ಡಾಂಬರಿಲ್ಲದ ರಸ್ತೆಗಳಲ್ಲಿ ಸಂಚಾರ ದುಸ್ತರ

ಡಾಂಬರೀಕರಣ ಕಾಣದ ರಸ್ತೆ, ಮುರಾರ್ಜಿ ವಸತಿ ಶಾಲೆಗೆ ಹೋಗಲು ಪಾಲಕರ ಪರದಾಟ, ರಸ್ತೆ ಅಭಿವೃದ್ಧಿಗೆ ಮುಂದಾಗದ ಅಧಿಕಾರಿಗಳು, ಭರವಸೆಯಲ್ಲೇ ಕಾಲ ಕಳೆದ ಚುನಾಯಿತಿ ಪ್ರತಿನಿಧಿಗಳು...

ತಾಲೂಕಿನ ರಾಂಪುರ ಗ್ರಾಮದಲ್ಲಿರುವ ಹಿಂದುಳಿದ ವರ್ಗಗಳ ಮುರಾರ್ಜಿ ದೇಸಾಯಿ ವಸತಿ ಶಾಲೆಗೆ ಕಿತ್ತು ಹೋದ ರಸ್ತೆಯಲ್ಲಿ ಹೋಗಬೇಕಿದೆ. ಸಾಲಿಗ್ರಾಮದಿಂದ ಈ ಶಾಲೆಗೆ ಬರುವ 3 ರಸ್ತೆಗಳಲ್ಲೂ ಗುಂಡಿಗಳನ್ನು ಮುಚ್ಚಿಲ್ಲ. ಅದರಲ್ಲೂ ಕಾಳಮ್ಮನಕೊಪ್ಪಲು ದೊಡ್ಡಗ್ರಾಮ. ಇಲ್ಲಿಂದ ಮಾದಾಪುರ ವಸತಿ ಶಾಲೆ ಮಾರ್ಗವಾಗಿ ಸಾಲಿಗ್ರಾಮಕ್ಕೆ ಬರುವ ಮುಖ್ಯ ರಸ್ತೆ ಈವರೆಗೂ ಡಾಂಬರ್ ಕಂಡಿಲ್ಲ. ಈ ಮಾರ್ಗದ ರಸ್ತೆಯಲ್ಲಿ ನಿತ್ಯ ಸಂಚರಿಸುವ ಜನರ ಪರಿಸ್ಥಿತಿ ಹೇಳತೀರದು.

ಸಾಲಿಗ್ರಾಮದಿಂದ ರಾಂಪುರ ಬಡಾವಣೆ, ರಾಂಪುರ ಮಾರ್ಗವಾಗಿ ಮಾದಾಪುರ, ದಡದಹಳ್ಳಿ, ಕಾಳಮ್ಮನ ಕೊಪ್ಪಲಿಗೆ 7 ಕಿ.ಮೀ. ಅಂತರವಿದೆ. ಈ ಮಾರ್ಗವಾಗಿ ಬೆಳಗ್ಗೆ, ಸಂಜೆ ಮಾತ್ರ ಒಂದು ಬಸ್ ಸಂಚರಿಸುತ್ತದೆ. ಇನ್ನುಳಿದ ಸಮಯದಲ್ಲಿ ಬಸ್ ವ್ಯವಸ್ಥೆ ಇಲ್ಲ. ಬಾಡಿಗೆಗೆ ಆಟೋಗಳನ್ನು ಮಾಡಿಕೊಂಡು ಹೋಗಬೇಕಾಗುತ್ತದೆ. ಹಾಗಾಗಿ ಜನರು ಓಡಾಡಲು ಬಹಳ ಕಷ್ಟವಾಗಿದೆ.

ಕಾಳಮ್ಮನ ಕೊಪ್ಪಲು ಮತ್ತು ಮಾದಾಪುರ ಮಾರ್ಗ ವಸತಿ ಶಾಲೆಗೆ ತೆರಳುವ ರಸ್ತೆ ಒಮ್ಮೆಯೂ ಡಾಂಬರ್ ಕಂಡಿಲ್ಲ. ರಸ್ತೆಯಲ್ಲಿ ಕಲ್ಲುಗಳು ಎದ್ದು ಮಂಡಿಯುದ್ದ ಗುಂಡಿಗಳು ಬಿದ್ದಿವೆ. ವಾಹನ ಸವಾರರು ಪರದಾಡಬೇಕಿದೆ. ಕಾಳಮ್ಮನ ಕೊಪ್ಪಲಿನ ತನಕ ಅಭಿವೃದ್ಧಿ ಮಾಡಿದರೆ ಮುಂದಕ್ಕೆ ಶೀಗೆವಾಳು, ಸಾಲಕೊಪ್ಪಲು, ದೊಡ್ಡಕೊಪ್ಪಲು ಗ್ರಾಮಗಳಿಗೂ ಹೋಗಬಹುದು. ಅಲ್ಲಿಂದ ರಸ್ತೆ ಆಗಿದೆ. ಸಾಲಿಗ್ರಾಮ ಪಟ್ಟಣಕ್ಕೆ ಬರಬೇಕಾದರೆ ಈ ಮಾರ್ಗವೇ ಹತ್ತಿರವಾದ ರಸ್ತೆ ಇದಾಗಿದೆ.

ಸಾರಿಗೆ ಬಸ್ ಕೊರತೆ:

ಈ ಮಾರ್ಗಕ್ಕೆ ಈ ಹಿಂದೆ ಶಾಸಕರಾಗಿದ್ದ ಸಾ.ರಾ.ಮಹೇಶ್ ಅವರು ರಾಂಪುರ-ಮಾದಾಪುರ-ದಡದಹಳ್ಳಿ-ಸಾಲಿಗ್ರಾಮ ಮಾರ್ಗವಾಗಿ ಶಾಲಾ ಮಕ್ಕಳ ಅನುಕೂಲಕ್ಕೆ ಬೆಳಗ್ಗೆ, ಸಂಜೆ ಒಂದು ಬಸ್ ವ್ಯವಸ್ಥೆ ಮಾಡಿಸಿದ್ದರು. ಇದು ಶಾಲಾ ಮಕ್ಕಳಿಗೆ ಅನುಕೂಲವಾಯಿತು ಜನರಿಗೆ ಅನುಕೂಲವಾಗಲಿಲ್ಲ. ಏಕೆಂದರೆ ಸಾಲಿಗ್ರಾಮ ಪಟ್ಟಣಕ್ಕೆ ಜನ ಸಂಪರ್ಕ ಮಾಡುವ ಸಮಯ ಇದ್ದರೆ 10 ಗಂಟೆ ಮೇಲೆ ಸಂಜೆಯವರೆಗೆ. ಆ ಸಮಯದಲ್ಲಿ ಬಸ್ ಇಲ್ಲದ ಕಾರಣ ಜನರು ಬಾಡಿಗೆ ಆಟೋಗಳನ್ನು ಅವಲಂಬಿಸಬೇಕಿತ್ತು. ಈ ಮಾರ್ಗದ ರಸ್ತೆಯಲ್ಲೇ ವಸತಿ ಶಾಲೆ ಇರುವುದರಿಂದ ತಾಲೂಕು ಸೇರಿದಂತೆ ಹೊರ ಜಿಲ್ಲೆಗಳಿಂದಲೂ ಮಕ್ಕಳನ್ನು ಈ ಶಾಲೆಗೆ ಸೇರಿಸಿದ್ದಾರೆ. ಮಕ್ಕಳು ಸಮಯಕ್ಕೆ ಬರಲು ಸಾಧ್ಯವಾಗದೆ ಕಷ್ಟಪಡುವಂತಾಗಿದೆ. ಕೂಡಲೇ ಸಂಬಂಧಪಟ್ಟ ಅಧಿಕಾರಿಗಳು ಬಸ್ ವ್ಯವಸ್ಥೆ ಕಲ್ಪಿಸಬೇಕು ಎಂದು ಭಾಗದ ಜನರು ಒತ್ತಾಯಿಸಿದ್ದಾರೆ.

ವಸತಿ ಶಾಲೆಗಳಿಗೆ ಈಗಾಗಲೇ ಆರನೇ ತರಗತಿಗೆ ಪ್ರವೇಶಗಳು ನಡೆಯುತ್ತಿದ್ದು ಜಿಲ್ಲೆ ಮತ್ತು ತಾಲೂಕುಗಳಿಂದ ಶಾಲೆಗೆ ಪಾಲಕರು ಅರ್ಜಿ ಸಲ್ಲಿಸಲು ಬರುತ್ತಿದ್ದಾರೆ. ಬಸ್ ಸೌಲಭ್ಯವಿಲ್ಲದೆ ಪರದಾಡುವ ಸ್ಥಿತಿ ನಿರ್ಮಾಣವಾಗಿದೆ. ಕೆಲವರು ಖಾಸಗಿ ವಾಹನಗಳಲ್ಲಿ ತೆರಳಿದರೆ ಗ್ರಾಮಾಂತರ ಭಾಗದವರು ನಡೆದುಕೊಂಡು ಹೋಗುತ್ತಾರೆ. ಮಧ್ಯಾಹ್ನ ಸಮಯದಲ್ಲಿ ಒಂದು ಬಸ್ ರಾಂಪುರ-ಮಾದಾಪುರ- ದಡದಹಳ್ಳಿ-ಕಾಳಮ್ಮನ ಕೊಪ್ಪಲು-ಬೆಟ್ಟಳ್ಳಿ ಮಾರ್ಗವಾಗಿ ಸಂಚರಿಸುವ ವ್ಯವಸ್ಥೆ ಮಾಡಿದರೆ ಶಾಲಾ ಮಕ್ಕಳು, ಸಾರ್ವಜನಿಕರಿಗೆ ಅನುಕೂಲವಾಗಲಿದೆ.