ಪುಸ್ತಕ, ಶಿಕ್ಷಕರ ಒಡನಾಟದಿಂದ ಜ್ಞಾನಗಳಿಕೆ ಸಾಧ್ಯ

ಪಡುವಾರಹಳ್ಳಿಯಲ್ಲಿರುವ ಮಹಾರಾಣಿ ಮಹಿಳಾ ವಾಣಿಜ್ಯ ಮತ್ತು ನಿರ್ವಹಣಾ ಕಾಲೇಜಿನಲ್ಲಿ ಶುಕ್ರವಾರ ಆಯೋಜಿಸಿದ್ದ ಕ್ರೀಡಾ, ಎನ್‌ಎಸ್‌ಎಸ್, ಯುವ ರೆಡ್‌ಕ್ರಾಸ್, ಎನ್‌ಸಿಸಿ, ಸ್ಕೌಟ್ಸ್ ಆ್ಯಂಡ್ ಗೈಡ್ಸ್,  ಸಾಂಸ್ಕೃತಿಕ ಚಟುವಟಿಕೆಗಳು ಮತ್ತು ಸಂಶೋಧನಾ ಕೇಂದ್ರದ ಉದ್ಘಾಟನಾ ಕಾರ್ಯಕ್ರಮದಲ್ಲಿ ಮಾತನಾಡಿದರು.

ಕಾಲೇಜಿನ ಬಹುತೇಕ ವಿದ್ಯಾರ್ಥಿನಿಯರು ಕೃಷಿಕ ಮನೆತನದ ಹಿನ್ನೆಲೆಯವರು. ನಾನು ಅಂಥ ರೈತ ಕುಟುಂಬದಿಂದಲೇ ಬಂದು ಸಮಾಜದಲ್ಲಿ ಏಳುಬೀಳುಗಳು ಕಂಡು ಬೆಳೆದವಳು. 

ವಿದ್ಯಾರ್ಥಿ ಜೀವನ ಯಶಸ್ಸಿಯಾಗಬೇಕಾದರೆ ಯಾವ ಅಡ್ಡಮಾರ್ಗಗಳು, ವಾಮಮಾರ್ಗಗಳು, ಅನೈತಿಕ ದಾರಿಗಳು ನಮ್ಮನ್ನು ದಡ ಮುಟ್ಟಿಸಲಾರವು. ಪ್ರತಿಭೆ ಮತ್ತು ಪರಿಶ್ರಮಗಳು ಮಾತ್ರ ನಮ್ಮನ್ನು ಯಶಸ್ಸಿನತ್ತ ಕೊಂಡೊಯ್ಯಲು ರಾಜಮಾರ್ಗ ಆಗಬಲ್ಲದು ಎಂದು ಹೇಳಿದರು.

ಕೆ.ಆರ್.ಪೇಟೆಯ ಒಂದು ಕುಗ್ರಾಮದಿಂದ ಬಂದಂತಹ ನಾನೂ ಮಹಾರಾಣಿ ಕಲಾ ಕಾಲೇಜಿನಲ್ಲಿ ಪದವಿ ಪಡೆದವಳು. ಉದ್ಯೋಗಕ್ಕಾಗಿ ನಿರಂತರ ಪರಿಶ್ರಮದಿಂದ ಮಾತ್ರ ಯಶಸ್ಸು ಸಾಧ್ಯ ಎಂಬುದನ್ನು ಮನಗಂಡು ಛಲ ಬಿಡದೆ ಅಧ್ಯಯನ ಮಾಡಿ ಕೆಎಎಸ್ ಅಧಿಕಾರಿಯಾಗಿರುವೆ. ವಿದ್ಯಾರ್ಥಿಗಳು ಸಹ ಪಾಲಕರು, ಹಿರಿಯರನ್ನು ಸದಾ ಗೌರವಿಸುತ್ತ ಅವರ ಮಾರ್ಗದರ್ಶನದಲ್ಲಿ ನಡೆದು ಬದುಕನ್ನು ಹಸನುಗೊಳಿಸಿಕೊಳ್ಳಬೇಕು ಎಂದರು.

ಓದು ಬರಹದಲ್ಲಿ ಹಿಂದೆ ಉಳಿದೆ ಎಂದು ಹತಾಶರಾಗದೆ ವಿವಿಧ ಸಾಂಸ್ಕೃತಿಕ ಚಟುವಟಿಕೆಗಳಾದ ಸಂಗೀತ, ನೃತ್ಯ, ಕಲೆ ಇತ್ಯಾದಿ ಕ್ರಿಯೆಯಲ್ಲಿ ತೊಡಗಿಸಿಕೊಂಡರೆ ಜೀವನದಲ್ಲಿ ಮುಂದೆ ಬರಬಹುದು. ಯಾವ ಕಾರ್ಯವನ್ನು ಮಾಡಿದರೂ ಶ್ರದ್ಧೆ, ನಂಬಿಕೆ, ವಿಶ್ವಾಸದಿಂದ ಮಾಡಿ ಜೀವನದಲ್ಲಿ ಯಶಸ್ಸು ಸಾಧಿಸಬಹುದು ಎಂದರು.

ಯುವ ಸಬಲೀಕರಣ ಮತ್ತು ಕ್ರೀಡಾ ಇಲಾಖೆ ಸಹಾಯಕ ನಿರ್ದೇಶಕ ಡಾ.ಕೆ.ಎಸ್.ಭಾಸ್ಕರ್ ನಾಯಕ್ ಮಾತನಾಡಿ, ವಿದ್ಯಾರ್ಥಿನಿಯರು ದೈಹಿಕ ಶಿಕ್ಷಣದ ಕಡೆಗೆ ಗಮನವಹಿಸಿ ಕ್ರೀಡಾಕೂಟಗಳಲ್ಲಿ ಭಾಗವಹಿಸಬೇಕು ಎಂದರು.

ಕಾಲೇಜು ಶಿಕ್ಷಣ ಇಲಾಖೆ ಜಂಟಿ ನಿರ್ದೇಶಕಿ ಪ್ರೊ.ಡಿ.ಎಸ್.ಪ್ರತಿಮಾ ಮಾತನಾಡಿ, ವಿದ್ಯಾರ್ಥಿನಿಯರು ಜೀವನದಲ್ಲಿ ಚಾನ್ಸ್ ತೆಗೆದುಕೊಳ್ಳುವ ಬದಲು ಚಾಯ್ಸ ತೆಗೆದುಕೊಂಡು ಬದುಕನ್ನು ಉಜ್ವಲಗೊಳಿಸಿಕೊಳ್ಳಬೇಕು ಎಂದು ಹೇಳಿದರು.

ಸರಿಗಮಪ ಕಾರ್ಯಕ್ರಮದ ವಿಜೇತೆ ರಶ್ಮಿ ಧರ್ಮೇಂದ್ರ ವಿವಿಧ ಗೀತೆಗಳನ್ನು ಹಾಡುವ ಮೂಲಕ ರಂಜಿಸಿದರು. ಮೈವಿವಿ ಪ್ರಾಧ್ಯಾಪಕ ಪ್ರೊ.ಬಿ.ನಾಗರಾಜು, ಪ್ರಾಂಶುಪಾಲ ಪ್ರೊ.ಸಿ.ನಟರಾಜ್, ಸಾಂಸ್ಕೃತಿಕ ಸಂಚಾಲಕ ಪ್ರೊ.ಪಿ.ಶಿವಣ್ಣ, ಖಜಾಂಚಿ ಪ್ರೊ.ಪಿ.ರಾಘವೇಂದ್ರ, ಐಕ್ಯೂಎಸಿ ಸಂಚಾಲಕ ಡಾ.ಎಸ್.ಮುತ್ತುರಾಜ, ಡಾ.ಶಿಲ್ಪಾ, ಡಾ.ಎಂ.ವೀಣಾ, ಪ್ರೊ.ತೇಜಸ್ವಿನಿ ಇದ್ದರು.