ವ್ಯಾಕರಣದ ಅಧ್ಯಯನ ಅಗತ್ಯ

ನಗರದ ಭಾರತೀಯ ಭಾಷಾ ಸಂಸ್ಥಾನದಲ್ಲಿ ಭಾರತೀಯ ವ್ಯಾಕರಣ ಪರಂಪರೆ ಕುರಿತು ಆಯೋಜಿಸಿರುವ ಕಾರ್ಯಾಗಾರವನ್ನು ಸೋಮವಾರ ಉದ್ಘಾಟಿಸಿ ಮಾತನಾಡಿದರು.

ಪಾಣಿನಿ ಮತ್ತು ಪತಂಜಲಿ ಅವರ ಕೃತಿಗಳು ವಿಶ್ವದ ವ್ಯಾಕರಣ ಅಧ್ಯಯನಕ್ಕೆ ಮಹತ್ವದ ಕೊಡುಗೆ ನೀಡಿವೆ. ಪತಂಜಲಿಯ ಚರ್ಚೆಗಳನ್ನು ಕೇವಲ ಪಾಣಿನಿಯ ವ್ಯಾಕರಣಕ್ಕೆ ಸೀಮಿತಗೊಳಿಸದೆ, ಕಾತಂತ್ರ, ಜೈನೇಂದ್ರ ಸೇರಿದಂತೆ ವಿವಿಧ ವ್ಯಾಕರಣ ಪರಂಪರೆಗಳೊಂದಿಗೆ ಸಮೀಕರಿಸಿ ಅಧ್ಯಯನ ಮಾಡಬೇಕು. ಇದರಿಂದ ಭಾರತೀಯ ವ್ಯಾಕರಣ ಪರಂಪರೆಯ ವ್ಯಾಪ್ತಿ ಮತ್ತಷ್ಟು ವಿಸ್ತರಿಸಲಿದೆ ಎಂದರು.

ಭಾರತೀಯ ವ್ಯಾಕರಣ ಪರಂಪರೆಯನ್ನು ಕೇವಲ ಸಂಸ್ಕೃತಕ್ಕೆ ಸೀಮಿತಗೊಳಿಸಬಾರದು. ಪಾಲಿ, ಪ್ರಾಕೃತ ಸೇರಿದಂತೆ ಹಲವು ಭಾರತೀಯ ಭಾಷೆಗಳು ತಮ್ಮದೇ ಆದ ವಿಶಿಷ್ಟ ವ್ಯಾಕರಣ ಪರಂಪರೆಯನ್ನು ಹೊಂದಿವೆ. ಭಾಷೆಯ ಅಧ್ಯಯನ, ವ್ಯಾಕರಣ ಹಾಗೂ ಭಾಷಾಶಾಸ್ತ್ರದ ಬೆಳವಣಿಗೆಗೆ ಭಾರತ ಶತಮಾನಗಳಿಂದ ಮಹತ್ವದ ಕೊಡುಗೆ ನೀಡಿದೆ. ಹೀಗಾಗಿ ಭಾರತೀಯ ವ್ಯಾಕರಣ ಪರಂಪರೆಯ ಅಧ್ಯಯನದತ್ತ ಜಗತ್ತಿನ ಪ್ರಮುಖ ವಿಶ್ವವಿದ್ಯಾಲಯಗಳು ಮತ್ತು ಸಂಶೋಧನಾ ಸಂಸ್ಥೆಗಳು ಹೆಚ್ಚಿನ ಆಸಕ್ತಿ ತೋರುತ್ತಿವೆ ಎಂದು ಹೇಳಿದರು.

ಸಿಐಐಎಲ್ ನಿರ್ದೇಶಕ ಪ್ರೊ. ಬಸವರಾಜ ಕೊಡಗುಂಟಿ ಮಾತನಾಡಿ, ಭಾರತೀಯ ವ್ಯಾಕರಣ ಪರಂಪರೆಯನ್ನು ಸಂಸ್ಕೃತಕ್ಕೆ ಮಾತ್ರ ಸೀಮಿತಗೊಳಿಸಲಾಗುವುದಿಲ್ಲ. ಕನ್ನಡ, ತೆಲುಗು, ತಮಿಳು, ಮಲಯಾಳಂ, ಪಾಲಿ, ಪ್ರಾಕೃತ ಸೇರಿದಂತೆ ಹಲವು ಭಾಷೆಗಳು ತಮ್ಮದೇ ಆದ ವ್ಯಾಕರಣ ಪರಂಪರೆ ಮತ್ತು ಇತಿಹಾಸ ಹೊಂದಿವೆ. ವಿವಿಧ ಭಾಷಾ ಪರಂಪರೆಗಳ ನಡುವಿನ ಪರಸ್ಪರ ಸಂಪರ್ಕವು ಭಾರತದ ಬೌದ್ಧಿಕ ಇತಿಹಾಸದ ಪ್ರಮುಖ ಅಂಶವಾಗಿದೆ ಎಂದರು.

ಪುಣೆ ವಿಶ್ವವಿದ್ಯಾಲಯದ ಸಂಸ್ಕೃತ ಮತ್ತು ಪ್ರಾಕೃತ ಭಾಷಾ ವಿಭಾಗದ ನಿವೃತ್ತ ಪ್ರಾಧ್ಯಾಪಕಿ ಪ್ರೊ.ಸರೋಜಾ ಭಾಟೆ, ಸಿಐಐಎಲ್ ಸಹಾಯಕ ನಿರ್ದೇಶಕ ಪಂಕಜ್ ದ್ವಿವೇದಿ, ಕಾರ್ಯಕ್ರಮ ಸಂಯೋಜಕ ಸುಜೋಯ್ ಸರ್ಕಾರ್ ಮತ್ತಿತರರು ಉಪಸ್ಥಿತರಿದ್ದರು.

ಸೆ.14ರವರೆಗೆ ನಡೆಯಲಿರುವ ಕಾರ್ಯಾಗಾರದಲ್ಲಿ ಭಾರತೀಯ ವ್ಯಾಕರಣ ಪರಂಪರೆಯ ವಿವಿಧ ಆಯಾಮಗಳು ಹಾಗೂ ಸಮಕಾಲೀನ ಭಾಷಾ ಅಧ್ಯಯನದಲ್ಲಿ ಅವುಗಳ ಪ್ರಸ್ತುತತೆ ಕುರಿತು ಸಮಗ್ರ ಅರಿವು ಮೂಡಿಸಲಾಗುತ್ತದೆ.

ಎರಡು ವಾರಗಳ ಕಾರ್ಯಕ್ರಮದಲ್ಲಿ ಕೇಂದ್ರ ಹಾಗೂ ರಾಜ್ಯ ವಿಶ್ವವಿದ್ಯಾಲಯಗಳು, ಐಐಟಿಗಳು, ಐಐಐಟಿಗಳು ಮತ್ತು ಸಿಐಐಎಲ್‌ನ 22 ತಜ್ಞರಿಂದ ಒಟ್ಟು 56 ಶೈಕ್ಷಣಿಕ ಅಧಿವೇಶನಗಳು ನಡೆಯಲಿವೆ. ದೇಶದ ವಿವಿಧ ಭಾಗಗಳ ವಿಶ್ವವಿದ್ಯಾಲಯಗಳು, ಐಐಟಿಗಳು, ಐಐಐಟಿಗಳು ಹಾಗೂ ಭಾಷಾ ಸಂಶೋಧನಾ ಸಂಸ್ಥೆಗಳಿಗೆ ಸೇರಿದ 163 ಮಂದಿ ಕಾರ್ಯಕ್ರಮಕ್ಕೆ ನೋಂದಾಯಿಸಿಕೊಂಡಿದ್ದಾರೆ.