ಜೆಎಸ್‌ಎಸ್ ಕಲಾ, ವಾಣಿಜ್ಯ ಮತ್ತು ವಿಜ್ಞಾನ ಕಾಲೇಜು : 998 ವಿದ್ಯಾರ್ಥಿಗಳಿಗೆ ಪದವಿ ಪ್ರದಾನ

ಶೇಷಾದ್ರಿಪುರಂ ಶಿಕ್ಷಣ ಸಂಸ್ಥೆಯ ಪ್ರಧಾನ ಕಾರ್ಯದರ್ಶಿ ನಾಡೋಜ ಡಾ.ವೂಡೇ ಪಿ. ಕೃಷ್ಣ ಮಾತನಾಡಿ, ಪ್ರಸ್ತುತ ವಿದ್ಯಾರ್ಥಿಗಳಿಗೆ ಜಗತ್ತಿನ ವಿವಿಧ ರಾಷ್ಟ್ರಗಳಲ್ಲಿ ಉದ್ಯೋಗಾವಕಾಶವಿದ್ದು, ಜಗತ್ತೇ ನಿಮ್ಮ ಕಾರ್ಯಕ್ಷೇತ್ರವಾಗಿದೆ. ಹಾಗಾಗಿ ವಿದ್ಯಾರ್ಥಿಗಳು ಜಾಗತಿಕ ನಾಗರಿ ಕರಾಗುವ ಮನಸ್ಥಿತಿ ಬೆಳೆಸಿಕೊಳ್ಳಬೇಕು. ದೇಶವನ್ನು ಪ್ರೀತಿಸುವುದರ ಜತೆಗೆ ಜಾಗತಿಕವಾಗಿಯೂ ಚಿಂತಿಸಬೇಕು ಎಂದು ವಿದ್ಯಾರ್ಥಿಗಳಿಗೆ ಕಿವಿಮಾತು ಹೇಳಿದರು.

ಜೀವನ ನಡೆಸಲು ಹಣದ ಅವಶ್ಯಕತೆ ಇದೆ. ಆದರೆ, ಹಣ ಗಳಿಕೆಯೇ ಜೀವನದ ಪ್ರಮುಖ ಗುರಿ ಆಗಬಾರದು. ಹಣ ಗಳಿಕೆಯ ಜತೆಗೆ ಸಮಾಜಕ್ಕೆ ಕೊಡುಗೆ ನೀಡುವ ಮನಸ್ಥಿತಿ ಬೆಳೆಸಿಕೊಳ್ಳಬೇಕು. ಪ್ರತಿಯೊಬ್ಬರು ಸಮಾಜಕ್ಕೆ ಉಪಯುಕ್ತ ವ್ಯಕ್ತಿಗಳಾಗಿ ರೂಪುಗೊಳ್ಳ ಬೇಕು. ಇದುವೇ ಶಿಕ್ಷಣದ ಮೂಲ ಉದ್ದೇಶ ಆಗಬೇಕು ಎಂದು ಹೇಳಿದರು.

ವಿದ್ಯಾರ್ಥಿಗಳು ಒಳ್ಳೆಯ ಆಲೋಚನೆಗಳನ್ನು ಬೆಳೆಸಿಕೊಳ್ಳಬೇಕು. ಉತ್ತಮ ಭವಿಷ್ಯಕ್ಕಾಗಿ ಉತ್ತಮ ಶಿಕ್ಷಣದ ಅವಶ್ಯಕತೆ ಇದೆ. ವಿದ್ಯಾರ್ಥಿಗಳು ದೊಡ್ಡದಾಗಿ ಆಲೋಚಿಸಿ ದೊಡ್ಡ ಕಾರ್ಯಗಳನ್ನು ಮಾಡಬೇಕು. ಕಲಿಕೆಯು ಕೇವಲ ಪದವಿ ಪಡೆಯಲು ಮಾತ್ರ ಸೀಮಿತವಾಗಿರಬಾರದು. ಶಿಕ್ಷಣ ಪೂರೈಸಿದ ನಂತರವೂ ನಿರಂತರವಾಗಿ ಕಲಿಕೆಯಲ್ಲಿ ತೊಡಗಿಸಿಕೊಂಡಾಗ ಮಾತ್ರ ಉತ್ತಮ ಸಾಧನೆ ತೋರಲು ಸಾಧ್ಯ. ಮೌಲ್ಯಗಳನ್ನು ರೂಢಿಸಿಕೊಳ್ಳದೆ ಯಶಸ್ಸು ಸಾಧಿಸಲು ಸಾಧ್ಯವಿಲ್ಲ. ಉತ್ತಮ ಮೌಲ್ಯಗಳನ್ನು ಜೀವನದಲ್ಲಿ ಅಳವಡಿಸಿಕೊಂಡು ಸರಳವಾದ ಜೀವನ ಶೈಲಿ ಅಳವಡಿಸಿಕೊಳ್ಳಿ ಎಂದು ವಿದ್ಯಾರ್ಥಿಗಳಿಗೆ ಸಲಹೆ ನೀಡಿದರು.

‘ಗುಲಾಮಗಿರಿಯಿಂದ ಮುಕ್ತಗೊಳ್ಳುವಂತೆ ಮಾಡುವುದೇ ಶಿಕ್ಷಣ’ ಎಂದು ರಾಷ್ಟ್ರಪಿತ ಮಹಾತ್ಮ ಗಾಂಧೀಜಿ ನಂಬಿದ್ದರು. ಭಾರತೀಯ ಶಿಕ್ಷಣ ಪದ್ಧತಿಯಲ್ಲಿ ಲೌಕಿಕ ಮತ್ತು ಆಧ್ಯಾತ್ಮಿಕ ಶಿಕ್ಷಣ ಎರಡಕ್ಕೂ ಪ್ರಾಧಾನ್ಯತೆ ಇದೆ. ಲೌಕಿಕ ಶಿಕ್ಷಣ ಅನ್ನವನ್ನು ಸಂಪಾದನೆ ಮಾಡುವುದನ್ನು ಹೇಳಿಕೊಡುತ್ತದೆ, ಇದು ಬಹಿರಂಗ ಜೀವನಕ್ಕೆ ಸಂಬಂಧಿಸಿದ್ದು. ಆಧ್ಯಾತ್ಮ ಶಿಕ್ಷಣ ಅಂತರಂಗಕ್ಕೆ ಸಂಬಂಧಿಸಿದ್ದು. ಶಿಕ್ಷಣ ಉತ್ತಮ ಹೊರನೋಟ ಮತ್ತು ಒಳನೋಟಗಳನ್ನು ನೀಡುವಂತೆ ಇರಬೇಕು. ಇಂದಿನ ಬದುಕನ್ನು ಸಮತೋಲನದಲ್ಲಿ ತೆಗೆದುಕೊಂಡು ಹೋಗುವುದಕ್ಕೆ ಇದು ಅಗತ್ಯವಾಗಿದೆ ಎಂದು ಅಭಿಪ್ರಾಯಪಟ್ಟರು.

ಅವಕಾಶಗಳನ್ನು ಸಮರ್ಪಕವಾಗಿ ಬಳಸಿಕೊಳ್ಳುವುದನ್ನು ವಿದ್ಯಾರ್ಥಿಗಳು ರೂಢಿಸಿಕೊಳ್ಳಬೇಕು. ಕೌಶಲಗಳನ್ನು ನಿರಂತರವಾಗಿ ಕಲಿತು ಕಾಲಕಾಲಕ್ಕೆ ಅವುಗಳನ್ನು ಉನ್ನತೀಕರಿಸಿಕೊಳ್ಳಬೇಕು. ಇಷ್ಟವಿಲ್ಲದವರ ನಡುವೆ ನಾವು ಬದುಕುವುದನ್ನು ಕಲಿಯಬೇಕು. ಇಷ್ಟವಿಲ್ಲದವರ ನಡುವೆ ಬದುಕಲು ಕಲಿತರೆ ಬದುಕಿನಲ್ಲಿ ಶೇ.50 ರಷ್ಟು ಗೆಲುವು ಸಿಕ್ಕಂತೆ ಎಂದರು.

ಸಮಾರಂಭದಲ್ಲಿ ಜೆಎಸ್‌ಎಸ್ ಮಹಾವಿದ್ಯಾಪೀಠದ ಕಾರ್ಯನಿರ್ವಾಹಕ ಕಾರ್ಯದರ್ಶಿ ಡಾ.ಸಿ.ಜಿ. ಬೆಟಸೂರಮಠ, ಕಾಲೇಜಿನ ಮುಖ್ಯ ಕಾರ್ಯನಿರ್ವಾಹಕ ಪ್ರೊ.ಬಿ.ವಿ.ಸಾಂಬಶಿವಯ್ಯ, ಪ್ರಾಂಶುಪಾಲ ಡಾ.ಎಂ. ಪ್ರಭು, ಪರೀಕ್ಷಾ ನಿಯಂತ್ರಣಾಧಿಕಾರಿ ಡಾ.ಬಿ. ಪ್ರಭುಸ್ವಾಮಿ ಇದ್ದರು.

ಟಾಪರ್ಸ್‌ಗಳ ವಿವರ: ಬಿಎನಲ್ಲಿ ಟಿ.ಜಿ. ಐಶ್ವರ್ಯ, ಬಿಕಾಂನಲ್ಲಿ ಎಚ್.ಜಿ. ಸುಪ್ರಿಯ, ಬಿಬಿಎನಲ್ಲಿ ಕೆ. ರೇಣುಕಾ, ಬಿಎಸ್‌ಸಿಯಲ್ಲಿ ಆರ್. ಅಥಿರಾದಾಸ್, ಬಿಸಿಎನಲ್ಲಿ ಎಚ್.ಪಿ ಮಾನ್ಯಶ್ರೀ, ಬಿವೋಕ್-ಎಫ್‌ಪಿ ಆ್ಯಂಡ್ ಇ ನಲ್ಲಿ ಎಂ.ಕೆ. ಐಶ್ವರ್ಯ, ಬಿವೋಕ್-ಎಸ್‌ಡಿಯಲ್ಲಿ ಶ್ರೀವಿದ್ಯಾ ಹೆಗ್ಡೆ, ಎಂಎ ಕನ್ನಡದಲ್ಲಿ ಟಿ.ದೇವಮ್ಮಣಿ, ಎಂಎ ಇಂಗ್ಲಿಷ್‌ನಲ್ಲಿ ಎಸ್. ಭಾರ್ಗವಿ, ಎಂಕಾಂನಲ್ಲಿ ಆರ್. ವರುಣ್ ನಾಯಕ್, ಎಂಎಸ್‌ಡಬ್ಲೂೃನಲ್ಲಿ ಜಿ.ಎನ್. ನಿಖಿತಾ, ಎಂಎಸ್‌ಸಿ ಭೌತಶಾಸ್ತ್ರದಲ್ಲಿ ಎಂ.ಜಿ. ಗೋಕುಲ್‌ಕೃಷ್ಣ, ಎಂಎಸ್‌ಸಿ ರಸಾಯನಶಾಸ್ತ್ರದಲ್ಲಿ ಎ.ಎಸ್. ಚಂದ್ರಶೇಖರ್, ಎಂಎಸ್‌ಸಿ ಗಣಿತಶಾಸ್ತ್ರದಲ್ಲಿ ಕೆ.ಎನ್. ಶಿವರಂಜನಿ, ಎಂಎಸ್‌ಸಿ ಗಣಕವಿಜ್ಞಾನದಲ್ಲಿ ಕೆ. ಅಮೃತಾ, ಎಂಎಸ್‌ಸಿ ಜೀವರಸಾಯನಶಾಸ್ತ್ರದಲ್ಲಿ ಬಿ.ಹರ್ಷಿತಾ, ಎಂಎಸ್‌ಸಿ ಜೈವಿಕ ವಿಜ್ಞಾನದಲ್ಲಿ ಕೆ.ವಿ.ಕೀರ್ತನಾ, ಎಂಎಸ್‌ಸಿ ಸಸ್ಯಶಾಸ್ತ್ರದಲ್ಲಿ ಜೆ. ವರುಣ್, ಎಂಎಸ್‌ಸಿ ಪ್ರಾಣಿಶಾಸ್ತ್ರದಲ್ಲಿ ವಿಜಯಲಕ್ಷ್ಮೀ ಪರಿಚನ್ನಗೌಡರ್, ಎಂಸಿಎನಲ್ಲಿ ಸಾನ್ಡ್ರಾ ಕೆ. ಪ್ರವೀಣ್, ಎಂವೋಕ್ ಎಸ್‌ಡಿಯಲ್ಲಿ ಎಂ.ಎಂ.ಸುದೀಪ್, ಎಂವೊಕ್ ಎಫ್‌ಪಿ ಆ್ಯಂಡ್ ಇನಲ್ಲಿ ಮರಿಯ ಜಾನ್ಸ್ ಟಾಪರ್ಸ್‌ಗಳಾಗಿ ಬಹುಮಾನ ಪಡೆದರು. ಅತಿ ಹೆಚ್ಚು ಅಂಕ ಪಡೆದ 66 ವಿದ್ಯಾರ್ಥಿಗಳಿಗೆ ಬಹುಮಾನ ಹಾಗೂ ಪ್ರಮಾಣ ಪತ್ರಗಳನ್ನು, 16 ವಿದ್ಯಾರ್ಥಿಗಳಿಗೆ ದತ್ತಿ ಪುರಸ್ಕಾರ ನೀಡಲಾಯಿತು.