ಶಿಸ್ತು, ಸಂಯಮ, ರೂಢಿಸಿಕೊಳ್ಳಿ: ಡಾ.ನಾ. ಸೋಮೇಶ್ವರ ಕಿವಿಮಾತು

 ಮೈಸೂರು: ವಿದ್ಯಾರ್ಥಿಗಳು ಶಿಸ್ತು, ಸಂಯಮ, ಸಮಯಪಾಲನೆ, ನಿಯಮಪಾಲನೆ, ಏಕಾಗ್ರತೆಯ ಮನೋಭಾವ ಜೀವನದಲ್ಲಿ ರೂಢಿಸಿಕೊಳ್ಳಬೇಕು ಎಂದು ದೂರದರ್ಶನ-ಚಂದನ ವಾಹಿನಿಯ ಥಟ್ ಅಂತ ಹೇಳಿ ಕಾರ್ಯಕ್ರಮದ ನಿರೂಪಕ ಡಾ.ನಾ. ಸೋಮೇಶ್ವರ ಹೇಳಿದರು. 

ನಗರದ ಊಟಿ ರಸ್ತೆಯಲ್ಲಿರುವ ಜೆಎಸ್‌ಎಸ್ ಕಲಾ, ವಾಣಿಜ್ಯ ಮತ್ತು ವಿಜ್ಞಾನ ಕಾಲೇಜಿನಲ್ಲಿ ಶನಿವಾರ ಆಯೋಜಿಸಿದ್ದ ಸ್ನಾತಕೋತ್ತರ ವಿಭಾಗದ ಸಾಂಸ್ಕೃತಿಕ ಮತ್ತು ಕ್ರೀಡಾ ವೇದಿಕೆಗಳ ಸಮಾರೋಪ ಕಾರ್ಯಕ್ರಮದಲ್ಲಿ ಮಾತನಾಡಿದರು.

ಸಾಧಕರ ಚರಿತ್ರೆಗಳನ್ನು ಅಧ್ಯಯನ ಮಾಡಬೇಕು. ಚರಿತ್ರೆಯಲ್ಲಿ ಗೆದ್ದವರ ಕಥೆಯಷ್ಟೆ ಇರುವುದಿಲ್ಲ. ಸೋತವರ ಕಥೆಯೂ ಇದೆ. ಅದರಿಂದಲೂ ಕಲಿಯುವುದು ಸಾಕಷ್ಟಿದೆ.

 ಗೆದ್ದವರ ಬದುಕಿನ ಸ್ಫೂರ್ತಿಯೊಂದಿಗೆ ಸೋತವರ ಬದುಕಿನ ಅಧ್ಯಯನವೂ ಆಗುತ್ತಿರಬೇಕು. ಸೋಲಿಗೆ ಹೆದರಬಾರದು, ಮತ್ತೆ ಪ್ರಯತ್ನಿಸಬೇಕು. ಗೆದ್ದವರು ಬೀಗಬಾರದು. ತಮ್ಮ ಮುಂದಿನ ಮಹತ್ವದ ಜವಾಬ್ದಾರಿ, ಸವಾಲು, ಎಚ್ಚರಿಕೆಯಿಂದ ಅರಿಯುತ್ತಿರಬೇಕು. ವಿದ್ಯಾರ್ಥಿಗಳು ಅರ್ಜುನನಂತೆ ಸವ್ಯಸಾಚಿ ಗುಣ ಬೆಳೆಸಿಕೊಳ್ಳಬೇಕು ಎಂದರು.

 ಸಾಂಸ್ಕೃತಿಕ ಮತ್ತು ಕ್ರೀಡಾ ಚಟುವಟಿಕೆ ವಿದ್ಯಾರ್ಥಿಗಳ ಸರ್ವತೋಮುಖ ಬೆಳವಣಿಗೆಗೆ ಸದಾ ಸಹಕಾರಿ. ಎಲ್ಲ ಶಿಕ್ಷಣ ಸಂಸ್ಥೆಗಳು ಇದನ್ನು ಪಠ್ಯಪೂರಕ ಚಟುವಟಿಕೆ ಎಂದು ಭಾವಿಸಬೇಕು. 

ಮಾನವನ ಮೆದುಳು ರಚನೆಯಲ್ಲಿ ಎಡ ಮತ್ತು ಬಲ ಅರೆಗೋಳಗಳು ವಿಭಿನ್ನವಾಗಿ ಕಾರ್ಯ ನಿರ್ವಹಿಸುತ್ತವೆ. ಎಡ ಅರೆಗೋಳದ ಮೆದುಳು ತಾರ್ಕಿಕವಾಗಿ ಯೋಚಿಸಿದರೆ, ಬಲ ಅರೆಗೋಳದ ಮೆದುಳು ಭಾವನಾತ್ಮಕವಾಗಿ ಯೋಚಿಸುತ್ತದೆ. ಆ ಕಾರಣಕ್ಕೆ ಇವುಗಳ ಬೆಳವಣಿಗೆಯಂತೆ ಮನುಷ್ಯರ ವರ್ತನೆಗಳು ಇರುತ್ತವೆ ಎಂದು ಅಭಿಪ್ರಾಯಿಸಿದರು.

ಮೆದುಳಿನ ಬೆಳವಣಿಗೆಯಲ್ಲಿ ಸಾಂಸ್ಕೃತಿಕ ಮತ್ತು ಕ್ರೀಡಾ ಚಟುವಟಿಕೆಗಳ ಪಾತ್ರ ಮಹತ್ವವದ್ದಾಗಿದೆ. ಸರಿಯಾದ ಅಧ್ಯಯನ ಕ್ರಮ ಅನುಸರಿಸಿ ಸ್ಪರ್ಧಾತ್ಮಕ ಪರೀಕ್ಷೆಗಳಲ್ಲಿ ಯಶಸ್ಸು ಪಡೆಯಬಹುದು. ಸಮಸ್ಯೆ ಬಂದಾಗ ಹೆದರಬೇಡಿ, ತಾಳ್ಮೆಯಿಂದ ಯೋಚಿಸಿ. ಮುಂದಿನ ಔದ್ಯೋಗಿಕ ಬದುಕಿನಲ್ಲೂ ಶಿಸ್ತನ್ನು ಬಿಡಬಾರದು. ಭಾರತೀಯ ಸೇನೆಯಲ್ಲಿ ಉದ್ಯೋಗವಕಾಶಗಳಿವೆ.

 ಅವುಗಳನ್ನು ಸಮರ್ಥವಾಗಿ ಬಳಸಿಕೊಳ್ಳಿ. ಪ್ರತಿದಿನ ಕೌಶಲ ವೃದ್ಧಿಸಿಕೊಳ್ಳಿ, ನೈತಿಕತೆ ಬಲಗೊಳಿಸಿಕೊಳ್ಳಬೇಕು. ಬದುಕಿನಲ್ಲಿ ಸಮತೋಲನ ಸಾಧಿಸುವುದನ್ನು ಅಭ್ಯಾಸಮಾಡಿಕೊಳ್ಳಬೇಕು.  ಭಾವನೆ ವ್ಯಕ್ತಪಡಿಸುವಾಗ ಸದಾ ಪ್ರಜ್ಞಾವಂತರಾಗಿ ವ್ಯಕ್ತಪಡಿಸಬೇಕು ಎಂದು ವಿದ್ಯಾರ್ಥಿಗಳಿಗೆ ಕಿವಿಮಾತು ಹೇಳಿದರು

ಯೋಗಪಟು ಎಚ್.ಖುಷಿ  ಮಾತನಾಡಿ, ಯೋಗ ಅಭ್ಯಾಸದಿಂದ ವಿಭಿನ್ನವಾದ ವ್ಯಕ್ತಿತ್ವ ರೂಪುಗೊಳ್ಳುತ್ತದೆ. ದೇಹ ಮತ್ತು ಮನಸ್ಸಿನ ಮೇಲಿನ ನಿಯಂತ್ರಣ ಸಾಧಿಸಬಹುದು. ಯೋಗ ಅಭ್ಯಾಸದಿಂದ ಸಣ್ಣತನ, ದ್ವೇಷ, ಅಸೂಯೆ ಮುಂತಾದವುಗಳಿಂದ ದೂರವಿದ್ದು, ವಿಶಾಲವಾದ ವ್ಯಕ್ತಿತ್ವ ರೂಪಿಸಿಕೊಳ್ಳಬಹುದು. ಪ್ರತಿದಿನ ಮಾಡುವ ಕಾರ್ಯ ತೃಪ್ತಭಾವ ಮೂಡಿಸಬೇಕು. ಗೆಲುವು, ಸಾಧನೆಯ ಜತೆಯಲ್ಲಿ ಸರಳತೆಯ ಗುಣ ರೂಪಿಸಿಕೊಳ್ಳಬೇಕು ಎಂದು ಹೇಳಿದರು. 

ಕಾಲೇಜಿನ ಮುಖ್ಯ ಕಾರ್ಯನಿರ್ವಾಹಕ ಪ್ರೊ.ಬಿ.ವಿ. ಸಾಂಬಶಿವಯ್ಯ ಮಾತನಾಡಿ, ಸಾಂಸ್ಕೃತಿಕ ಮತ್ತು ಕ್ರೀಡಾ ಚಟುವಟಿಕೆಗಳಿಂದ ಸಂಘಟನಾ ಚತುರತೆ, ನಾಯಕತ್ವದ ಗುಣ, ಧೈರ್ಯ, ಆತ್ಮವಿಶ್ವಾಸ, ವಿಭಿನ್ನವಾಗಿ ಆಲೋಚಿಸುವ ಮನಸ್ಥಿತಿ ಬರುತ್ತದೆ ಎಂದರು.

ಎಐ ತಂತ್ರಜ್ಞಾನದಿಂದ ಉದ್ಯೋಗಗಳು ನಾಶವಾಗುತ್ತಿಲ್ಲ. ಉದ್ಯೋಗದ ಸ್ವರೂಪಗಳು ಬದಲಾಗುತ್ತಿವೆ. ಇದನ್ನು ವಿದ್ಯಾರ್ಥಿಗಳು ಸರಿಯಾಗಿ ಅರಿತುಕೊಂಡರೆ ಹಲವು ಅವಕಾಶಗಳು ದೊರೆಯುತ್ತವೆ. ವಿದ್ಯಾರ್ಥಿಗಳು ಈ ತಂತ್ರಜ್ಞಾನದ ಸಹಾಯದಿಂದ ಹೊಸ ಕೌಶಲದೊಂದಿಗೆ ಪ್ರಗತಿ ಸಾಧಿಸಬೇಕು. ಈ ತಂತ್ರಜ್ಞಾನವನ್ನು ಶತ್ರುವಾಗಿ ಕಾಣದೆ, ಅದನ್ನು ಕಲಿತು ಸಹಾಯಕ ಸಾಧನವಾಗಿ ಬಳಸಿಕೊಳ್ಳುವ ಅವಶ್ಯಕತೆ ಇದೆ  ಎಂದರು. 

ಪ್ರಾಂಶುಪಾಲ ಡಾ.ಎಂ.ಪ್ರಭು  ಮಾತನಾಡಿ, ಪ್ರತಿಭೆ, ಜ್ಞಾನ, ಚತುರತೆ, ಕೌಶಲ ಗುಣ ಬೆಳಸಿಕೊಳ್ಳಬೇಕು. ಅನಿವಾರ್ಯ ಮತ್ತು ಅವಕಾಶಗಳ ಬಗ್ಗೆ ಪ್ರಜ್ಞೆ ಇರಲಿ. ಬದುಕಿನಲ್ಲಿ ಯಾವುದೂ ಅನಿವಾರ್ಯವಲ್ಲ. ಎಲ್ಲವನ್ನು ಅವಕಾಶವಾಗಿ ನೋಡಬೇಕು ಎಂದು ವಿದ್ಯಾರ್ಥಿಗಳಿಗೆ ಹೇಳಿದರು.

ಸಾಂಸ್ಕೃತಿಕ ವೇದಿಕೆಯ ಸಂಚಾಲಕ ಡಾ.ಎಂ.ಪಿ. ಸೋಮಶೇಖರ್, ದೈಹಿಕ ನಿರ್ದೇಶಕ ಎಂ. ಕಾರ್ತಿಕ್ ಇದ್ದರು.