ವಿದ್ಯುತ್ ವಿತರಣಾ ಪರವಾನಗಿ ಖಾಸಗಿಯವರಿಗೆ ನೀಡದಿರಿ

ಗುರುವಾರ ನಗರದ ಸಂವಿಧಾನ ವೃತ್ತದಿಂದ ನೂರಾರು ರೈತರು ನಗರದ ಪ್ರಮುಖ ರಸ್ತೆಗಳಲ್ಲಿ ಪ್ರತಿಭಟನಾ ಮೆರವಣಿಗೆ ನಡೆಸಿದರು.

ಐಪಿ ಸೆಟ್‌ಗಳಿಗೆ ಉಚಿತ ವಿದ್ಯುತ್ ಬೇಕು, ವಿದ್ಯುತ್ ವಿತರಣೆ ಜವಾಬ್ದಾರಿ ಖಾಸಗಿ ಕಂಪನಿಗೆ ಬೇಡವೇ ಬೇಡ, ಖಾಸಗೀಕರಣಕ್ಕೆ ನಾವು ಒಪ್ಪುವುದಿಲ್ಲ ಎಂಬಿತ್ಯಾದಿ ಘೋಷಣೆಗಳನ್ನು ಕೂಗಿ ಸಾರ್ವಜನಿಕರ ಗಮನಸೆಳೆದರು.

ನಗರದ ಕಲ್ಪತರು ವೃತ್ತದಲ್ಲಿ ಮಾನವ ಸರಪಳಿ ನಡೆಸಿ ಪ್ರತಿರೋಧ ತೋರಿದರು. ನಂತರ ಗೋಕುಲ ರಸ್ತೆಯ ಮೂಲಕ ತಾಲೂಕು ಕಚೇರಿ ಆವರಣದಲ್ಲಿ ಜಮಾವಣೆಗೊಂಡರು.

ರೈತ ಸಂಘದ ಜಿಲ್ಲಾದ್ಯಕ್ಷ ಹೊಸೂರು ಕುಮಾರ್ ಮಾತನಾಡಿ, 125 ವರ್ಷಗಳ ಇತಿಹಾಸ ಹೊಂದಿರುವ ರಾಜ್ಯ ವಿದ್ಯುತ್ ನಿಗಮವನ್ನು ಖಾಸಗೀಕರಣದತ್ತ ಪರಿವರ್ತಿಸಲು ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳು ಹೆಜ್ಜೆ ಇಡುತ್ತಿವೆ. ಟಾಟಾ ಪವರ್ ಕಂಪನಿಯು ಸರ್ಕಾರಕ್ಕೆ ಪರವಾನಗಿ ನೀಡಲು ಅರ್ಜಿ ಸಲ್ಲಿಸಿರುವುದೇ ಇದಕ್ಕೆ ಸಾಕ್ಷಿಯಾಗಿದೆ. ಸರ್ಕಾರ ವಿದ್ಯುತ್ ವಿತರಣೆಯನ್ನು ಮಾತ್ರ ನೀಡುತ್ತೇವೆನ್ನುವ ಸಬೂಬು ಹೇಳುತ್ತಲೇ ಹಂತಹಂತವಾಗಿ ಮಂಡಳಿಯನ್ನು ಖಾಸಗಿಯವರ ಕೈಗೆ ಒಪ್ಪಿಸಿ ರೈತರ ಜೀವನಕ್ಕೆ ಸಂಚಕಾರ ತರಲು ಸರ್ಕಾರಗಳು ಷಡ್ಯಂತ್ರ ನಡೆಸುತ್ತಿವೆ ಎನ್ನುವ ಅನುಮಾನಗಳು ರೈತರನ್ನು ಕಾಡುತ್ತಿದೆ. ಅತ್ಯುತ್ತಮ ಮೂಲಸೌಕರ್ಯಗಳು, ವಿತರಣಾ ವ್ಯವಸ್ಥೆಯನ್ನು ಮಂಡಳಿ ಹೊಂದಿದ್ದು, ಸಾಕಷ್ಟು ಲಾಭವನ್ನೂ ಗಳಿಸುತ್ತಿದೆ. ಹೀಗಿದ್ದೂ ಒಂದೊಂದೇ ಹಂತವನ್ನು ಖಾಸಗಿಯವರಿಗೆ ನೀಡುವತ್ತ ಸರ್ಕಾರಗಳ ಚಿಂತನೆ ಯಾಕಾಗುತ್ತಿದೆ? ಎಂದು ಪ್ರಶ್ನಿಸಿದರು.

ರೈತರ ಪಂಪ್‌ಸೆಟ್‌ಗಳಿಗೆ ಉಚಿತ ವಿದ್ಯುತ್‌ನ್ನು ಖಾಸಗಿಯವರು ನೀಡಬಲ್ಲರೇ? ಖಾಸಗೀಕರಣ ರೈತರ ಬದುಕಿಗೆ ಇಡುತ್ತಿರುವ ಕೊಳ್ಳಿಯಾಗಿದೆ. ಖಾಸಗೀಕರಣದಿಂದ ರೈತರ ಪಂಪ್‌ಸೆಟ್‌ಗಳಿಗೆ ಮೀಟರ್ ಅಳವಡಿಸಲಾಗುತ್ತದೆ. ಸರ್ಕಾರದ ವಿವಿಧ ಯೋಜನೆಗಳಾದ ಗೃಹಜ್ಯೋತಿ, ನಿರಂತರ ವಿದ್ಯುತ್, ಕುಟೀರ ಜ್ಯೋತಿ, ಭಾಗ್ಯಜ್ಯೋತಿ ಮುಂತಾದುವೆಲ್ಲವೂ ರದ್ದಾಗಲಿವೆ. ಸಣ್ಣ ಕೈಗಾರಿಕೆಗಳಿಗೆ ರಿಯಾಯಿತಿ ದರದಲ್ಲಿ ಪೂರೈಸುವ ವಿದ್ಯುತ್ ಖೋತಾ ಆಗಲಿದೆ. ವಿದ್ಯುತ್ ಬಳಕೆಗೆ ಮುಂಗಡ ಹಣ ಪಾವತಿಯ ಹುನ್ನಾರ ಇದರಲ್ಲಿ ಅಡಗಿದೆ. ಈವರೆಗೆ ಸಾರ್ವಜನಿಕರ ಹಣದಿಂದ ಅಭಿವೃದ್ಧಿಪಡಿಸಿದ ಎಲ್ಲ ವ್ಯವಸ್ಥೆಗಳೂ ಖಾಸಗಿಯವರ ಪಾಲಾಗಲಿದೆ ಎಂದು ತಿಳಿಸಿದರು.

ತಾಲೂಕು ಪ್ರಧಾನ ಕಾರ್ಯದರ್ಶಿ ಅಗ್ರಹಾರ ರಾಮೇಗೌಡ ಮಾತನಾಡಿ, ಸರ್ಕಾರಗಳು ಸೌರಶಕ್ತಿ ಮೂಲಗಳ ಮೂಲಕ ವಿದ್ಯುತ್ ಉತ್ಪಾದನೆಗೆ ರೈತರಿಗೆ ಪ್ರೇರಣೆ ನೀಡುವ ಕಾರ್ ಇನ್ನಷ್ಟು ಪರಿಣಾಮಕಾರಿಯಾಗಿ ಕೈಗೊಳ್ಳಲಿ. ಟಾಟಾ ಪವರ್ ನೀಡಿರುವ ದರಪಟ್ಟಿ ನಿಗಮ ನೀಡುತ್ತಿರುವುದಕ್ಕಿಂತ ಶೇ.25ರಷ್ಟು ಹೆಚ್ಚಳವಿದೆ. ಸಾರ್ವಜನಿಕರ ಆಸ್ತಿಯನ್ನು ಖಾಸಗಿಯವರ ಪಾಲು ಮಾಡುವ ಸರ್ಕಾರಗಳು ಹೊರಟಿರುವುದು ಖಂಡನೀಯವೆಂದರು.

ಪ್ರತಿಭಟನಾ ಸ್ಥಳಕ್ಕೆ ಆಗಮಿಸಿದ ಶಿರಸ್ತೇದಾರ್ ಶ್ರೀಪಾದ್ ನಲವತ್‌ವಾಡಕರ್ ಅವರಿಗೆ ರೈತರು ಮನವಿ ಸಲ್ಲಿಸಿದರು. ರೈತ ಸಂಘ ತಾಲೂಕು ಅಧ್ಯಕ್ಷ ಬೆಂಕಿಪುರ ಚಿಕ್ನಣ್ಣ, ಗೌರವಾಧ್ಯಕ್ಷ ವಿಷಕಂಠಪ್ಪ, ಉಂಡುವಾಡಿ ಸಿ.ಚಂದ್ರೇಗೌಡ, ಧನಂಜಯ, ದಲಿತ ಮುಖಂಡ ಅತ್ತಿಗುಪ್ಪೆ ರಾಮಕೃಷ್ಣ, ಕಲ್ಲಹಳ್ಳಿ ಜಯಣ್ಣ, ಹರೀಶ್, ಸತೀಶ್, ಬಸವರಾಜೇಗೌಡ, ಕಟ್ಟೆಮಳಲವಾಡಿ ಮಹದೇವ್, ವೆಂಕಟಾಚಲಯ್ಯ, ಈಶ್ವರ್, ಸುರೇಶ್, ತಟ್ಟೆಕೆರೆ ಶ್ರೀನಿವಾಸ್, ಚಿಕ್ಕಹುಣಸೂರು ರಾಜು ಇತರರು ಇದ್ದರು.

ಇದೇ ವೇಳೆ ಸಾವಿರಕ್ಕೂ ಹೆಚ್ಚು ಪಂಪ್‌ಸೆಟ್ ಹೊಂದಿದ ರೈತರು ಖಾಸಗೀಕರಣ ನೀಡಬಾರದೆಂದು ಆಗ್ರಹಿಸಿ ಮನವಿಗಳನ್ನು ಸೆಸ್ಕ್ ಎಇಇ ಜಗದೀಶ್ ಅವರಿಗೆ ನೀಡಿದರು.