ದತ್ತಪೀಠದಲ್ಲಿ ವೈಕುಂಠ ಏಕಾದಶಿ: ರೋಗ ನಿವಾರಕ 'ಗುರುವಾಯೂರಪ್ಪ'ನಾಗಿ ಕಂಗೊಳಿಸಿದ ದತ್ತ ವೆಂಕಟೇಶ್ವರ

ಈ ಸಂದರ್ಭದಲ್ಲಿ ಆಶೀರ್ವಚನ ನೀಡಿದ ಆಶ್ರಮದ ಕಿರಿಯ ಶ್ರೀಗಳಾದ ಶ್ರೀ ದತ್ತ ವಿಜಯಾನಂದ ತೀರ್ಥ ಸ್ವಾಮೀಜಿ, ನಮ್ಮ ಸಂಪ್ರದಾಯದಲ್ಲಿ ವೈಕುಂಠ ಎಂಬುದು ಕೇವಲ ಮರಣದ ನಂತರ ಅಥವಾ ದೇಹ ಬಿಟ್ಟ ಮೇಲೆ ಸಿಗುವಂಥದ್ದಲ್ಲ. ಬದುಕಿರುವಾಗಲೇ ಆನಂದವನ್ನು ಅನುಭವಿಸುವುದು ನಮ್ಮ ಗುರಿ. ಅಂತಹ ವೈಕುಂಠದ ಅನುಭವವನ್ನು ಭಕ್ತರಿಗೆ ಇಲ್ಲೇ ಕಲ್ಪಿಸಿಕೊಡುವ ಪ್ರತೀಕವಾಗಿ ಇಂದು ಉತ್ತರ ದ್ವಾರ ದರ್ಶನವನ್ನು ಏರ್ಪಡಿಸಲಾಗಿದೆ. ದೇವಾನುದೇವತೆಗಳು ಹೇಗೆ ವೈಕುಂಠಕ್ಕೆ ತೆರಳಿ ಶ್ರೀಮನ್ನಾರಾಯಣನ ದರ್ಶನ ಪಡೆಯುತ್ತಾರೋ, ಅದೇ ರೀತಿ ಭಕ್ತರು ಇಲ್ಲಿ ದರ್ಶನ ಪಡೆಯುತ್ತಿದ್ದಾರೆ ಎಂದರು.

ಮೋಕ್ಷದ ಉತ್ತರ ದ್ವಾರ: ವರ್ಷವಿಡೀ ಪೂರ್ವ ದ್ವಾರದಿಂದ (ರಾಜಗೋಪುರ) ದರ್ಶನ ನೀಡುವ ಸ್ವಾಮಿ, ಇಂದು ಒಂದು ದಿನ ಮಾತ್ರ ಉತ್ತರ ದ್ವಾರದಲ್ಲಿ ದರ್ಶನ ನೀಡುತ್ತಾರೆ. ಒಮ್ಮೆ ವೈಕುಂಠ ಸೇರಿದ ಮೇಲೆ ಹೇಗೆ ಮರಳಿ ಬರುವಂತಿಲ್ಲವೋ (ಪುನರ್ಜನ್ಮವಿಲ್ಲವೋ), ಅದೇ ರೀತಿ ಈ ದ್ವಾರದ ದರ್ಶನವು ಮೋಕ್ಷದಾಯಕವಾಗಿದೆ. ಇದು ‘ಮೋಕ್ಷದಾ ಏಕಾದಶಿ’ಯಾಗಿದ್ದು, ಭಕ್ತರು ಗೋವಿಂದ ನಾಮಸ್ಮರಣೆಯೊಂದಿಗೆ ಬಂದು ಪುನೀತರಾಗುತ್ತಿದ್ದಾರೆ ಎಂದು ಹೇಳಿದರು.

ಆರೋಗ್ಯದಾಯಕ ಬೆಣ್ಣೆ ಅಲಂಕಾರ: ಶ್ರೀ ಗಣಪತಿ ಸಚ್ಚಿದಾನಂದ ಸ್ವಾಮೀಜಿಯವರ ಆಜ್ಞೆಯಂತೆ, ಇಂದು ದತ್ತ ವೆಂಕಟೇಶ್ವರನಿಗೆ ಪ್ರಸಿದ್ಧ ‘ಗುರುವಾಯೂರಪ್ಪ’ನ ಅಲಂಕಾರ ಮಾಡಲಾಗಿತ್ತು. ತಿರುಪತಿಗಾಗಲಿ ಅಥವಾ ಗುರುವಾಯೂರಿಗಾಗಲಿ ಹೋಗಲು ಸಾಧ್ಯವಾಗದ ಭಕ್ತರು, ಇಲ್ಲೇ ಆ ಕ್ಷೇತ್ರಗಳ ದರ್ಶನ ಭಾಗ್ಯವನ್ನು ಪಡೆಯುತ್ತಿದ್ದಾರೆ.

ಸ್ವಾಮಿಯ ಕೈಯಲ್ಲಿರುವ ‘ಬೆಣ್ಣೆ’ಯ (ನವನೀತ) ಮಹತ್ವವನ್ನು ವಿವರಿಸಿದ ಶ್ರೀಗಳು, ನವನೀತ ಎಂದರೆ ನಮ್ಮಲ್ಲಿ ಹೊಸದಾಗಿ ಬರುವ ರೋಗಗಳು, ಪಾಪಗಳು ಮತ್ತು ದೋಷಗಳನ್ನು ನುಂಗಿ ಹಾಕಿ, ನಮಗೆ ಅಮೃತವೆಂಬ ಆರೋಗ್ಯವನ್ನು ಕರುಣಿಸುತ್ತಾನೆ ಎಂದು ಹೇಳಿದರು.