ಕೆ.ವಿ.ಮಲ್ಲೇಶ್ ಸರಳ, ಸಜ್ಜನಿಕೆ ರಾಜಕಾರಣಿ

ನಗರದ ಅರವಿಂದ ನಗರದ ರವಿತೇಜ ಕಲ್ಯಾಣ ಮಂಟಪದಲ್ಲಿ ಶುಕ್ರವಾರ ಸಂಜೆ ಕೆ.ವಿ. ಮಲ್ಲೇಶ್ ಸ್ನೇಹ ಬಳಗದ ವತಿಯಿಂದ ಕೆ.ವಿ.ಮಲ್ಲೇಶ್ ಅವರ 60ನೇ ಹುಟ್ಟುಹಬ್ಬದ ಪ್ರಯುಕ್ತ ಹಮ್ಮಿಕೊಂಡಿದ್ದ ಜನಸೇವಕನ ಜನ್ಮದಿನ ಕಾರ್ಯಕ್ರಮದಲ್ಲಿ ಆಶೀರ್ವಚನ ನೀಡಿದರು.

ಸದಾ ಕಾಲ ಸಾರ್ವಜನಿಕರ ಕಷ್ಟ, ಸುಖದಲ್ಲಿ ಭಾಗಿಯಾಗುವ ಮಲ್ಲೇಶ್ ಅವರು, ಎಲ್ಲ ಜನರೊಂದಿಗೆ ಪ್ರೀತಿ, ವಿಶ್ವಾಸದಿಂದಿರುವ ಗುಣ ಹೊಂದಿದ್ದಾರೆ. ಮಾಡಿದೆನೆಂಬುದು ಮನದಲಿ ಹೊಳೆದೆಡ, ಏಡಿಸಿ ಕಾಡಿತ್ತು ಶಿವನಂ ಡಂಗುರ. ಮಾಡಿದೆನೆನ್ನದಿರಾ ಲಿಂಗಕ್ಕೆ, ಮಾಡಿದೆನೆನ್ನದಿರಾ ಜಂಗಮಕ್ಕೆ, ಮಾಡಿದೆನೆಂಬುದು ಮನದಲ್ಲಿಲ್ಲದಿದ್ದಡೆ, ಬೇಡಿತ್ತನೀವನು ಕೂಡಲಸಂಗಮದೇವ..’ ಎಂಬ ಮಾತುಗಳಿಗೆ ಅನ್ವರ್ಥ ಎಂಬಂತೆ ಬದುಕುತ್ತಿರುವವರು ಮಲ್ಲೇಶ್. 60ನೇ ವರ್ಷಕ್ಕೆ ಕಾಲಿಟ್ಟಿರುವ ಅವರು ಶತಾಯುಷಿಯಾಗಲಿ. ಅವರು ಇರುವಷ್ಟು ಕಾಲವೂ ಸಾರ್ವಜನಿಕರ ಸೇವೆ ಮಾಡುತ್ತಿರಲಿ ಎಂದು ಆಶಿಸಿದರು.

ಸಾಹಿತಿ ಪ್ರೊ.ಎಂ.ಕೃಷ್ಣೇಗೌಡ ಮಾತನಾಡಿ, ಕೆ.ವಿ.ಮಲ್ಲೇಶ್ ಅವರೊಬ್ಬ ಸಜ್ಜನ, ಸುಸಂಸ್ಕೃತ ರಾಜಕಾರಣಿ. ಸುಸಂಸ್ಕೃತ ಕುಟುಂಬದಲ್ಲಿ ಜನಿಸಿದ ಮಲ್ಲೇಶ್ ಅವರನ್ನು ನೈತಿಕ ಚೌಕಟ್ಟಿನಲ್ಲಿ ಬೆಳೆಸಿದವರು ಅಣ್ಣ ಕೆ.ವಿ. ಜಯಶೇಖರ್. ಬೇರೆಯವರ ಬಗ್ಗೆ ಕೆಟ್ಟದಾಗಿ ಎಂದೂ ಮಾತನಾಡದ ಮಲ್ಲೇಶ್, ಚುನಾವಣೆಯಲ್ಲಿ ಸೋತಾಗಲೂ ಯಾರ ಮೇಲೆಯೂ ಆಪಾದಿಸಲಿಲ್ಲ. ಅದು ಅವರೊಳಗಿನ ಪ್ರಬುದ್ಧ ನಾಯನನ್ನು ತೋರಿಸುತ್ತದೆ. ನಂಬಿದವರಿಗೆ ನಿಯತ್ತಾಗಿರುವುದು ಮಲ್ಲೇಶ್ ಅವರ ಮತ್ತೊಂದು ದೊಡ್ಡಗುಣ ಎಂದು ಹೇಳಿದರು.

ಮುಡಾ ಮಾಜಿ ಅಧ್ಯಕ್ಷ ಎಚ್.ವಿ. ರಾಜೀವ್ ಮಾತನಾಡಿ, ಮಲ್ಲೇಶ್ ಅವರೊಬ್ಬ ಆಶಾವಾದಿ ರಾಜಕಾರಣಿ. ತಾಪತ್ರಯಗಳ ನಡುವೆಯೂ ಸಂತೋಷದಿಂದಿರುವ ಸನ್ಮಿತ್ರ. ಸಜ್ಜನಿಕೆ, ಸುಸಂಸ್ಕೃತ ನಡವಳಿಕೆ ಅವರಿಗೆ ಕುಟುಂಬದಿಂದ ಬಂದ ಬಳುವಳಿ. ಮುಂದಿನ ದಿನಗಳಲ್ಲಿಯೂ ಜನರ ಆಶೀರ್ವಾದದೊಂದಿಗೆ ಜನಸೇವೆಯಲ್ಲಿ ತೊಡಗಿಸಿಕೊಳ್ಳಲಿ ಎಂದು ಆಶಿಸಿದರು.

ಹಿರಿಯ ಕವಿ ಪ್ರೊ.ಕೆ.ಸಿ. ಶಿವಪ್ಪ, ಶಾಸಕ ಜಿ.ಡಿ. ಹರೀಶ್ ಗೌಡ, ವಿಧಾನ ಪರಿಷತ್ ಸದಸ್ಯ ಕೆ.ಶಿವಕುಮಾರ್, ಮಾಜಿ ಶಾಸಕ ಎಲ್.ನಾಗೇಂದ್ರ, ವಿಧಾನ ಪರಿಷತ್ ಮಾಜಿ ಸದಸ್ಯರಾದ ತೋಂಟದಾರ್ಯ, ಮರಿತಿಬ್ಬೇಗೌಡ, ವಸ್ತುಪ್ರದರ್ಶನ ಪ್ರಾಧಿಕಾರದ ಅಧ್ಯಕ್ಷ ಅಯೂಬ್ ಖಾನ್, ಜಿ.ಪಂ. ಮಾಜಿ ಅಧ್ಯಕ್ಷ ದ್ವಾರಕೀಶ್, ಮಾಜಿ ಮೇಯರ್‌ಗಳಾದ ಬಿ.ಎಲ್. ಭೈರಪ್ಪ, ರವಿಕುಮಾರ್, ಪಾಲಿಕೆ ಮಾಜಿ ಸದಸ್ಯ ಕೆ.ವಿ.ಶ್ರೀಧರ್, ನಗರ ಕಾಂಗ್ರೆಸ್ ಅಧ್ಯಕ್ಷ ಆರ್. ಮೂರ್ತಿ ಇತರರಿದ್ದರು.