ದ್ವೇಷ ಭಾಷಣ ಕಾಯ್ದೆಗೆ ‘ಕುವೆಂಪು ಕೋಮು ಸೌಹಾರ್ದ ಕಾಯ್ದೆ’ ಹೆಸರಿಡಲು ಒತ್ತಾಯ

ವಿಶ್ವಮಾನವ ಧರ್ಮ ಜಾಗೃತಿ ವೇದಿಕೆ ವತಿಯಿಂದ ತಿ.ನರಸೀಪುರ ತಾಲೂಕಿನ ಯಾಚೇನಹಳ್ಳಿಯ ಶ್ರೀ ರಾಮಕೃಷ್ಣ ಸೇವಾ ಕೇಂದ್ರದ ಶಾಲೆ ಆವರಣದಲ್ಲಿ ಸೋಮವಾರ ಕುವೆಂಪು ಜಯಂತಿ ಅಂಗವಾಗಿ ‘ವಿಶ್ವ ಮಾನವ ಧರ್ಮ ಮಹಾಧಿವೇಶನ’ ಆಯೋಜಿಸಲಾಗಿತ್ತು. ಮಹಾಧಿವೇಶನದಲ್ಲಿ ಹಲವು ನಿರ್ಣಯಗಳನ್ನು ಕೈಗೊಳ್ಳಲಾಯಿತು.

ಕೇಂದ್ರ ಸರ್ಕಾರ ಸದ್ಯದಲ್ಲಿಯೇ ಕೈಗೊಳ್ಳಲಿರುವ ಜಾತಿ ಗಣತಿ ಸಂದರ್ಭ ‘ವಿಶ್ವಮಾನವ ಧರ್ಮ’ ಎಂದು ದಾಖಲಿಸಲು ಅವಕಾಶ ನೀಡಬೇಕು, ಎಲ್ಲ ಶಾಲಾ, ಕಾಲೇಜುಗಳಲ್ಲಿ ಕಡ್ಡಾಯವಾಗಿ ‘ವಿಶ್ವಮಾನವ ವೈಚಾರಿಕ ಕ್ಲಬ್’ ಸ್ಥಾಪಿಸಲು ಕ್ರಮ ಕೈಗೊಳ್ಳಬೇಕು ಎಂದು ಮಹಾಧಿವೇಶನದಲ್ಲಿ ನಿರ್ಣಯ ಕೈಗೊಂಡು ಈ ಬಗ್ಗೆ ಕೇಂದ್ರ ಹಾಗೂ ರಾಜ್ಯ ಸರ್ಕಾರವನ್ನು ಒತ್ತಾಯಿಸಲು ತೀರ್ಮಾನಿಸಲಾಯಿತು.

ಕುವೆಂಪು ಜನ್ಮದಿನವನ್ನು ಸರ್ಕಾರಿ, ಖಾಸಗಿ ಶಾಲಾ, ಕಾಲೇಜುಗಳು ಹಾಗೂ ಇಲಾಖೆಗಳಲ್ಲಿ ವಿಶ್ವಮಾನವ ದಿನವಾಗಿ ಆಚರಿಸಲು ಸುತ್ತೋಲೆ ಹೊರಡಿಸಬೇಕು, ಶಾಲಾ ಪಠ್ಯಕ್ರಮದಲ್ಲಿ ಕುವೆಂಪು ಒಳಗೊಂಡಂತೆ ಎಲ್ಲ ವೈಚಾರಿಕ ಲೇಖಕರ ವಿಚಾರಗಳು ಹೆಚ್ಚು ಇರುವಂತೆ ಪಠ್ಯಕ್ರಮ ಸಮಿತಿಗೆ ಶಿಫಾರಸು ಮಾಡಲು ನಿರ್ಣಯ ಕೈಗೊಳ್ಳಲಾಯಿತು.

ಮುಂದಿನ ಮಹಾಧಿವೇಶನವನ್ನು ಬೆಂಗಳೂರಿನಲ್ಲಿ ನಡೆಸಲು ತೀರ್ಮಾನಿಸಲಾಯಿತು. ಕಾರ್ಯಕ್ರಮದಲ್ಲಿ ಕೆಂಗೇರಿಯ ಶ್ರೀ ವಿಶ್ವಮಾನವ ಪೀಠದ ಶ್ರೀ ನಿಶ್ಚಲಾನಂದ ಸ್ವಾಮೀಜಿ, ಶ್ರೀ ರಾಮಕೃಷ್ಣ ಸೇವಾ ಕೇಂದ್ರ ಟ್ರಸ್ಟ್ ವ್ಯವಸ್ಥಾಪಕ ಟ್ರಸ್ಟಿ ಶ್ರೀ ನಾದಾನಂದನಾಥ ಸ್ವಾಮೀಜಿ, ಸಾಹಿತ್ಯ ಅಕಾಡೆಮಿ ಅಧ್ಯಕ್ಷ ಎಲ್.ಎನ್. ಮುಕುಂದರಾಜ್, ವಿಮರ್ಶಕ ಚಂದ್ರಶೇಖರ ನಂಗಲಿ, ಸಹಕಾರಿ ಧುರೀಣ ವೈ.ಎನ್. ಶಂಕರೇಗೌಡ ಇದ್ದರು.