ಈ ಭಾಗದ ಶಿಕ್ಷಣ ಸಂತನೆಂದೇ ಖ್ಯಾತಿ ಪಡೆದ ಲಕ್ಕಪ್ಪ ಸ್ವಾಮೀಜಿ ಸಂಸ್ಥೆಯನ್ನು ಸ್ಥಾಪಿಸಿದ್ದರು. 1964ರಲ್ಲಿ ಅಂದಿನ ರಾಜ್ಯ ಸರ್ಕಾರದ ಸಚಿವರಾದ ಮಲ್ಲಿಕಾರ್ಜುನಸ್ವಾಮಿ, ಬಸವಲಿಂಗಯ್ಯ ಮುಂತಾದವರು ಶಿಕ್ಷಣ ಸಂಸ್ಥೆಯ ಅಭಿವೃದ್ಧಿಗಾಗಿ ರತ್ನಪುರಿ ಗ್ರಾಮದಲ್ಲಿ 40 ಎಕರೆ ಭೂಮಿ, ಪಕ್ಕದ ಎಚ್.ಡಿ.ಕೋಟೆ ತಾಲೂಕಿನ ಬಗ್ಗವಾಡಿ ಗ್ರಾಮದಲ್ಲಿ ಹೆಣ್ಣುಮಕ್ಕಳ ಹಾಸ್ಟೆಲ್ ನಿರ್ಮಾಣಕ್ಕಾಗಿ 200 ಎಕರೆ ಭೂಮಿ ಮತ್ತು ಮೈಸೂರಿನ ಕಾಮಾಕ್ಷಿ ಆಸ್ಪತ್ರೆ ಮುಂಭಾಗ 1.25 ಎಕರೆ ಭೂಮಿಯನ್ನು ಲೀಸ್ ಆಧಾರದಡಿ ನೀಡಲಾಗಿತ್ತು. ಆದರೆ ವರ್ಷದ ಹಿಂದೆ ಸ್ವಾಮೀಜಿ ಕಾಲಾನಂತರ ಶಿಕ್ಷಣ ಸಂಸ್ಥೆ ಅವನತಿಯತ್ತ ಸಾಗಿದೆ. ಶಿಕ್ಷಣ ಸಂಸ್ಥೆಯ ಆಡಳಿತ ಮಂಡಳಿಯಲ್ಲಿ ಸ್ಥಳೀಯ ಮುಖಂಡರಿಗೆ ಸ್ಥಾನವಿಲ್ಲ. ಸ್ವಾಮೀಜಿ ಕುಟುಂಬದವರ ಹಸ್ತಕ್ಷೇಪ ನಡೆದಿದ್ದು, ಶಿಕ್ಷಣ ಕುಸಿಯುತ್ತಿದ್ದು, ಶೋಷಿತ ಸಮುದಾಯಕ್ಕೆ ಆಶಾಕಿರಣವಾಗಿದ್ದ ಈ ಸಂಸ್ಥೆ ಅವನತಿಯತ್ತ ಸಾಗಿದೆ ಎಂದು ಶುಕ್ರವಾರ ಸುದ್ದಿಗೋಷ್ಟಿಯಲ್ಲಿ ಬೇಸರ ವ್ಯಕ್ತಪಡಿಸಿದರು.
