ಜೇನು ಆರ್ಥಿಕ ಲಾಭದೊಂದಿಗೆ ಬೆಳೆಗಳ ಇಳುವರಿ ವೃದ್ಧಿ

ಪಟ್ಟಣದ ತೋಟಗಾರಿಕಾ ಇಲಾಖೆಯ ಕಚೇರಿ ಆವರಣದಲ್ಲಿ ರಾಜ್ಯ ವಲಯ ಮಧುವನ ಮತ್ತು ಜೇನು ಸಾಕಾಣೆ ಯೋಜನೆಯಡಿ ಗುರುವಾರ ಏರ್ಪಡಿಸಿದ್ದ ಜೇನು ಸಾಕಾಣಿಕೆಯ ತರಬೇತಿ ಕಾರ್ಯಕ್ರಮದಲ್ಲಿ ಮಾತನಾಡಿದರು.

ಇತ್ತೀಚಿನ ದಿನಗಳಲ್ಲಿ ಜೇನು ಸಾಕಾಣಿಕೆಯು ಒಂದು ಉಪ ಕಸುಬಾಗಿದ್ದು ಪರಾಗ ಸ್ಪರ್ಶ ಪ್ರಕ್ರಿಯೆ ಮೂಲಕ ಬೆಳೆಗಳಲ್ಲಿ ಇಳುವರಿಗೆ ಮಹತ್ತರವಾದ ಪಾತ್ರ ವಹಿಸುತ್ತಿದೆ. ಜೇನು ಸಾಕಾಣಿಕೆಯಿಂದ ಜೇನುತುಪ್ಪದ ಜತೆಗೆ ಇತರ ಉತ್ಪನ್ನಗಳಾದ ರಾಜಶಾಹಿರಸ, ಪೊಲೀನ್, ಮೇಣ, ಅಂಟು, ಜೇನುವಿಷ ಸೇರಿದಂತೆ ವಿವಿಧ ಉತ್ಪನ್ನಗಳನ್ನು ಪಡೆಯಬಹುದು ಎಂದರು.

ಜೇನು ಹುಳುವಿನ ಪರಾಗಸ್ಪರ್ಶ ಪ್ರಕ್ರಿಯೆಯಿಂದ ತೆಂಗಿನ ಬೆಳೆಯಲ್ಲಿ ಶೇ.30 ರಷ್ಟು ಉತ್ಪಾದನೆ ಹೆಚ್ಚಾಗುವ ಸಾಧ್ಯತೆ ಇದ್ದರೆ ಕಾಫಿ ಬೆಳೆಯಲ್ಲಿ ಶೇ.21 ರಿಂದ 30 ರಸ್ತು ಇಳುವರಿ ಹೆಚ್ಚು ದೊರಕಲಿದೆ ಎಂದರು.

ಜೇನು ಕೃಷಿ ಮಾಡಲು ಜೇನು ಪೆಟ್ಟಿಗೆ, ಹೊಗೆ ತಿದಿ, ಮುಖ ಪರದೆ, ಪೆಟ್ಟಿಗೆ ಸ್ಟ್ಯಾಂಡ್, ಮೇಣದ ಹಾಳೆಗಳು, ಶುಚಿಗೊಳಿಸುವ ಸಾಧನ ಮತ್ತು ಜೇನುಕುಟುಂಬ ಹಾಗೂ ತುಪ್ಪದ ಕೋಣೆ ಅತ್ಯವಶ್ಯಕವಾಗಿ ಬೇಕಾದ ಪರಿಕರಗಳಾಗಿದ್ದು ಸಾಮಾನ್ಯವಾಗಿ ಒಂದು ಪೆಟ್ಟಿಗೆ ಜೇನು ಕೃಷಿ ಮಾಡಲು ಸರಾಸರಿ 5500 ರೂ. ವೆಚ್ಚ ತಗುಲಲಿದೆ ಎಂದು ಮಾಹಿತಿ ನೀಡಿದರು.

ತುಡುವೆ ಜೇನು ಸುಮಾರು ಒಂದೂವರೆ ಕಿ.ಮೀ. ವ್ಯಾಪ್ತಿಯಲ್ಲಿ ಸಂಚರಿಸಿ ಪರಾಗಸ್ಪರ್ಶ ಮಾಡುವ ಮೂಲಕ ಜೀವ ವೈವಿಧ್ಯತೆ ಹೆಚ್ಚಲು ಕಾರಣವಾಗಲಿದೆ. ಪ್ರತಿ 10-15 ದಿನಗಳಿಗೊಮ್ಮೆ ಜೇನು ಪೆಟ್ಟಿಗೆಯನ್ನು ನಿಯಮಿತವಾಗಿ ಪರೀಕ್ಷೆ ಮಾಡಿ, ಸ್ವಚ್ಛಗೊಳಿಸಬೇಕು ಎಂದರು.

ಜೇನು ಹುಳು ಚುಚ್ಚುವುದರಿಂದ ಯಾವುದೇ ರೀತಿಯಲ್ಲಿ ಆತಂಕಕ್ಕೆ ಒಳಗಾಗಬಾರದು. ಮೂಳೆ ಸಂಬಂಧಿತ ರೋಗಗಳಿಗೆ ಒಂದು ರೀತಿಯಲ್ಲಿ ಔಷಧದಾಯಕವಾಗಿದೆ. ಜೇನಿನ ವಿಷ ನಮ್ಮ ದೇಹದಲ್ಲಿ ಸೇರಿದರೆ ಕ್ಯಾನ್ಸರ್ ಸಂಬಂಧಿತ ಸೆಲ್‌ಗಳು ಬೆಳೆಯುವುದು ನಿಲ್ಲಲಿದೆ ಎಂಬುದು ವೈಜ್ಞಾನಿಕ ಪರೀಕ್ಷೆಗಳಿಂದ ಸಾಬೀತುಗೊಂಡಿದೆ ಎಂದರು.

ತೋಟಗಾರಿಕಾ ಇಲಾಖೆಯ ಹಿರಿಯ ಸಹಾಯಕ ನಿರ್ದೇಶಕ ಗುರುಸ್ವಾಮಿ ಮಾತನಾಡಿ, ಜೇನು ಸಾಕಾಣಿಕೆಗೆ ಸರ್ಕಾರದಿಂದ ನೀಡಲಾಗುವ ವಿವಿಧ ಸವಲತ್ತುಗಳ ಬಗ್ಗೆ ಮಾಹಿತಿ ನೀಡಿದರು.

ಕಾರ್ಯಕ್ರಮದಲ್ಲಿ ಸಹಾಯಕ ತೋಟಗಾರಿಕಾ ಅಧಿಕಾರಿಗಳಾದ ಪ್ರಸಾದ್, ಮಲ್ಲಿಕಾರ್ಜುನ್ ಸೇರಿದಂತೆ ಮತ್ತಿತರರು ಇದ್ದರು.