ನಗರದಲ್ಲಿ ಮುಕ್ತಿ ಜಯೋತ್ಸವ ಅದ್ದೂರಿ

ಜೈನ ದೀಕ್ಷೆಯು ಪವಿತ್ರ ತ್ಯಾಗದ ಪ್ರತಿಜ್ಞೆಯಾಗಿದ್ದು, ಲೌಕಿಕ ಬಾಂಧವ್ಯಗಳನ್ನು ತ್ಯಜಿಸಿ, ಸತ್ಯ ಹಾಗೂ ಆತ್ಮ ಸಾಕ್ಷಾತ್ಕಾರದ ಹಾದಿಯಲ್ಲಿ ನಡೆಯುವುದು ಇದರ ಮೂಲ ಉದ್ದೇಶವಾಗಿದೆ. ಮೋಹದಿಂದ ಸಾಕ್ಷಾತ್ಕಾರದ ಕಡೆಗೆ ಮತ್ತು ಲೌಕಿಕದಿಂದ ಮೋಕ್ಷದ ಕಡೆಗೆ ಪ್ರಯಾಣ ಬೆಳೆಸಲು ದಿಯಾ ಕುಮಾರಿ ಹಾಗೂ ಕುನಾಲ್ ಪ್ರತಿಜ್ಞೆ ಮಾಡಿದ್ದಾರೆ.

ದಿಯಾ ಕುಮಾರಿ ಹಾಗೂ ಕುನಾಲ್ ಅವರು ಫೆಬ್ರವರಿ 22 ರಂದು ಗುಜರಾತ್‌ನ ಮಣಿಲಕ್ಷ್ಮೀ ತೀರ್ಥ ದೇವಾಲಯದಲ್ಲಿ ಜೈನ ದೀಕ್ಷೆ

ಪಡೆಯುತ್ತಿದ್ದಾರೆ. ಈ ಹಿನ್ನೆಲೆ ನಗರದ ಸ್ಕೌಟ್ಸ್ ಅಂಡ್ ಗೈಡ್ಸ್ ಮೈದಾನದಲ್ಲಿ ಪಾರಂಪರಿಕ ಶೈಲಿಯಲ್ಲಿ ನಿರ್ಮಾಣ ಮಾಡಿದ್ದ ಜಯನಂದ ನಗರಿ ಮಂಟಪದಲ್ಲಿ ಮುಕ್ತಿ ಜಯೋತ್ಸವ ಅದ್ದೂರಿಯಿಂದ ನಡೆಯಿತು.

ಮಾಜಿ ಉಪ ಮುಖ್ಯಮಂತ್ರಿ ಡಾ.ಅಶ್ವತ್ಥ್ ನಾರಾಯಣ್, ಸಂಸದ ಯದುವೀರ ಕೃಷ್ಣದತ್ತ ಚಾಮರಾಜ ಒಡೆಯರ್, ಕಾರ್ಯಕ್ರಮದಲ್ಲಿ ಶಾಸಕ ಗಣೇಶ್ ಪ್ರಸಾದ್, ಮಾಜಿ ಸಚಿವೆ ಗೀತಾ ಮಹದೇವಪ್ರಸಾದ್, ಬಿಜೆಪಿ ಹಿಂದುಳಿದ ಮೋರ್ಚಾ ರಾಜ್ಯಾಧ್ಯಕ್ಷ ರಘು ಕೌಟಿಲ್ಯ, ಮುಡಾ ಮಾಜಿ ಅಧ್ಯಕ್ಷ ಎಚ್.ವಿ.ರಾಜೀವ್, ಐಪಿಎಸ್ ಅಧಿಕಾರಿ ಗೀತಾ ಪ್ರಸನ್ನ, ಅರಮನೆ ಮಂಡಳಿ ಉಪ ನಿರ್ದೇಶಕ ಸುಬ್ರಹ್ಮಣ್ಯ, ಪತ್ರಕರ್ತ ವಿಕ್ರಂ ಮುತ್ತಣ್ಣ, ಕೆಪಿಎ ನಿರ್ದೇಶಕ ವಿಷ್ಣುರ್ಧನ್, ಮಾಜಿ ಶಾಸಕರಾದ ಎಂ.ಕೆ.ಸೋಮಶೇಖರ್, ತೋಂಟದಾರ್ಯ, ನಗರ ಪಾಲಿಕೆ ಮಾಜಿ ಸದಸ್ಯ ಪ್ರಶಾಂತ್ ಗೌಡ, ಬಿಜೆಪಿ ಮುಖಂಡರಾದ ಕವೀಶ್ ಗೌಡ, ಪ್ರದೀಪ್ ಕುಮಾರ್ ಇತರರಿದ್ದರು.

ಮೈಸೂರಿನ ಶಿವರಾಂಪೇಟೆಯ ವಾಸಿ ಪ್ರವೀಣ್ ಕುಮಾರ್ ಹರಣ್ ಹಾಗೂ ಅನಿತಾ ದೇವಿ ಅವರ ಪುತ್ರಿ ದಿಯಾ ಕುಮಾರಿ ಜೈನ ದೀಕ್ಷೆ ಸ್ವೀಕರಿಸಲು ಸಿದ್ಧಳಾಗಿರುವ ಯುವತಿಯಾಗಿದ್ದಾಳೆ. ಪದವೀಧರಳಾಗಿರುವ ಈಕೆಗೆ 22 ವರ್ಷ ವಯಸ್ಸಾಗಿದೆ. ಈಕೆಯ ಕುಟುಂಬ ಆರ್ಥಿಕವಾಗಿ ಸದೃಢವಾಗಿದ್ದು, ಮೂರು ಮಕ್ಕಳಲ್ಲಿ ಈಕೆಯೂ ಒಬ್ಬಳಾಗಿದ್ದಳು. ಆದರೆ ಅದೇಕೊ ಏನೋ ದಿಯಾ ಕುಮಾರಿಗೆ ಅಲೌಕಿಕ ಬದುಕು ಆಕರ್ಷಣೆಯಾಗಿದೆ. ಈ ಹಿನ್ನೆಲೆ ಲೌಖಿಕ ಬದುಕಿನಿಂದ ದೂರ ಸರಿಯಲು ನಿರ್ಧರಿಸಿದಳು.

ಗುಜರಾತ್‌ನ ಮುಕ್ತಿ ಪ್ರಜ್ಞಾ ಶ್ರೀಜಿ ಅವರ ಬಳಿ ಕಳೆದ 7 ವರ್ಷಗಳಿಂದ ದಿಯಾ ಕುಮಾರಿ ಆಧ್ಯಾತ್ಮಿಕ ಬದುಕಿನಲ್ಲಿ ದಿನ ಕಳೆದಿದ್ದಾಳೆ. ಆದರೆ ಈಗ ಜೈನ ದೀಕ್ಷೆ ಪಡೆದು ಸನ್ಯಾಸತ್ವಕ್ಕೆ ತನ್ನ ಬದುಕು ಒಪ್ಪಿಸಲು ನಿರ್ಧರಿಸಿದ್ದಾಳೆ.

ದಿಯಾ ಕುಮಾರಿಯಂತೆ 13 ವರ್ಷದ ಕುನಾಲ್ ಎಂಬಾತ ಕೂಡ ಜೈನ ದೀಕ್ಷೆ ಪಡೆಯುತ್ತಿದ್ದಾನೆ. ಈತ ಮೈಸೂರಿನ ಸಿದ್ಧಾರ್ಥ ಬಡಾವಣೆಯ ವಾಸಿ. ಈತ ನರೇಶ್ ಹಾಗೂ ಸಮತಾದೇವಿ ಅವರ ಪುತ್ರ. 9 ನೇ ತರಗತಿಯಲ್ಲಿ ವ್ಯಾಸಂಗ ಮಾಡುತ್ತಿರುವ ಈತ ಕೂಡ ಲೌಖಿಕ ಬಾಂಧವ್ಯ ತ್ಯಜಿಸಿ ಜೈನ ದೀಕ್ಷೆ ಪಡೆಯುತ್ತಿದ್ದಾನೆ.