ತೆರಿಗೆ ವಸೂಲಾತಿ ಚುರುಕುಗೊಳಿಸಿ : ಮೈಸೂರು ಜಿಪಂ ಸಿಇಒ ನಿರ್ದೇಶನ

ನಗರದ ಜಿಲ್ಲಾ ಪಂಚಾಯಿತಿ ಸಭಾಂಗಣದಲ್ಲಿ ಬುಧವಾರ ಜಿಲ್ಲೆಯ ತಾಲೂಕು ಪಂಚಾಯಿತಿಗಳ ಕಾರ್ಯ ನಿರ್ವಹಕಾಧಿಕಾರಿಗಳು,ಪಂಚಾಯಿತಿ ಅಭಿವೃದ್ದಿ ಅಧಿಕಾರಿಗಳೊಂದಿಗೆ ಆಯೋಜಿಸಿದ್ದ ವೀಡಿಯೋ ಕಾನ್ಫರೆನ್ಸ್ ಸಭೆಯಲ್ಲಿ ಮಾತನಾಡಿ, ಕಳೆದ ವರ್ಷಕ್ಕಿಂತ ಈ ಬಾರಿ ತೆರಿಗೆ ಸಂಗ್ರಹದ ಗುರಿಮುಟ್ಟಬೇಕು. ಶೇ.50ರಿಂದ 60ರಷ್ಟು ವಸೂಲಿ ಮಾಡಿರುವ ಗ್ರಾಪಂಗಳು ಹದಿನೈದು ದಿನಗಳಲ್ಲಿ ಶೇ.90ರಷ್ಟು ವಸೂಲಿ ಮಾಡುವುದು ಕಡ್ಡಾಯ ಎಂದು ನಿರ್ದೇಶನ ನೀಡಿದರು.

ತೆರಿಗೆ ವಸೂಲಿ ಸಮರ್ಪಕವಾಗದಿದ್ದರೆ ಸಿಬ್ಬಂದಿ ವೇತನ ನೀಡಲು, ಗ್ರಂಥಾಲಯ ನಿರ್ವಹಣೆಗೆ ತೊಡಕಾಗಲಿದೆ. ತೆರಿಗೆ ವಸೂಲಾತಿ ಬಿಲ್ ಕಲೆಕ್ಟರ್ ಜವಾಬ್ದಾರಿ ಎಂದು ಪಿಡಿಒಗಳು ಹಾಗೂ ಕಾರ್ಯದರ್ಶಿಗಳು ಸುಮ್ಮನಾಗಬಾರದು. ಮನೆ ಮನೆಗೆ ತೆರಳಿ ತೆರಿಗೆ ವಸೂಲಿ ಮಾಡಬೇಕು ಎಂದರು.

ತೆರಿಗೆ ವಸೂಲಾತಿಯ ಪ್ರಗತಿಯನ್ನು ತಾಪಂ ಕಾರ್ಯ ನಿರ್ವಹಕಾಧಿಕಾರಿಗಳು ವಾರಕ್ಕೊಮ್ಮೆ ಪರಿಶೀಲಿಸಬೇಕು. ಪಿಡಿಒಗಳು ತಮ್ಮ ಜವಾಬ್ದಾರಿ ಅರಿಯಬೇಕು. ಕಳೆದ ವರ್ಷಕ್ಕಿಂತ ಈ ಬಾರಿ ಗುರಿ ಸಾಧನೆ ಮಾಡಬೇಕು. ಕೆಲವು ಪಿಡಿಒಗಳು ಕಂದಾಯ ವಸೂಲಿಗೂನಮಗೂ ಸಂಬಂಧವೇ ಇಲ್ಲದಂತೆ ಇರುವ ಬಗ್ಗೆ ಮಾಹಿತಿ ಬಂದಿದೆ. ಯಾರೇ ಆಗಿದ್ದರೂ ವಸೂಲಿಗೆ ಗಮನಹರಿಸಬೇಕು. 15 ದಿನಗಳ ಒಳಗೆ ಶೇ.90ರಷ್ಟು ವಸೂಲಿ ಮಾಡದಿದ್ದರೆ ಸರ್ಕಾರಕ್ಕೆ ಅಂತಹವರ ಮೇಲೆ ಕ್ರಮಕ್ಕೆ ಶಿಫಾರಸು ಮಾಡಲಾಗುವುದು ಎಚ್ಚರಿಕೆ ನೀಡಿದರು.

ಕೆ.ಆರ್.ನಗರ ತಾಲೂಕಿನಲ್ಲಿ ಶೇ.49ರಷ್ಟು ತೆರಿಗೆ ವಸೂಲಾತಿಯಾಗಿದ್ದು, ಚಂದಗಾಲು, ಮಾವತ್ತೂರು, ಲಾಳಂದೇದವನಹಳ್ಳಿ ಗ್ರಾಪಂನಲ್ಲಿ ಕಡಿಮೆ ವಸೂಲಿಯಾಗಿದ್ದು, ಇದಕ್ಕೆ ಕಾರಣ ಏನು ಎಂದು ಪ್ರಶ್ನಿಸಿದರು. ತೆರಿಗೆ ವಸೂಲಾತಿಯಲ್ಲಿ ತಾ.ಪಂ. ಇಒಗಳು ಕೇವಲ ಸೂಚನೆ ನೀಡುವುದರಲ್ಲಿಯೇ ಕಾಲ ಕಳೆಯಬಾರದು, ಪ್ರತಿ ಗ್ರಾಮ ಪಂಚಾಯಿತಿವಾರು ಪರಿಶೀಲಿಸಿ ಬಾಕಿ ಹೆಚ್ಚಿರುವ ಕಡೆಗಳಲ್ಲಿ ವಸೂಲಿ ಮಾಡಲು ಬೇಕಾದ ಕ್ರಮ ಗೊಳ್ಳಬೇಕು ಎಂದು ನಿರ್ದೇಶನ ನೀಡಿದರು.

ತಿ.ನರಸೀಪುರ ತಾಲೂಕಿನ ಸೋಸಲೆ, ಮೂಗೂರು, ಹೊಳೆಸಾಲು ಮತ್ತಿತರ ಪಂಚಾಯಿತಿಗಳಲ್ಲೂ ಕಡಿಮೆ ವಸೂಲಿಯಾಗಿದ್ದಕ್ಕೆ ಪಿಡಿಒಗಳನ್ನು ತರಾಟೆಗೆ ತಗೆದುಕೊಂಡರು. ಎಚ್.ಡಿ. ಕೋಟೆ ತಾಲೂಕಿನಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಹಾಡಿಗಳು ಇರುವ ಹಿನ್ನೆಲೆಯಲ್ಲಿ ತೆರಿಗೆ ವಸೂಲಾತಿ ಕಡಿಮೆಯಾಗಿದೆ ಎಂಬ ಅಭಿಪ್ರಾಯಕ್ಕೆ ಸಿಇಒ ಅಸಮಾಧಾನಗೊಂಡರು. ಉತ್ತರ ಕನ್ನಡ ಜಿಲ್ಲೆಯಲ್ಲಿ ಮೈಸೂರು ಜಿಲ್ಲೆಗಿಂತ ಹೆಚ್ಚಿನ ಸಂಖ್ಯೆಯಲ್ಲಿ ಹಾಡಿಗಳು ಇವೆ. ಅದರೆ ಅಲ್ಲಿ ಉತ್ತಮವಾಗಿ ತೆರಿಗೆ ವಸೂಲಾತಿಯಾಗುತ್ತಿದೆ. ನಮ್ಮಲ್ಲಿ ಏತಕ್ಕೆ ಆಗುತ್ತಿಲ್ಲ ಎಂದು ಪ್ರಶ್ನಿಸಿದರು.

ನಂಜನಗೂಡು ತಾಲೂಕಿನ ಹುಳಿಮಾವು ಗ್ರಾಪಂನಲ್ಲಿ ಶೇ.75ರಷ್ಟು ತೆರಿಗೆ ವಸೂಲಿಯಾಗಿದ್ದಕ್ಕೆ ಪ್ರಶಂಸೆ ವ್ಯಕ್ತಪಡಿಸಿದ ಸಿಇಒ, ಹೆಡತಲೆ, ಹೆಮ್ಮರಗಾಲ, ನೇರಳೆ ಪಂಚಾಯಿತಿಗಳಲ್ಲಿ ಏತಕ್ಕೆ ಗುರಿ ಮುಟ್ಟಿಲ್ಲ. ಬಿಲ್ ಕಲಕ್ಟರ್‌ಗಳನ್ನು ನಂಬಿ ಕೂರದೆ ನೀವು ಮನೆ ಮನೆಗೆ ಹೋದರೆ ಜನರು ಕಟ್ಟುತ್ತಾರೆ. ನೀವು ಸುಮ್ಮನೆ ಕುಳಿತರೆ ಜನರು ಕಟ್ಟುವುದಿಲ್ಲ ಎಂದರು.

ಕುಡಿಯುವ ನೀರಿನ ಸಮಸ್ಯೆ ಬಗೆಹರಿಸಿ: ಮುಂದಿನ ದಿನಗಳಲ್ಲಿ ಉಂಟಾಗುವ ಕುಡಿಯುವ ನೀರಿನ ಸಮಸ್ಯೆ ನಿವಾರಣೆಗೆ ಗ್ರಾಪಂ ಹಾಗೂ ಗ್ರಾಮೀಣ ಕುಡಿಯುವ ನೀರು ಸರಬರಾಜು ಇಲಾಖೆ ಸಮನ್ವಯತೆಯಿಂದ ಕೆಲಸ ಮಾಡಬೇಕು. ಸಾರ್ವಜನಿಕರಿಂದ ದೂರು ಬರುವ ಮುನ್ನವೇ ಪರಿಹರಿಸಬೇಕು ಎಂದು ಸಿಇಒ ಎಸ್.ಯುಕೇಶ್ ಕುಮಾರ್ ಸೂಚನೆ ನೀಡಿದರು.

ಒಂದು ವೇಳೆ ಮಾಧ್ಯಮದಲ್ಲಿ ಬಂದ ನಂತರ ಸರಿಪಡಿಸುವ ಕೆಲಸ ಮಾಡಿದರೆ ಕಠಿಣ ಕ್ರಮಜರುಗಿಸಲಾಗುವುದು. ಕುಡಿಯುವ ನೀರಿನ ಸಮಸ್ಯೆಗಳು ಇರುವ ಗ್ರಾಮಗಳನ್ನು ಗುರುತಿಸಬೇಕು. ಗ್ರಾಪಂನಲ್ಲಿ ಅನುದಾನ ಇಲ್ಲದಿದ್ದರೆ ತಾಪಂ, ಜಿಪಂ ಅನುದಾನ ಬಳಕೆಗೆ ಅವಕಾಶ ಮಾಡಿಕೊಡಲಾಗುವುದು. ಅಗತ್ಯವಿರುವ ಕಡೆಗಳಲ್ಲಿ ಹೆಚ್ಚುವರಿ ಕೊಳವೆಬಾವಿ, ಕಿರುತೊಂಬೆಗಳನ್ನು ನಿರ್ಮಾಣ ಮಾಡಬೇಕು. ಹದಿನೈದು ದಿನಗಳಿಗೊಮ್ಮೆ ಕುಡಿಯುವ ನೀರಿನ ಮಾದರಿಯನ್ನು ಪರೀಕ್ಷೆ ನಡೆಸಬೇಕು ಎಂದರು.

ಮನೆ ಪ್ರಗತಿಗೆ ಜಿಪಿಎಸ್ ಕಡ್ಡಾಯ: ವಿವಿಧ ಯೋಜನೆಗಳಡಿ ನಿರ್ಮಾಣಗೊಳ್ಳುತ್ತಿರುವ ಮನೆಗಳ ಪ್ರಗತಿ ಬಗ್ಗೆ ದಿನನಿತ್ಯ ಜಿಪಿಎಸ್ ಮಾಡಿ ಅಪ್ಲೋಡ್ ಮಾಡಬೇಕು ಎಂದು ಸಿಇಒ ಎಸ್.ಯುಕೇಶ್ ಕುಮಾರ್ ಸೂಚಿಸಿದರು. ಪಾಯದಿಂದ ಪೂರ್ಣಗೊಂಡಿರುವ ಮನೆಗಳ ಹಂತದಲ್ಲಿದ್ದರೂ ಕೆಲವು ಮನೆಗಳ ಜಿಪಿಎಸ್ ಮಾಡುತ್ತಿಲ್ಲ. ಪಾಯ, ಗೋಡೆ ಹಂತ, ಪೂರ್ಣಗೊಂಡಿರುವುದು ಇದ್ದರೆ ಆಯಾಯ ದಿನದಂದು ಅಪ್ಲೋಡ್ ಮಾಡಬೇಕು. ಜಿಪಿಎಸ್ ಮಾಡಿ ಅಪ್ಲೋಡ್ ಮಾಡದೆ ಪ್ರಗತಿಯಾಗಿದೆ ಎನ್ನುವುದನ್ನು ಒಪ್ಪಲು ಸಾಧ್ಯವಿಲ್ಲ ಎಂದರು.

ಸಭೆಯಲ್ಲಿ ಜಿ.ಪಂ. ಉಪ ಕಾರ್ಯದರ್ಶಿಗಳಾದ ಬಿ.ಎಂ.ಸವಿತಾ, ಭೀಮೇಶ್ ಕೆ.ಲಾಳಿ, ಮುಖ್ಯಯೋಜನಾಧಿಕಾರಿ ಕೆ.ಬಿ.ಪ್ರಭುಸ್ವಾಮಿ, ಪಂಚಾಯತ್‌ರಾಜ್ ಇಂಜಿನಿಯರಿಂಗ್ ಇಲಾಖೆ ಕಾರ್ಯಪಾಲಕ ಇಂಜಿನಿಯರ್ ಎಸ್.ವೀರೇಶ್, ಗ್ರಾಮೀಣ ಕುಡಿಯುವ ನೀರು ಮತ್ತು ನೈರ್ಮಲ್ಯ ಇಲಾಖೆ ಕಾರ್ಯಪಾಲಕ ಇಂಜಿನಿಯರ್ ರಾಮಸ್ವಾಮಿ, ಮುಖ್ಯ ಲೆಕ್ಕಾಧಿಕಾರಿ ಸಿದ್ದಗಂಗಮ್ಮ, ಲೆಕ್ಕಾಧಿಕಾರಿ ಮಹೇಶ್ ಹಾಗೂ ಇತರರು ಇದ್ದರು.