ಧಾರ್ಮಿಕ ಆಚರಣೆಗಳಲ್ಲಿ ರಾಜಕಾರಣ ಸಲ್ಲದು

ಪಟ್ಟಣದಲ್ಲಿ ಹಲವು ದಿನಗಳಿಂದ ಶ್ರೀ ಗಣೇಶೋತ್ಸವ ಮೆರವಣಿಗೆ ಪೊಲೀಸ್ ಇನ್‌ಸ್ಪೆಕ್ಟರ್ ಮತ್ತು ಬಿಜೆಪಿ, ಹಿಂದೂಪರ ಸಂಘಟನೆಗಳ ಮುಖಂಡರ ನಡುವಿನ ಸಂಘರ್ಷಕ್ಕೆ ಕಾರಣವಾಗಿರುವ ಹಿನ್ನೆಲೆಯಲ್ಲಿ ಶನಿವಾರ ಕಾಂಗ್ರೆಸ್ ಕಚೇರಿಯಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದರು.

ಕಳೆದ ನಾಲ್ಕು ದಶಕಗಳಿಂದ ತಾಲೂಕಿನಲ್ಲಿ ಎಲ್ಲ ಧರ್ಮ, ಕೋಮು ಹಾಗೂ ಸಮುದಾಯಗಳ ಜನರು ಸೌಹಾರ್ದದಿಂದಲೇ ಹಬ್ಬಗಳನ್ನು ಆಚರಿಸಿಕೊಂಡು ಬಂದಿದ್ದಾರೆ. ಸಾಮರಸ್ಯ ಕದಡುವ ಕೃತ್ಯಕ್ಕೆ ಯಾರೂ ಕೈ ಹಾಕಬಾರದು ಎಂದು ಮನವಿ ಮಾಡಿದರು.

ಯುಗಾದಿ, ಶಿವರಾತ್ರಿ, ಬಕ್ರೀದ್, ಕ್ರಿಸ್‌ಮಸ್, ಬಸವ, ಬುದ್ಧ ಜಯಂತಿ ಸೇರಿದಂತೆ ವಿವಿಧ ಧರ್ಮಗಳ ಹಬ್ಬಗಳನ್ನು ಯಾವುದೇ ಗಲಾಟೆ ಅಥವಾ ಭಿನ್ನಾಭಿಪ್ರಾಯಗಳಿಲ್ಲದೆ ಜನರು ಒಗ್ಗಟ್ಟಿನಿಂದ ಆಚರಿಸಿಕೊಂಡು ಬಂದಿರುವುದು ತಿ.ನರಸೀಪುರದ ವಿಶೇಷತೆಯಾಗಿದೆ. ಸಂವಿಧಾನವು ಕೂಡ ಪ್ರತಿಯೊಬ್ಬರಿಗೂ ತಮ್ಮ ಧಾರ್ಮಿಕ ಆಚರಣೆಗಳನ್ನು ಸ್ವತಂತ್ರವಾಗಿ ನಡೆಸುವ ಹಕ್ಕು ನೀಡಿದೆ. ಇದರೊಂದಿಗೆ ವೈಜ್ಞಾನಿಕ ಚಿಂತನೆಗಳನ್ನು ಅಳವಡಿಸಿಕೊಳ್ಳುವ ಅವಕಾಶವೂ ಇದೆ. ಹೀಗಾಗಿ ಧಾರ್ಮಿಕ ಆಚರಣೆಗಳಿಗೆ ಅನಗತ್ಯವಾಗಿ ರಾಜಕೀಯ ಬಣ್ಣ ಬೆರೆಸಿ ಜನರಲ್ಲಿ ಗೊಂದಲ ಮೂಡಿಸುವುದು ಸರಿಯಲ್ಲ ಎಂದರು.

ಪೊಲೀಸ್ ಅಧಿಕಾರಿಗಳು ಕಾನೂನು ಮತ್ತು ಸುವ್ಯವಸ್ಥೆ ಕಾಪಾಡುವ ಉದ್ದೇಶದಿಂದ ನೀಡುವ ಸೂಚನೆಗಳನ್ನು ರಾಜಕೀಯ ಕಾರಣಗಳಿಗಾಗಿ ತಪ್ಪಾಗಿ ಅರ್ಥೈಸಿ ಸಂಘರ್ಷದ ವಿಚಾರವನ್ನಾಗಿ ಮಾಡಲಾಗಿದೆ. ಧಾರ್ಮಿಕ ಆಚರಣೆಗಳಲ್ಲಿ ಅನಗತ್ಯ ರಾಜಕೀಯ ಪ್ರವೇಶ ಮಾಡಿ ಧರ್ಮೀಕರಣಗೊಳಿಸುವ ಪ್ರಯತ್ನಗಳು ಸಮಾಜದಲ್ಲಿನ ಸಾಮರಸ್ಯಕ್ಕೆ ಧಕ್ಕೆ ತರಲಿದೆ ಎಂದು ಆತಂಕ ವ್ಯಕ್ತಪಡಿಸಿದರು.

ನೀಲಿ ಬಣ್ಣವು ಸ್ಥಿರತೆ, ನಂಬಿಕೆ, ಪ್ರಶಾಂತತೆ ಹಾಗೂ ಆಳದ ಸಂಕೇತವಾಗಿದೆ. ಸಾಗರ ಮತ್ತು ಆಕಾಶವನ್ನು ಪ್ರತಿಬಿಂಬಿಸುವ ನೀಲಿ ಬಣ್ಣವು ಶಾಂತಿ ಹಾಗೂ ಸಾಮರಸ್ಯದ ಸಂದೇಶವನ್ನೂ ಪ್ರತಿನಿಧಿಸುತ್ತದೆ ಎಂಬುದನ್ನು ಧರ್ಮಾಂಧತೆ ತುಂಬುವ ಜನರು ಅರ್ಥ ಮಾಡಿಕೊಳ್ಳಬೇಕು. ಕಾನೂನು ಉಲ್ಲಂಘನೆ ಅಥವಾ ವ್ಯಕ್ತಿಯ ಚಾರಿತ್ರ್ಯಕ್ಕೆ ಧಕ್ಕೆ ತರುವಂತಹ ಯಾವುದೇ ಘಟನೆಗಳು ನಡೆದಿದ್ದರೆ, ಪೊಲೀಸ್ ಇಲಾಖೆಯ ಅಧಿಕಾರಿಗಳು ಕಾನೂನು ಪ್ರಕಾರ ಸೂಕ್ತ ಕ್ರಮ ಕೈಗೊಳ್ಳಲಿದ್ದಾರೆ ಎಂದು ಎಚ್.ಸಿ.ಮಹದೇವಪ್ಪ ತಿಳಿಸಿದರು.

ಗ್ಯಾರಂಟಿ ಯೋಜನೆಗಳ ಅನುಷ್ಠಾನ ಸಮಿತಿ ಅಧ್ಯಕ್ಷ ಹಿರಿಯೂರು ವೀರೇಂದ್ರ(ನವೀನ್), ಕುರುಬರ ಸಂಘದ ಪ್ರಧಾನ ಕಾರ್ಯದರ್ಶಿ ಕೊತ್ತೇಗಾಲ ಬಸವರಾಜು, ಹಿರಿಯ ಮುಖಂಡ ಉಕ್ಕಲಗೆರೆ ಬಸವಣ್ಣ, ಸೋಸಲೆ ಮಹದೇವಸ್ವಾಮಿ, ಬಿ.ಎಂ.ಶಿವಮಲ್ಲಪ್ಪ, ತಾ.ಪಂ ಮಾಜಿ ಅಧ್ಯಕ್ಷ ಎಂ.ಮಲ್ಲಿಕಾರ್ಜುನಸ್ವಾಮಿ, ಮಾಜಿ ಸದಸ್ಯರಾದ ಕುಕ್ಕೂರು ಗಣೇಶ್, ರಾಮಲಿಂಗಯ್ಯ, ಆಪ್ತ ಸಹಾಯಕ ಬಿ.ಬಸವರಾಜು, ಮುಖಂಡರಾದ ಕೊಳತ್ತೂರು ಕುಮಾರ್, ಆರ್.ಸೋಮಣ್ಣ, ಕನ್ನಹಳ್ಳಿ ಲಕ್ಷ್ಮಣ್, ಕಲಿಯೂರು ಶಿವಣ್ಣ, ಕೆಬ್ಬೆ ರಂಗಪ್ಪ, ಅಕ್ಕೂರು ಗುರುಮೂರ್ತಿ, ಮುಸುವಿನಕೊಪ್ಪಲು ಶಿವರಾಮ್, ಕೆಬ್ಬೇಹುಂಡಿ ಮಹೇಶ, ಕೋಣಗಳ್ಳಿ ನಾಗರಾಜ್, ನರಸಿಂಹ ಮಾದನಾಯಕ, ನಾಗರಾಜ್ ಮೂರ್ತಿ, ಅಂದಾನಿಗೌಡ, ಗದ್ದೆಮೋಳೆ ಸಿದ್ದರಾಜು, ಆರ್.ಮಾದೇಶ, ದ್ವಾರಿ ಪುಟ್ಟಸ್ವಾಮಿ, ಶ್ರೀನಿವಾಸಮೂರ್ತಿ, ಮಹದೇವ ಪ್ರಸಾದ್ ಇತರರು ಇದ್ದರು.