ಸಿದ್ದರಾಮಯ್ಯ ರಾಜೀನಾಮೆ, ತವರೂರಿನಲ್ಲಿ ತಳಮಳ

ಜನನಾಯಕ ಸಿದ್ದರಾಮಯ್ಯ ಪದತ್ಯಾಗ ಮಾಡಿರುವುದು ಮೈಸೂರು ಜಿಲ್ಲೆಯಲ್ಲಿ ನಿರಾಶೆ ಮೂಡಿಸಿದೆ. ಅಧಿಕಾರಾವಧಿ ಪೂರ್ಣಗೊಳಿಸದೆ ‘ಸಿದ್ದರಾಮನಹುಂಡಿಯ ಕಲಿ’ ನಿರ್ಗಮಿಸಿರುವುದು ತವರೂರಿನಲ್ಲಿ ಬೇಸರ ಉಂಟು ಮಾಡಿದೆ..!

ಸಿಎಂ ಸ್ಥಾನಕ್ಕೆ ಅವರು ರಾಜೀನಾಮೆ ಕೊಟ್ಟಿರುವುದರಿಂದ ‘ಮೈಸೂರು’ ಮುಖ್ಯಮಂತ್ರಿಯವರ ಜಿಲ್ಲೆ ಎಂಬ ಹಿರಿಮೆಯೂ ಕಳಚಿದೆ. ರಾಜ್ಯ ಸರ್ಕಾರದಿಂದ ವಿಶೇಷ ಒಲವು, ಪ್ರಭಾವದಿಂದ ಹೆಚ್ಚಿನ ಅನುದಾನ, ನೆರವು ಪಡೆಯುತ್ತಿದ್ದ ಜಿಲ್ಲೆ ಇನ್ನೂ ಮುಂದೆ ಸಾಮಾನ್ಯ ಜಿಲ್ಲೆಯ ಪಟ್ಟಿಗೆ ಸೇರ್ಪಡೆಯಾಗಲಿದೆ.

ಕಳೆದ 50 ವರ್ಷ ಕಾಲ ಜಿಲ್ಲೆ, ರಾಜ್ಯದ ಮೇಲೆ ರಾಜಕೀಯ ಪ್ರಭಾವ ಬೀರಿದ್ದ ಸಿದ್ದರಾಮಯ್ಯ ಕಾಂಗ್ರೆಸ್‌ನ ಹೈಕಮಾಂಡ್ ಸೂಚನೆ ಮೇರೆಗೆ ಸಿಎಂ ಸ್ಥಾನವನ್ನು ಬಿಟ್ಟುಕೊಟ್ಟಿದ್ದು, ಇದರೊಂದಿಗೆ 77 ವರ್ಷ ವಯಸ್ಸಿನ ಹುಟ್ಟುಹೋರಾಟಗಾರ ಸಿದ್ದರಾಮಯ್ಯ ಅವರ ‘ರಾಜಕೀಯದ ಯುಗಾಂತ್ಯ’ಗೊಂಡಿದೆ. ‘ಹುಲಿಯಾ’ ಸಂಧ್ಯಾ ಕಾಲದ ರಾಜಕೀಯ ಬದುಕು ಮತ್ತೊಂದು ಮಗ್ಗಲು ಬದಲಿಸಿದ್ದು, ಅಧಿಕಾರ ಕೇಂದ್ರದಿಂದ ತೆರೆಮರೆಗೆ ಸರಿಯುವಂತಾಗಿದೆ. ಇದು ಅವರ ಅಭಿಮಾನಿಗಳು, ಪಕ್ಷದ ಕಾರ್ಯಕರ್ತರಲ್ಲಿ ಕಳವಳ ಮೂಡಿಸಿದೆ.

ಸಿಎಂ ಆಗಿದ್ದಾಗ ಆಗೊಮ್ಮೆ-ಈಗೊಮ್ಮೆ ತವರೂರಿನ ಮಮಕಾರದಿಂದ ಇಲ್ಲಿಗೆ ದೌಡಾಯಿಸುತ್ತಿದ್ದ ಸಿದ್ದರಾಮಯ್ಯ ಜಿಲ್ಲೆಯ ಪ್ರಭಾವಿ ರಾಜಕಾರಣಿ. 5 ದಶಕಗಳ ರಾಜಕೀಯ ಚರಿತ್ರೆಯಲ್ಲಿ ಮಹತ್ವ ಹೆಜ್ಜೆಗುರುತುಗಳು ಮೂಡಿಸಿದ್ದಾರೆ. ಜಿಲ್ಲೆಯ ಪ್ರಮುಖ ಆಗುಹೋಗುಗಳ ಮೇಲೆ ನಿಗಾ ಇರಿಸುವ ಮೂಲಕ ಬಲವಾದ ಹಿಡಿತ ಹೊಂದಿದ್ದ ಅವರು ಇನ್ನೂ ಮುಂದೆ ‘ಮಾಜಿ ಸಿಎಂ’ ಎಂಬುದನ್ನು ಅವರ ಅಭಿಮಾನಿಗಳಿಗೆ ಅರಗಿಸಿಕೊಳ್ಳಲಾಗುತ್ತಿಲ್ಲ.

ಅಂದು ಅರಸು, ಇಂದು ಸಿದ್ದು... ಇಬ್ಬರು ಸಹ 2ನೇ ಅವಧಿಯಲ್ಲಿ ಸಿಎಂ ಆಗಿ 5 ವರ್ಷದ ಅಧಿಕಾರವನ್ನು ಪೂರೈಸಲಿಲ್ಲ ಎಂಬುದು ಕಾಕತಾಳೀಯ. ಜಿಲ್ಲೆಯ ಸಾಮಾಜಿಕ ಹರಿಕಾರ ಡಿ.ದೇವರಾಜ ಅರಸು ಅವರಂತೆ ಸಿದ್ದರಾಮಯ್ಯ ಅವರಿಗೂ 2ನೇ ಸಲ ಸಿಎಂ ಆಗಿ ಅವಧಿ ಪೂರ್ಣಗೊಳಿಸಲು ಸಾಧ್ಯವಾಗಲಿಲ್ಲ.

ಅರಸು ಬಳಿಕ ಜಿಲ್ಲೆಯಿಂದ 2ನೇ ಸಲ ಸಿಎಂ ಹುದ್ದೆ ಪಡೆದ 2ನೇ ನಾಯಕ ಎಂಬ ಕೀರ್ತಿಗೆ ಸಿದ್ದರಾಮಯ್ಯ ಭಾಜನರಾದವರು. 1972ರಲ್ಲಿ ಮೊದಲ ಬಾರಿಗೆ ಮುಖ್ಯಮಂತ್ರಿಯಾದ ಡಿ.ದೇವರಾಜ ಅರಸು ಅವಧಿ ಪೂರ್ಣಗೊಳಿಸಿದ್ದರು. 1978ರಲ್ಲಿ 2ನೇ ಸಲ ಆಯ್ಕೆಯಾದಾಗ ಅವಧಿ ಪೂರ್ಣಗೊಳಿಸಲು ಸಾಧ್ಯವಾಗಲಿಲ್ಲ. ಇಂದಿರಾಗಾಂಧಿ ವಿರುದ್ಧ ಸಿಡಿದೆದ್ದದ್ದು ಅರಸು ಅಧಿಕಾರ ಕಳೆದುಕೊಳ್ಳಲು ಕಾರಣವಾಯಿತು. ಇದೀಗ ಸಿದ್ದರಾಮಯ್ಯ ಹೈಕಮಾಂಡ್ ಸೂಚನೆಗೆ ತಲೆಬಾಗಿ ಅಧಿಕಾರವನ್ನು ತ್ಯಜಿಸಿದ್ದು, ಯಾವುದೇ ಗದ್ದಲ, ಗಲಾಟೆ, ರಂಪಾಟ, ನಾಟಕೀಯ ಬೆಳವಣಿಗೆಗಳಿಗೆ ಅವಕಾಶ ನೀಡದೆ ನೇಪಥ್ಯಕ್ಕೆ ಸರಿದಿರುವುದು ಅವರು ‘ಪ್ರಬುದ್ಧ ಸಿದ್ದರಾಮಯ್ಯ’ ಎಂಬುದನ್ನು ಮತ್ತೊಮ್ಮೆ ರುಜುವಾತುಪಡಿಸಿದ್ದಾರೆ. 

ಸಿಎಂ ಸಿದ್ದರಾಮಯ್ಯ ರಾಜೀನಾಮೆ ಹಿನ್ನೆಲೆಯಲ್ಲಿ ಅವರ ಹುಟ್ಟೂರು ಮೈಸೂರು ಜಿಲ್ಲೆಯ ವರುಣ ಹೋಬಳಿಯ ಸಿದ್ದರಾಮನಹುಂಡಿ ಗ್ರಾಮದಲ್ಲಿ ನೀರವ ಮೌನ ಆವರಿಸಿದೆ. 

ಗ್ರಾಮಸ್ಥರ ಮುಖದಲ್ಲಿ ಅಸಂತೋಷ ಭಾವ ಎದ್ದುಕಾಣುತ್ತಿತ್ತು. ರಾಜೀನಾಮೆಯ ಸುದ್ದಿ ಕಳೆದ ಎರಡು ದಿನಗಳಿಂದ ಹರಿದಾಡುತ್ತಿದ್ದರಿಂದ ಅವರ ಮನದಲ್ಲಿ ತಳಮಳ ಶುರುವಾಗಿತ್ತು. ಗುರುವಾರ ಮಧ್ಯಾಹ್ನದ ಹೊತ್ತಿಗೆ ಅದು ದೃಢವಾಗುತ್ತಿದ್ದಂತೆ ಬೇಸರ ಇಮ್ಮಡಿಯಾಯಿತು. ಮಾಧ್ಯಮಗಳಲ್ಲಿ ಬರುತ್ತಿದ್ದ ಕ್ಷಣಕ್ಷಣದ ರಾಜಕೀಯ ಬೆಳವಣಿಗೆಯನ್ನು ಗಮನಿಸಿದರು. ‘ನಮ್ಮೂರಿನ ಸಿಎಂ’ ಎಂಬ ಹಿರಿಮೆ-ಹೆಮ್ಮೆ ಹೊಂದಿದ್ದ ಸಿದ್ದರಾಮನಹುಂಡಿಯ ಜನರು ಈ ಘಟನೆಯಿಂದ ವ್ಯಾಕುಲಗೊಂಡರು.

ಮೈಸೂರಿನ ಟಿ.ಕೆ.ಬಡಾವಣೆಯಲ್ಲಿರುವ ಅವರ ಮನೆಯಲ್ಲೂ ಮೌನ ಆವರಿಸಿತ್ತು. ಅಹವಾಲು ಸಲ್ಲಿಸಲು ಬರುವ ಜನರ ಗಡಿಬಿಡಿ ಇಲ್ಲಿ ಕಾಣಲಿಲ್ಲ. ಹೆಚ್ಚಿನ ಸಾರ್ವಜನಿಕರೂ ಇರಲಿಲ್ಲ. ಬಂದೋಬಸ್ತ್ ಪೊಲೀಸರೂ ಕಾಣಲಿಲ್ಲ. ಸಿಎಂ ಆಗಮಿಸಿದ ಸಂದರ್ಭದಲ್ಲಿ ಬಹಳ ಜನದಟ್ಟಣೆಯಿಂದ ಕೂಡಿರುತ್ತಿದ್ದ ಈ ಮನೆ ಸುತ್ತಲಿನ ವಾತಾವರಣ ಶಾಂತವಾಗಿತ್ತು. ಇನ್ನೂ ಮುಂದೆ ಬಿರುಸಿನ ರಾಜಕೀಯ ಚಟುವಟಿಕೆಗಳು ಇಲ್ಲಿರುವುದಿಲ್ಲ.

ಸಿದ್ದರಾಮಯ್ಯ ಜೀವನಗಾಥೆಯೆಂದರೆ ಸ್ವಂತ ಪರಿಶ್ರಮದಿಂದ ಯಶಸ್ಸಿನ ಎತ್ತರಕ್ಕೆ ಏರಿದ ಸಾಮಾನ್ಯ ಮನುಷ್ಯನ ಬದುಕಿನ ಕತೆ. ಅವರು ಹುಟ್ಟಿದ್ದು ಕುಗ್ರಾಮದಲ್ಲಿ. ಹೆತ್ತವರೇನು ಪ್ರಭಾವಿಗಳಲ್ಲ. ಅವರದ್ದು ಸಾಮಾನ್ಯ ರೈತ ಕುಟುಂಬ. ಹಳ್ಳಿಗಾಡಿನ ಬದುಕಿನ ಎಲ್ಲ ಅಡೆತಡೆ ಸವಾಲಾಗಿ ಸ್ವೀಕರಿಸಿ ಮೆಟ್ಟಿನಿಂತು ಸಾಧನೆಯ ಶಿಖರ ಏರಿದವರು. 1948ರ ಆಗಸ್ಟ್ 3ರಂದು ಜನಿಸಿದ ಅವರು ಇಷ್ಟು ಎತ್ತರ ಬೆಳೆಯುತ್ತೇನೆಂದು ಅವರಿಗೂ ತಿಳಿದಿರಲಿಲ್ಲ. ಅಂದಿನ ಕಾಲದಲ್ಲಿ ಎಸ್‌ಎಸ್‌ಎಲ್‌ಸಿ ಪಾಸು ಮಾಡುವುದೇ ಕಠಿಣವಾಗಿತ್ತು. ಅಂತಹ ಪರಿಸ್ಥಿತಿಯಲ್ಲಿ ಅವರು ತಮ್ಮ ಕುಟುಂಬದಲ್ಲಿ ಪದವಿ ಪಡೆದ ಮೊದಲಿಗರಾದರು. ಭಾಷಣ ಮಾಡುವುದರಲ್ಲಿ ಸಿದ್ದರಾಮಯ್ಯ ಎತ್ತಿದ ಕೈ. ಶಾಲಾ-ಕಾಲೇಜು ದಿನಗಳಲ್ಲಿ ಉತ್ತಮ ಭಾಷಣಕಾರರಾಗಿದ್ದ ಅವರು ಸಿಎಂ ಆಗಿ ಉತ್ತಮ ಮಾತುಗಾರರಾಗಿ ನಾಡಿನ ಗಮನ ಸೆಳೆದವರು. 

ಅವರು ವೇದಿಕೆಯಲ್ಲಿ ಮಾತಿಗೆ ನಿಂತರೆ ಅಪ್ಪಟ ಮೈಸೂರು ಸೀಮೆಯ ಗ್ರಾಮ್ಯಭಾಷೆ ಹೊರಹೊಮ್ಮುತ್ತದೆ. ಆ ಶೈಲಿಯಲ್ಲೇ ಭಾಷಣ ಮಾಡಿ ಸಭಿಕರನ್ನು ಸೂಜಿಗಲ್ಲಿನಂತೆ ಸೆಳೆಯುವ ಶಕ್ತಿ ಅವರಿಗೆ ಇದೆ. ಅವರ ಮಾತು ಒರಟು, ಆದರೆ ಮನಸ್ಸು ಮಾತ್ರ ಮೃದು. ಈ ಕಾರಣಕ್ಕಾಗಿಯೇ ಸಿದ್ದರಾಮಯ್ಯನವರಿಗೆ ದೊಡ್ಡ ಅಭಿಮಾನಿ ಬಳಗವೇ ಇದೆ. ಅಂತಹ ಅಭಿಮಾನಿಗಳು ಇದೀಗ ಮೌನಕ್ಕೆ ಜಾರಿದ್ದು, ‘ಸಿದ್ದರಾಮಯ್ಯ 5 ವರ್ಷ ಸಿಎಂ ಆಗಿ ಮುಂದುವರಿದು ರಾಜ್ಯ ರಾಜಕೀಯದಲ್ಲಿ ಮೈಲುಗಲ್ಲು ಸಾಧಿಸಬೇಕು’ ಎಂಬ ಅವರ ಹಂಬಲ ಸಾಕಾರಾಗೊಳ್ಳಲಿಲ್ಲ. ಈ ನೋವು ಅವರನ್ನು ಕಾಡುತ್ತಿದೆ.

ಮುಂದಿನ ದಿನಗಳಲ್ಲಿ ಕುವೆಂಪುನಗರದ ವಿಶ್ವಮಾನವ ಜೋಡಿ ರಸ್ತೆಯಲ್ಲಿ ನಿರ್ಮಾಣಗೊಂಡಿರುವ ಹೊಸ ಮನೆಯಲ್ಲಿ ಸಿದ್ದರಾಮಯ್ಯ ವಿಶ್ರಾಂತಿ ಜೀವನ ಕಳೆಯುವ ಸಾಧ್ಯತೆ ಇದೆ. ಟಿ.ಕೆ.ಬಡಾವಣೆಯಲ್ಲಿರುವ ಈಗಿರುವ ಸಿಎಂ ಮನೆ ಮರಿಸ್ವಾಮಿ ಅವರ ಹೆಸರಿನಲ್ಲಿ ಇದೆ. ಅವರು ಅಧಿಕೃತವಾಗಿ ಸ್ವಂತ ಮನೆಯನ್ನು ಹೊಂದಿಲ್ಲ. ಈ ಕಾರಣಕ್ಕೆ ಹೊಸದಾಗಿ ಮನೆ ಕಟ್ಟಿಸಿದ್ದಾರೆ. ಇದರ ಗೃಹಪ್ರವೇಶ ಇನ್ನೂ ಆಗಿಲ್ಲ. ಇದು ಕೆಲ ಕಾರಣಕ್ಕೆ ವಿಳಂಬವಾಗಿದೆ. ಮುಂದಿನ ದಿನಗಳಲ್ಲಿ ಗೃಹಪ್ರವೇಶ ನೆರವೇರಿಸಿ ಕುಟುಂಬಸಹಿತ ಇಲ್ಲಿ ವಾಸ್ತವ್ಯ ಹೂಡಲಿದ್ದಾರೆ ಎಂದು ಅವರ ಆಪ್ತರು ತಿಳಿಸಿದ್ದಾರೆ.