ಹಿಂಬಾಲಕರ ಕಳಪೆ ಸಾಹಿತ್ಯ ವಿಜೃಂಭಣೆ: ಪ್ರೊ.ಸಿದ್ದರಾಮಯ್ಯ ಕಳವಳ

ಚಾಮರಾಜನಗರದ ರಂಗವಾಹಿನಿ, ನೆಲೆ ಹಿನ್ನೆಲೆ, ಡಾ.ರಾಮಮನೋಹರ ಲೋಹಿಯಾ ಟ್ರಸ್ಟ್ ಸಹಯೋಗದಲ್ಲಿ ನಗರದ ಕಿರುರಂಗ ಮಂದಿರದಲ್ಲಿ ಭಾನುವಾರ ಆಯೋಜಿಸಿದ್ದ ಮುಳ್ಳೂರು ನಾಗರಾಜ ರಾಜ್ಯಮಟ್ಟದ 15ನೇ ವರ್ಷದ ಪ್ರಶಸ್ತಿ ಪ್ರದಾನ, ರಾಜಶೇಖರ ಕೋಟಿ ನೆನಪಿನ ಕಾರ್ಯಕ್ರಮದಲ್ಲಿ ಮಾತನಾಡಿದರು.

ಈಗಲೂ ಸಾಂಸ್ಕೃತಿಕ ಗುಲಾಮಗಿರಿ ಅನುಭವಿಸುತ್ತಿದ್ದು, ಚಾತುರ್ವಣ ಕರ್ಮ ಸಿದ್ಧಾಂತವೇ ಈಗಲೂ ರಾರಾಜಿಸುತ್ತಿದೆ. ಈ ಸಿದ್ಧಾಂತದ ನೆಲೆಯಡಿ ಪೌರಕಾರ್ಮಿಕರು ಯಾರು? ಪೌರೋಹಿತ್ಯ ಮಾಡುವವರು ಯಾರು? ಆಲೋಚನೆ ಮಾಡಬೇಕು. 

ಚಾತುರ್ವಣ ಚಿಂತನೆಯ ಶ್ರೇಷ್ಠತೆಯ ಗುಲಾಮರಾಗಿದ್ದು, ಪ್ರತಿಯೊಂದು ಮಂಗಳ ಕಾರ್ಯಕ್ಕೆ ಅಕ್ಷತೆ ಬೀಳಬೇಕು. ಈ ಮೌಢ್ಯದೊಳಗೆ ದೇಶ ನರಳುತ್ತಿದೆ. ಸಾಂಸ್ಕೃತಿಕ ದಬ್ಬಾಳಿಕೆ ವಿರುದ್ಧ ಅಂಬೇಡ್ಕರ್ ದನಿ ಎತ್ತಿದ್ದರು. ಆ ಕೂಗು ಕೇಳಿಸಿದ್ದರೆ ಬೆವರಿನ ಬದುಕು ಕಟ್ಟಿಕೊಂಡ ಜನರು ಗುಲಾಮಗಿರಿ ರಾಜಕಾರಣದ ದಾಳವಾಗುತ್ತಿರಲಿಲ್ಲ ಎಂದು ಅಸಮಾಧಾನ ವ್ಯಕ್ತಪಡಿಸಿದರು.

ಶೋಷಿತರ ಬಿಡುಗಡೆಗಾಗಿ ಬಿ.ಆರ್.ಅಂಬೇಡ್ಕರ್ ಕೊಟ್ಟ ಶಿಕ್ಷಣ, ಸಂಘಟನೆ, ಹೋರಾಟ ಸೂತ್ರವನ್ನು ಕವಿ ಮುಳ್ಳೂರು ನಾಗರಾಜು ಧ್ಯೇಯವಾಕ್ಯ ಮತ್ತು ಪ್ರಾಣವಾಕ್ಯವಾಗಿಸಿಕೊಂಡು ಜೀವಿಸಿದರು. ಆದರೆ, ಅವರಿಗೆ ವಿಮರ್ಶಾಲೋಕದಲ್ಲಿ ಸಿಗಬೇಕಾದ ಗೌರವ ಸಿಕ್ಕಿಲ್ಲ. ಇದುವೇ ನೋವಿನ ಸಂಗತಿ ಎಂದರು.

ಮುಳ್ಳೂರು ನಾಗರಾಜು ಶಿಕ್ಷಣ ಪಡೆದು ಸಂಘಟನೆಗೆ ತೊಡಗಿದರು. ಯಾವ ಕೆಲಸಕ್ಕೂ ಹೋಗಲಿಲ್ಲ. ವೈಯಕ್ತಿಕ ಜೀವನಕ್ಕಿಂತ ದಲಿತರು, ಅಸಹಾಯಕರ ಬದುಕಿಗಾಗಿ ಅವಿಶ್ರಾಂತವಾಗಿ ದುಡಿದರು. ಅಂಬೇಡ್ಕರ್ ತೋರಿದ ದಾರಿಯಲ್ಲಿ ತಮ್ಮ ಬದುಕನ್ನು ಅರ್ಪಿಸಿಕೊಂಡರು ಎಂದು ಅಭಿಪ್ರಾಯಿಸಿದರು.

ಡಿಎಸ್‌ಎಸ್ ಪ್ರಜಾಪ್ರಭುತ್ವದ ನೆಲೆಯೊಳಗಿನ ಸಂಘಟನೆ ಹೊರತು ಏಕವ್ಯಕ್ತಿಯಿಂದ ಆದ ಸಂಘಟನೆಯಲ್ಲ. ಶೋಷಿತರ ಮೇಲಿನ ಹಲ್ಲೆ, ಅತ್ಯಾಚಾರ, ಹತ್ಯೆ ಹಾಗೂ ಅಪಮಾನದ ವಿರುದ್ಧ ದಲಿತ ಸಂಘರ್ಷ ಹೋರಾಡಿದೆ. ಹಸಿವು, ಬಡತನ, ಅಭದ್ರತೆಗಳನ್ನು ಸಾಯುವ ಕೊನೆಯವರೆಗೆ ತಮ್ಮ ಬೆನ್ನಿಗೆ ಕಟ್ಟಿಕೊಂಡು ನಾಗರಾಜು ಬಾಳಿದವರು  ಎಂದು ಸ್ಮರಿಸಿಕೊಂಡರು.

ಬೆಂಗಳೂರು ನಗರ ಜಿಲ್ಲೆಯ ಎಸ್.ಮಂಜುನಾಥ್ ಅವರಿಗೆ 15ನೇ ವರ್ಷದ ಕಾವ್ಯ ಪ್ರಶಸ್ತಿಯನ್ನು ಪ್ರದಾನ ಮಾಡಲಾಯಿತು. ಬಳಿಕ ಮಾತನಾಡಿದ ಅವರು, ಮುಳ್ಳೂರು ನಾಗರಾಜ ಅತ್ಯಂತ ಪ್ರಾಮಾಣಿಕ ಹೋರಾಟದ ಜೀವಿ. ಅವರ ಸಾಹಿತ್ಯ ರೋಮಾಂಚನಗೊಳಿಸಲಿವೆ. ಶರಣ ಚಳವಳಿಯಿಂದ ಹಿಡಿದು ದಲಿತ ಸಂಘರ್ಷ ಸಮಿತಿಯ ಹೋರಾಟದವರೆಗೂ ಅವರ ಕಾವ್ಯ ಬೆಳಕು ಚೆಲ್ಲಲಿದೆ. ಅವರ ಹೆಸರಿನಲ್ಲಿ ಪ್ರಶಸ್ತಿ ಪಡೆಯುತ್ತಿರುವುದು ಸಂತಸದ ಸಂಗತಿ ಎಂದರು. 

 ಪ್ರಶಸ್ತಿ ಪುರಸ್ಕೃತರ ಕುರಿತು ಪ್ರಾಧ್ಯಾಪಕಿ ಡಾ.ತ್ರಿವೇಣಿ ಮಾತನಾಡಿದರು. ರಾಜಶೇಖರ ಕೋಟಿ ಬಗ್ಗೆ ಲೇಖಕ ಮಲ್ಕುಂಡಿ ಮಹದೇವಸ್ವಾಮಿ ಮುಳ್ಳೂರು ನಾಗರಾಜ ಮಾತನಾಡಿದರು. ಕವಿ ಸುಬ್ಬು ಹೊಲೆಯಾರ್, ಮುಳ್ಳೂರು ನಾಗರಾಜ್ ಅವರ ಪತ್ನಿ ಪುಟ್ಟಲಕ್ಷ್ಮೀ ಮತ್ತು ಪುತ್ರ ಕಿರಣ್, ನೆಲೆ ಹಿನ್ನೆಲೆ ಸಂಸ್ಥೆಯ ಕೆ.ಆರ್ ಗೋಪಾಲಕೃಷ್ಣ, ರಂಗವಾಹಿನಿ ಅಧ್ಯಕ್ಷ ಸಿ.ಎಂ ನರಸಿಂಹಮೂರ್ತಿ ಇತರರಿದ್ದರು.