ನೋಡಬನ್ನಿ ಮೈಸೂರು ದಸರಾ, ಮಹಾಮಸ್ತಕಾಭಿಷೇಕ...

ಏನಪ್ಪ ಇದು, ಮಹಾಮಸ್ತಕಾಭಿಷೇಕ ಮುಗಿದು ವರ್ಷಗಳಾಗಿವೆ. ದಸರಾಗೆ ಇನ್ನಷ್ಟೇ ಸಿದ್ಧತೆ ಆರಂಭವಾಗಿದೆ. ಈಗ ನೋಡಲು ಹೇಗೆ ಸಾಧ್ಯ ಎಂಬ ಪ್ರಶ್ನೆ ಮೂಡುವುದು ಸಹಜ. ಅದಕ್ಕೆ ಉತ್ತರವೇ ನಗರದ ಕಲಾಮಂದಿರದ ಸುಚಿತ್ರ ಕಲಾ ಗ್ಯಾಲರಿಯಲ್ಲಿ ಬೆಂಗಳೂರಿನ ಫೋಟೋಗ್ರಾಫಿಕ್ ಕ್ಲಬ್ ಆಯೋಜಿಸಿರುವ ಎರಡು ದಿನಗಳ ‘ಪರಂಪರೆ ಕರ್ನಾಟಕ 2026: ಕರ್ನಾಟಕದ ಜಾತ್ರೆ, ಉತ್ಸವಗಳ ಛಾಯಾಚಿತ್ರ’ ಸ್ಪರ್ಧೆಯ ಆಯ್ದ ಛಾಯಾಚಿತ್ರಗಳ ಪ್ರದರ್ಶನ.

ರಾಜ್ಯದ ಮೂಲೆ ಮೂಲೆಗಳಲ್ಲಿ ನಡೆಯುವ ಜಾತ್ರೆಗಳು, ಉತ್ಸವಗಳ ಅಪರೂಪದ ಕ್ಷಣಗಳನ್ನು ಕ್ಯಾಮರಾದಲ್ಲಿ ಸೆರೆಹಿಡಿದಿರುವ ಛಾಯಾಚಿತ್ರಗಳು ಪ್ರದರ್ಶನದಲ್ಲಿ ವೀಕ್ಷಕರನ್ನು ಆಕರ್ಷಿಸುತ್ತಿವೆ. ಸ್ಪರ್ಧೆಗೆ 50 ಛಾಯಾಗ್ರಾಹಕರು ಕಳುಹಿಸಿದ್ದ 185 ಛಾಯಾಚಿತ್ರಗಳಲ್ಲಿ ಆಯ್ಕೆಯಾದ 30 ಅತ್ಯುತ್ತಮ ಚಿತ್ರಗಳನ್ನು ಪ್ರದರ್ಶನಕ್ಕಿಡಲಾಗಿದೆ. ಜುಲೈ 12ರವರೆಗೆ ಸಾರ್ವಜನಿಕರಿಗೆ ಪ್ರದರ್ಶನ ವೀಕ್ಷಿಸಲು ಅವಕಾಶ ಕಲ್ಪಿಸಲಾಗಿದೆ.

ಪ್ರದರ್ಶನದಲ್ಲಿ ಬನಶಂಕರಿ ಅಮ್ಮನ ರಥೋತ್ಸವ, ಸಂತ ಶಿಶುನಾಳ ಶರೀಫ ಅಜ್ಜನ ಜಾತ್ರೆ, ಶ್ರೀ ದುರ್ಗಾಪರಮೇಶ್ವರಿ ಉತ್ಸವ, ಶ್ರವಣಬೆಳಗೊಳದ ಮಹಾಮಸ್ತಕಾಭಿಷೇಕ, ಕುಕನೂರು ಗುಡ್ನೇಶ್ವರ ಜಾತ್ರೆ, ಮೈಸೂರು ದಸರಾ ಮಹೋತ್ಸವ, ಹೆಸರಘಟ್ಟ ಗ್ರಾಮದೇವತೆಯ ಆರತಿ ಮೆರವಣಿಗೆ, ಮಂಗಳೂರಿನ ಕೋಡಿಯಾಲ ತೇರು, ಉಚ್ಚಿಲದ ನವರಾತ್ರಿ, ಕೊಪ್ಪಳದ ಶ್ರೀ ಗವಿಸಿದ್ದೇಶ್ವರ ರಥೋತ್ಸವ, ಗೋಕಾಕ್‌ನ ಭಂಡಾರ ಜಾತ್ರೆ ಹಾಗೂ ಕೊಪ್ಪಳದ ಹನುಮ ಮಾಲಾ ಅಂಜನಾದ್ರಿ ಸೇರಿದಂತೆ ಕರ್ನಾಟಕದ ವಿವಿಧ ಭಾಗಗಳ ಸಾಂಸ್ಕೃತಿಕ ಮತ್ತು ಧಾರ್ಮಿಕ ವೈಭವವನ್ನು ಪ್ರತಿಬಿಂಬಿಸುವ ಛಾಯಾಚಿತ್ರಗಳು ಗಮನ ಸೆಳೆಯುತ್ತಿವೆ.

ರಾಜ್ಯದ ವೈವಿಧ್ಯಮಯ ಸಂಸ್ಕೃತಿ, ಜಾನಪದ ಪರಂಪರೆ, ಧಾರ್ಮಿಕ ಸಹಬಾಳ್ವೆ ಹಾಗೂ ಆಚರಣೆಗಳ ವೈಶಿಷ್ಟ್ಯವನ್ನು ಈ ಚಿತ್ರಗಳು ಮನೋಜ್ಞವಾಗಿ ಕಟ್ಟಿಕೊಡುತ್ತವೆ.

ಸುಚಿತ್ರ ಕಲಾ ಗ್ಯಾಲರಿಯಲ್ಲಿ ಶನಿವಾರ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಜಾನಪದ ಪರಿಷತ್ತು ಮತ್ತು ಜಾನಪದ ಲೋಕದ ಅಧ್ಯಕ್ಷ ಪ್ರೊ.ಹಿ.ಚಿ.ಬೋರಲಿಂಗಯ್ಯ ಪ್ರದರ್ಶನಕ್ಕೆ ಚಾಲನೆ ನೀಡಿದರು. ಬಳಿಕ ಮಾತನಾಡಿದ ಅವರು, ಛಾಯಾಗ್ರಹಣ ಸತ್ಯಕ್ಕೆ ಹತ್ತಿರವಾಗಿರುವ ಕಲೆಯಾಗಿದ್ದು, ಇತಿಹಾಸವನ್ನು ನಂಬುವಂತೆ ಮಾಡುವ ಶಕ್ತಿ ಛಾಯಾಚಿತ್ರಗಳಿಗಿದೆ ಎಂದರು.

ಇಂತಹ ಸ್ಪರ್ಧೆಗಳ ಆಯೋಜನೆ ಸಾರ್ಥಕ ಕಾರ್ಯವಾಗಿದೆ. ಭಾರತವು ಬಹುಸಂಸ್ಕೃತಿಯ ದೇಶವಾಗಿದ್ದು, ವಿವಿಧ ಜಾತ್ರೆಗಳು, ಉತ್ಸವಗಳು ಹಾಗೂ ಆಚರಣೆಗಳು ನಮ್ಮ ಸಾಂಸ್ಕೃತಿಕ ವೈವಿಧ್ಯವನ್ನು ಪ್ರತಿಬಿಂಬಿಸುತ್ತವೆ. ಪ್ರತಿಯೊಂದು ಪ್ರದೇಶದ ಸಂಪ್ರದಾಯ, ನಂಬಿಕೆ ಮತ್ತು ಜೀವನಶೈಲಿಯನ್ನು ಛಾಯಾಚಿತ್ರಗಳ ಮೂಲಕ ಮುಂದಿನ ಪೀಳಿಗೆಗೆ ದಾಖಲಿಸಿಡಲು ಸಾಧ್ಯವಾಗುತ್ತದೆ ಎಂದು ತಿಳಿಸಿದರು.

ಕರ್ನಾಟಕ ಅನೇಕ ಸಂಸ್ಕೃತಿಗಳನ್ನು ತನ್ನೊಳಗೆ ಹೊಂದಿರುವ ರಾಜ್ಯವಾಗಿದೆ. ಇಲ್ಲಿನ ಜಾತ್ರೆಗಳು, ಉತ್ಸವಗಳು ಮತ್ತು ಜನಪದ ಆಚರಣೆಗಳು ಜನರ ಆಳವಾದ ಶ್ರದ್ಧೆ ಹಾಗೂ ನಂಬಿಕೆಯ ಪ್ರತೀಕಗಳಾಗಿವೆ. ಕಾಲ ಬದಲಾದರೂ ಈ ನಂಬಿಕೆಯ ಚೌಕಟ್ಟು ಬದಲಾಗಿಲ್ಲ. ಇಂತಹ ಸಾಂಸ್ಕೃತಿಕ ಕ್ಷಣಗಳನ್ನು ಛಾಯಾಚಿತ್ರಗಳ ಮೂಲಕ ದಾಖಲಿಸುವುದು ಸಮಾಜಕ್ಕೆ ಅಮೂಲ್ಯ ಕೊಡುಗೆಯಾಗಿದೆ ಎಂದು ಹೇಳಿದರು.

ಸಾಹಿತಿ ಪ್ರೊ.ಕಾಳೇಗೌಡ ನಾಗವಾರ, ಜಾನಪದ ತಜ್ಞ ಡಾ.ಸಿರಿಗಂಧ ಶ್ರೀನಿವಾಸಮೂರ್ತಿ, ಛಾಯಾಗ್ರಾಹಕ ಡಾ.ಎಸ್.ತಿಪ್ಪೇಸ್ವಾಮಿ, ಆಯೋಜಕರಾದ ಜಿನೇಶ್ ಪ್ರಸಾದ್, ಟಿ.ಕೆಂಪಣ್ಣ ಇದ್ದರು.