್ಯಪ್​ ಸ್ಟೇಟಸ್​ ಹಾಕಿ, 6 ತಿಂಗಳ ಮಗು ಜತೆ ನದಿಗೆ ಹಾರಿದ ತಾಯಿ!

ನವೆಂಬರ್‌ 9ರಂದು ಬೆಂಗಳೂರಿನ ಎಲ್ಲ ವಿಧಾನಸಭಾ ಕ್ಷೇತ್ರಗಳಲ್ಲೂ ಗುಂಡಿಗಳಿಗೆ ಸಂಬಂಧಿಸಿ ಮಾಜಿ ಕಾರ್ಪೊರೇಟರ್‌ಗಳ ವಿರುದ್ಧ ದೂರು ದಾಖಲಿಸಲಾಗಿದೆ. ಬಿಬಿಎಂಪಿಯ ಕೊನೆಯ ಅವಧಿಯಲ್ಲಿ ಕಾರ್ಪೊರೇಟರ್‌ ಆಗಿದ್ದವರು ಜನತೆಗೆ ಮೂಲಭೂತ ಸೌಕರ್ಯಗಳನ್ನು ಕಲ್ಪಿಸುವ ನಿಟ್ಟಿನಲ್ಲಿ ಮಹಾ ಮೋಸ ಎಸಗಿ, ವಿಶ್ವಾಸ ದ್ರೋಹ ಮಾಡಿದ್ದಾರೆ. ಮುಂದಿನ ಹತ್ತು ದಿನಗಳಲ್ಲಿ ಬೆಂಗಳೂರು ಗುಂಡಿಮುಕ್ತ ಆಗದಿದ್ದರೆ, ಬೃಹತ್‌ ಜನಸ್ತೋಮದೊಂದಿಗೆ ಬಿಬಿಎಂಪಿ ಕಚೇರಿಗೆ ಮುತ್ತಿಗೆ ಹಾಕಿ ಬೀಗ ಜಡಿದು ಪ್ರತಿಭಟನೆ ನಡೆಸಲಾಗುತ್ತದೆ. ರಾಜ್ಯ ರಾಜಧಾನಿಯ ವರ್ಚಸ್ಸು ಉಳಿಸುವ ನಿಟ್ಟಿನಲ್ಲಿ ರಾಜಿಯಾಗುವ ಪ್ರಶ್ನೆಯೇ ಇಲ್ಲ” ಎಂದು ಮೋಹನ್‌ ದಾಸರಿ ಹೇಳಿದರು.

“ಸರಿಯಾದ ರಸ್ತೆಗಳನ್ನು ಪಡೆಯುವುದು ಜನರ ಹಕ್ಕು. ಅವುಗಳನ್ನು ಪಡೆಯುವುದಕ್ಕಾಗಿ ಜನರು ವಾಹನ ತೆರಿಗೆ, ರಸ್ತೆ ತೆರಿಗೆ, ಆಸ್ತಿ ತೆರಿಗೆ, ಜಿಎಸ್‌ಟಿ ಮುಂತಾದವುಗಳನ್ನು ಕಟ್ಟಿರುತ್ತಾರೆ. ರಸ್ತೆ ದುರಸ್ತಿಗಾಗಿ ರಾಜ್ಯ ಸರ್ಕಾರದ ಬೊಕ್ಕಸದಿಂದ ಸಾವಿರಾರು ಕೋಟಿ ರೂಪಾಯಿ ಖರ್ಚಾಗಿದ್ದರೂ ಗುಂಡಿಗಳು ಕಡಿಮೆಯಾಗಲಿಲ್ಲ. ಕೇವಲ ಒಂದು ತಿಂಗಳೊಳಗೆ ಕಿತ್ತುಹೋಗುವಷ್ಟು ಕಳಪೆ ಕಾಮಗಾರಿ ಮಾಡಲಾಗಿದೆ. ದುಡ್ಡು ಕೊಳ್ಳೆ ಹೊಡೆಯುವುದಕ್ಕಾಗಿ ಕಡಿಮೆ ಗುಣಮಟ್ಟದ ವಸ್ತುಗಳನ್ನು ರಸ್ತೆಗಾಗಿ ಬಳಸಲಾಗಿದೆ” ಎಂದು ಅವರು ಹೇಳಿದರು.

ಒಂದೇ ವರ್ಷದಲ್ಲಿ ಬೆಂಗಳೂರಿನಲ್ಲಿ 7 ಮಂದಿ ರಸ್ತೆಗುಂಡಿಗೆ ಬಲಿಯಾಗಿದ್ದು, ಅದಕ್ಕೆ ಹೊಣೆ ಯಾರು? 20,000 ಕೋಟಿ ರೂ. ಕಳೆದ 5 ವರ್ಷಗಳಲ್ಲಿ ಬೆಂಗಳೂರಿನ ರಸ್ತೆಗಳಿಗೆ ಖರ್ಚು ಮಾಡಲಾಗಿದೆ ಎಂದು ಹೇಳುತ್ತಿದ್ದು, ಅದಕ್ಕೆ ಲೆಕ್ಕ ಕೊಡಬೇಕು, ಆ ಸಂಬಂಧ ತನಿಖೆ ಆಗಬೇಕು ಎಂದು ಆಗ್ರಹಿಸಿದರು.

ಇದನ್ನೂ ಓದಿ: ಶಿಕ್ಷಕನ ಮರ್ಮಾಂಗವನ್ನೇ ಕತ್ತರಿಸಿ ಬರ್ಬರ ಕೊಲೆ; ಭೀಕರ ಹತ್ಯೆಗೆ ಕಾರಣವಿನ್ನೂ ನಿಗೂಢ..

ಒಂದು ಸಾವಿರಕ್ಕೂ ಹೆಚ್ಚು ಬೆಂಗಳೂರಿಗರು ನಮ್ಮ ಸಹಾಯವಾಣಿಗೆ ರಸ್ತೆಗುಂಡಿಗಳ ಚಿತ್ರಗಳನ್ನು ಕಳುಹಿಸಿ ದೂರು ನೀಡಿದ್ದಾರೆ. ನಾವು ಕಾನೂನು ಘಟಕದ ಸಹಕಾರ ನೀಡುತ್ತೇವೆಂದರೂ ಜನರು ಪೋಲಿಸ್​ ಠಾಣೆಯಲ್ಲಿ ದೂರು ನೀಡಲು ಮುಂದಾಗಲಿಲ್ಲ. ಅವರಿಗೆ ಪೋಲೀಸರ ಮೇಲಿನ ಹೆದರಿಕೆ ಇರಬಹುದು, ಸ್ಥಳೀಯ ರಾಜಕಾರಣಿಗಳ ಕೆಂಗಣ್ಣಿಗೆ ಗುರಿ ಆಗಬಹುದೆಂದು ಮುಂದೆ ಬರಲಿಲ್ಲ ಅನಿಸುತ್ತದೆ. ನಮ್ಮ ವಾರ್ಡ್​ ಮಟ್ಟದ ನಾಯಕರುಗಳು ಪೋಲಿಸ ಠಾಣೆಗೆ ಹೋಗಿ ಸ್ಥಳೀಯ ಬಿಬಿಎಂಪಿ ಸದಸ್ಯರುಗಳ ಮತ್ತು ಸಂಬಂದಪಟ್ಟ ಅಧಿಕಾರಿಗಳ ವಿರುದ್ದ ದೂರು ನೀಡಿದ್ದಾರೆ, ಇದು ಸಾಮಾನ್ಯ ವಿಷಯವಲ್ಲ. ಅಧಿಕಾರವಿಲ್ಲದೆ ಇಷ್ಟು ಕೆಲಸ ಮಾಡಬಹುದೆಂದರೆ, ಒಂದು ಅವಕಾಶ ಕೊಟ್ಟು ಗೆಲ್ಲಿಸಿದರೆ, ಒಂದೇ ಒಂದು ದಿನ ರಸ್ತೆಗುಂಡಿಗಳಿಲ್ಲದ ಉತ್ತಮ ರಸ್ತೆಗಳನ್ನ ಮಾಡಿ ತೋರಿಸುತ್ತೇವೆ ಎಂದು ಆಪ್​ನ ರಾಜ್ಯ ಮಾಧ್ಯಮ ಸಂಚಾಲಕ ವಿ. ಜಗದೀಶ್​ ಹೇಳಿದರು.

ಇದನ್ನೂ ಓದಿ: ಚಲಿಸುತ್ತಿದ್ದ ರೈಲಿನಿಂದ ಬಿದ್ದಾಕೆ ಸ್ವಲ್ಪದರಲ್ಲೇ ಬಚಾವ್​; ‘ತ್ರಿಮೂರ್ತಿ’ಗಳಂತೆ ಧಾವಿಸಿ ರಕ್ಷಿಸಿದ ರೈಲ್ವೆ ಪೊಲೀಸರು

ಬೆಂಗಳೂರು ನಗರ ಉಪಾಧ್ಯಕ್ಷ ಬಿ.ಟಿ. ನಾಗಣ್ಣ ಮಾತನಾಡಿ, ಗುಂಡಿಗಳಿಂದ ವಾಹನಗಳು ಹಾಳಾಗುತ್ತಿರುವುದು ಹಾಗೂ ಸಂಚಾರಕ್ಕೆ ಅಡ್ಡಿಯಾಗುತ್ತಿರುವುದಷ್ಟೇ ಅಲ್ಲದೆ, ಅನೇಕ ವಾಹನ ಸವಾರರು ಕೈಕಾಲು ಮುರಿದುಕೊಂಡಿದ್ದಾರೆ. ಕಳೆದ ಒಂದು ವರ್ಷದಲ್ಲಿ ಸುಮಾರು 7 ಮಂದಿ ಜೀವ ಕಳೆದುಕೊಂಡಿದ್ದಾರೆ. ಗುಂಡಿಗಳು ಬೆಂಗಳೂರಿಗರ ಜೀವಕ್ಕೆ ಸಂಚಕಾರ ತರುತ್ತಿದ್ದರೂ ಗಂಭೀರವಾಗಿ ಪರಿಗಣಿಸದ ಸರ್ಕಾರ ಹಾಗೂ ಪಾಲಿಕೆಗೆ ನಾಚಿಕೆಯಾಗಬೇಕು” ಎಂದು ಆಕ್ರೋಶ ವ್ಯಕ್ತಪಡಿಸಿದರು. ಸುದ್ದಿಗೋಷ್ಠಿಯಲ್ಲಿ ಪಕ್ಷದ ಮುಖಂಡರುಗಳಾದ ಜಗದೀಶ್ ಚಂದ್ರ, ಗೋಪಿನಾಥ್, ಸುಹಾಸಿನಿ, ಅಶೋಕ್ ಮೃತ್ಯುಂಜಯ ಮುಂತಾದವರು ಭಾಗವಹಿಸಿದ್ದರು.

ಆರೋಪಕ್ಕೆ ಒಳಗಾಗಿರುವ ಪಾಲಿಕೆಯ ಮಾಜಿ ಸದಸ್ಯರು

• ಶ್ಯಾಮಲಾ ಕುಮಾರ್‌ - ವಿದ್ಯಾಪೀಠ ವಾರ್ಡ್‌
• ಕೋದಂಡ ರೆಡ್ಡಿ – ಬಾಣಸವಾಡಿ ವಾರ್ಡ್‌
• ಸೈಯದ್‌ ಸಜಿದಾ ನಸೀರುಲ್ಲಾ – ಮನೇಶ್ವರ ನಗರ ವಾರ್ಡ್‌
• ಚಂದ್ರಪ್ಪ ರೆಡ್ಡಿ – ಕೋನೆನ ಅಗ್ರಹಾರ ವಾರ್ಡ್‌
• ನೌಶೀರ್‌ ಅಹ್ಮದ್‌ - ಕೆಜಿ ಹಳ್ಳಿ ವಾರ್ಡ್‌
• ಭಾಗ್ಯಲಕ್ಷ್ಮಿ ಮುರಳಿ – ಅರಕೆರೆ ವಾರ್ಡ್‌
• ನಜೀಮಾ ಅಯೂಬ್‌ ಖಾನ್‌ - ಕೆಆರ್ ಮಾರ್ಕೆಟ್‌ ವಾರ್ಡ್‌
• ಕೋಕಿಲಾ ಚಂದ್ರಶೇಖರ್‌ - ಚಾಮರಾಜಪೇಟೆ ವಾರ್ಡ್‌
• ಸುಜಾತ ರಮೇಶ್‌ - ಆಜಾದ್‌ ನಗರ ವಾರ್ಡ್‌
• ಇಮ್ರಾನ್‌ ಪಾಷಾ – ಪಾದರಾಯನಪುರ ವಾರ್ಡ್‌
• ರಾಧಮ್ಮ ವೆಂಕಟೇಶ್‌ - ಹೊರಮಾವು ವಾರ್ಡ್‌
• ಶಶಿರೇಖ ಮುಕುಂದ್‌ - ಸರ್ವಜ್ಞನಗರ ವಾರ್ಡ್‌
• ಉಮ್ಮೆ ಸಲ್ಮಾ – ಕುಶಾಲ್‌ ನಗರ ವಾರ್ಡ್‌
• ರಮೇಶ್‌ - ಸುಂಕೇನಹಳ್ಳಿ ವಾರ್ಡ್‌
• ನೇತ್ರ ಪಲ್ಲವಿ – ಅತ್ತೂರು ವಾರ್ಡ್‌
• ಸತೀಶ್‌ - ಯಲಹಂಕ ಸೆಟ್‌ಲೈಟ್‌ ಟೌನ್‌ ವಾರ್ಡ್‌
• ಪದ್ಮರಾಜ್‌ - ಬಸವೇಶ್ವರನಗರ ವಾರ್ಡ್‌
• ಕೃಷ್ಣಮೂರ್ತಿ – ಮಂಜುನಾಥ ನಗರ ವಾರ್ಡ್‌
• ಝಾಕೀರ್‌ - ಪುಲಕೇಶಿನಗರ ವಾರ್ಡ್‌
• ಲೀಲಾ ಶಿವಕುಮಾರ್‌ - ಚಿಕ್ಕಪೇಟೆ ವಾರ್ಡ್‌
• ಶಾರದಾ ಮುನಿರಾಜ – ಉಳ್ಳಾಲ ವಾರ್ಡ್
• ಸತ್ಯನಾರಾಯಣ – ಕೆಂಗೇರಿ ವಾರ್ಡ್‌
• ಆರ್ಯ ಶ್ರೀನಿವಾಸ್‌ - ಹೆಮ್ಮಿಗೆಪುರ ವಾರ್ಡ್‌
• ಗುರುಮೂರ್ತಿ ರೆಡ್ಡಿ – ಅಗರ ವಾರ್ಡ್‌
• ಶಕೀಲ್‌ ಅಹ್ಮದ್‌ - ಭಾರತಿ ನಗರ ವಾರ್ಡ್‌
• ಮಂಜುನಾಥ್‌ - ಸುಬ್ರಹ್ಮಣ್ಯಪುರ ವಾರ್ಡ್‌
• ದಿ. ಫಾರಿದಾ ಇಶ್ತಿಯಾಕ್‌ - ಶಿವಾಜಿನಗರ ವಾರ್ಡ್‌
• ಪದ್ಮಾವತಿ ಅಮರನಾಥ್‌ - ಚೌಡೇಶ್ವರಿ ವಾರ್ಡ್‌
• ಮೋಹನ್‌ ಕುಮಾರ್‌ - ಕೊಟ್ಟಿಗೆಪಾಳ್ಯ ವಾರ್ಡ್‌
• ತೇಜಸ್ವಿನಿ – ಜ್ಞಾನಭಾರತಿ ವಾರ್ಡ್
  
  

https://www.vijayavani.net/actress-rachitha-ram-marriage-kannada-movie/

https://www.vijayavani.net/people-celebrated-shankar-nags-birthday-today/