ತಂಬಾಕು ಟ್ರೇ ಸಸಿಮಡಿ ನಿರ್ವಹಣೆ ಆರಂಭ

ರಾಜ್ಯದಲ್ಲಿ ಗರಿಷ್ಠ 75 ಸಾವಿರ ಎಕರೆ ಭೂಪ್ರದೇಶದಲ್ಲಿ ತಂಬಾಕು ಕೃಷಿ ಕಾರ್ಯಕ್ಕೆ ಅವಕಾಶವಿದೆ. ಕಳೆದ ಸಾಲಿನಲ್ಲಿ 60 ಸಾವಿರ ಹೆಕ್ಟೇರ್ ಭೂಪ್ರದೇಶದಲ್ಲಿ ತಂಬಾಕು ಬೆಳೆದಿದ್ದು, 87 ಮಿಲಿಯನ್ ಕೆಜಿ ತಂಬಾಕು ಬೆಳೆದಿದ್ದರು. ಇದೀಗ ತಂಬಾಕು ಮಾರುಕಟ್ಟೆ ವ್ಯವಹಾರ ದರ ಕುಸಿತದ ಗೊಂದಲದ ನಡುವೆಯೇ ಮುಂದುವರಿದಿದೆ. ತಂಬಾಕಿನ ದರದಲ್ಲಿನ ಅನಿಶ್ಚಿತತೆ ರೈತರನ್ನು ಅತಂಕಕ್ಕೆ ಈಡುಮಾಡಿದೆ. ಕೃಷಿಗಾಗಿ ಹಾಕಿದ ಬಂಡವಾಳ ಕೂಡ ಬಾರದಂತಹ ಪರಿಸ್ಥಿತಿ ಎದುರಾಗಿದೆ. ಪ್ರತಿದಿನ ಮಾರುಕಟ್ಟೆಯಲ್ಲಿ ರೈತರು ದರಕುಸಿತದಿಂದ ಕುಪಿತರಾಗಿ ರಸ್ತೆತಡೆ, ಪ್ರತಿಭಟನೆಯಂತಹ ಹೋರಾಟಗಳನ್ನು ನಡೆಸುತ್ತಿದ್ದರೂ ಪ್ರಯೋಜನವಾಗಿಲ್ಲ.

ಈ ಬಾರಿ ರೈತರು 70 ಸಾವಿರ ಹೆಕ್ಟೇರ್ ಭೂಪ್ರದೇಶದಲ್ಲಿ 87 ಮಿಲಿಯನ್ ಕೆಜಿ ಹೊಗೆಸೊಪ್ಪು ಬೆಳೆದಿದ್ದು ದರ ಕುಸಿತದ ನಡುವೆ ಈವರೆಗೆ 63 ಮಿಲಿಯನ್ ಕೆಜಿಯಷ್ಟು ಹೊಗೆಸೊಪ್ಪು ಮಾರಾಟ ಮಾಡಿದ್ದಾರೆ. ಇಷ್ಟೆಲ್ಲದರ ನಡುವೆ ಮುಂಬರುವ ಸಾಲಿಗಾಗಿ ರಾಜ್ಯದಲ್ಲಿ ಅಂದಾಜು 60-65 ಸಾವಿರ ಹೆಕ್ಟೇರ್ ಭೂಮಿಯಲ್ಲಿ ಹೊಗೆಸೊಪ್ಪು ಕೃಷಿಕಾರ್ಯ ನಡೆದಿದ್ದು, ಮಾರ್ಚ್ ತಿಂಗಳಾಂತ್ಯ ಅಥವಾ ಏಪ್ರಿಲ್ ತಿಂಗಳ ಮೊದಲ ವಾರದಲ್ಲಿ ನರ್ಸರಿ ಬೆಡ್‌ನಿಂದ ಗುಣಮಟ್ಟದ ಸಸಿಗಳನ್ನು ಟ್ರೆನಲ್ಲಿ ಇಟ್ಟು ನಿರ್ವಹಣೆ ಮಾಡುವ ಕಾರ್ಯ ಆರಂಭಿಸಲಿದ್ದಾರೆ. 30-35 ದಿನಗಳ ಕಾಲ ಟ್ರೇ ನರ್ಸರಿ ಕಾರ್ಯ ಪ್ರಗತಿಯಲ್ಲಿರಲಿದೆ.