ಪುನರುಜ್ಜೀವನದ ನಿರೀಕ್ಷೆಯಲ್ಲಿ ಶತಮಾನದ ಶಾಲೆಗಳು

ಶತಮಾನೋತ್ಸವ ಪೂರೈಸಿರುವ ಸರ್ಕಾರಿ ಶಾಲೆಗಳು ಶೈಕ್ಷಣಿಕ ಕ್ಷೇತ್ರದಲ್ಲಿ ಚರಿತ್ರೆಯ ಅಸ್ಮಿತೆಗಳು. ಅಕ್ಷರಲೋಕದಲ್ಲಿ ಹೆಗ್ಗುರುತು ಮೂಡಿಸಿರುವ 100 ವರ್ಷ ಕಂಡಿರುವ ಈ ಜ್ಞಾನದೇಗುಲಗಳು ಇದೀಗ ಪುನರುಜ್ಜೀವನಕ್ಕಾಗಿ ಕಾಯುತ್ತಿವೆ!

ನೂರು ವರ್ಷಗಳ ಹಿಂದೆಯೇ ಕಣ್ತೆರೆದಿರುವ ಪುರಾತನ ಶಾಲೆಗಳು ಈಗ ಕಣ್ಣುಮುಚ್ಚುವತ್ತ ಸಾಗಿವೆ. ಇವುಗಳನ್ನು ತ್ವರಿತವಾಗಿ ಜೀರ್ಣೋದ್ಧಾರ ಮಾಡಲು ಮುಂದಾಗಬೇಕಿದೆ.

ಇಂತಹ ಐತಿಹಾಸಿಕ ಹಿನ್ನೆಲೆಯ 74 ಪ್ರಾಥಮಿಕ, 6 ಪ್ರೌಢಶಾಲೆಗಳು ಸೇರಿದಂತೆ 80 ಸರ್ಕಾರಿ ಶಾಲೆಗಳು ಶತಾಬ್ಧಿ ಪೂರೈಸಿ ಇತಿಹಾಸವನ್ನು ಸಾರುತ್ತಿವೆ. ಸಹಸ್ರಾರು ವಿದ್ಯಾರ್ಥಿಗಳಿಗೆ ಅಕ್ಷರ ಜ್ಞಾನ ನೀಡಿ ಅವರ ಏಳ್ಗೆಗೆ, ಸಮುದಾಯ ಅಭ್ಯುದಯಕ್ಕೂ ನಾಂದಿ ಹಾಡಿವೆ. ಆದರೀಗ ಶತಮಾನ ಕಾಲದಿಂದ ಮಕ್ಕಳ ಭವಿಷ್ಯದ ರೂಪಿಸಿದ ಇಂತಹ ಹಳೇ ಸರ್ಕಾರಿ ಶಾಲೆಗಳ ಭವಿಷ್ಯವೇ ಮಂಕಾಗಿದೆ ಎಂಬುದು ಕಳವಳಕಾರಿ ಸಂಗತಿ.

ಐತಿಹಾಸಿಕ ಹಿರಿಮೆ ಹೊಂದಿರುವ ಇಂತಹ ಶಾಲೆಗಳಿಗೆ ರಾಜ್ಯ ಸರ್ಕಾರ ವಿಶೇಷ ಗಮನ ನೀಡುತ್ತಿಲ್ಲ. ಜತೆಗೆ, ಅವುಗಳ ಅಭಿವೃದ್ಧಿ, ಮೂಲಸೌಕರ್ಯ ಒದಗಿಸಲು, ಶಿಥಿಲಗೊಂಡಿರುವ ಕಟ್ಟಡಗಳ ದುರಸ್ತಿಗೆ ವಿಶೇಷ ಅನುದಾನವನ್ನೂ ಕೊಡುತ್ತಿಲ್ಲ. ಕುಸಿದಿರುವ ಮಕ್ಕಳ ಸಂಖ್ಯೆ ವೃದ್ಧಿಗೂ ಕ್ರಮ ವಹಿಸುತ್ತಿಲ್ಲ.

ಹಳೇ ವಿದ್ಯಾರ್ಥಿಗಳು, ಊರಿನ ಶಿಕ್ಷಣಾಸಕ್ತರ ಉತ್ತೇಜನದಿಂದ ಕೆಲ ಶಾಲೆಗಳು ಸುಧಾರಣೆ ಕಂಡಿವೆ. ಬಹುತೇಕ ಶಾಲೆಗಳಿಗೆ ಇಂತಹ ಭಾಗ್ಯ ದೊರೆತ್ತಿಲ್ಲ. ಹೀಗಾಗಿ, ನಿಧಾನಗತಿಯಲ್ಲಿ ಇವುಗಳು ಕಾಲಗರ್ಭದತ್ತ ಸಾಗುತ್ತಿವೆ. ಇವುಗಳನ್ನು ಉಳಿಸಿಕೊಳ್ಳದಿದ್ದರೆ, ಸುದೀರ್ಘ ಅಕ್ಷರ ಚರಿತ್ರೆಯನ್ನೇ ಕಳೆದುಕೊಳ್ಳಬೇಕಾಗುತ್ತದೆ. ಹೀಗಾಗಿ, ಈಗಲಾದರೂ ಎಚ್ಚೆತ್ತುಕೊಳ್ಳಬೇಕಿದೆ.

ನೂರು ವರ್ಷ ಸಂಭ್ರಮ ಕಂಡಿರುವ ಸರ್ಕಾರಿ ಶಾಲೆಗಳಲ್ಲಿ ವರ್ಷಗಳು ಕಳೆದಂತೆ ವಿದ್ಯಾರ್ಥಿಗಳ ಸಂಖ್ಯೆ ಗಣನೀಯವಾಗಿ ಇಳಿಕೆಯಾಗಿದೆ. ಬಹಳಷ್ಟು ಶಾಲೆಗಳಲ್ಲಿ ಅವುಗಳ ವಯಸ್ಸಿನಷ್ಟು ಮಕ್ಕಳ ಸಂಖ್ಯೆಯೇ ಇಲ್ಲ. ಬಹುತೇಕ ಶಾಲೆಗಳಲ್ಲಿ ಮಕ್ಕಳ ಸಂಖ್ಯೆ 100ಕ್ಕಿಂತ ಕಡಿಮೆ ತಗ್ಗಿದೆ. ಜಿಲ್ಲೆಯಲ್ಲಿರುವ ಇಂತಹ 74 ಪ್ರಾಥಮಿಕ ಸರ್ಕಾರಿ ಶಾಲೆಯಲ್ಲಿ ಈಗಲೂ 7,531 ವಿದ್ಯಾರ್ಥಿಗಳು ವ್ಯಾಸಂಗ ಮಾಡುತ್ತಿದ್ದು, 388 ಶಿಕ್ಷಕರು ಕಾರ್ಯನಿರ್ವಹಿಸುತ್ತಿದ್ದಾರೆ.

ಅಂತೆಯೇ, 6 ಪ್ರೌಢಶಾಲೆಗಳಲ್ಲಿ 1,355 ಮಕ್ಕಳು ಓದುತ್ತಿದ್ದು, 63 ಶಿಕ್ಷಕರಿದ್ದಾರೆ.

ನಗರ ಪ್ರದೇಶಕ್ಕಿಂತ ಗ್ರಾಮಾಂತರ ಪ್ರದೇಶದಲ್ಲಿರುವ ಶತಕ ವರ್ಷ ಕಂಡ ಶಾಲೆಗಳು ಸುಸ್ಥಿತಿಯಲ್ಲಿವೆ. ಹಳ್ಳಿಗಾಡಿನಲ್ಲಿರುವ ಇಂತಹ 50 ಸ್ಕೂಲ್‌ಗಳು ಈಗಲೂ ಸುಸ್ಥಿತಿಯಲ್ಲಿವೆ. ಜತೆಗೆ, ವಿದ್ಯಾರ್ಥಿಗಳು ಸಂಖ್ಯೆ ಉತ್ತಮವಾಗಿದೆ. ಆದರೆ, ನಗರ ಪ್ರದೇಶದಲ್ಲಿ ಪ್ರವೇಶಾತಿ ಸಂಖ್ಯೆ ಗಣನೀಯವಾಗಿ ಕುಸಿದಿದೆ. ಜತೆಗೆ, ಕಳೆಗುಂದಿರುವ ಕಟ್ಟಡಗಳು ಅವಸಾನದತ್ತ ಮುಖ ಮಾಡಿರುವ ನಿದರ್ಶನಗಳಿವೆ.

1863ರಲ್ಲಿ ನಿರ್ಮಾಣಗೊಂಡಿರುವ ಕನಕಗಿರಿಯ ಸರ್ಕಾರಿ ಪ್ರೌಢಶಾಲೆಯೇ ಜಿಲ್ಲೆಯಲ್ಲೇ ಅತ್ಯಂತ ಪುರಾತನ ಸರ್ಕಾರಿ ಪ್ರೌಢಶಾಲೆಯಾಗಿದೆ. 163 ವರ್ಷ ಕಂಡಿರುವ ಈ ಶಾಲೆಯಲ್ಲಿ ಈಗಲೂ 186 ಮಕ್ಕಳು ವ್ಯಾಸಂಗ ಮಾಡುತ್ತಿದ್ದಾರೆ.

1881ರಲ್ಲಿ ಸ್ಥಾಪನೆಗೊಂಡಿರುವ ಸರ್ಕಾರಿ ಮಹಾರಾಣಿ ಪ್ರೌಢಶಾಲೆ 145 ವರ್ಷ ಕಂಡಿದೆ. ಇಲ್ಲಿ 87 ವಿದ್ಯಾರ್ಥಿಗಳು ಓದುತ್ತಿದ್ದಾರೆ. 1886ರಲ್ಲಿ ನಿರ್ಮಿಸಿರುವ ಹುಣಸೂರಿನ ಸರ್ಕಾರಿ ಬಾಲಕರ ಪ್ರೌಢಶಾಲೆ ಸಹ 140 ವರ್ಷ ಕಂಡಿದ್ದರೂ ಇಲ್ಲಿ 455 ವಿದ್ಯಾರ್ಥಿಗಳಿದ್ದಾರೆ. ಉಳಿದಂತೆ 1910ರಲ್ಲಿ ಸ್ಥಾಪನೆಯಾಗಿರುವ ಇದೇ ಹುಣಸೂರು ತಾಲೂಕಿನ ಬಿಳಿಕೆರೆ ಸರ್ಕಾರಿ ಬಾಲಕರ ಪ್ರೌಢಶಾಲೆಯಲ್ಲಿ 253 ಮಕ್ಕಳು ಇದ್ದಾರೆ. 1923ರಲ್ಲಿ ಸ್ಥಾಪನೆಗೊಂಡಿರುವ ಚಿಲ್ಕುಂದ ಸರ್ಕಾರಿ ಬಾಲಕರ ಪ್ರೌಢಶಾಲೆ ಮತ್ತು 1925ರಲ್ಲಿ ಪ್ರಾರಂಭಗೊಂಡಿರುವ ನಂಜನಗೂಡು ಸರ್ಕಾರಿ ಪದವಿಪೂರ್ವ ಕಾಲೇಜು ಸಹ ಶತಮಾನೋತ್ಸವ ಕಂಡಿವೆ. ಈ ಎರಡು ಶಾಲೆಯಲ್ಲಿ ತಲಾ 114 ಹಾಗೂ 260 ವಿದ್ಯಾರ್ಥಿಗಳು ಓದುತ್ತಿದ್ದಾರೆ.

ನೂರು ವರ್ಷ ಕಂಡಿರುವ ಸರ್ಕಾರಿ ಪ್ರಾಥಮಿಕ ಶಾಲೆಗಳ ಸಂಖ್ಯೆ ದೊಡ್ಡದಿದೆ. ಈ ಪೈಕಿ 1863ರಲ್ಲಿ ಸ್ಥಾಪನೆಗೊಂಡಿರುವ ಕನಕಗಿರಿಯ ಸರ್ಕಾರಿ ಪ್ರಾಥಮಿಕ ಶಾಲೆಯೇ ಜಿಲ್ಲೆಯಲ್ಲೇ ಅತ್ಯಂತ ಹಳೇ ಸರ್ಕಾರಿ ಪ್ರಾಥಮಿಕ ಶಾಲೆಯಾಗಿದೆ. 1900ಕ್ಕಿಂತ ಮುಂಚೆಯೇ ಶುರುವಾಗಿರುವ 9 ಪ್ರಾಥಮಿಕ ಶಾಲೆಗಳಿರುವುದು ವಿಶೇಷ. ಇವುಗಳೆಲ್ಲ ಬಹುತೇಕ ಒಂದೂವರೆ ಶತಮಾನವನ್ನು ಕಾಣುವ ಮೂಲಕ ಶೈಕ್ಷಣಿಕ ಲೋಕದಲ್ಲೇ ಧ್ರುವತಾರೆಗಳಾಗಿ ಮಿನುಗುತ್ತಿವೆ. ಆದರೆ, ಭವಿಷ್ಯ ಮಾತ್ರ ಮಬ್ಬಾಗುತ್ತಿದೆ.

ರಾಜ್ಯದಲ್ಲಿರುವ ಶತಮಾನ ಪೂರೈಸಿರುವ 75 ಸರ್ಕಾರಿ ಪ್ರಾಥಮಿಕ, 25 ಪ್ರೌಢಶಾಲೆಗಳನ್ನು ಪಾರಂಪರಿಕ ಶಾಲೆಗಳು ಎಂದು ಗುರುತಿಸಲಾಗಿದೆ. ಕಟ್ಟಡ ನವೀಕರಣಕ್ಕಾಗಿ, ಮೂಲಸೌಕರ್ಯ ಅಭಿವೃದ್ಧಿಗಾಗಿ ವಿಶೇಷ ಅನುದಾನ ಕಲ್ಪಿಸಿಕೊಡಲಾಗಿದೆ.

ಈ ಪೈಕಿ ಮೈಸೂರು ಜಿಲ್ಲೆಯಲ್ಲಿ ಶತಮಾನ ಪೂರೈಸಿರುವ 15 ಸರ್ಕಾರಿ ಶಾಲೆಗಳನ್ನು ಮಾತ್ರ ಸೇರಿಸಲಾಗಿದೆ. ರಾಜ್ಯ ಸರ್ಕಾರವು ಕೊಟ್ಟಿರುವ ಅನುದಾನವೇ ಕಡಿಮೆ. ಅಂತಹದಲ್ಲಿ ಈ ಬಿಡಿಗಾಸಿನ ಅನುದಾನದಿಂದ ಜಿಲ್ಲೆಯ ಬಹಳಷ್ಟು ಶಮಾನೋತ್ಸವದ ಸರ್ಕಾರಿ ಶಾಲೆಗಳು ವಂಚಿತವಾಗಿದ್ದು, ಶಿಥಿಲಗೊಂಡಿರುವ ಕಟ್ಟಡಗಳು ಸೊರಗಿ ಬಡವಾಗಿವೆ.

‘ನೂರ ವರ್ಷಕ್ಕೆ ಸಾಕ್ಷಿಯಾಗಿರುವ ಶಾಲೆಗಳಲ್ಲಿ ವಿದ್ಯಾರ್ಥಿಗಳು ಈಗಲೂ ಕಲಿಯುತ್ತಿದ್ದು, ಹೀಗಾಗಿ, ಯಾವುದೇ ಶಾಲೆಗಳು ಮುಚ್ಚಿರುವುದಿಲ್ಲ. ಇವುಗಳು ಪ್ರಸ್ತುತ ಸ್ಥಿತಿಗತಿ ಸುಸ್ಥಿತಿಯಲ್ಲಿವೆ. ಮಕ್ಕಳಿಗೆ ಕಲಿಕೆ ಪೂರಕವಾದ ಮತ್ತು ಶೈಕ್ಷಣಿಕ ಚಟುವಟಿಕೆಗಳಿಗೆ ಅನುಕೂಲಕರವಾಗಿದೆ ಎಂದು ರಾಜ್ಯ ಸರ್ಕಾರ ಹೇಳುತ್ತಿದೆ.

ಆದರೆ, ವಾಸ್ತವ ಬೇರೆಯೇ ಇದೆ. ಮೂಲ ಸೌಕರ್ಯ ಕೊರತೆ, ಸುಣ್ಣಬಣ್ಣ ಕಾಣದ ಗೋಡೆಗಳು, ಶಿಥಿಲಗೊಂಡ ಕಟ್ಟಡ, ಬೀಳುತ್ತಿರುವ ಸ್ಥಿತಿಯಲ್ಲಿರುವ ಛಾವಣಿ, ನಿರ್ವಹಣೆ ಕೊರತೆಯಿಂದ ಸೃಷ್ಟಿಯಾಗಿರುವ ವಿವಿಧ ಸಮಸ್ಯೆಗಳ ಸರಮಾಲೆಗಳು ಇಂತಹ ಶಾಲೆಯಲ್ಲಿ ಕಣ್ಣಿಗೆ ಕುಕ್ಕುತ್ತಿದೆ.

-------------

"