ಎಸಿ ಕಚೇರಿಯಲ್ಲಿ ಶಂಕರರ ಜಯಂತಿ

ತತ್ವಶಾಸ್ತ್ರ ವಿಭಾಗದ ವಿಶ್ರಾಂತ ಪ್ರಾಧ್ಯಾಪಕ ಎಚ್.ಎಲ್.ಚಂದ್ರಶೇಖರ್ ಮಾತನಾಡಿ, ಶಂಕರರು ಜ್ಞಾನದ ಗಣಿ. ಅವರು ವಿಷಯವನ್ನು ಒಂದೇ ಸಾಲಿನಲ್ಲೂ(ಸೂತ್ರ) ಪ್ರಸ್ತುತಪಡಿಸಬಲ್ಲರು. ಪುಟಗಟ್ಟಲೆಯೂ ತಿಳಿಸಬಲ್ಲವರಾಗಿದ್ದರು. ಪ್ರತಿಯೊಬ್ಬರಲ್ಲೂ ಜ್ಞಾನದ ಬೆಳಕು ಇದೆ. ಬೆಳಕು ಎಲ್ಲೋ ಹೊರಗಡೆ ಇಲ್ಲ. ಅದು ನಮ್ಮೊಳಗೆ ಇದೆ. ಜ್ಞಾನದ ಬೆಳಕಿನ ಮುಂದೆ ಸೂರ್ಯಚಂದ್ರರ ಬೆಳಕೂ ಏನೂ ಅಲ್ಲ. ನಾವೆಲ್ಲರೂ ಬೆಳಕಿನ ಕಿಡಿಗಳು, ನಮ್ಮೊಳಗೆ ಇರುವುದು ದೈವ. ಜ್ಞಾನವೊಂದೇ ಸಾಕು ಮುಕ್ತಿಗೆ ಎಂಬ ಮಾತಿಗೆ ಅವರು ಅನ್ವರ್ಥವಾಗಿ ಇದ್ದರು. ಯಾವುದು ನಾನು, ಯಾವುದೂ ನಾನಲ್ಲ, ಯಾವುದು ಸತ್ಯ, ಯಾವುದು ಅಸತ್ಯ ಎನ್ನುವ ವಿವೇಚನೆಯೇ ವಿಚಾರವಾಗಿದ್ದು, ಇಂತಹ ವಿಚಾರವನ್ನು ತಿಳಿದವರೇ ಜ್ಞಾನಯೋಗಿಗಳು ಎನ್ನಲಾಗುತ್ತದೆ. ಹೀಗಾಗಿಯೇ ಶಂಕರರು ಲೋಕಶಂಕರರಾದರು ಎಂದರು.

ಅಧ್ಯಕ್ಷತೆ ವಹಿಸಿದ್ದ ತಹಸೀಲ್ದಾರ್ ಜೆ.ಮಂಜುನಾಥ್ ಮಾತನಾಡಿ, ಸನಾತನ ಧರ್ಮದ ಪುನರುತ್ಥಾನ ಮಾಡಿದ ಶ್ರೀಶಂಕರರು ತಮ್ಮ ಅಲ್ಪ ಜೀವತಾವಧಿಯಲ್ಲೇ ಶತಶತಮಾನಗಳೇ ಕಳೆದರೂ ಪ್ರಸ್ತುತತೆ ಪಡೆಯುತ್ತಿರುವುದು ಅವರ ಸಾಧನೆಯ ಹಿರಿಮೆ ತೋರುತ್ತದೆ. ತರ್ಕದಲ್ಲಿ ಮಂಡನಾಮಿಶ್ರರನ್ನೇ ಸೋಲಿಸಿದ ಖ್ಯಾತಿ ಶಂಕರರದ್ದಾಗಿತ್ತು. ಅಹಂ ಬ್ರಹ್ಮಾಸ್ಮಿ ಎನ್ನುವ ಮೂಲಕ ಅದ್ವೈತ ಸಿದ್ಧಾಂತ ಪ್ರತಿಪಾದಿಸಿ ಆತ್ಮ ಮತ್ತು ಬ್ರಹ್ಮ ಎರಡೂ ಒಂದೇ ಎನ್ನುವ ಅರಿವನ್ನು ಜಗತ್ತಿಗೆ ನೀಡಿದರು ಎಂದರು.

ಬ್ರಾಹ್ಮಣ ಸಭಾದ ತಾಲೂಕು ಅಧ್ಯಕ್ಷ ಭಾಸ್ಕರಭಟ್ ಮಾತನಾಡಿದರು. ವಿಪ್ರ ವನಿತಾ ವೇದಿಕೆಯ ಅಧ್ಯಕ್ಷೆ ಸತ್ಯವತಿ, ಪ್ರಧಾನ ಕಾರ್ಯದರ್ಶಿ ಕಮಲಮ್ಮ, ಮುಖಂಡರಾದ ರಾಧಾಕೃಷ್ಣ, ವಿ.ಎನ್.ದಾಸ್, ಸ್ಟುಡಿಯೋ ಸುಂದರ್, ಕಟ್ಟೆಮಳಲವಾಡಿ ಶಿವಶಂಕರ್, ಗಿರೀಶ್, ನಾಗಭೂಷಣ್, ನಾಗರಾಜ್, ವಾಸುಕಿ, ಸಚ್ಚಿತ್, ಸಂಪತ್‌ಕುಮಾರ್, ಶಿರಸ್ತೇದಾರ್ ಶ್ರೀಪಾದ್ ನಲವತ್ ವಾಡಕರ್, ಸಮಿತಿ ಸದಸ್ಯರಾದ ಭಾಸ್ಕರ್, ಎಸ್.ಜಯರಾಂ, ಪಿ.ಆರ್.ರಾಚಪ್ಪ ಇತರರು ಇದ್ದರು.