ತೀವ್ರ ನಗರೀಕರಣದಿಂದ ಸಂಚಾರ ದಟ್ಟಣೆ, ಮೂಲಸೌಕರ್ಯ ಸಮಸ್ಯೆ: ನಿತೇಶ್ ಪಾಟೀಲ್

ವಿಶ್ವ ಪರಿಸರ ದಿನಾಚರಣೆಯ ಅಂಗವಾಗಿ ಮೈಸೂರು ವಿಶ್ವವಿದ್ಯಾನಿಲಯದ ಯೋಜನಾ ಮತ್ತು ವಾಸ್ತುಶಿಲ್ಪ ಶಾಲೆ, ಬೆಂಗಳೂರಿನ ಭಾರತೀಯ ನಗರ ಯೋಜಕರ ಸಂಸ್ಥೆ (ಐಟಿಪಿಐ) ಕರ್ನಾಟಕ ಪ್ರಾದೇಶಿಕ ಘಟಕ ಹಾಗೂ ಐಟಿಪಿಐ ಮೈಸೂರು ಕೇಂದ್ರದಿಂದ ಮಾನಸಗಂಗೋತ್ರಿಯಲ್ಲಿ ಆಯೋಜಿಸಿದ್ದ ‘ನಗರ ಪ್ರದೇಶಗಳಲ್ಲಿ ಬ್ಲೂ-ಗ್ರೀನ್ ನೆಟ್‌ವರ್ಕ್ ಸುಧಾರಣೆಯ ತಂತ್ರಗಳು’ ಕುರಿತ ಕಾರ್ಯಾಗಾರ ಉದ್ಘಾಟಿ ಮಾತನಾಡಿದರು.

ಮೈಸೂರು ನಗರವು ಸಾಂಸ್ಕೃತಿಕ ಹಾಗೂ ಪರಂಪರೆಯ ವೈಶಿಷ್ಟ್ಯ ಹೊಂದಿರುವ ಹಸಿರು ಮತ್ತು ವಾಸಯೋಗ್ಯ ನಗರವಾಗಿದ್ದರೂ ಇತ್ತೀಚಿನ ದಿನಗಳಲ್ಲಿ ವೇಗವಾಗಿ ವಿಸ್ತರಿಸುತ್ತಿರುವ ನಗರೀಕರಣ, ಸಂಚಾರ ದಟ್ಟಣೆ ಹಾಗೂ ಮೂಲಸೌಕರ್ಯ ಮೇಲಿನ ಒತ್ತಡ ಹೊಸ ಸವಾಲುಗಳನ್ನು ಸೃಷ್ಟಿಸುತ್ತಿವೆ ಎಂದರು.

ಹಸಿರು ಪ್ರದೇಶಗಳ ವೃದ್ಧಿ, ಪಾದಚಾರಿ ಸ್ನೇಹಿ ಜಾಲಗಳ ನಿರ್ಮಾಣ, ಮುಕ್ತ ಪ್ರದೇಶಗಳ ಸಂರಕ್ಷಣೆ ಹಾಗೂ ನೈಸರ್ಗಿಕ ವ್ಯವಸ್ಥೆಗಳನ್ನು ನಗರ ಯೋಜನೆಯಲ್ಲಿ ಅಳವಡಿಸಿಕೊಳ್ಳುವ ಅಗತ್ಯವಿದೆ. ಈ ಹಿನ್ನೆಲೆಯಲ್ಲಿ ಬ್ಲೂ-ಗ್ರೀನ್ ನೆಟ್‌ವರ್ಕ್ ಕುರಿತು ನಡೆಯುವ ಚರ್ಚೆಗಳು ಸುಸ್ಥಿರ ಹಾಗೂ ಹವಾಮಾನ ಸಹಿಷ್ಣು ನಗರಗಳ ನಿರ್ಮಾಣಕ್ಕೆ ಅಗತ್ಯ ಎಂದು ಅಭಿಪ್ರಾಯಪಟ್ಟರು.

ಸೌರಶಕ್ತಿ, ತ್ಯಾಜ್ಯ ನಿರ್ವಹಣೆ, ಬಯೋಗ್ಯಾಸ್ ಘಟಕ ಮತ್ತು ಮಳೆ ನೀರು ಸಂಗ್ರಹಣೆ ವ್ಯವಸ್ಥೆ ಅಳವಡಿಸಿರುವ ಮನೆಗಳಿಗೆ ನೀಡಲಾಗುತ್ತಿರುವ ಹಸಿರು ಆಸ್ತಿ ತೆರಿಗೆ ಯೋಜನೆಗೆ ಈಗಾಗಲೇ 33 ಅರ್ಜಿಗಳು ಬಂದಿವೆ. ಅಲ್ಲದೆ ಗ್ರೀನ್ ವೆಡ್ಡಿಂಗ್ ಪರಿಕಲ್ಪನೆಯ ಮೂಲಕ ತ್ಯಾಜ್ಯರಹಿತ ಮದುವೆಗಳನ್ನು ಉತ್ತೇಜಿಸಲಾಗುತ್ತಿದೆ ಎಂದು ಹೇಳಿದರು.

ತ್ಯಾಜ್ಯದಿಂದ ವಿದ್ಯುತ್ ಉತ್ಪಾದಿಸುವ ಯೋಜನೆಗಾಗಿ ಸುಮಾರು ಏಳು ಎಕರೆ ಜಾಗವನ್ನು ಗುರುತಿಸಲಾಗಿದೆ. ಭವಿಷ್ಯದ ನಗರ ಯೋಜನೆಗಳಲ್ಲಿ ಬ್ಲೂ-ಗ್ರೀನ್ ಕಾರಿಡಾರ್‌ಗಳ ಅಭಿವೃದ್ಧಿ ಹಾಗೂ ಪ್ರಕೃತಿ ಆಧಾರಿತ ಪರಿಹಾರಗಳಿಗೆ ಹೆಚ್ಚಿನ ಒತ್ತು ನೀಡಬೇಕು ಎಂದು ಹೇಳಿದರು.

ಪ್ರತಿಯೊಬ್ಬರಿಗೂ ಆರೋಗ್ಯಕರ ಹಾಗೂ ಹಸಿರು ಪರಿಸರ ಲಭ್ಯವಾಗಬೇಕಿದ್ದು, ಅದಕ್ಕಾಗಿ ಶೈಕ್ಷಣಿಕ ಸಂಸ್ಥೆಗಳು, ವೃತ್ತಿಪರ ಸಂಘಟನೆಗಳು, ಸರ್ಕಾರ ಹಾಗೂ ಸಾರ್ವಜನಿಕರ ಸಹಭಾಗಿತ್ವ ಅಗತ್ಯ ಎಂದರು.

ಅಧ್ಯಕ್ಷತೆ ವಹಿಸಿದ್ದ ಮೈಸೂರು ವಿಶ್ವವಿದ್ಯಾನಿಲಯದ ಕುಲಪತಿ ಪ್ರೊ.ಎನ್.ಕೆ. ಲೋಕನಾಥ್ ಮಾತನಾಡಿ, ಗ್ರಾಮೀಣ ಪ್ರದೇಶಗಳಿಂದ ನಗರಗಳಿಗೆ ಹೆಚ್ಚುತ್ತಿರುವ ವಲಸೆ ಪರಿಣಾಮ ನಗರೀಕರಣ ವೇಗವಾಗುತ್ತಿದೆ. ಪರಿಣಾಮ ನಗರದಲ್ಲಿ ಸಂಚಾರ ದಟ್ಟಣೆ, ರಸ್ತೆ ಮತ್ತು ಮೂಲಸೌಕರ್ಯಗಳ ಮೇಲಿನ ಒತ್ತಡ ಹೆಚ್ಚುತ್ತಿದ್ದು, ನಗರ ಜೀವನ ಹೆಚ್ಚು ಸಂಕೀರ್ಣವಾಗುತ್ತಿದೆ ಎಂದು ಕಳವಳ ವ್ಯಕ್ತಪಡಿಸಿದರು.

ಸಂಯುಕ್ತ ರಾಷ್ಟ್ರಗಳ ಸುಸ್ಥಿರ ಅಭಿವೃದ್ಧಿ ಗುರಿಗಳಲ್ಲಿ ನೀರು, ಪರಿಸರ ಹಾಗೂ ಸುಸ್ಥಿರತೆಗೆ ಹೆಚ್ಚಿನ ಆದ್ಯತೆ ನೀಡಲಾಗಿದೆ. ಪರಿಸರ ಸಂರಕ್ಷಣೆ ವಿಶ್ವ ಪರಿಸರ ದಿನಕ್ಕೆ ಮಾತ್ರ ಸೀಮಿತವಾಗದೆ ಪ್ರತಿದಿನದ ಜೀವನದ ಭಾಗವಾಗಬೇಕು ಎಂದು ಕರೆ ನೀಡಿದರು.

ಹವಾಮಾನ ಬದಲಾವಣೆಯ ಸವಾಲುಗಳನ್ನು ಎದುರಿಸಲು ವಿದ್ಯಾರ್ಥಿಗಳು, ಸಾರ್ವಜನಿಕರು ಹಾಗೂ ಸಂಸ್ಥೆಗಳು ಸಕ್ರಿಯವಾಗಿ ಹಸಿರು ಕಾರ್ಯಕ್ರಮಗಳಲ್ಲಿ ಪಾಲ್ಗೊಳ್ಳಬೇಕು ಎಂದು ಕೋರಿದರು.

ಶಿಕ್ಷಣ ತಜ್ಞರು, ನಗರ ಯೋಜಕರು, ವೃತ್ತಿಪರರು, ವಿದ್ಯಾರ್ಥಿಗಳು ಹಾಗೂ ವಿವಿಧ ಕ್ಷೇತ್ರಗಳ ಪ್ರತಿನಿಧಿಗಳು ಭಾಗವಹಿಸಿ ನಗರ ಪ್ರದೇಶಗಳಲ್ಲಿ ಬ್ಲೂ-ಗ್ರೀನ್ ಮೂಲಸೌಕರ್ಯ ಬಲಪಡಿಸುವುದು ಹಾಗೂ ಹವಾಮಾನ ಸಹಿಷ್ಣು ಯೋಜನಾ ಕ್ರಮಗಳ ಕುರಿತು ಚರ್ಚಿಸಿದರು.

ಕಾರ್ಯಕ್ರಮದ ಅಂಗವಾಗಿ ಗಿಡಗಳನ್ನು ನಡೆಸಲಾಯಿತು. ಶಾಲೆಯ ನಿರ್ದೇಶಕ ಪ್ರೊ.ಡಾ. ಎಚ್.ಎಸ್.ಕುಮಾರ ಇತರರು ಇದ್ದರು.