ಮೈವಿವಿ ಉಪನ್ಯಾಸಕರ ನೇಮಕ ಯಾವಾಗ?

ವಿವಿಧ ಇಲಾಖೆಗಳಲ್ಲಿ ಖಾಲಿ ಇರುವ ಹುದ್ದೆಗಳ ಭರ್ತಿಗೆ ವೇಳಾಪಟ್ಟಿ ಸಿದ್ಧಪಡಿಸಿಕೊಂಡು ನೇಮಕಾತಿ ಪ್ರಕ್ರಿಯೆ ಆರಂಭಿಸಲಾಗುತ್ತಿದೆ. ಆದರೆ, ಮೈಸೂರು ವಿಶ್ವವಿದ್ಯಾಲಯಯಲ್ಲಿ ನನೆಗುದಿಗೆ ಬಿದ್ದಿರುವ ಉಪನ್ಯಾಸಕರ ನೇಮಕಾತಿಗೆ ಅನುಮೋದನೆ ನೀಡಲು ಸರ್ಕಾರ ಸತಾಯಿಸುತ್ತಿದೆ!

ವಿವಿಧ ಇಲಾಖೆಗಳಲ್ಲಿ ಮುಂದಿನ ದಿನಗಳಲ್ಲಿ ಹುದ್ದೆಗಳ ಭರ್ತಿ ಪರ್ವವೇ ಆರಂಭವಾಗಲಿದ್ದು, ಇಂತಹ ಶುಕ್ರದೆಸೆ ಶತಮಾನೋತ್ಸವದ ಹಿನ್ನೆಲೆಯ ಮೈವಿವಿಗೆ ದೊರೆಯುತ್ತಿಲ್ಲ. ಇದುವೇ ವಿವಿಯನ್ನು ಇನ್ನಷ್ಟು ಸಂಕಷ್ಟಕ್ಕೆ ಸಿಲುಕಿಸಿದೆ.

ವಿವಿಧ ಇಲಾಖೆಗಳಲ್ಲಿ ಖಾಲಿ ಇರುವ ಅಂದಾಜು 52 ಸಾವಿರ ಹುದ್ದೆಗಳ ಭರ್ತಿಯನ್ನು ತ್ವರಿತವಾಗಿ ಮಾಡಲಾಗುವುದು ಎಂದು ಈಗಾಗಲೇ ರಾಜ್ಯ ಸರ್ಕಾರ ಭರವಸೆ ನೀಡಿದೆ.

ಇದಕ್ಕೆ ಪೂರಕವಾಗಿ ಕರ್ನಾಟಕ ಲೋಕಸೇವಾ ಆಯೋಗ (ಕೆಪಿಎಸ್‌ಸಿ) ಮತ್ತು ಕರ್ನಾಟಕ ಪರೀಕ್ಷಾ ಪ್ರಾಧಿಕಾರ (ಕೆಇಎ) ಕಾರ್ಯೋನ್ಮುಖವಾಗಿದೆ. ವಿವಿಧ ಇಲಾಖೆಗಳಿಂದ ಈಗಾಗಲೇ ಬಂದಿರುವ ಪ್ರಸ್ತಾವಗಳನ್ನು ಒಟ್ಟು ಮಾಡಿ ಅಧಿಸೂಚನೆ ಹೊರಡಿಸುವ, ಸ್ಪರ್ಧಾತ್ಮಕ ಪರೀಕ್ಷೆ ನಡೆಸುವ ಮತ್ತು ಫಲಿತಾಂಶ ಪ್ರಕಟಿಸುವ ತಾತ್ಕಾಲಿಕ ದಿನ ನಿಗದಿ ಪಡಿಸಿ ವೇಳಾಪಟ್ಟಿಯನ್ನು ಪ್ರಕಟಿಸಲು ತಯಾರಿ ಮಾಡಿಕೊಳ್ಳುತ್ತಿದೆ.

ಆದರೆ, ಇದಕ್ಕೆಲ್ಲ ಅನುಮತಿ ಕೊಡುವ ರಾಜ್ಯ ಸರ್ಕಾರವು ಮೈವಿವಿಯತ್ತ ಮಾತ್ರ ಗಮನ ಹರಿಸುತ್ತಿಲ್ಲ. ಇದರಿಂದ ದಶಕದ ಸಮಸ್ಯೆಗೂ ಮುಕ್ತಿ ದೊರೆಯುತ್ತಿಲ್ಲ.

1916ರಲ್ಲಿ ಸ್ಥಾಪನೆಯಾದ ಮೈವಿವಿ ದೇಶದ 6ನೇ ಮತ್ತು ರಾಜ್ಯದಲ್ಲಿ ಸ್ಥಾಪನೆಗೊಂಡ ಮೊದಲ ವಿಶ್ವವಿದ್ಯಾಲಯ. ದೂರದೃಷ್ಟಿಯುಳ್ಳ ಮಹಾರಾಜ ನಾಲ್ವಡಿ ಕೃಷ್ಣರಾಜ ಒಡೆಯರ್, ದಿವಾನ ಸರ್ ಎಂ.ವಿಶ್ವೇಶ್ವರಯ್ಯ ಅವರ ಪ್ರಯತ್ನದ ಫಲ ಇದು. ಆದರೀಗ ಬೋಧಕರ ಅಭಾವದಿಂದ ಕಳೆಗುಂದಿದೆ.

110 ವರ್ಷಗಳ ಇತಿಹಾಸ ಇರುವ ಮೈವಿವಿಗೆ 570 ಬೋಧಕರ ಹುದ್ದೆಗಳು ಮಂಜೂರಾಗಿವೆ. ಈ ಪೈಕಿ 402 ಬೋಧಕರ ಹುದ್ದೆಗಳು ಖಾಲಿ ಇವೆ. ಸದ್ಯಕ್ಕೆ 169 ಪ್ರಾಧ್ಯಾಪಕರು ಮಾತ್ರ ಕಾರ್ಯನಿರ್ವಹಿಸುತ್ತಿದ್ದಾರೆ. ಇವರೆಲ್ಲರೂ 50 ವರ್ಷ ದಾಟಿದವರು. ಬಹಳಷ್ಟು ಬೋಧಕರು ನಿವೃತ್ತಿಯ ಅಂಚಿಗೆ ಬಂದವರೇ. ಹೀಗೆ ಪ್ರತಿ ತಿಂಗಳು ಒಬ್ಬರು ನಿವೃತ್ತಿಯಾಗುತ್ತಿದ್ದಾರೆ. ಅಲ್ಲಿಗೆ ಭರ್ತಿಯಾಗುತ್ತಿಲ್ಲ.

ಕುಲಪತಿಯಾಗಿದ್ದ ಪ್ರೊ.ಜೆ.ಶಶಿಧರ ಪ್ರಸಾದ್(2003- 2007) ಅವಧಿಯಲ್ಲೇ ಬೋಧಕರ ಹುದ್ದೆಗಳು ಕೊನೆಯ ಸಲ ನೇಮಕಾತಿ ನಡೆಯಿತು. 2007ರಿಂದ ಈ ವರೆಗೆ ಹುದ್ದೆಗಳ ನೇಮಕಾತಿ ಪ್ರಕ್ರಿಯೆಯಾಗಿಲ್ಲ. ಇದು ಆಡಳಿತ ವ್ಯವಸ್ಥೆ ನಿರ್ಲಕ್ಷೃಕ್ಕೆ ಕನ್ನಡಿಯೇ ಸರಿ.

ನೇಮಕಾತಿ ಮಾಡಿಕೊಳ್ಳಲಾಗದೆ 3 ಕುಲಪತಿಗಳು ನಿವೃತ್ತಿಯಾಗಿದ್ದಾರೆ. ಇನ್ನೂ ಒಬ್ಬರಿಗೂ ಇದೇ ರೀತಿಯ ಕಹಿ ಅನುಭವವಾಗುವ ಸಾಧ್ಯತೆ ಇದೆ. ಪ್ರೊ.ವಿ.ಜಿ.ತಳವಾರ್, ಪ್ರೊ.ಕೆ.ಎಸ್.ರಂಗಪ್ಪ, ಪ್ರೊ.ಜಿ.ಹೇಮಂತ್ ಕುಮಾರ್ ಅವರು ಪ್ರಾಧ್ಯಾಪಕರ ನೇಮಕಾತಿ ಮಾಡಿಕೊಳ್ಳಲು ಅವಕಾಶವೇ ಸಿಗಲಿಲ್ಲ.

ಪ್ರಸಕ್ತ ಕುಲಪತಿ ಪ್ರೊ.ಎನ್.ಕೆ.ಲೋಕನಾಥ್ ಅವರಿಗೂ ಈ ಸೌಲಭ್ಯ ದೊರೆಯುತ್ತಿಲ್ಲ. ಅವರೂ ಹೊಸ ಬೋಧಕರ ಆಗಮನವನ್ನು ನೋಡದೆ ನಿವೃತ್ತಿಯಾಗಬಹುದು. ಪ್ರತಿ 3 ತಿಂಗಳಿಗೊಮ್ಮೆ ನೇಮಕಾತಿ ಕುರಿತು ಪ್ರಸ್ತಾವನೆಯನ್ನು ರಾಜ್ಯ ಸರ್ಕಾರಕ್ಕೆ ಸಲ್ಲಿಸಿ ಸಾಕಾಗಿ ಹೋಗಿದೆ. ಎಷ್ಟೇ ಪ್ರಯತ್ನ ಮಾಡಿದರೂ ರಾಜ್ಯ ಸರ್ಕಾರದ ಅನುಮೋದನೆ ಹಸಿರು ನಿಶಾನೆ ಮಾತ್ರ ನೀಡುತ್ತಿಲ್ಲ. ಇದಕ್ಕೆ ಕಾರಣ ಏನು ಎಂಬ ಪ್ರಶ್ನೆಗೂ ಉತ್ತರ ಸಿಕ್ಕಿಲ್ಲ.

ಬೋಧಕರ ಅಭಾವದಿಂದ ವಿವಿ ನಲುಗಿದೆ. ಬೋಧನೆ, ಸಂಶೋಧನೆ, ವಿದ್ಯಾರ್ಥಿಗಳ ಸಾಧನೆ ಸೇರಿದಂತೆ ವಿವಿ ಒಟ್ಟಾರೆ ಗುಣಮಟ್ಟದ ಮೇಲೆ ನೇರವಾಗಿ ಪ್ರತಿಕೂಲ ಪರಿಣಾಮ ಬೀರಿದೆ. ಆದ್ದರಿಂದ ಖಾಲಿ ಇರುವ ಬೋಧಕ ಹುದ್ದೆಗಳನ್ನು ಶೀಘ್ರ ಭರ್ತಿ ಮಾಡಬೇಕು.ಇಲ್ಲವಾದರೆ ವಿವಿ ಪೂರ್ಣವಾಗಿ ಖಾಲಿಯಾಗಿ ಅತಿಥಿ ಉಪನ್ಯಾಸಕರಿಂದಲೇ ನಡೆಯುವ ದುಸ್ಥಿತಿ ಎದುರಿಸಲಿದೆ.

ವಿವಿಯಲ್ಲಿ ಪ್ರಾಧ್ಯಾಪಕರ ಕೊರತೆಯಿಂದ ಹಲವಾರು ಶೈಕ್ಷಣಿಕ, ಆಡಳಿತಾತ್ಮಕ ಸಮಸ್ಯೆ ಉಂಟಾಗಿವೆ. ಶಿಕ್ಷಣದ ಗುಣಮಟ್ಟ ಕುಸಿತವಾಗಿ ವಿದ್ಯಾರ್ಥಿಗಳಿಗೆ ಸಮರ್ಪಕ ಮಾರ್ಗದರ್ಶನವೂ ದೊರೆಯುವುದಿಲ್ಲ.

ಪಠ್ಯಕ್ರಮವನ್ನು ಪರಿಣಾಮಕಾರಿಯಾಗಿ ಬೋಧಿಸಲಾಗುತ್ತಿಲ್ಲ. ವಿದ್ಯಾರ್ಥಿ-ಬೋಧಕ ನಡುವಿನ ಅನುಪಾತ ಹೆಚ್ಚಳವಾಗಿದ್ದು, ಉತ್ತರಪತ್ರಿಕೆಗಳ ಮೌಲ್ಯಮಾಪನ, ಫಲಿತಾಂಶದ ಮೇಲೂ ಪೆಟ್ಟುಕೊಟ್ಟಿದೆ.

ಈ ಸಮಸ್ಯೆಯಿಂದಾಗಿ ಪಿಎಚ್.ಡಿ ವಿದ್ಯಾರ್ಥಿಗಳಿಗೆ ಮಾರ್ಗದರ್ಶಕರ ಕೊರತೆ ತೀವ್ರವಾಗಿ ಕಾಡುತ್ತಿದ್ದು, ಇದರಿಂದ ಸಂಶೋಧನೆ, ಸಂಶೋಧನಾ ಪ್ರಬಂಧಗಳ ಸಂಖ್ಯೆಯೂ ತಗ್ಗಿದೆ.

ಸಂಶೋಧನಾ ವಿದ್ಯಾರ್ಥಿಗಳ ಸಂಖ್ಯೆ ಹೆಚ್ಚಾಗಿದ್ದರೆ ಮಾರ್ಗದರ್ಶಕರ ಸಂಖ್ಯೆ ಕುಸಿದಿದೆ. ಒಬ್ಬ ಪ್ರಾಧ್ಯಾಪಕರಿಗೆ ಹೆಚ್ಚುವರಿ ವಿದ್ಯಾರ್ಥಿಗಳು ಇರುವುದರಿಂದ ವೈಯಕ್ತಿಕ ಗಮನ ನೀಡಲಾಗುತ್ತಿಲ್ಲ. ಇನ್ನೊಂದೆಡೆ, ಪಿಎಚ್‌ಡಿಗಾಗಿ ನೋಂದಣಿ ಮಾಡಿಸಿಕೊಂಡು ವಿದ್ಯಾರ್ಥಿಗಳು ಸಹ ವರ್ಷಗಟ್ಟಲೆ ಕಾಯಬೇಕಾದ ದುಸ್ಥಿತಿ ಎದುರಾಗಿದೆ.

ಕಾಯಂ ಉಪನ್ಯಾಸಕರ ಕೊರತೆಯಿಂದ ಮೈಸೂರು ವಿವಿ ಖಾಲಿಯಾಗುವ ಹಂತಕ್ಕೆ ಬಂದಿದ್ದು, ಬರೋಬ್ಬರಿ ಶೇ.70ರಷ್ಟು ಅತಿಥಿ ಉಪನ್ಯಾಸಕರನ್ನೇ ಅವಲಂಬಿಸಬೇಕಾಗಿದೆ. ಅವರಿಂದಲೇ ವಿವಿ ಸಹ ನಡೆಯುತ್ತಿದೆ ಎಂಬುದು ವಾಸ್ತವ. ಆದರೆ, ಕಾಯಂ ಬೋಧಕರಂತೆ ಇವರಿಂದ ಕೆಲಸ ನಿರೀಕ್ಷಿಸಲಾಗುವುದಿಲ್ಲ. ವಿದ್ಯಾರ್ಥಿಗಳಿಗೂ ನ್ಯಾಯ ಕಲ್ಪಿಸಿಕೊಡಲಾಗುತ್ತಿಲ್ಲ. ವಿವಿ ಸಹ ತನ್ನ ಆಂತರಿಕ ಸಂಪನ್ಮೂಲದಿಂದಲೇ ಇವರಿಗೆ ಸಂಬಳ ಕೊಡಬೇಕಿರುವುದು ಬಿಸಿತುಪ್ಪವಾಗಿದೆ.

ಬೋಧಕರೊಂದಿಗೆ ಬೋಧಕೇತರ ಸಿಬ್ಬಂದಿ ಅಭಾವವೂ ಸಹ ಇದೆ. ಹೀಗಾಗಿ, ತಾತ್ಕಾಲಿಕ ಸಿಬ್ಬಂದಿಗೆ ಮೊರೆ ಹೋಗಲಾಗಿದೆ. ಆದರೆ, ಅದರ ಸಂಖ್ಯೆಯನ್ನು ಮಿತಿಗೊಳಿಸಿಲ್ಲ. ಕ್ರಮಬದ್ಧವನ್ನೂ ಮಾಡಲಿಲ್ಲ. ಯಥೇಚ್ಛವಾಗಿ ಅರೆಕಾಲಿಕ ಸಿಬ್ಬಂದಿ ಭರ್ತಿಯಾಗಿದ್ದು, ಇದರಿಂದ 1,136 ತಾತ್ಕಾಲಿಕ ಸಿಬ್ಬಂದಿ ಇದ್ದಾರೆ. ಇದರಲ್ಲಿ ಅರ್ಧದಷ್ಟು ಅನಗತ್ಯ ಸಿಬ್ಬಂದಿ. ಇದು ಸಹ ವಿವಿಗೆ ಹೆಚ್ಚಿನ ಹೊರೆಯಾಗಿದೆ.

"

ಬೋಧಕರ ನೇಮಕಾತಿ ಪ್ರಕ್ರಿಯೆಗೆ ರಾಜ್ಯ ಸರ್ಕಾರದಿಂದ ಇನ್ನೂ ಅನುಮತಿ ದೊರೆತಿಲ್ಲ. ಈ ವಿಷಯವಾಗಿ ಯಾವುದೇ ಪ್ರಗತಿಯೂ ಆಗಿಲ್ಲ. ಯಥಾಸ್ಥಿತಿಯಲ್ಲಿ ಮುಂದುವರಿದಿದೆ. ಭವಿಷ್ಯದಲ್ಲಿ ಅತಿಥಿ ಉಪನ್ಯಾಸಕರಿಂದಲೇ ವಿಶ್ವವಿದ್ಯಾಲಯ ನಡೆಸುವ ಕಾಲ ಬರಲಿದೆ.

— ಪ್ರೊ.ಎನ್.ಕೆ.ಲೋಕನಾಥ್ ಕುಲಪತಿ, ಮೈಸೂರು ವಿಶ್ವವಿದ್ಯಾಲಯ