ನೀರು ನುಗ್ಗಿ ಹೋಟೆಲ್ ಕಾಂಪೌಂಡ್ ಕುಸಿತ

ದೋಷಪೂರಿತ ವಾಲ್ವ್‌ನಿಂದಾಗಿ ನಿಯಂತ್ರಣಕ್ಕೆ ಬಾರದ ಜಲಸಂಗ್ರಹಾಗಾರದಿಂದ ಹೆಚ್ಚಿನ ನೀರಿನ ಒತ್ತಡದಿಂದ ಪಕ್ಕದ ತಗ್ಗು ಪ್ರದೇಶದಲ್ಲಿದ್ದ ಹೋಟೆಲ್ ಹಿಂಬದಿಗೆ ನುಗ್ಗಿದೆ. ಇದರಿಂದಾಗಿ ಕಾಂಪೌಂಡ್ ಗೋಡೆ ಕುಸಿದು, ನೆಲಮಹಡಿಯಲ್ಲಿ ನೀರು ನಿಂತುಕೊಂಡಿತ್ತು.

ಹೋಟೆಲ್‌ನ ನೆಲಮಾಳಿಗೆ, ಸ್ವಾಗತ ಪ್ರದೇಶ, ಕಾರಿಡಾರ್‌ಗಳು ಮತ್ತು ಕೊಠಡಿಗಳಿಗೆ ನೀರು ನುಗ್ಗಿದೆ, ಪೀಠೋಪಕರಣಗಳಿಗೂ ಹಾನಿಯಾಗಿದೆ.

ಇದು ಮೊದಲ ಘಟನೆಯಲ್ಲ. ಹಿಂದೆ ಅನೇಕ ಈ ಸಮಸ್ಯೆಯಾಗಿದ್ದು, ಇದನ್ನು ಸರಿಪಡಿಸಲು ಮತ್ತು ಆವರಣಕ್ಕೆ ನೀರು ಪ್ರವೇಶಿಸದಂತೆ ಕ್ರಮ ವಹಿಸಲು ಪಾಲಿಕೆಗೆ ಮನವಿ ಮಾಡಲಾಗಿತ್ತು. ಆದರೆ, ಏನು ಪ್ರಯೋಜನವಾಗಿಲ್ಲ ಎಂದು ಅಲ್ಲಿಯ ಹೋಟೆಲ್ ಸಿಬ್ಬಂದಿ ದೂರಿದ್ದಾರೆ.

ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ಮಾಡಿದ ಪಾಲಿಕೆಯ ಅಧೀಕ್ಷಕ ಇಂಜಿನಿಯರ್ ಮಂಜು, ನೆಲಮಟ್ಟದ ಸಂಗ್ರಹಾಗಾರದ ನೀರಿನ ಕವಾಟದಲ್ಲಿ ಸಮಸ್ಯೆ ಇದೆ. ವಾಲ್ವ್ ಚೇಂಬರ್ ದುರಸ್ತಿ ಮಾಡಲು ಕ್ರಿಯಾಯೋಜನೆ ಸಿದ್ಧಪಡಿಸಲಾಗುತ್ತಿದೆ. ಈಗ ವಾಲ್ವ್  ಮುಚ್ಚಲಾಗಿದೆ. ಹೋಟೆಲ್‌ಗೆ ನೀರಿನ ಹರಿವು ನಿಂತಿದೆ. ಭವಿಷ್ಯದಲ್ಲಿ ಇಂತಹ ಘಟನೆಗಳು ಮರುಕಳಿಸದಂತೆ ಎಚ್ಚರಿಕೆ ವಹಿಸಲಾಗುವುದು ಎಂದು ತಿಳಿಸಿದ್ದಾರೆ.

‘ಹೋಟೆಲ್‌ನ ಒಳಚರಂಡಿ ಮಾರ್ಗಗಳು, ನೀರಿನ ಪೈಪ್‌ಗಳು, ಭೂಗತ ವಿದ್ಯುತ್ ಕೇಬಲ್‌ಗಳು ಹಾನಿಗೊಳಗಾಗಿವೆ. ನೀರಿನ ಹರಿವಿನಿಂದಾಗಿ ಕಾಂಪೌಂಡ್ ಗೋಡೆ, ಬೇಲಿ ಕುಸಿದಿದೆ. ಹೋಟೆಲ್ ನೆಲಮಹಡಿ ಕೊಳಚೆ ನೀರಿನಿಂದ ತುಂಬಿದ್ದು, ಅದನ್ನು ನಮ್ಮ ಸಿಬ್ಬಂದಿಯೇ ಹೊರಹಾಕಿದ್ದಾರೆ. ಹೂಳು ಶೇಖರಣೆ, ದುರ್ವಾಸನೆಯಿಂದಾಗಿ ಹೋಟೆಲ್ ಎಡಭಾಗದಲ್ಲಿರುವ ಕೊಠಡಿಗಳನ್ನು ಕನಿಷ್ಠ ಒಂದು ವಾರ ಬಾಡಿಗೆಗೆ ನೀಡಲಾಗುವುದಿಲ್ಲ. ಇದರಿಂದ ಲಕ್ಷಾಂತರ ರೂ.ನಷ್ಟವಾಗಿದೆ’ ಎಂದು ಹೋಟೆಲ್‌ನ ಪ್ರತಿನಿಧಿಯೊಬ್ಬರು ತಿಳಿಸಿದರು.