ಚಾಮುಂಡೇಶ್ವರಿ ದೇವಿಗೆ ಸೀರೆ ಅರ್ಪಿಸಿ ಹರಕೆ ತೀರಿಸಿದ ಸಿಎಂ ಪತ್ನಿ

‘ಪತಿ ಮುಖ್ಯಮಂತ್ರಿಯಾದರೆ ಆಷಾಢ ಶುಕ್ರವಾರದಂದು ಸೀರೆ ಉಡಿಸುತ್ತೇನೆ’ ಎಂದು ಹರಕೆ ಹೊತ್ತಿದ್ದರು. ಈ ಹಿನ್ನೆಲೆಯಲ್ಲಿ ಇಲ್ಲಿಗೆ ದೌಡಾಯಿಸಿದ ಅವರು, ಮೊದಲ ಆಷಾಢ ಶುಕ್ರವಾರಕ್ಕೆ ಗುಲಾಬಿ, ಬೂದು ಬಣ್ಣದ ರೇಷ್ಮೆ ಸೀರೆ ಅರ್ಪಿಸಿದರು. ಇದನ್ನು ಸ್ವೀಕರಿಸಿದ ದೇವಸ್ಥಾನದವರು ನಾಡದೇವಿಗೆ ಇದನ್ನು ಉಡಿಸಿ ಅಲಂಕಾರ ಮಾಡಿದರು.

ಚಾಮುಂಡಿಬೆಟ್ಟಕ್ಕೆ ಕೊಲೆ ಆರೋಪಿ ನಟ ದರ್ಶನ್ ಪತ್ನಿ ವಿಜಯಲಕ್ಷ್ಮೀ ಭೇಟಿ ನೀಡಿದರು. ಈಗಾಗಲೇ ರೇಣುಕಾ ಸ್ವಾಮಿ ಹತ್ಯೆ ಕೇಸ್‌ನಲ್ಲಿ ನಟ ದರ್ಶನ್ ಜೈಲು ಸೇರಿದ್ದಾರೆ. ಇನ್ನು ಜಾಮೀನು ಸಿಕ್ಕಿಲ್ಲ. ಹೀಗಾಗಿ ಸಂಕಷ್ಟ ಪರಿಹಾರಕ್ಕೆ ತಾಯಿ ಚಾಮುಂಡೇಶ್ವರಿ ಮೊರೆಹೋದ ವಿಜಯಲಕ್ಷ್ಮೀ, ದೇವಿಗೆ ವಿಶೇಷ ಪೂಜೆ ಸಲ್ಲಿಸಿದರು. ಇವರಿಗೆ ದರ್ಶನ್ ಅಕ್ಕನ ಮಗ ಚಂದನ್ ಸಾಥ್ ನೀಡಿದರು.

ಗಣ್ಯರ ಭೇಟಿ ಅವಧಿಯ ನಿಯಮವನ್ನು ಪಾಲನೆ ಮಾಡುವ ಮೂಲಕ ನಗರಾಭಿವೃದ್ಧಿ ಸಚಿವ ಡಾ.ಯತೀಂದ್ರ ಸಿದ್ದರಾಮಯ್ಯ ಮೆಚ್ಚುಗೆಗೆ ಪಾತ್ರವಾದರು. ಈ ಕುರಿತು ಪ್ರತಿಕ್ರಿಯೆ ನೀಡಿದ ಡಾ.ಯತೀಂದ್ರ ಅವರು, ‘ನಾವೇ ನಿಯಮ ಮಾಡಿ ಅದನ್ನು ಉಲ್ಲಘನೆ ಮಾಡೋದು ಸರಿಯಲ್ಲ. ಇದರಿಂದ ಜನಸಾಮಾನ್ಯರಿಗೆ ತೊಂದರೆ ಆಗುತ್ತದೆ. ಆದ ಕಾರಣ ದರ್ಶನ ಮಾಡಲಿಲ್ಲ. ಬೇರೆ ಗಣ್ಯರಿಗೂ ಈ ಮೂಲಕ ಮನವಿ ಮಾಡುವೆ. ಆಷಾಢ ಮಾಸದಲ್ಲಿ ಶುಕ್ರವಾರ, ಶನಿವಾರ, ಭಾನುವಾರ ಬೆಳಗ್ಗೆ 10ಗಂಟೆ ಒಳಗೆ ಬನ್ನಿ. ಇದರಿಂದ ಜನಸಾಮಾನ್ಯರಿಗೂ ಒಳ್ಳೆಯದಾಗುತ್ತದೆ ಎಂದು ಕೋರಿದರು.

ಮೊದಲ ಬಾರಿ ವಿಐಪಿ ಸಂಸ್ಕೃತಿಗೆ ಕಡಿವಾಣ ಹಾಕಲಾಗಿತ್ತು. ಗಣ್ಯರು, ಜನಪ್ರತಿನಿಧಿಗಳ ಪ್ರವೇಶಕ್ಕೂ ಸಮಯ ನಿಗದಿ ಪಡಿಸಲಾಗಿತ್ತು. ಬೆಳಗ್ಗೆ 10ಗಂಟೆ ಬಳಿಕ ಬರುವ ಎಲ್ಲ ಗಣ್ಯರ ವಾಹನಗಳ ಪ್ರವೇಶವನ್ನು ಚಾಮುಂಡಿಬೆಟ್ಟಕ್ಕೆ ನಿರ್ಬಂಧಿಸಲಾಗಿತ್ತು. ಆದ್ದರಿಂದ ನಿಗದಿತ ಸಮಯದ ನಂತರ ಬರುವ ವಿಐಪಿಗಳು ಸಾಮಾನ್ಯ ಸಾಲಿನಲ್ಲೇ ತೆರಳಬೇಕಿತ್ತು. ಯಾವುದೇ ರೀತಿಯ ಪ್ರಭಾವಿ ವ್ಯಕ್ತಿಗಳ ಶಿಫಾರಸು ಪತ್ರಗಳನ್ನು ತಂದರೂ ಅವರಿಗೆ ವಿಶೇಷ ರಿಯಾಯಿತಿ ಅಥವಾ ದರ್ಶನ ಇರಲಿಲ್ಲ. ಮೊದಲ ಆದ್ಯತೆಯಾಗಿ ಸಾಮಾನ್ಯ ಭಕ್ತಾದಿಗಳಿಗೆ ಸುಲಭವಾಗಿ ದರ್ಶನ ಸಿಗುವಂತೆ ನೋಡಿಕೊಳ್ಳಲಾಯಿತು.