ವರದಕ್ಷಿಣೆ ಕಿರುಕುಳದಿಂದ ಮಹಿಳೆ ಸಾವು

ತನ್ನ ಪುತ್ರಿ ಜಯಲಕ್ಷ್ಮೀ(25)ಯನ್ನು ಆಕೆಯ ಪತಿ ಮತ್ತು ಕುಟುಂಬಸ್ಥರು ಕೊಲೆ ಮಾಡಿದ್ದಾರೆ ಎಂದು ಶ್ರೀರಂಗಣಪಟ್ಟಣ ತಾಲೂಕು ಹುಲಿಕೆರೆ ಗ್ರಾಮದ ನಿವಾಸಿ ಮಮತಾ ನೀಡಿದ ದೂರಿನ ಮೇಲೆ ತಾಲೂಕಿನ ಬೋರೆ ಆನಂದೂರು ಗ್ರಾಮದ ನಿವಾಸಿ ಬೈರೇಗೌಡ, ಆತನ ತಂದೆ ಬಸವೇಗೌಡ, ತಾಯಿ ರತ್ನಮ್ಮ, ಸಹೋದರ ಗಣೇಶ್, ಸಹೋದರನ ಪತ್ನಿ ರಂಜಿತಾ ವಿರುದ್ಧ ಪ್ರಕರಣ ದಾಖಲಾಗಿದೆ.

‘ನನ್ನ ಮಗಳು ಜಯಲಕ್ಷ್ಮೀಯನ್ನು ಐದು ವರ್ಷದ ಹಿಂದೆ ಬೈರೇಗೌಡ ಜತೆ ಮದುವೆ ಮಾಡಿಕೊಟ್ಟಿದ್ದವು. ಅವರಿಗೆ ಇಬ್ಬರು ಗಂಡು ಮಕ್ಕಳಿದ್ದು, ಬೋರೆ ಆನಂದೂರು ಗ್ರಾಮದಲ್ಲಿನ ಗಂಡನ ಮನೆಯಲ್ಲಿ ನನ್ನ ಮಗಳು ವಾಸವಿದ್ದಳು. ಬೈರೇಗೌಡ ಮತ್ತು ಕುಟುಂಬಸ್ಥರು ಆಗ್ಗಾಗೆ ಜಗಳ ತೆಗೆದು, ನಿಮ್ಮ ಅಪ್ಪನ ಮನೆಯಿಂದ ಹಣವನ್ನು ತೆಗೆದುಕೊಂಡು ಬಾ ಎಂದು ಮಗಳಿಗೆ ಕಿರುಕುಳ ಕೊಡುತ್ತಿದ್ದರು. ಇವರ ಒತ್ತಡ ತಡೆಯಲಾರದೆ ನಾವು 8 ಲಕ್ಷ ರೂ.ಗಳನ್ನು ನನ್ನ ಅಳಿಯನಿಗೆ ಕೊಟ್ಟಿದ್ದವು. ಆದರೂ ಅವರಿಗೆ ಸಮಧಾನವಾಗದೇ ಇನ್ನೂ ಹೆಚ್ಚಿನ ಹಣ ತರುವಂತೆ ಪಿಡಿಸುತ್ತಿದ್ದರು. ಬುಧವಾರ ಸಂಜೆ 6.45 ಸುಮಾರಿನಲ್ಲಿ ನನ್ನ ಮಗಳಿಗೆ ಹೊಡೆದು ಅವರ ಮನೆಯಲ್ಲಿ ನೇಣುಹಾಕಿ ಕೊಲೆ ಮಾಡಿದ್ದಾರೆ. ನಂತರ ಅವರೆ ಯಾವುದೋ ವಾಹನದಲ್ಲಿ ಮೈಸೂರಿನ ಕೆ.ಆರ್.ಆಸ್ಪತ್ರೆಗೆ ಕರೆದುಕೊಂಡು ಹೋಗಿದ್ದಾರೆ. ರಾತ್ರಿ ಸುಮಾರು 9.45 ರ ಸಮಯದಲ್ಲಿ ನನ್ನ ಮಗಳು ಮೃತಪಟ್ಟಿರುವುದಾಗಿ ವೈದ್ಯರು ತಿಳಿಸಿದ್ದಾರೆ’ ಎಂದು ದೂರಿನಲ್ಲಿ ತಿಳಿಸಿದ್ದಾರೆ.