ಮೈಸೂರಿನಲ್ಲಿ ಎಸ್. ಜಾನಕಿ ಸ್ಮಾರಕ ನಿರ್ಮಾಣಕ್ಕೆ ಒತ್ತಾಯ

ನಟರು, ಗಾಯಕರು, ಸಾಹಿತ್ಯಾಸಕ್ತರು, ಸಂಗೀತಪ್ರೇಮಿಗಳು ಹಾಗೂ ಸಾರ್ವಜನಿಕರು ಈ ವಿಚಾರವಾಗಿ ಧ್ವನಿಗೂಡಿಸಿದ್ದರೆ. ಜಾನಕಿ ಅವರ ಅಂತ್ಯಕ್ರಿಯೆ ನಡೆದ ಎಚ್.ಡಿ. ಕೋಟೆ ತಾಲೂಕಿನ ಕಣಿಯನಹುಂಡಿಯಲ್ಲೇ ಸ್ಮಾರಕ ನಿರ್ಮಿಸಿ, ಅದು ಸಂಗೀತಾಭಿಮಾನಿಗಳ ಭಾವನಾತ್ಮಕ ತಾಣವಾಗಬೇಕು ಎಂಬ ಬೇಡಿಕೆ ಭಾನುವಾರ ನಗರದ ಮಹಾರಾಜ ಕಾಲೇಜು ಮೈದಾನದಲ್ಲಿ ಎಸ್. ಜಾನಕಿ ಅವರ ಅಂತಿಮ ದರ್ಶನದ ವೇಳೆ ಕೇಳಿ ಬಂತು.

ಕನ್ನಡ ಭಾಷೆ ಮತ್ತು ಕನ್ನಡಿಗರ ಬಗ್ಗೆ ಜಾನಕಿ ಅವರಿಗೆ ಇದ್ದ ಪ್ರೀತಿ ಎಲ್ಲರಿಗೂ ತಿಳಿದ ಸಂಗತಿ. ಹಲವು ಭಾಷೆಗಳಲ್ಲಿ ಸಾವಿರಾರು ಹಾಡುಗಳನ್ನು ಹಾಡಿದ್ದರೂ, ಕನ್ನಡದ ಬಗ್ಗೆ ಅವರು ತೋರಿದ ಅಭಿಮಾನ ವಿಶೇಷವಾಗಿತ್ತು. ಜೀವನದ ಕೊನೆಯ ದಿನಗಳನ್ನು ಅವರು ಸಾಂಸ್ಕೃತಿಕ ನಗರಿ ಮೈಸೂರಿನಲ್ಲಿ ಕಳೆದರು. ತಮ್ಮ ಅಂತಿಮ ಪಯಣವೂ ಇದೇ ನೆಲದಲ್ಲಿ ಮುಗಿಯಬೇಕೆಂಬ ಅವರ ಇಚ್ಛೆಯಂತೆ ಕನ್ನಡ ನಾಡಿನ ಮಣ್ಣಿನಲ್ಲೇ ಅವರು ಲೀನರಾದರು. ಇದೇ ಕಾರಣದಿಂದ, ಅವರ ನೆನಪು ಕೂಡ ಈ ನೆಲದಲ್ಲೇ ಶಾಶ್ವತವಾಗಿ ಉಳಿಯಬೇಕು ಎಂಬುದು ಅಭಿಮಾನಿಗಳ ಆಶಯವಾಗಿದೆ.

ಸ್ಮಾರಕ ನಿರ್ಮಾಣದ ಜತೆಗೆ ಮೈಸೂರು ವಿಶ್ವವಿದ್ಯಾಲಯದಲ್ಲಿ ‘ಎಸ್.ಜಾನಕಿ ಸಂಗೀತ ಅಧ್ಯಯನ ಪೀಠ’ ಆರಂಭಿಸಬೇಕೆಂಬ ಒತ್ತಾಯವೂ ಕೇಳಿಬರುತ್ತಿದೆ. ಅವರ ಹೆಸರಿನಲ್ಲಿ ಸಂಶೋಧನೆ, ಸಂಗೀತ ಅಧ್ಯಯನ, ಕಾರ್ಯಾಗಾರಗಳು ಹಾಗೂ ಯುವ ಗಾಯಕರಿಗೆ ತರಬೇತಿ ಕಾರ್ಯಕ್ರಮಗಳನ್ನು ನಡೆಸಿದರೆ, ಅದು ಅವರಿಗೆ ಸಲ್ಲಿಸುವ ಅತ್ಯಂತ ಅರ್ಥಪೂರ್ಣ ಗೌರವವಾಗಲಿದೆ ಎಂಬ ಅಭಿಪ್ರಾಯ ಸಂಗೀತ ವಲಯದಲ್ಲಿ ವ್ಯಕ್ತವಾಗುತ್ತಿದೆ.

ಸಂಗೀತ ಕ್ಷೇತ್ರಕ್ಕೆ ಜಾನಕಿ ನೀಡಿರುವ ಕೊಡುಗೆ ಕೇವಲ ಪ್ರಶಸ್ತಿಗಳಲ್ಲಿ ಅಳೆಯಲಾಗದು. ಐದು ದಶಕಗಳಿಗೂ ಹೆಚ್ಚು ಕಾಲ ತಮ್ಮ ಮಧುರ ಕಂಠದಿಂದ ಭಾರತೀಯ ಚಿತ್ರರಂಗವನ್ನು ಶ್ರೀಮಂತಗೊಳಿಸಿದ ಅವರು, ಲಕ್ಷಾಂತರ ಜನರ ಬದುಕಿನ ನೆನಪುಗಳಿಗೆ ಧ್ವನಿಯಾಗಿದ್ದರು. ಸಂತೋಷ, ದುಃಖ, ಪ್ರೀತಿ, ವಿರಹ, ಭಕ್ತಿಪ್ರತಿಯೊಂದು ಭಾವನೆಗೂ ತಮ್ಮ ಗಾಯನದ ಮೂಲಕ ಜೀವ ತುಂಬಿದ ಅಪರೂಪದ ಕಲಾವಿದೆ.

ಜಾನಕಿ ಅವರಂತಹ ಕಲಾವಿದರು ದೇಹವಾಗಿ ನಮ್ಮೊಂದಿಗಿಲ್ಲದಿರಬಹುದು. ಆದರೆ ಅವರ ನೆನಪು, ಸಾಧನೆ ಮತ್ತು ಸಂಗೀತವನ್ನು ಮುಂದಿನ ತಲೆಮಾರಿಗೆ ಪರಿಚಯಿಸುವ ಹೊಣೆ ಸಮಾಜದ ಮೇಲಿದೆ ಎಂಬ ಮಾತುಗಳು ಇದೀಗ ಎಲ್ಲೆಡೆಯಿಂದ ಕೇಳಿಬರುತ್ತಿವೆ. ಕಣಿಯನಹುಂಡಿಯಲ್ಲಿ ಸ್ಮಾರಕ ಹಾಗೂ ಮೈಸೂರು ವಿಶ್ವವಿದ್ಯಾಲಯದಲ್ಲಿ ಸಂಗೀತ ಅಧ್ಯಯನ ಪೀಠ ಸ್ಥಾಪನೆಯಾದರೆ, ಅದು ಕೇವಲ ಒಬ್ಬ ಗಾಯಕಿಗೆ ಸಲ್ಲಿಸುವ ಗೌರವವಾಗುವುದಿಲ್ಲ; ಕನ್ನಡ ನಾಡು ಸಂಗೀತಕ್ಕೆ ತೋರುವ ಕೃತಜ್ಞತೆಯ ಪ್ರತೀಕವಾಗಲಿದೆ.