ಜ.5ಕ್ಕೆ ಸಂಸದರ ಕಚೇರಿ ಮುಂಭಾಗ ಧರಣಿ

ನಗರದ ಎಪಿಎಂಸಿ ಆವರಣದಲ್ಲಿ ಗುರುವಾರ ಆಯೋಜಿಸಿದ್ದ ರಾಜ್ಯದ 10 ತಂಬಾಕು ಹರಾಜು ಮಾರುಕಟ್ಟೆಯ ರೈತ ಮುಖಂಡರ ಸಭೆಯಲ್ಲಿ ಮಾತನಾಡಿ, ತಂಬಾಕಿನ ಬೆಲೆ ಕುಸಿತ ರೈತರನ್ನು ಆತಂಕಕ್ಕೀಡು ಮಾಡಿದೆ. ಈ ಕುರಿತು ಡಿ.12ರಂದು ತಾಲೂಕಿನ ಕಟ್ಟೆಮಳಲವಾಡಿ ತಂಬಾಕು ಹರಾಜು ಕೇಂದ್ರದಲ್ಲಿ ಆಯೋಜಿಸಿದ್ದ ರೈತ ಮುಖಂಡರ ಸಭೆಯಲ್ಲಿ ಡಿ.25ರಂದು ಮಾರುಕಟ್ಟೆ ಬಂದ್ ಮಾಡಲು ನಿರ್ಧರಿಸಲಾಗಿತ್ತು. ನಂತರದ ದಿನಗಳಲ್ಲಿ ಸರ್ಕಾರ ಮತ್ತು ಮಂಡಳಿಯ ಸ್ಪಂದನೆ ಆದರಿಸಿ ಹೋರಾಟ ನಡಸಲು ತೀರ್ಮಾನಿಸಲಾಗಿತ್ತು. ಈ ನಡುವೆ ಮೈಸೂರು ಕೊಡಗು ಸಂಸದ ಯದುವೀರ್ ಕೃಷ್ಣದತ್ತ ಚಾಮರಾಜ ಒಡೆಯರ್ ಅವರನ್ನು ಭೇಟಿಯಾಗಿದ್ದ ವೇಳೆ ಕೇಂದ್ರ ವಾಣಿಜ್ಯ ಸಚಿವರಲ್ಲಿಗೆ ರೈತ ಮುಖಂಡರ ನಿಯೋಗ ಕೊಂಡ್ಯೊಯ್ಯುವುದಾಗಿ ಭರವಸೆ ನೀಡಿದ್ದರು. ಆದರೆ ಇದ್ಯಾವುದೂ ಆಗಿಲ್ಲ ಎಂದು ಬೇಸರ ವ್ಯಕ್ತಪಡಿಸಿದರು.

ಅಲ್ಪಸುಧಾರಣೆ:

ಇದೀಗ ಡಿ.20ರ ನಂತರ ಮಾರುಕಟ್ಟೆಯಲ್ಲಿ ತಂಬಾಕಿಗೆ ದರ ನೀಡುವಲ್ಲಿ ಅಲ್ಪ ಪ್ರಮಾಣದ ಸುಧಾರಣೆ ಕಂಡು ಬಂದಿದೆ. ಹೀಗಾಗಿ ಮಾರುಕಟ್ಟೆ ಬಂದ್ ಮಾಡುವುದನ್ನು ತಾತ್ಕಾಲಿಕವಾಗಿ ಮುಂದೂಡಲಾಗಿದೆ. ಆದರೆ ಹೋರಾಟ ನಿಂತಿಲ್ಲ ಎಂದು ಸ್ಪಷ್ಟಪಡಿಸಿದರು.

ಜ.5ಕ್ಕೆ ಧರಣಿ: ಸಭೆಯಲ್ಲಿ ರೈತಮುಖಂಡರ ಅಭಿಪ್ರಾಯದಂತೆ ಜ.5ಕ್ಕೆ ತಂಬಾಕು ಬೆಳೆವ ಪ್ರದೇಶಗಳ ವ್ಯಾಪ್ತಿಯ ನಾಲ್ವರು ಸಂಸದರ ಕಚೇರಿ ಮುಂಭಾಗ ತಂಬಾಕು ಬೆಳೆಗಾರರ ಬೇಡಿಕೆಯ ಈಡೇರಿಕಗೆ ಆಗ್ರಹಿಸಿ ಧರಣಿ ನಡೆಸಲಾಗುವುದು. ಕರ್ನಾಟಕ ರಾಜ್ಯದಲ್ಲಿ ವರ್ಜಿನಿಯ ಉತ್ತಮ ಗುಣಮಟ್ಟದ ತಂಬಾಕು ಬೆಳೆದು ಈ ಬೆಳೆಗೆ ಉತ್ತಮವಾದ ಬೆಲೆ ದೊರಕುವಂತೆ ಮಾಡಬೇಕು. ಈ ಕುರಿತು ಖರೀದಿ ಕಂಪನಿಗಳಿಗೆ ಸ್ಪಷ್ಟ ನಿರ್ದೇಶನವನ್ನು ಮಂಡಳಿ ನೀಡಬೇಕು. ಆಂಧ್ರದಲ್ಲಿ ಕಳೆದ ನಾಲ್ಕೈದು ವರ್ಷದಿಂದ ಮಂಡಳಿ ನಿಗದಿಪಡಿಸಿದ ಪ್ರಮಾಣಕ್ಕಿಂತಲೂ ಅಧಿಕವಾಗಿ 60-90 ಮಿಲಿಯನ್ ಕೆಜಿ ತಂಬಾಕು ಹೆಚ್ಚುವರಿಯಾಗಿ ಬೆಳೆಯುತ್ತಿದ್ದರೂ ಅವರಿಗೆ ಉತ್ತಮ ದರ ಕೆ.ಜಿ.ಗೆ 450 ರೂ. ಗಳವರೆಗೆ ನೀಡುತ್ತಿದ್ದು, ಮಂಡಳಿ ನಿರ್ಧರಿಸಿರುವ ಪ್ರಮಾಣಕ್ಕಿಂತಲೂ ಕಡಿಮೆ ಬೆಳೆದ ಕರ್ನಾಟಕದ ರೈತರಿಗೆ ಕೇವಲ 320 ರೂ. ಗಳನ್ನು ನೀಡುತ್ತಿದ್ದು, ಈ ತಾರತಮ್ಯ ನೀತಿ ನಿಲ್ಲಿಸಬೇಕು. ತಂಬಾಕಿನಿಂದ ಬಂದಂತಹ ಹುಡಿಯನ್ನು ತಂಬಾಕು ಮಂಡಳಿಯಲ್ಲಿ ಮಾರಾಟ ಮಾಡಿಸಬೇಕು. ತಂಬಾಕು ಮಾರಾಟ ಮಾಡಿದ ರೈತರ ಖಾತೆಗೆ ಮಾರಾಟ ಮಾಡಿದ 3-5ದಿನಗಳೊಳಗೆ ಹಣ ಪಾವತಿಯಾಗಬೇಕು ಎಂಬಿತ್ಯಾದಿ ಬೇಡಿಕೆಗಳನ್ನು ಮುಂದಿಡಲಾಗುವುದು. ಇಷ್ಟೇ ಅಲ್ಲದೆ ಭಾರತದಲ್ಲಿ ವಿದೇಶಿಯರಿಗೆ ಹಾಲು ಮತ್ತು ಮೀನುಗಾರಿಕೆ ವ್ಯವಹಾರ ನಡೆಸಲು ಅವಕಾಶ ನೀಡಬಾರದು ಎಂದು ಆಗ್ರಹಿಸಲಾಗುವುದು ಎಂದರು.

ಸಭೆಯಲ್ಲಿ ಕಾಫ್ ಕಮಿಟಿ ಸದಸ್ಯ ನಿಲುವಾಗಿಲು ಪ್ರಭಾಕರ್, ತಂಬಾಕು ಬೆಳೆಗಾರರ ಗೌರವಾಧ್ಯಕ್ಷ ಚಂದ್ರೇಗೌಡ, ಅಧ್ಯಕ್ಷ ಮೊದೂರು ಶಿವಣ್ಣ, ಜಿಲ್ಲಾ ಉಪಾಧ್ಯಕ್ಷ ಪ್ರಕಾಶ್ ರಾಜ್ ಅರಸು, ದಶರಥ ಪಿರಿಯಾಪಟ್ಟಣ, ಮಹದೇವ ಕೆ.ಎಂ.ವಾಡಿ, ಬಸವರಾಜೇಗೌಡ ರಾಜು ಚಿಕ್ಕಹುಣಸೂರು, ಹರೀಶ ಮರೂರು ಕಾವಲು, ಕೆ.ಬಿ.ಚಂದ್ರಶೇಖರ್, ರವಿ, ವಿಷಕಂಠಪ್ಪ ಅರಸು ಕಲ್ಲಹಳ್ಳಿ, ಚಾಮೇಗೌಡ, ಬೀರೇಗೌಡ, ಶಿವರಾಜು ಮೋದೂರು, ಕುಮಾರ, ದಶರಥ ಕುಪ್ಪೆ, ಮಹದೇವೇಗೌಡ, ಶಿವಶಂಕರ ಕಿರಿಜಾಜಿ, ರವಿ ಅಗ್ರಹಾರ ರಾಮೇಗೌಡ, ಕಿರಿಜಾಜಿ ಧನಂಜಯ, ಹರೀಶ ಮುಂತಾದವರು ಇದ್ದರು.