ಮೈಸೂರು ರಂಗಾಯಣದಲ್ಲಿ ಚಿಣ್ಣರ ಮೇಳಕ್ಕೆ ಚಾಲನೆ

ಶಿಬಿರ ಉದ್ಘಾಟಿಸಿದ ಗಾಂಧಿವಾದಿ ಸಂತೋಷ್ ಕೌಲಗಿ ಮಾತನಾಡಿ, ಪ್ರಸ್ತುತ ಪಾಲಕರು ಮಕ್ಕಳನ್ನು ಸಿದ್ಧಾರ್ಥನ ರೀತಿಯಲ್ಲಿ ಬೆಳೆಸುತ್ತಿದ್ದಾರೆ. ಮಕ್ಕಳಿಗೆ ಯಾವುದೇ ಕಷ್ಟಗಳು ಬಾರದೆ ರೀತಿಯಲ್ಲಿ ನೋಡಿಕೊಳ್ಳುತ್ತಿದ್ದಾರೆ. ಆದರೆ, ಮಕ್ಕಳು ಸಿದ್ಧಾರ್ಥನಾಗಿಯೇ ಉಳಿಯದೆ ಬುದ್ಧನ ಮಾರ್ಗವನ್ನೂ ತುಳಿಯಬೇಕು. ಇದಕ್ಕೆ ಈ ಶಿಬಿರವು ಸಹಕಾರಿಯಾಗಲಿದೆ ಎಂದು ಅಭಿಪ್ರಾಯಪಟ್ಟರು.

ಬುದ್ಧ ಅಂದರೆ ಅರಿವು. ಜ್ಞಾನ ಸಂಪಾದಿಸಿದರೆ ಮಕ್ಕಳು ಬುದ್ಧರಾಗುತ್ತಾರೆ, ಇಲ್ಲವಾದರೆ ಸಿದ್ಧಾರ್ಥನಾಗಿಯೇ ಉಳಿಯುತ್ತಾರೆ. ಹಾಗಾಗಿ ಮಕ್ಕಳಿಗೆ ಸಮಾಜದಲ್ಲಿರುವ ನೋವು ನಲಿವುಗಳನ್ನು ತಿಳಿಸಿಕೊಡುವ ಕಾರ್ಯ ಆಗಬೇಕು. ಸಮಾಜದಲ್ಲಿರುವ ಪ್ರತಿಯೊಬ್ಬರನ್ನು ಗೌರವಿಸುವುದನ್ನು ಕಲಿಸಬೇಕು. ಎಲ್ಲರು ನಮ್ಮವರು ಎಂದು ಭಾವಿಸುವ ಗುಣವನ್ನು ಮಕ್ಕಳಲ್ಲಿ ಬೆಳೆಸಬೇಕು ಎಂದು ಪಾಲಕರಿಗೆ ಸಲಹೆ ನೀಡಿದರು.

ಪ್ರಸ್ತುತ ಪ್ರಪಂಚದಲ್ಲಿ ಅಶಾಂತಿಯ ವಾತಾವರಣ ನಿರ್ಮಾಣವಾಗಿದೆ. ಯಾರು ಸಹ ಬುದ್ಧನಾಗುವ ಕಡೆಗೆ ಆಸಕ್ತಿ ತೋರದ ಹಿನ್ನೆಲೆಯಲ್ಲಿ ಪ್ರಪಂಚದಲ್ಲಿ ಅಶಾಂತಿ ನೆಲೆಸಿದೆ. ಎಲ್ಲರು ಕೊಳ್ಳುಬಾಕ ಸಂಸ್ಕೃತಿಯ ಭಾಗವಾಗುತ್ತಿದ್ದಾರೆ ಎಂದು ಬೇಸರ ವ್ಯಕ್ತಪಡಿಸಿದರು.

ರಂಗಾಯಣ ನಿರ್ದೇಶಕ ಸತೀಶ್ ತಿಪಟೂರು, ಉಪ ನಿರ್ದೇಶಕ ಡಾ.ಎಂ.ಡಿ. ಸುದರ್ಶನ್, ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಜಂಟಿ ನಿರ್ದೇಶಕ ವಿ.ಎನ್. ಮಲ್ಲಿಕಾರ್ಜುನಸ್ವಾಮಿ, ಹಿರಿಯ ವೃತ್ತಿ ರಂಗಭೂಮಿ ಕಲಾವಿದೆ ಜುಲೇಖಾ ಬೇಗಂ, ರಂಗಸಮಾಜ ಸದಸ್ಯ ಸುರೇಶ್ ಬಾಬು ಹಾಗೂ ಇತರರು ಇದ್ದರು.