ಬೃಹತ್ ಆರೋಗ್ಯ-ರಕ್ತದಾನ ಶಿಬಿರ

ತಿ.ನರಸಿಪುರ: ನುರಿತ ತಜ್ಞ ವೈದ್ಯರು ಹಾಗೂ ಅತ್ಯಾಧುನಿಕ ಆರೋಗ್ಯ ಸೇವಗಳನ್ನ ಹಳ್ಳಿಗಾಡಿನ ಜನರಿಗೆ ಕಲ್ಪಿಸಲಿಕ್ಕೆ ತಾಲೂಕಿನ ಬನ್ನೂರು ಪಟ್ಟಣದ ವರವಲಯದಲ್ಲಿರುವ ಶ್ರೀನಿವಾಸ ಕಲ್ಯಾಣ ಮಂಟಪದಲ್ಲಿ ಜು.20ರಂದು ಸ್ನೇಹ ಬಳಗ ಹಾಗೂ ನೇಗಿಲಯೋಗಿ ಸಮಾಜ ಸೇವಾ ಟ್ರಸ್ಟ್ ಸಹಯೋದಲ್ಲಿ ಉಚಿತ ಬೃಹತ್ ಆರೋಗ್ಯ ಮತ್ತು ರಕ್ತದಾನ ಶಿಬಿರವನ್ನು ಆಯೋಜಿಸಲಾಗಿದೆ ಎಂದು ರಾಜ್ಯ ಒಕ್ಕಲಿಗರ ಸಂಘದ ನಿರ್ದೇಶಕ ಡಾ.ಎಂ.ಬಿ.ಮಂಜೇಗೌಡ ಹೇಳಿದರು.

ತಾಲೂಕಿನ ಬನ್ನೂರು ಪಟ್ಟಣದಲ್ಲಿರುವ ನೇಗಿಲ ಯೋಗಿ ಸಮಾಜ ಸೇವಾ ಟ್ರಸ್ಟ್‌ನ ಶಾಖಾ ಕಚೇರಿಯಲ್ಲಿ ಶುಕ್ರವಾರ ಸಂಜೆ ಶಿಬಿರದ ಪೂರ್ವಭಾವಿ ಸಭೆಯಲ್ಲಿ ಮಾತನಾಡಿದ ಅವರು, ಸಮುದಾಯ ಮತ್ತು ಸಮಾಜದ ಸೇವೆ ಮಾಡುವ ಉದ್ದೇಶದಿಂದ ಆಯೋಜಿಸಿರುವ ಬೃಹತ್ ಆರೋಗ್ಯ ಮತ್ತು ರಕ್ತದಾನ ಶಿಬಿರ ಬೆಳಗ್ಗೆ 9.30 ಗಂಟೆಗೆ ಆರಂಭವಾಗಲಿದ್ದು, ಅದಕ್ಕಾಗಿ ಕಲ್ಯಾಣ ಮಂಟಪದಲ್ಲಿ ಐದಾರು ಕೌಂಟರ್‌ಗಳನ್ನ ಪ್ರತ್ಯೇಕವಾಗಿ ತೆರೆಯಲಾಗಿದೆ. ವೈದ್ಯರ ಸಲಹೆ ಮೇರೆಗೆ ಉಚಿತವಾಗಿ ಔಷಧಗಳನ್ನು ವಿತರಿಸಲಾಗುವುದು ಎಂದರು.

ಮೈಸೂರಿನ ಕಾವೇರಿ ಹಾರ್ಟ್ ಮತ್ತು ಮಲ್ಟಿ ಸ್ಪೆಷಾಲಿಟಿ ಆಸ್ಪತ್ರೆ, ಬೆಂಗಳೂರು ಕೆಂಪೇಗೌಡ ಆಸ್ಪತ್ರೆ ಮತ್ತು ಸಂಶೋಧನಾ ಕೇಂದ್ರ, ಒಕ್ಕಲಿಗರ ಸಂಘದ ದಂತ ವೈದ್ಯಕೀಯ ಮಹಾವಿದ್ಯಾಲಯದ ಸಹಯೋಗದಲ್ಲಿ ವಿಶ್ರಾಂತ ಕುಲಪತಿ ಡಾ.ಎಂ.ವಿ.ಶೇಖರ್, ಹೃದ್ರೋಗ ತಜ್ಞ ಡಾ.ಕೆ.ಎಸ್.ಸದಾನಂದ, ರಕ್ತ ನಿಧಿ ಕೇಂದ್ರದ ಡಾ.ಕುಸುಮಾ, ಡೆಂಟಲ್ ಕ್ಲಿನಿಕ್ ಡಾ.ಎಸ್.ಡಿ.ಮೀನಾಕುಮಾರಿ, ಕುಟುಂಬ ವೈದ್ಯ ಡಾ.ತಮ್ಮಯ್ಯ, ಡಾ.ವಿಜಯಕುಮಾರ್, ಡಾ.ಶಿವಕುಮಾರ್ ಹಾಗೂ ಡಾ.ಪ್ರಕಾಶ್ ಅವರ ಮಾರ್ಗದರ್ಶನ ಮತ್ತು ಸಹಕಾರದೊಂದಿಗೆ ಆಯೋಜಿಸಿರುವ ಶಿಬಿರದಲ್ಲಿ ಸಾಮಾನ್ಯ ವೈದ್ಯಕೀಯ ತಪಾಸಣೆ ಸೇರಿದಂತೆ ಸ್ತ್ರೀರೋಗ ಮತ್ತು ಪ್ರಸೂತಿ ತಪಾಸಣೆ, ಮಕ್ಕಳ ತಪಾಸಣೆ, ಮೂಳೆ ಮತ್ತು ಸಂಧಿ ತಪಾಸಣೆ, ಕಣ್ಣಿನ ತಪಾಸಣೆ, ದಂತ ತಪಾಸಣೆ, ಕಿವಿ ಮೂಗು ಗಂಟಲು ತಪಾಸಣೆ, ಚರ್ಮರೋಗ ತಪಾಸನೆ, ಇಸಿಜಿ, ರಕ್ತದೊತ್ತಡ, ರಕ್ತದಲ್ಲಿನ ಸಕ್ಕರೆ ಪರೀಕ್ಷೆ, ಹಿಮೋಗ್ಲೋಬಿನ್ ಪರೀಕ್ಷೆ ನಡೆಸಲಾಗುವುದು ಎಂದು ಡಾ.ಎಂ.ಬಿ.ಮಂಜೇಗೌಡ ತಿಳಿಸಿದರು.

ನೇಗಿಲ ಯೋಗಿ ಸಮಾಜ ಸೇವಾ ಟ್ರಸ್ಟ್ ನ ಸಂಸ್ಥಾಪಕ ರವಿಕುಮಾರ್ ಮಾತನಾಡಿ, ಶಿಬಿರಕ್ಕೆ ಬರುವ ಪ್ರತಿಯೊಬ್ಬರು ಅನಾರೋಗ್ಯಕ್ಕೆ ಸಂಬಂಧಿಸಿದ ಹಿಂದಿನ ವೈದ್ಯರ ವರದಿ, ಚಿಕಿತ್ಸೆ ಪಡೆದಿದ್ದ ದಾಖಲೆಗಳನ್ನು ಇದ್ದರೆ ಜೊತೆಗೆ ತರಬೇಕು ಎಂದು ಸಲಹೆ ನೀಡಿದರು.

ಗೌರವಾಧ್ಯಕ್ಷ ರಾಮಸ್ವಾಮಿ, ನೇಗಿಲ ಯೋಗಿ ಸಮಾಜ ಸೇವಾ ಟ್ರಸ್ಟ್ ಅಧ್ಯಕ್ಷ ದೇವರಾಜು, ಕಾರ್ಯಾಧ್ಯಕ್ಷ ಚೆಲುವರಾಜು, ಉಪಾಧ್ಯಕ್ಷ ಆಕ್ಟರ್ ಶ್ರೀನಿವಾಸ್, ಕಾರ್ಯದರ್ಶಿ ಮಾದೇಗೌಡ, ಖಜಾಂಚಿ ಜಯರಾಮೇಗೌಡ, ಆಡಳಿತಾಧಿಕಾರಿ ವೈ.ಎಸ್.ಸ್ವಾಮಿ, ಮುಖಂಡರಾದ ರಂಗಸಮುದ್ರ ರೇವಣ್ಣ, ವೈ.ಟಿ.ಮಹೇಶ್, ದುರುಗನೂರು ಪ್ರಸನ್ನ, ಎನ್‌ಸಿಆರ್ ರಾಜೇಶ್, ಪಾಪಣ್ಣ, ಕೊಡಗಹಳ್ಳಿ ಶಿವಕುಮಾರ್, ಬಾಲರಾಜು ಬನ್ನೂರ್, ಅತ್ತಹಳ್ಳಿ ಮಧು, ಸತೀಶ್ ಹಾಗೂ ಇತರರು ಇದ್ದರು.