ಕೈವಾರ ತಾತಯ್ಯ ಕಾಲಜ್ಞಾನ ಇಂದಿಗೂ ಪ್ರಸ್ತುತ

ನಗರದ ಉಪವಿಭಾಗಾಧಿಕಾರಿ ಕಚೇರಿ ಸಭಾಂಗಣದಲ್ಲಿ ಸೋಮವಾರ ತಾಲೂಕು ರಾಷ್ಟ್ರೀಯ ಹಬ್ಬಗಳ ಆಚರಣಾ ಸಮಿತಿ ವತಿಯಿಂದ ಆಯೋಜಿಸಿದ್ದ ಜಗದ್ಗುರು ಶ್ರೀ ರೇಣುಕಾಚಾರ್ಯ, ಕೈವಾರ ತಾತಯ್ಯ ಮತ್ತು ಆದ್ಯವಚನಕಾರ ದೇವರದಾಸಿಮಯ್ಯರ ಜಯಂತ್ಯುತ್ಸವ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿ ಮಾತನಾಡಿದರು.

ಜಗದ್ಗುರು ಶ್ರೀ ರೇಣುಕಾಚಾರ್ಯರು ವೀರಶೈವ ಮತಸ್ಥಾಪಕರಾಗಿದ್ದು ಸಾವಿರಾರು ವರ್ಷಗಳ ಹಿಂದೆಯೇ ಶೈವ ಮತದ ಅಂಕುಡೊಂಕುಗಳನ್ನು ನಿವಾರಿಸಿ ಸಮಾನತೆಗಾಗಿ ಶ್ರಮಿಸಿದರು. ಆಧುನಿಕ ಕಾಲದಲ್ಲಿ ಇದು ಬಾಳೆಹೊನ್ನೂರಿನ ರಂಭಾಪುರಿ ಮಠದಲ್ಲಿ ಪೀಠವನ್ನು ಹೊಂದಿದ್ದು ಪಂಚಾಚಾರ್ಯ ಪರಂಪರೆಯನ್ನು ಮುಂದುವರಿಸಿಕೊಂಡು ಹೋಗುತ್ತಿದೆ ಎಂದರು.

ಯೋಗಿ ನಾರೇಯಣರು ಕಾಲಜ್ಞಾನಿಗಳಾಗಿದ್ದು ಕೈವಾರ ತಾತಯ್ಯನೆಂದೇ ಪ್ರಖ್ಯಾತರು. ಅವರು ಬರೆದ ಕಾಲಜ್ಞಾನವು ಆಧುನಿಕ ಜಗತ್ತಿನಲ್ಲಿಯೂ ಜನಸಾಮಾನ್ಯರ ಬದುಕಿಗೆ ಆಧಾರವಾಗಿದ್ದು ಲೋಕ ಕಲ್ಯಾಣದ ಮಾರ್ಗದಲ್ಲಿ ಜನರು ನಡೆಯುವಂತೆ ಪ್ರೇರಣೆ ನೀಡುತ್ತದೆ. ಕೈವಾರ ತಾತಯ್ಯನವರು ಬಣಜಿಗ ಸಮುದಾಯದ ಗುರುಸಮಾನರಾಗಿದ್ದಾರೆ ಎಂದರು.

ದೇವರ ದಾಸಿಮಯ್ಯ ಆದ್ಯ ವಚನಕಾರರಾಗಿದ್ದು ಹನ್ನೊಂದನೇ ಶತಮಾನದ ಕೊನೆಯ ಭಾಗದಲ್ಲೇ ವಚನ ಸಾಹಿತ್ಯವನ್ನು ರಚಿಸುವುದರ ಮೂಲಕ ಬಸವಣ್ಣ ಮತ್ತು ಅಲ್ಲಮ ಪ್ರಭುದೇವನಿಗೆ ಪ್ರೇರಣೆ ನೀಡಿದ ವಚನಕಾರ. ಅವರ ವಚನಗಳು ಅತ್ಯಂತ ಸರಳವಾಗಿದ್ದು ಜನರ ಬದುಕನ್ನು ಹಸನುಗೊಳಿಸಿವ ಹಾದಿಯಲ್ಲಿ ನೆರವಾಗಿವೆ. ದೇವರ ದಾಸಿಮಯ್ಯ ಅವರು ದೇವಾಂಗ ಸಮುದಾಯದ ಆರಾಧ್ಯ ದೈವವಾಗಿ ಸಕಲರಿಗೂ ಲೇಸನ್ನೇ ಬಯಸಿದ್ದಾರೆ ಎಂದರು.

ರಾಷ್ಟ್ರೀಯ ಹಬ್ಬಗಳ ಸಮಿತಿಯ ಸದಸ್ಯ ಎಸ್. ಜಯರಾಂ ಮಾತನಾಡಿದರು. ಸಮಿತಿಯ ಸದಸ್ಯ ಪಿ.ಆರ್.ರಾಚಪ್ಪ, ರೈತಸಂಘದ ಜಿಲ್ಲಾಧ್ಯಕ್ಷ ಹೊಸೂರು ಕುಮಾರ್, ಶರಣ ಸಾಹಿತ್ಯ ಪರಿಷತ್ ಅಧ್ಯಕ್ಷ ಮೋದೂರು ಮಹೇಶಾರಾಧ್ಯ, ಬಲಿಜ ಸಮಾಜದ ಅಧ್ಯಕ್ಷ ಗಣೇಶ್, ದಲಿತ ಮುಖಂಡ ಡಿ.ಕುಮಾರ್ ಮತ್ತು ತಾಲೂಕು ಮಟ್ಟದ ಅಧಿಕಾರಿಗಳು ಹಾಜರಿದ್ದರು.