ಲಾಕರ್ ಒಡೆದು ಚಿನ್ನಾಭರಣ, ನಗದು ಕಳವು

ಖಾಸಗಿ ಟಿವಿ ವಾಹಿನಿಯ ಸಿಬ್ಬಂದಿ ಕೆ.ಪಿ.ಪ್ರಕಾಶ್ ಅಲಿಯಾಸ್ ಸಚಿನ್ ಪ್ರಕಾಶ್ ಅವರ ಮನೆಯಲ್ಲಿ ಶನಿವಾರ ತಡರಾತ್ರಿ ಕಳ್ಳತನ ನಡೆದಿದೆ. ಮನೆಯ ಸುತ್ತ ಅಳವಡಿಸಿದ್ದ ಸಿಸಿ ಕ್ಯಾಮರಾದಲ್ಲಿ ದರೋಡೆ ಮಾಡಿರುವ ಕಳ್ಳ ರಾಜಾರೋಷವಾಗಿ ಬಂದು ಹೋಗಿರುವ ದೃಶ್ಯ ಸೆರೆಯಾಗಿದೆ.

40 ಗ್ರಾಂ ತೂಕದ ಚಿನ್ನದ ತಾಳಿ, 7 ಗ್ರಾಂ ತೂಕದ ಚಿನ್ನದ ಓಲೆ, 20 ಗ್ರಾಂ ತೂಕದ ಚಿನ್ನದ ಒಂದು ಜತೆ ಬಳೆ, 5 ಗ್ರಾಂ ತೂಕದ ಚಿನ್ನದ ಕಾಯಿನ್, ಒಟ್ಟು 7 ಗ್ರಾಂ ತೂಕದ ಎರಡು ಉಂಗುರಗಳು, 12 ಗ್ರಾಂ ತೂಕದ ಚಿನ್ನದ ಚೈನ್, 20 ಗ್ರಾಂ ತೂಕದ ಎರಡು ಪೆಂಡೆಂಟ್, 15 ಗ್ರಾಂ ತೂಕದ ಒಂದು ಡೈಮಂಡ್ ಉಂಗುರ, ಒಟ್ಟು 19 ಗ್ರಾಂ ತೂಕದ ಮೂರು ಓಲೆಗಳು, 4 ಗ್ರಾಂ ತೂಕದ ಎರಡು ಹುಕ್ಸ್‌ಗಳು ಹಾಗೂ 5 ಲಕ್ಷದ 35 ಸಾವಿರ ರೂ. ನಗದು ಕಳವಾಗಿದೆ ಎಂದು ಪ್ರಕಾಶ್ ನೀಡಿರುವ ದೂರಿನಲ್ಲಿ ತಿಳಿಸಿದ್ದಾರೆ.

ಸ್ಥಳಕ್ಕೆ ಎಎಸ್ಪಿ ನಾಗೇಶ್, ಡಿವೈಎಸ್‌ಪಿ ರವಿ, ಪಟ್ಟಣಠಾಣೆ ಶಿವಮಾದಯ್ಯ ಮತ್ತವರ ತಂಡ ಭೇಟಿ ನೀಡಿ, ಪರಿಶೀಲನೆ ನಡೆಸಿ ತನಿಖೆ ಕೈಗೊಂಡಿದ್ದಾರೆ. ಪ್ರಕರಣ ಬೇಧಿಸಲು ಪ್ರತ್ಯೇಕ ತಂಡವೊಂದನ್ನು ರಚಿಸಿ ತನಿಖೆ ನಡಸಲಾಗುತ್ತಿದೆ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ.

ವರ್ಷದ ಹಿಂದೆ ಬಸ್ ನಿಲ್ದಾಣಕ್ಕೆ ಬೈಪಾಸ್ ರಸ್ತೆ ಮೂಲಕ ಪ್ರವೇಶಿಸುವ ಜಾಗದ ಬಳಿಯೇ ಜ್ಯುವೆಲ್ಲರಿ ಅಂಗಡಿಯನ್ನು ದರೋಡೆಕೋರರು ದೋಚಿದ್ದರು. ಇದೀಗ ಬಸ್ ನಿಲ್ದಾಣದ ಸಮೀಪದ ಕಾಲನಿಯಲ್ಲಿಯೇ ಕಳ್ಳತನ ನಡೆದಿರುವುದು ನಾಗರಿಕರಲ್ಲಿ ಆತಂಕ ಮೂಡಿಸಿದೆ.