ತುಂಬಿದ ಅಣೆಕಟ್ಟು, ಕೃಷಿಕರಿಗೆ ಬಿಕ್ಕಟ್ಟು :ನಿರ್ವಹಣೆಯಲ್ಲಿ ಅಧಿಕಾರಿಗಳ ನಿರ್ಲಕ್ಷ್ಯ : ಪ್ರಯೋಜನವಿಲ್ಲದ ಇಂದಬೆಟ್ಟು ಸೇತುವೆ

ವಿಜಯವಾಣಿ ಸುದ್ದಿಜಾಲ ಬೆಳ್ತಂಗಡಿ

ಇಂದಬೆಟ್ಟು ಹಾಗೂ ಕಡೀರುದ್ಯಾವರ ಸಂಪರ್ಕಕ್ಕಾಗಿ ಸುಮಾರು 5.80 ಕೋಟಿ ರೂ. ಮೊತ್ತ ವೆಚ್ಚದಲ್ಲಿ ಸೇತುವೆ, ಅಣೆಕಟ್ಟು ನಿರ್ಮಾಣವಾಗಿದ್ದರೂ ಪ್ರಯೋಜನವಿಲ್ಲದಾಗಿದೆ.

ಜೋರಾಗಿ ಮಳೆ ಸುರಿದ ಸಂದರ್ಭ ಇಂದಬೆಟ್ಟು ಹಾಗೂ ಕಡೀರುದ್ಯಾವರ ಭಾಗದಲ್ಲಿ ನೆರೆ ಉಂಟಾಗುತ್ತಿದ್ದು, ಸ್ಥಳೀಯ ಮನೆಗಳೆಲ್ಲವೂ ಮುಳುಗಡೆಯಾಗುತ್ತಿದ್ದವು. ತೆಪ್ಪದ ಮೂಲಕ ಜನರು ಸಂಚಾರ ನಡೆಸುತ್ತಿದ್ದು, ಈ ಸಂಕಷ್ಟ ಮನಗಂಡಿದ್ದ ಅಂದಿನ ಶಾಸಕ ವಸಂತ ಬಂಗೇರ ಅವರು ಸೇತುವೆ ನಿರ್ಮಾಣಕ್ಕೆ ಅನುದಾನ ಮಂಜೂರುಗೊಳಿಸಿದ್ದರು. ಸೂಕ್ತ ನಿರ್ವಹಣೆಯಲ್ಲದಿರುವುದರಿಂದ ಸೇತುವೆ ಹಾಗೂ ಅಣೆಕಟ್ಟು ನಿರ್ಮಿಸಿದ್ದರೂ ಸ್ಥಳೀಯ ತೋಟಗಳಿಗೆ ಈಗಲೂ ನೆರೆ ನೀರು ನುಗ್ಗುತ್ತಿದೆ ಎಂದು ಸ್ಥಳೀಯರು ಬೇಸರ ಹೊರಹಾಕಿದ್ದಾರೆ.

ಸೂಕ್ತ ರಸ್ತೆಯೂ ಇಲ್ಲ: ಸೇತುವೆಯ ಇನ್ನೊಂದು ಕೊನೆಯಲ್ಲಿ ಕೇವಲ ಕಾಲುದಾರಿಯಷ್ಟೇ ಇದ್ದು, ಇದೇ ಕಾಲುದಾರಿಯಲ್ಲಿ ವಿದ್ಯಾರ್ಥಿಗಳು, ಸಾರ್ವಜನಿಕರು ನಿತ್ಯವೂ ಸಾಹಸದಿಂದ ಸಂಚರಿಸಬೇಕಾದ ಸಂಕಷ್ಟದ ಪರಿಸ್ಥಿತಿ ಇದೆ.

ಅಸಮರ್ಪಕ ಅಣೆಕಟ್ಟು ನಿರ್ವಹಣೆ: ಸತತ ಬೇಡಿಕೆ ಬಳಿಕ ಅಂತೂ ಇಂತೂ ಸೇತುವೆ ಹಾಗೂ ಅಣೆಕಟ್ಟು ನಿರ್ಮಾಣವಾದರೂ ಅದರ ಅಸಮರ್ಪಕ ನಿರ್ವಹಣೆಯಿಂದ ಸ್ಥಳೀಯ ಕೃಷಿಕರ ಗೋಳು ಮುಂದುವರಿದಿದೆ. ಭಾರಿ ಮಳೆಯಾದ ಸಂದರ್ಭ ಅಣೆಕಟ್ಟಿನಲ್ಲಿ ನೀರು ತುಂಬುತ್ತಿದ್ದು, ಅದರ ತೆರವು ಕಾರ್ಯಕ್ಕೆ ಯಾವ ಇಲಾಖೆಯೂ ಮುಂದಾಗುತ್ತಿಲ್ಲ. ಸಂಬಂಧಿಸಿದ ಇಲಾಖೆಯ ಇಂಜಿನಿಯರ್‌ಗೆ ಸಾರ್ವಜನಿಕರು ಕರೆ ಮಾಡಿ ಮನವರಿಕೆ ಮಾಡಲು ಯತ್ನಿಸಿದರೂ ಪೂರಕ ಸ್ಪಂದನೆ ದೊರೆಯುವುದಿಲ್ಲ ಎಂದು ಸಾರ್ವಜನಿಕರು ಆರೋಪಿಸಿದ್ದಾರೆ.

• ಇನ್ನೊಂದು ಬದಿಯಿರುವ ಕಿರುಮಾರ್ಗದಲ್ಲಿ ಸಂಚಾರವೇ ಕಷ್ಟ
• ಹೆಚ್ಚುವರಿ ನೀರು ಹೊರಬಿಡದಿರುವುದರಿಂದ ಕೃಷಿಕರಿಗೆ ಸಂಕಷ್ಟ
• ಸಾರ್ವಜನಿಕರ ದೂರಿಗೆ ಸಿಗದ ಪೂರಕ ಸ್ಪಂದನೆ

https://www.vijayavani.net/kedambadi-congress-public-awareness-meeting

https://www.vijayavani.net/kesardonji-dina-3