ಹೃದಯ ಸ್ಪರ್ಶಿಸಿದ ‘ವಿವೇಕಗಾಥೆ’ ಸಾಂಸ್ಕೃತಿಕ ರೂಪಕ

ಮೈಸೂರಿನ ರಾಮಕೃಷ್ಣ ಆಶ್ರಮ ಶತಮಾನೋತ್ಸವದ ಕೊನೆಯ ಕಾರ್ಯಕ್ರಮ ಬಲು ವೈಶಿಷ್ಟೃತೆಯಿಂದ ನೆರೆದವರ ಮನಗೆದ್ದಿತ್ತು.

 ವೀರ ಸನ್ಯಾಸಿ ಸ್ವಾಮಿ ವಿವೇಕಾನಂದರ ಜೀವನ ಮತ್ತು ಸಂದೇಶವನ್ನು ಆಧಾರಿತ ಈ ರೂಪಕ ತನ್ಮಯತೆ  ಮೂಡಿಸಿತು. ರಾಮಕೃಷ್ಣ ವಿದ್ಯಾಶಾಲೆಯ ಬಯಲು ಕ್ರೀಡಾಂಗಣದಲ್ಲಿ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ತಂಗಾಳಿಯೊಂದಿಗೆ ‘ವಿವೇಕ’ ವಿಚಾರಚಿಂತನೆಯ ಕಿಚ್ಚು ಹಚ್ಚಿತು.

ವಿವೇಕರ ಬಾಲ್ಯ, ಯೌವನ, ದೇಶ-ವಿದೇಶ ಪರ್ಯಟನೆ, ತತ್ವಧಾರೆವನ್ನು ವಿವಿಧ ಪ್ರದರ್ಶನ ಕಲೆಗಳ ಮೂಲಕ ತೆರೆದಿಡಲಾಯಿತು. ಮಾತಿನ ವಿವರಣೆ, ಗಾಯನ, ನೃತ್ಯ, ನಾಟಕ, ಸಂಗೀತ, ಜಾನಪದ ಕಲೆಯನ್ನು ಏಕಕಾಲದಲ್ಲಿ ಒಂದರ ಮೇಲೊಂದು ಪ್ರದರ್ಶಿಸುವ ಮೂಲಕ ವಿವೇಕರ ಕಥೆಯನ್ನು ವಿಭಿನ್ನವಾಗಿ ತೆರೆದಿಡಲಾಯಿತು. ವಿಡಿಯೋ, ಆಡಿಯೋ ಬಳಸಿಕೊಳ್ಳಲಾಯಿತು.

 ಆಧುನಿಕ ಕೃತಕ ಬುದ್ಧಿಮತ್ತೆ(ಐಎ) ತಂತ್ರಜ್ಞಾನವನ್ನೂ ಬಳಸಿ ಕೃತಕ ದೃಶ್ಯವನ್ನು ಕಟ್ಟಿಕೊಡಲಾಯಿತು. ಹಳೇ ಫೋಟೋಗಳಿಗೆ ಐಎ ಮೂಲಕ ಜೀವಕಳೆಯನ್ನೂ  ತುಂಬಲಾಯಿತು.

1982ರ ನವೆಂಬರ್‌ನಲ್ಲಿ ಸಾಂಸ್ಕೃತಿಕ ನಗರಿ ಮೈಸೂರಿಗೆ ವಿವೇಕರ ಪಾದ ಸ್ಪರ್ಶಿಸಿದ ಘಳಿಗೆ, ಇಲ್ಲಿ ಮೂರು ವಾರಗಳ ವಾಸ್ತವ್ಯ, ಮಹಾರಾಜ 10ನೇ ಚಾಮರಾಜ ಒಡೆಯರ್ ಅವರೊಂದಿಗೆ ಬಾಂಧವ್ಯ, ಮೈಸೂರಿನೊಂದಿಗೆ ಒಡನಾಟ, ಈ ಊರಿನ ಕುರಿತು ವಿವೇಕರು ಬರೆದಿರುವ ಒಲವಿನ ಕರೆಯೋಲೆಗಳು ಬೃಹತ್ ಡಿಜಿಟಲ್ ಪರದೆಯ ಮೇಲೆ ಹಾದು ಹೋಯಿತು. 

ಸರಗೂರು ಕಾರ್ತಿಕ ನಿರ್ದೇಶನ: ರಾಮಕೃಷ್ಣ ವಿದ್ಯಾಶಾಲೆಯ ಹಳೇ ವಿದ್ಯಾರ್ಥಿ ಸರಗೂರು ಕಾರ್ತಿಕ ಅವರ ನಿರ್ದೇಶನದಲ್ಲಿ ಮೂಡಿದ ಬಂದ ಈ ರೂಪಕಕ್ಕೆ ಸಂಗೀತ ನಿರ್ದೇಶಕ ಪ್ರವೀಣ್ ಡಿ.ರಾವ್ ಸೊಗಸಾದ ರಾಗಲಹರಿ ಸಂಗೀತ ಸುಧೆ ಹರಿಸಿದರು. 50-60 ಕಲಾವಿದರು ವಿವಿಧ ಪ್ರದರ್ಶನ ಕಲೆಯನ್ನು ಪ್ರಸ್ತುತಪಡಿಸಿ ಮನಸೂರೆಗೊಂಡರು. ಅನೇಕ ಸ್ವಾರಸ್ಯಕರ ಸಂಗತಿಗಳನ್ನು ಬಹು ಆಯಾಮದಲ್ಲಿ ಪ್ರದರ್ಶಿಸಿ ಸಭಿಕರಲ್ಲಿ ವಿವೇಕಪ್ರಜ್ಞೆ, ವಿವೇಕಸ್ಫೂರ್ತಿಯನ್ನು ಬಿತ್ತಲಾಯಿತು.

ಆದಿಚುಂಚನಗಿರಿ ಮಠದ ಪೀಠಾಧೀಶ ಶ್ರೀ ಡಾ.ನಿರ್ಮಲಾನಂದನಾಥ ಸ್ವಾಮೀಜಿ, ಮೈಸೂರು ರಾಮಕೃಷ್ಣ ಆಶ್ರಮ ಅಧ್ಯಕ್ಷ ಸ್ವಾಮಿ ಮುಕ್ತಿದಾನಂದ, ಸ್ವಾಮಿ ಯುಕ್ತೇಶನಾಂದ, ದೇಶದ ವಿವಿಧೆಡೆಯಿಂದ ಆಗಮಿಸಿದ ರಾಮಕೃಷ್ಣ ಆಶ್ರಮ, ರಾಮಕೃಷ್ಣಮಠ, ಬೇಲೂರು ಮಠದ ಯತಿಗಳು ಸಾಕ್ಷಿಯಾದರು.

ಕುವೆಂಪು ಅವರ ಪುತ್ರಿ ತಾರಿಣಿ ಚಿದಾನಂದಗೌಡ, ವಿಶ್ರಾಂತ ಕುಲಪತಿಗಳಾದ ಡಾ.ಕೆ.ಚಿದಾನಂದಗೌಡ, ಡಾ.ಜೆ.ಶಶಿಧರಪ್ರಸಾದ್, ಪ್ರೊ.ಜಿ.ಹೇಮಂತಕುಮಾರ್, ಮೂಳೆ ಶಸ್ತ್ರಚಿಕಿತ್ಸ ಡಾ.ನಿತ್ಯಾನಂದರಾವ್, ನಿವೃತ್ತ ಪ್ರಾಧ್ಯಾಪಕ ಡಾ.ಸಿ.ನಾಗಣ್ಣ, ಆರ್‌ಎಸ್‌ಎಸ್ ಎಂ.ವೆಂಕಟರಾಮು, ವಿಜಯವಿಠ್ಠಲ ಶಿಕ್ಷಣ ಸಂಸ್ಥೆಯ ಕಾರ್ಯದರ್ಶಿ ವಾಸುದೇವ ಭಟ್, ರಾಮಕೃಷ್ಣ ವಿದ್ಯಾಶಾಲೆಯ ಹಿರಿಯ ವಿದ್ಯಾರ್ಥಿಗಳ ಸಂಘದ ಕಾರ್ಯದರ್ಶಿ ಡಾ.ಸುಜಯ್‌ಕುಮಾರ್, ಮಾಜಿ ಕಾರ್ಯದರ್ಶಿಗಳಾದ ಕೆ.ನರೇಂದ್ರ, ರಾಘವನ್, ಎನ್.ಆರ್.ಅಶೋಕ್ ವಿಶೇಷ ಆಹ್ವಾನಿತರಾಗಿದ್ದರು. ಉಪಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್, ಕನ್ನಡ ಮತ್ತು ಸಂಸ್ಕೃತಿ ಸಚಿವ ಶಿವರಾಜ ತಂಗಡಗಿ ಗೈರಾದರು.

ನಾಲ್ಕು ದಿನಗಳ ಕಾಲ ನಡೆದ ಮೈಸೂರಿನ ಶ್ರೀರಾಮಕೃಷ್ಣ ಆಶ್ರಮ ಶತಮಾನೋತ್ಸವ(1925-2025) ಸೋಮವಾರ ರಾತ್ರಿ ಸಂಪನ್ನಗೊಂಡಿತು. ನ.21ರಂದು ಪೌರಕಾರ್ಮಿಕರಿಗೆ ನಾರಾಯಣಸೇವೆಯೊಂದಿಗೆ ಶುರುವಾಗಿತ್ತು. 

100 ವರ್ಷಗಳ ಸಾರ್ಥಕ ಸೇವೆ ಅಂಗವಾಗಿ ಶತಮಾನೋತ್ಸವ ಸ್ಮರಣೆ ಸಂಚಿಕೆ ಬಿಡುಗಡೆ, ವಿವೇಕ ಯಾತ್ರೆ, ರಾಮಕೃಷ್ಣ ನೈತಿಕ ಮತ್ತು ಆಧ್ಯಾತ್ಮಿಕ ಶಿಕ್ಷಣ ಸಂಸ್ಥೆಯ ಸುವರ್ಣ ಮಹೋತ್ಸವ, ಹೊನಲು ಬೆಳಕಿನ ಪ್ರದರ್ಶನ, ರಾಮಕೃಷ್ಣ ವಿದ್ಯಾಶಾಲೆಯ ಶೈಕ್ಷಣಿಕ ಸೇವೆಯ ಅವಲೋಕನ, ರಾಮಕೃಷ್ಣ-ವಿವೇಕಾನಂದ ಭಾವಧಾರೆಗೆ ಮೈಸೂರು ರಾಜಮನೆತನದ ಕೊಡುಗೆ, ಸಂತ ಸಮಾಗಮ, ವಿವೇಕ ಪ್ರಭ ಮಾಸಪತ್ರಿಕೆ ಬೆಳ್ಳಿ ಹಬ್ಬ, ಶ್ರೀರಾಮಕೃಷ್ಣ, ಶಾರದಾದೇವಿ, ಸ್ವಾಮಿವಿವೇಕಾನಂದರ ಕುರಿತು ವಿಚಾರಸಂಕಿರಣ ಆಯೋಜಿಸಲಾಗಿತ್ತು. 

ಸಮರ್ಪಣ ಸಮಾವೇಶ, ವಿವೇಕಾಗಾಥೆಯೊಂದಿಗೆ ಶತಮಾನೋತ್ಸವಕ್ಕೆ ತೆರೆಬಿದ್ದಿತು. ನಾಲ್ಕು ದಿನಗಳ ಆಧ್ಯಾತ್ಮಿಕ ಚಿಂತನೆ, ವಿವೇಕ, ರಾಮಕೃಷ್ಣ ವಿಚಾರಧಾರೆ, ಸಂಸ್ಕೃತಿಯ ಕುರಿತು ಚಿಂತನಮಂಥನವೂ ನಡೆಯಿತು. 

"