ಮೈಸೂರಿನಲ್ಲಿ ಮೊದಲ ಬಾರಿಗೆ ಶ್ವಾಸಕೋಶದ ಕಾಯಿಲೆ ಪತ್ತೆ ಹಚ್ಚುವ ಅತ್ಯಾಧುನಿಕ ಇಬಸ್ ತಂತ್ರಜ್ಞಾನ ಪರಿಚಯ

ಮೈಸೂರು: ಮೈಸೂರಿನ ವೈದ್ಯಕೀಯ ಕ್ಷೇತ್ರದಲ್ಲಿ ಇಂದು ಒಂದು ಪ್ರಮುಖ ಮೈಲಿಗಲ್ಲು ಸ್ಥಾಪನೆಯಾಗಿದೆ. ಮೈಸೂರಿನ ಮಣಿಪಾಲ್ ಆಸ್ಪತ್ರೆಯು ಶ್ವಾಸಕೋಶದ ಗಂಭೀರ ಸಮಸ್ಯೆಗಳನ್ನು ಅತ್ಯಂತ ನಿಖರವಾಗಿ ಮತ್ತು ಸುಲಭವಾಗಿ ಪತ್ತೆಹಚ್ಚುವ 'ಎಂಡೋಬ್ರಾಂಕಿಯಲ್ ಅಲ್ಟ್ರಾಸೌಂಡ್' (EBUS - ಇಬಸ್) ಎಂಬ ಅತ್ಯಾಧುನಿಕ ತಂತ್ರಜ್ಞಾನವನ್ನು ನಗರದಲ್ಲಿ ಮೊದಲ ಬಾರಿಗೆ ಪರಿಚಯಿಸಿದೆ.

ಈ ಕುರಿತು ಮೈಸೂರು ಪತ್ರಕರ್ತರ ಭವನದಲ್ಲಿ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಮಣಿಪಾಲ್ ಆಸ್ಪತ್ರೆಯ ಡಾ. ಲಕ್ಷ್ಮಿ ನರಸಿಂಹನ್ ಆರ್, ಕನ್ಸಲ್ಟೆಂಟ್ – ಶ್ವಾಸಕೋಶ ವಿಭಾಗ (ಪಲ್ಮನಾಲಜಿ), ಡಾ. ಸ್ಪೂರ್ತಿ ಕೆ, ಅಸೋಸಿಯೇಟ್ ಕನ್ಸಲ್ಟೆಂಟ್ – ಶ್ವಾಸಕೋಶ ವಿಭಾಗ (ಪಲ್ಮನಾಲಜಿ), ಮಣಿಪಾಲ್ ಆಸ್ಪತ್ರೆ ಮೈಸೂರು, ಮತ್ತು ಮೈಸೂರಿನ ಮಣಿಪಾಲ್ ಆಸ್ಪತ್ರೆಯ ನಿರ್ದೇಶಕರಾದ ಸಂದೀಪ್ ಪಟೇಲ್ ಬಿ. ಜೆ., ಇವರು ಪತ್ರಿಕಾಗೋಷ್ಠಿಯನ್ನುದ್ದೇಶಿಸಿ ಮಾತನಾಡಿದರು. ಅವರೊಂದಿಗೆ ಚಿಕಿತ್ಸೆ ಪಡೆದ ರೋಗಿಯು ಸಹ ಭಾಗವಹಿಸಿ, ಕಾಯಿಲೆ ಪತ್ತೆಯಾಗದ ಆತಂಕದ ದಿನಗಳಿಂದ ಹಿಡಿದು ರೋಗನಿರ್ಣಯದವರೆಗಿನ ತಮ್ಮ ಅನುಭವವನ್ನು ಹಂಚಿಕೊಂಡರು.

54 ವರ್ಷದ ಗೃಹಿಣಿ ಶ್ರೀಮತಿ ತಾಯಮ್ಮ ಅವರು ಕಳೆದ ಹಲವು ತಿಂಗಳುಗಳಿಂದ ಜ್ವರ ಮತ್ತು ನಿರಂತರ ಕೆಮ್ಮಿನಿಂದ ಬಳಲುತ್ತಿದ್ದರು. ಪರೀಕ್ಷೆ ಮಾಡಿದಾಗ ಅವರ ಶ್ವಾಸಕೋಶದ ಅತ್ಯಂತ ಸೂಕ್ಷ್ಮ ಪ್ರದೇಶದಲ್ಲಿ (ಎದೆಯ ಮಧ್ಯಭಾಗ) ಒಂದು ಗೆಡ್ಡೆ ಇರುವುದು ಪತ್ತೆಯಾಯಿತು. ಇದು ಹೃದಯ ಮತ್ತು ಶ್ವಾಸಕೋಶದ ನಡುವಿನ ಬಹಳ ಕಿರಿದಾದ ಜಾಗವಾದ್ದರಿಂದ, ಸಾಮಾನ್ಯ ಪರೀಕ್ಷೆಗಳಿಂದ ನಿಖರವಾದ ಮಾಹಿತಿ ತಿಳಿಯುತ್ತಿರಲಿಲ್ಲ. ಹಲವು ಆಸ್ಪತ್ರೆಗಳಿಗೆ ಹೋಗಿದ್ದರೂ ಕಾಯಿಲೆ ಏನೆಂದು ಪತ್ತೆಯಾಗದೆ ಕುಟುಂಬದವರು ಆತಂಕಕ್ಕೆ ಒಳಗಾಗಿದ್ದರು.

ಈ ಬಗ್ಗೆ ಮಾತನಾಡಿದ ಶ್ರೀಮತಿ ತಾಯಮ್ಮ, "ಹಲವು ಆಸ್ಪತ್ರೆಗಳಿಗೆ ಹೋಗಿ ಪರೀಕ್ಷೆ ಮಾಡಿಸಿಕೊಂಡರೂ ನಮಗೆ ಸರಿಯಾದ ಉತ್ತರ ಸಿಕ್ಕಿರಲಿಲ್ಲ. ಪ್ರತಿ ಪರೀಕ್ಷೆಯೂ ನಮ್ಮ ಆತಂಕವನ್ನು ಹೆಚ್ಚಿಸುತ್ತಿತ್ತು. ಕೊನೆಗೆ ಮೈಸೂರಿನ ಮಣಿಪಾಲ್ ಆಸ್ಪತ್ರೆಗೆ ಬಂದು ಡಾ. ಲಕ್ಷ್ಮಿ ನರಸಿಂಹನ್ ಅವರನ್ನು ಭೇಟಿಯಾದೆವು. ಅವರು ಈ ಹೊಸ ತಂತ್ರಜ್ಞಾನದ ಬಗ್ಗೆ ನಮಗೆ ಧೈರ್ಯ ನೀಡಿದರು. ‘ಇಬಸ್’ ಪರೀಕ್ಷೆಯ ನಂತರ ನಮಗೆ ಕಾಯಿಲೆಯ ಸರಿಯಾದ ಮಾಹಿತಿ ತಿಳಿಯಿತು. ಈಗ ನಾನು ಗುಣಮುಖಳಾಗುತ್ತಿದ್ದೇನೆ ಮತ್ತು ಮುಂದಿನ ಚಿಕಿತ್ಸೆಯ ಬಗ್ಗೆ ನನಗೆ ಭರವಸೆ ಮೂಡಿದೆ," ಎಂದು ವಿವರಿಸಿದರು.

ಡಾ. ಲಕ್ಷ್ಮಿ ನರಸಿಂಹನ್ ಆರ್, ಕನ್ಸಲ್ಟೆಂಟ್ – ಶ್ವಾಸಕೋಶ ವಿಭಾಗ ಅವರು ಈ ತಂತ್ರಜ್ಞಾನದ ಬಗ್ಗೆ ವಿವರಿಸುತ್ತಾ, "ನಮ್ಮ ಎದೆಯ ಭಾಗದಲ್ಲಿ ಹೃದಯ, ಶ್ವಾಸಕೋಶ ಮತ್ತು ಪ್ರಮುಖ ರಕ್ತನಾಳಗಳಿರುವ ಜಾಗದಲ್ಲಿ ಉಂಟಾಗುವ ಸಮಸ್ಯೆಗಳನ್ನು ಪತ್ತೆಹಚ್ಚುವುದು ಸವಾಲಿನ ಕೆಲಸವಾಗಿತ್ತು. ಹಿಂದೆ ಇಂತಹ ಸಂದರ್ಭಗಳಲ್ಲಿ ಶಸ್ತ್ರಚಿಕಿತ್ಸೆ ಅನಿವಾರ್ಯವಾಗಿತ್ತು. ಆದರೆ ಇಬಸ್ ತಂತ್ರಜ್ಞಾನದಲ್ಲಿ ಶಸ್ತ್ರಚಿಕಿತ್ಸೆ ಇಲ್ಲದೆ, ಅಲ್ಟ್ರಾಸೌಂಡ್ ಸಹಾಯದಿಂದ ಶ್ವಾಸನಾಳದ ಒಳಗೆ ಹೋಗಿ, ನೈಜ ಸಮಯದಲ್ಲಿ ಗೆಡ್ಡೆ ಅಥವಾ ಸೋಂಕನ್ನು ವೀಕ್ಷಿಸಬಹುದು. ಅಲ್ಲದೆ, ಅತ್ಯಂತ ನಿಖರವಾಗಿ ಅಲ್ಲಿನ ಅಂಗಾಂಶದ ಮಾದರಿಯನ್ನು (ಟಿಶ್ಯೂ ಸ್ಯಾಂಪಲ್) ಸಂಗ್ರಹಿಸಬಹುದು. ಇದರಿಂದ ರೋಗ ಪತ್ತೆ ಸುಲಭವಾಗುತ್ತದೆ," ಎಂದರು.

ಮತ್ತೊಬ್ಬ ತಜ್ಞ ವೈದ್ಯರಾದ ಡಾ. ಸ್ಪೂರ್ತಿ ಕೆ ಮಾತನಾಡಿ, "ಇಬಸ್ ಎಂಬುದು ಕ್ಯಾನ್ಸರ್, ಕ್ಷಯರೋಗ (TB), ಮತ್ತು ಶ್ವಾಸಕೋಶದ ಗೆಡ್ಡೆಗಳನ್ನು ಪತ್ತೆಹಚ್ಚಲು ಇರುವ ಅತ್ಯಂತ ಸುರಕ್ಷಿತ ವಿಧಾನವಾಗಿದೆ. ಇದರಲ್ಲಿ ರೋಗಿಗೆ ಯಾವುದೇ ನೋವಾಗುವುದಿಲ್ಲ ಮತ್ತು ಶೀಘ್ರವಾಗಿ ಚೇತರಿಸಿಕೊಳ್ಳಬಹುದು. ಮೈಸೂರಿನ ರೋಗಿಗಳು ಇನ್ನು ಮುಂದೆ ಇಂತಹ ಪರೀಕ್ಷೆಗಳಿಗಾಗಿ ಬೆಂಗಳೂರಿನಂತಹ ದೊಡ್ಡ ನಗರಗಳಿಗೆ ಹೋಗುವ ಅಗತ್ಯವಿಲ್ಲ," ಎಂದು ತಿಳಿಸಿದರು.

ಮೈಸೂರಿನ ಮಣಿಪಾಲ್ ಆಸ್ಪತ್ರೆಯ ನಿರ್ದೇಶಕರಾದ ಸಂದೀಪ್ ಪಟೇಲ್ ಬಿ. ಜೆ. ಅವರು ಮಾತನಾಡಿ, "ಶಸ್ತ್ರಚಿಕಿತ್ಸೆಯಿಲ್ಲದೆ ನಿಖರವಾಗಿ ಅಂಗಾಂಶದ ಮಾದರಿ ಸಂಗ್ರಹಿಸಲು ಇಬಸ್ (EBUS) ಸಹಕಾರಿ. ಇದರಿಂದ ರೋಗ ಪತ್ತೆ ವೇಗವಾಗಿ ನಡೆದು, ತಕ್ಷಣವೇ ಚಿಕಿತ್ಸೆ ಆರಂಭಿಸಬಹುದು. ಈ ಸೌಲಭ್ಯವು ಮೈಸೂರಿನಲ್ಲೇ ಲಭ್ಯವಿರುವುದರಿಂದ ರೋಗಿಗಳು ಬೇರೆ ನಗರಗಳಿಗೆ ಅಲೆದಾಡುವುದು ತಪ್ಪುತ್ತದೆ," ಎಂದರು.

"ನಗರದಲ್ಲೇ ಮೊದಲ ಬಾರಿಗೆ ಈ ಅತ್ಯಾಧುನಿಕ ತಂತ್ರಜ್ಞಾನ ಪರಿಚಯಿಸಿರುವುದು ಶ್ವಾಸಕೋಶದ ಚಿಕಿತ್ಸೆಯಲ್ಲಿ ಮಹತ್ವದ ಮೈಲಿಗಲ್ಲು. ಪ್ರಾರಂಭವಾದ ಕೇವಲ ಮೂರು ತಿಂಗಳಲ್ಲೇ 20ಕ್ಕೂ ಹೆಚ್ಚು ಸಂಕೀರ್ಣ ಪ್ರಕರಣಗಳನ್ನು ನಾವು ಯಶಸ್ವಿಯಾಗಿ ಪತ್ತೆಹಚ್ಚಿದ್ದೇವೆ. ಇದು ರೋಗಿಗಳಿಗೆ ಮನೆಗೆ ಹತ್ತಿರದಲ್ಲೇ ನಿಖರ ಮತ್ತು ಗುಣಮಟ್ಟದ ಚಿಕಿತ್ಸೆ ನೀಡುವ ನಮ್ಮ ಬದ್ಧತೆಯನ್ನು ತೋರಿಸುತ್ತದೆ," ಎಂದು ಅವರು ತಿಳಿಸಿದರು.