ಎಸ್.ಜಾನಕಿ ಅಂತ್ಯಕ್ರಿಯೆ ಸ್ಥಳಕ್ಕೆ ಅಭಿಮಾನಿಗಳ ದಂಡು

ಜು.11ರಂದು ನಿಧನರಾದ ಜಾನಕಿ ಅವರ ಅಂತ್ಯಕ್ರಿಯೆ ಜು.12ರಂದು ಸಂಜೆ ಎಚ್.ಡಿ.ಕೋಟೆ ತಾಲೂಕಿನ ಕಣಿಯನಹುಂಡಿಯಲ್ಲಿರುವ ಅಭಿಮಾನಿ ನವೀನ್ ಅವರ ತೋಟದಲ್ಲಿ ನಡೆದಿದೆ.

 ಅವರು ಪಂಚಭೂತಗಳಲ್ಲಿ ಲೀನರಾದ ನಂತರವೂ ಅಭಿಮಾನಿಗಳ ದಂಡು ಹರಿದು ಬರುವುದು ನಿಂತಿಲ್ಲ. ಮೈಸೂರು ಸೇರಿದಂತೆ ರಾಜ್ಯದ ವಿವಿಧ ಭಾಗಗಳಿಂದ, ತಮಿಳುನಾಡು ಹಾಗೂ ಆಂಧ್ರಪ್ರದೇಶದಿಂದ ದಿನವೂ ಅಭಿಮಾನಿಗಳು ಇಲ್ಲಿಗೆ ದೌಡಾಯಿಸಿ ಕಂಬನಿ ಮಿಡಿಯುತ್ತಿದ್ದಾರೆ. ಈಗ ಈ ತಾಣ ಅಭಿಮಾನಿಗಳ ಪಾಲಿಗೆ ಪುಣ್ಯಕ್ಷೇತ್ರವಾಗಿ ಪರಿವರ್ತನೆಗೊಂಡಿದೆ.

ಈ ಸ್ಥಳವನ್ನು ಸ್ಮಾರಕ ಮಾಡುವ ಉದ್ದೇಶವನ್ನು ಇಟ್ಟುಕೊಳ್ಳಲಾಗಿದೆ. ಅಲ್ಲಿಯವರೆಗೆ ಚಿತಾ ಭಸ್ಮವನ್ನು ಸುರಕ್ಷಿತವಾಗಿ ಸಂರಕ್ಷಿಸಲು ಅದರ ಸುತ್ತ ತಾತ್ಕಾಲಿಕ ಕಟ್ಟೆ ನಿರ್ಮಿಸಿ, ಮಳೆ-ಗಾಳಿಯಿಂದ ಹಾನಿಯಾಗದಂತೆ ವ್ಯವಸ್ಥೆ ಮಾಡಲಾಗಿದೆ.

ಎಸ್.ಜಾನಕಿ ಅವರ ಸ್ಮರಣಾರ್ಥ ಸಂಗೀತ ಕಾರ್ಯಕ್ರಮ ಆಯೋಜನೆಗೂ ಚಿಂತಿಸಲಾಗಿದೆ. ಜಾನಕಿ ಅವರು ಅಕಾಲಿಕವಾಗಿ ನಿಧನರಾದ ಪುತ್ರ, ಗಾಯಕ ಮುರಳಿಕೃಷ್ಣ ಅವರ ಸ್ಮರಣಾರ್ಥ ಸಂಗೀತ ಸಂಜೆ ಏರ್ಪಡಿಸುವ ಆಸೆ ಹೊಂದಿದ್ದರು. ಡಿ.6ರಂದು ಮಾನಸಗಂಗೋತ್ರಿಯ ಬಯಲು ರಂಗಮಂದಿರದಲ್ಲಿ ಇದಕ್ಕಾಗಿ ಕಾರ್ಯಕ್ರಮವೂ ನಿಗದಿಯಾಗಿತ್ತು.