ಸಮರ್ಥ ಶಿಕ್ಷಕ ಮಾತ್ರ ರಾಷ್ಟ್ರ ರಕ್ಷಕನಾಗಲು ಸಾಧ್ಯ

ನಗರದ ಗುರುಭವನದಲ್ಲಿ ಮಂಗಳವಾರ ಕ್ಷೇತ್ರ ಶಿಕ್ಷಣಾಧಿಕಾರಿಗಳ ಕಚೇರಿ, ಶಾಲಾ ಶಿಕ್ಷಣ, ಸಾಕ್ಷರತಾ ಇಲಾಖೆ ಸಹಯೋಗದಲ್ಲಿ ಆಯೋಜಿಸಿದ್ದ ಡಾ.ಸರ್ವಪಲ್ಲಿ ರಾಧಾಕೃಷ್ಣನ್ ಜಯಂತಿ ಸಮಾರಂಭದ ಅಧ್ಯಕ್ಷತೆ ವಹಿಸಿ ಮಾತನಾಡಿದರು.

ದೇಶದ ರಕ್ಷಣೆಯನ್ನು ಗಡಿಯಲ್ಲಿ ಕಾಯುವ ಸೈನಿಕ ಮಾತ್ರ ಮಾಡುವುದಿಲ್ಲ. ಸಮಾಜದಲ್ಲಿ ಸದೃಢ ಪ್ರಜೆಗಳನ್ನು ಸೃಷ್ಟಿಸುವ ಕಾರ್ಯದೊಂದಿಗೆ ಶಿಕ್ಷಕನೂ ದೇಶ ಕಾಯುತ್ತಾನೆ. ಈ ನೆಲದ ಸಂಸ್ಕೃತಿ, ಪರಂಪರೆ, ಜಾನಪದ ಸಾಹಿತ್ಯ ಎಲ್ಲವನ್ನೂ ಉಳಿಸಿ ಬೆಳೆಸುವ ಮಹತ್ಕಾರ್ಯ ಶಿಕ್ಷಕರಿಂದಾಗುತ್ತಿದೆ. ಕಲಿಕೆ ವೇಳೆ ವಿದ್ಯಾರ್ಥಿಗಳನ್ನು ದಂಡಿಸುವ ಕಾರ್ಯ ಈಗಿಲ್ಲದಿದ್ದರೂ ವಿದ್ಯಾರ್ಥಿ ಕಲಿಕೆಗೆ ಬೇಕಾದ ಅಂಕುಶವನ್ನು ಹೇರಲು ಶಿಕ್ಷಕರಿಗೆ ಅವಕಾಶವಿರಬೇಕು ಎಂದರು.

ಶಿಕ್ಷಣಕ್ಕೆ ಗ್ಯಾರಂಟಿ: ಶಿಕ್ಷಕರು ತಮ್ಮ ವೃತ್ತಿಯನ್ನು ಹೊರತುಪಡಿಸಿ ಮಿಕ್ಕೆಲ್ಲ ಕೆಲಸಗಳನ್ನೇ ಮಾಡುವಂತಾಗಿದೆ ಎಂದ ಅಳಲು ತೋಡಿಕೊಳ್ಳುತ್ತಿರುತ್ತಾರೆ. ದಾಸೋಹ, ಸಮೀಕ್ಷಾ ಕಾರ್ಯ ಹೀಗೆ ಹತ್ತು ಹಲವು ಕಾರ್ಯಗಳನ್ನು ಮಾಡಬೇಕಿದೆ ನಿಜ. ಆದರೆ ಜೀವನದಲ್ಲಿ ಕಷ್ಟಪಟ್ಟು ದುಡಿದವನೇ ಸಾಧಕನಾಗಲು ಸಾಧ್ಯ. ಈ ನಿಟ್ಟಿನಲ್ಲಿ ನೀವು ಕೂಡ ಸಾಧನೆಯ ಶಿಖರವೇರಲು ಶ್ರಮಿಸಿ. ರಾಜ್ಯ ಸರ್ಕಾರ ಪಂಚ ಗ್ಯಾರಂಟಿ ಯೋಜನೆ ಜಾರಿಗೊಳಿಸಿದೆ. ಇದರೊಂದಿಗೆ ಶಿಕ್ಷಣ ಕ್ಷೇತ್ರಕ್ಕೆ ಹೆಚ್ಚಿನ ಒತ್ತು ನೀಡುವ 6ನೇ ಗ್ಯಾರಂಟಿಯನ್ನೂ ಸರ್ಕಾರ ನೀಡಲಿ ಎಂದು ಒತ್ತಾಯಿಸಿದರು.

ಪ್ರಸಿದ್ಧ ಜಾನಪದ ತಜ್ಞ, ಲೇಖಕ ಮತ್ತು ನಿವೃತ್ತ ಪ್ರಾಧ್ಯಾಪಕ ಡಾ.ಪಿ.ಕೆ.ರಾಜಶೇಖರ್ ಪ್ರಧಾನ ಭಾಷಣ ಮಾಡಿ, ವಿಶ್ವವನ್ನೇ ಆಳುವ ಶಕ್ತಿ ಗುರುಶಕ್ತಿಗಿದೆ. ಅಜ್ಞಾನವೆಂಬ ಕತ್ತಲೆಯಿಂದ ಜ್ಞಾನವೆಂಬ ಬೆಳಕಿನತ್ತ ಕರೆದೊಯ್ಯುವವನೇ ಗುರು. ಗುರುವಿಗೆ ಇರುವ ಸ್ಥಾನ ಮಾನ ಇನ್ಯಾರಿಗೂ ಇರುವುದಿಲ್ಲ. ರಾಕ್ಷಸಿ ಪ್ರವೃತ್ತಿಯ ವ್ಯಕ್ತಿಯನ್ನೂ ಸಾತ್ವಿಕ ಶಕ್ತಿಯನ್ನಾಗಿಸುವ ಶಕ್ತಿ ಗುರುವಿನಲ್ಲಿದೆ. ಇಡೀ ಸಮುದಾಯ ಶಿಕ್ಷಕರನ್ನು ಗಮನಿಸುತ್ತದೆ. ನಿಮ್ಮ ನಡೆ, ನುಡಿಯಲ್ಲಿ ಸಭ್ಯತೆ, ನೈತಿಕ ಮೌಲ್ಯ ತುಂಬಿರಲಿ ಎಂದು ಸಲಹೆ ನೀಡಿದರು.

ಗ್ಯಾರಂಟಿ ಯೋಜನೆಗಳ ಅನುಷ್ಠಾನ ಸಮಿತಿ ರಾಜ್ಯ ಉಪಾಧ್ಯಕ್ಷೆ ಡಾ. ಪುಷ್ಪಾ ಅಮರನಾಥ್ ಮಾತನಾಡಿ, ನಾನು ಜಿಪಂ ಅಧ್ಯಕ್ಷತೆಯಾಗಿದ್ದ ವೇಳೆ ಎಸ್‌ಎಸ್‌ಎಲ್‌ಸಿ ಫಲಿತಾಂಶದಲ್ಲಿ ಹುಣಸೂರು 2-3ನೇ ಸ್ಥಾನದಲ್ಲಿತ್ತು. ಆದರೆ ಇದೀಗ ಕೊನೆಯ ಸ್ಥಾನ ತಲುಪಿರುವುದು ಬೇಸರದ ಸಂಗತಿಯಾಗಿದೆ. ನಾವೆಲ್ಲರೂ ಈ ಕುರಿತು ಗಂಭೀರ ಚಿಂತನೆ ಮಾಡಬೇಕಿದೆ ಎಂದರು.