ಬದಲಾಗುತ್ತಿರುವ ಸಂತಾನಹೀನತೆಯ ಸ್ವರೂಪ ಮತ್ತು ಸುಧಾರಿತ ಚಿಕಿತ್ಸೆ

ವಿಶ್ವ ಐವಿಎಫ್ ದಿನದ ಅಂಗವಾಗಿ ಮಣಿಪಾಲ್ ಹಾಸ್ಪಿಟಲ್ ಮೈಸೂರು, ತನ್ನ 'ಫರ್ಟಿಲಿಟಿ ಮತ್ತು ಐವಿಎಫ್' ವಿಭಾಗವನ್ನು ಹೊಸ ತಂತ್ರಜ್ಞಾನ ಹಾಗೂ ಹೊಸ ಮೂಲಸೌಕರ್ಯಗಳೊಂದಿಗೆ ಮರುಪ್ರಾರಂಭಿಸಿದೆ. ಕಳೆದ 11ಕ್ಕೂ ಹೆಚ್ಚು ವರ್ಷಗಳಿಂದ ಈ ಸೇವೆಯನ್ನು ನೀಡುತ್ತಾ ಬಂದಿರುವ ಆಸ್ಪತ್ರೆಯು, ಈಗ ದಂಪತಿಗಳಿಗೆ ಸಮಗ್ರ ಮತ್ತು ವೈಯಕ್ತಿಕ ಕಾಳಜಿಯ ಚಿಕಿತ್ಸೆ ನೀಡುವ ಗುರಿ ಹೊಂದಿದೆ.

ಈ ಕೇಂದ್ರವನ್ನು ಶೇವ್ರಾನ್ ಲ್ಯಾಬೊರೇಟರೀಸ್ ಹಾಗೂ ಕ್ಲೀನ್‌ಫಿಕ್ಸ್-ಶೇವ್ರಾನ್ ಸಿಸ್ಟಮ್ಸ್ ಸಂಸ್ಥೆಯ ಸಂಸ್ಥಾಪಕ ಅಧ್ಯಕ್ಷರಾದ ರೋಟೇರಿಯನ್ ಸ್ಯಾಮ್ ಚೆರಿಯನ್ ಹಾಗೂ ಮೈಸೂರು ನಗರ ಕಾನೂನು ಮತ್ತು ಸುವ್ಯವಸ್ಥೆ ವಿಭಾಗದ ಉಪ ಪೊಲೀಸ್ ಆಯುಕ್ತರಾದ (DCP) ಡಾ. ಹರ್ಷ ಪ್ರಿಯಂವದಾ ಅವರು ಮುಖ್ಯ ಅತಿಥಿಗಳಾಗಿ ಉದ್ಘಾಟಿಸಿದರು. ಕಾರ್ಯಕ್ರಮದಲ್ಲಿ ಮಣಿಪಾಲ್ ಆಸ್ಪತ್ರೆಯ ಡಾ. ನಿವೇದಿತಾ ಶೆಟ್ಟಿ, ಕಾನ್ಸಲ್ಟೆಂಟ್ - ರಿಪ್ರೊಡಕ್ಟಿವ್ ಮೆಡಿಸಿನ್, ಮೈಸೂರು ಮಣಿಪಾಲ್ ಆಸ್ಪತ್ರೆಯ ನಿರ್ದೇಶಕರಾದ ಸಂದೀಪ್ ಪಟೇಲ್ ಬಿ. ಜೆ. ಮತ್ತು ಡಾ. ಉಪೇಂದ್ರ ಶೆಣೈ, ವೈದ್ಯಕೀಯ ಸೇವೆಗಳ ಮುಖ್ಯಸ್ಥರು ಹಾಗೂ ಸೀನಿಯರ್ ಕನ್ಸಲ್ಟೆಂಟ್ - ಕಾರ್ಡಿಯೊಥೊರಾಸಿಕ್ ಮತ್ತು ವಾಸ್ಕ್ಯುಲರ್ ಸರ್ಜನ್ ಸೇರಿದಂತೆ ಹಲವು ಗಣ್ಯರು ಉಪಸ್ಥಿತರಿದ್ದರು.

ಕಾರ್ಯಕ್ರಮದಲ್ಲಿ ಮಾತನಾಡಿದ ರೋಟೇರಿಯನ್ ಸ್ಯಾಮ್ ಚೆರಿಯನ್, "ಸಂತಾನಹೀನತೆ ಎಂಬುದು ಕೇವಲ ದೈಹಿಕ ಸಮಸ್ಯೆಯಷ್ಟೇ ಅಲ್ಲ, ಅದು ದಂಪತಿಗಳ ಮತ್ತು ಕುಟುಂಬದ ಭಾವನಾತ್ಮಕ ನೆಮ್ಮದಿಯ ಮೇಲೆಯೂ ಪರಿಣಾಮ ಬೀರುತ್ತದೆ. ಮಣಿಪಾಲ್ ಆಸ್ಪತ್ರೆಯು ಈ ಆಧುನಿಕ ಕೇಂದ್ರದ ಮೂಲಕ ದಂಪತಿಗಳಿಗೆ ಸಮಯಕ್ಕೆ ಸರಿಯಾದ ಮಾರ್ಗದರ್ಶನ ಮತ್ತು ಚಿಕಿತ್ಸೆ ನೀಡಿ, ಅವರ ಪೋಷಕರಾಗುವ ಅವರ ಕನಸು ನನಸಾಗಲು ಹೊಸ ಭರವಸೆ ಸಿಗಲಿದೆ" ಎಂದರು.

ಮೈಸೂರು ನಗರ (ಕಾನೂನು ಮತ್ತು ಸುವ್ಯವಸ್ಥೆ) ಉಪ ಪೊಲೀಸ್ ಆಯುಕ್ತರಾದ (DCP) ಡಾ. ಹರ್ಷ ಪ್ರಿಯಂವದಾ ಮಾತನಾಡಿ "ಜನರು ಯಾವುದೇ ಹಿಂಜರಿಕೆ ಅಥವಾ ಮುಜುಗರವಿಲ್ಲದೆ ಸಮಯಕ್ಕೆ ಸರಿಯಾಗಿ ವೈದ್ಯಕೀಯ ನೆರವು ಪಡೆಯಲು ಆರೋಗ್ಯ ಜಾಗೃತಿ ಅತ್ಯಂತ ಮುಖ್ಯ ಪಾತ್ರ ವಹಿಸುತ್ತದೆ. ಸಂತಾನಹೀನತೆ ಎಂಬುದು ಒಂದು ವೈದ್ಯಕೀಯ ಸಮಸ್ಯೆಯಷ್ಟೇ. ಇದಕ್ಕೆ ಸರಿಯಾದ ತಿಳಿವಳಿಕೆ, ಬೆಂಬಲ ಮತ್ತು ಸೂಕ್ತ ವೈದ್ಯಕೀಯ ತಜ್ಞರ ಚಿಕಿತ್ಸೆಯ ಅಗತ್ಯವಿದೆ. ತಮ್ಮ 'ಫರ್ಟಿಲಿಟಿ ಮತ್ತು ಐವಿಎಫ್' ಕೇಂದ್ರವನ್ನು ಅತ್ಯಾಧುನಿಕ ತಂತ್ರಜ್ಞಾನ ಹಾಗೂ ಹೊಸ ಮೂಲಸೌಕರ್ಯಗಳೊಂದಿಗೆ ಮರುಪ್ರಾರಂಭಿಸಿರುವ ಮಣಿಪಾಲ್ ಹಾಸ್ಪಿಟಲ್ ಮೈಸೂರು ತಂಡಕ್ಕೆ ನನ್ನ ಅಭಿನಂದನೆಗಳು. ಹೆಚ್ಚಿನ ದಂಪತಿಗಳ ಪೋಷಕರಾಗುವ ಕನಸನ್ನು ನನಸು ಮಾಡುವಲ್ಲಿ ಈ ತಂಡಕ್ಕೆ ಯಶಸ್ಸು ಸಿಗಲಿ ಎಂದು ಹಾರೈಸುತ್ತೇನೆ," ಎಂದು ಹೇಳಿದರು.

ಡಾ. ನಿವೇದಿತಾ ಶೆಟ್ಟಿ, ಕಾನ್ಸಲ್ಟೆಂಟ್ - ರಿಪ್ರೊಡಕ್ಟಿವ್ ಮೆಡಿಸಿನ್ ಮಾತನಾಡಿ, “ಇಂದಿನ ದಿನಗಳಲ್ಲಿ ಸಂತಾನಹೀನತೆಗೆ ಒಂದೇ ನಿರ್ದಿಷ್ಟ ಕಾರಣವಿರುವುದಿಲ್ಲ. ತಡವಾದ ಮದುವೆ, ಜೀವನಶೈಲಿಯ ಬದಲಾವಣೆ, ಹಾರ್ಮೋನ್ ಸಮಸ್ಯೆಗಳು ಮತ್ತು ಮಾನಸಿಕ ಒತ್ತಡಗಳು ಪುರುಷರು ಹಾಗೂ ಮಹಿಳೆಯರಿಬ್ಬರ ಮೇಲೆಯೂ ಪರಿಣಾಮ ಬೀರುತ್ತಿವೆ. ಮದುವೆಯಾಗಿ ನೈಸರ್ಗಿಕವಾಗಿ ಒಂದು ವರ್ಷ ಪ್ರಯತ್ನಿಸಿದರೂ ಮಗುವಾಗದಿದ್ದರೆ ದಂಪತಿಗಳು ತಜ್ಞರನ್ನು ಸಂಪರ್ಕಿಸಬೇಕು. 35 ವರ್ಷ ಮೇಲ್ಪಟ್ಟ ಮಹಿಳೆಯರು 6 ತಿಂಗಳ ಪ್ರಯತ್ನದ ನಂತರವೇ ವೈದ್ಯರನ್ನು ಭೇಟಿಯಾಗುವುದು ಒಳ್ಳೆಯದು. ಸೂಕ್ತ ಸಮಯದಲ್ಲಿ ತಪಾಸಣೆ ಮಾಡಿಸಿಕೊಂಡರೆ, ಸಮಸ್ಯೆಯ ಮೂಲ ಕಾರಣವನ್ನು ತಿಳಿದುಕೊಂಡು ಸರಿಯಾದ ಚಿಕಿತ್ಸೆಯನ್ನು ಆಯ್ಕೆ ಮಾಡಲು ಸಹಾಯವಾಗುತ್ತದೆ.” ಎಂದು ತಿಳಿಸಿದರು.

ಕಳೆದ 10 ವರ್ಷಗಳಲ್ಲಿ ಸಂತಾನೋತ್ಪತ್ತಿ ವೈದ್ಯಕೀಯ ಕ್ಷೇತ್ರವು ಸಾಕಷ್ಟು ಪ್ರಗತಿ ಕಂಡಿದೆ. ಮಣಿಪಾಲ್ ಆಸ್ಪತ್ರೆ ಮೈಸೂರಿನಲ್ಲಿ ಓವ್ಯುಲೇಶನ್ ಇಂಡಕ್ಷನ್, ಫೋಲಿಕ್ಯುಲರ್ ಮಾನಿಟರಿಂಗ್, ಐಯುಐ (IUI) ನಿಂದ ಹಿಡಿದು ಐವಿಎಫ್ (IVF), ಐಸಿಎಸ್‍ಐ (ICSI), ಭ್ರೂಣ ಶೀತಲೀಕರಣ (Embryo Freezing) ಹಾಗೂ ಜನೆಟಿಕ್ ಟೆಸ್ಟಿಂಗ್ (PGT-A / PGT-M) ನಂತಹ ಅತ್ಯಾಧುನಿಕ ಸೇವೆಗಳು ಲಭ್ಯವಿವೆ.

ಪುರುಷರ ಸಂತಾನಹೀನತೆ ನಿವಾರಣೆಗೆ MESA, TESA, TESE ನಂತಹ ಶಸ್ತ್ರಚಿಕಿತ್ಸಾ ವಿಧಾನಗಳೂ ಇಲ್ಲಿವೆ. ಚಿಕಿತ್ಸೆಯ ಸಮಯದಲ್ಲಿ ಪದೇ ಪದೇ ಸೂಜಿ ಚುಚ್ಚಿಸಿಕೊಳ್ಳುವ ನೋವನ್ನು ಕಡಿಮೆ ಮಾಡಲು ಸೂಜಿ ರಹಿತ ಇಂಜೆಕ್ಷನ್ ತಂತ್ರಜ್ಞಾನವನ್ನು ಪರಿಚಯಿಸಲಾಗಿದೆ. ಇದು ಚಿಕಿತ್ಸಾ ಅನುಭವವನ್ನು ಸುಲಭಗೊಳಿಸುತ್ತದೆ.

ಐವಿಎಫ್ ಮಾಡಿಸಿದ ಮೊದಲ ಬಾರಿಯೇ ಗರ್ಭಧಾರಣೆಯಾಗುತ್ತದೆ ಎಂಬುದು ತಪ್ಪು ಕಲ್ಪನೆ ಎಂದು ಡಾ. ನಿವೇದಿತಾ ಶೆಟ್ಟಿ ಸ್ಪಷ್ಟಪಡಿಸಿದರು. ಚಿಕಿತ್ಸೆಯ ಯಶಸ್ಸು ವಯಸ್ಸು, ಅಂಡಾಣು ಮತ್ತು ವೀರ್ಯಾಣುವಿನ ಗುಣಮಟ್ಟ ಹಾಗೂ ಸಾಮಾನ್ಯ ಆರೋಗ್ಯವನ್ನು ಅವಲಂಬಿಸಿರುತ್ತದೆ. ಧೂಮಪಾನ, ಮದ್ಯಪಾನ, ಬೊಜ್ಜು, ನಿದ್ರಾಹೀನತೆ ಮತ್ತು ಮಾನಸಿಕ ಒತ್ತಡಗಳು ಸಂತಾನೋತ್ಪತ್ತಿ ಸಾಮರ್ಥ್ಯದ ಮೇಲೆ ದುಷ್ಪರಿಣಾಮ ಬೀರುತ್ತವೆ.

ಮಣಿಪಾಲ್ ಆಸ್ಪತ್ರೆಯ ನಿರ್ದೇಶಕರಾದ ಸಂದೀಪ್ ಪಟೇಲ್ ಬಿ. ಜೆ. ಮಾತನಾಡಿ, "ನಮ್ಮ ಆಸ್ಪತ್ರೆಯ ಈ ಐ.ವಿ.ಎಫ್. ಕೇಂದ್ರದ ಮೂಲಕ ಮೈಸೂರಿನಲ್ಲಿ ಸಮಗ್ರ ಸಂತಾನೋತ್ಪತ್ತಿ ಆರೋಗ್ಯ ಸೇವೆ ನೀಡುವುದು ನಮ್ಮ ಮುಖ್ಯ ಉದ್ದೇಶವಾಗಿದೆ. ಆಧುನಿಕ ತಂತ್ರಜ್ಞಾನದ ಜೊತೆಗೆ ರೋಗಿಗಳ ಗೌಪ್ಯತೆ, ಮಾನಸಿಕ ಬೆಂಬಲ ಮತ್ತು ವೈಯಕ್ತಿಕ ಕಾಳಜಿಗೆ ನಾವು ಆದ್ಯತೆ ನೀಡುತ್ತೇವೆ," ಎಂದು ಹೇಳಿದರು.