ಪುರುಷರಿಗೆ ಸಮನಾಗಿ ಬದುಕು ಕಟ್ಟಿಕೊಳ್ಳಿ: ಶಾಸಕ ಜಿ.ಟಿ.ದೇವೇಗೌಡ ಸಲಹೆ

ಡಿ.ದೇವರಾಜ ಅರಸು ಹಿಂದುಳಿದ ವರ್ಗಗಳ ಅಭಿವೃದ್ಧಿ ನಿಗಮದಿಂದ ಚಾಮುಂಡೇಶ್ವರಿ ಕ್ಷೇತ್ರದಿಂದ ಆಯ್ಕೆಯಾಗಿದ್ದ ಮಹಿಳೆಯರಿಗೆ ನಗರದ ಜಲದರ್ಶಿನಿಯಲ್ಲಿರುವ ಕಚೇರಿಯಲ್ಲಿ ಹೊಲಿಗೆ ಯಂತ್ರ ವಿತರಿಸಿ ಮಾತನಾಡಿದರು. ಮಹಿಳೆಯರು ಆರ್ಥಿಕ ಸಬಲರಾಗಲು ಕಾಯಕ ಜೀವಿಗಳಾಗಿ ಬದುಕುವ ಗುರಿ ಹೊಂದಬೇಕು. ನಾಲ್ಕು ಗೋಡೆಗಳಿಗೆ ಸೀಮಿತವಾಗದೆ ಸ್ವಂತ ಶ್ರಮದಿಂದ ಪುರುಷರಿಗೆ ಸಮನಾಗಿ ಬದುಕು ಕಟ್ಟಿಕೊಳ್ಳಬೇಕು. ಈಗ ಮಹಿಳೆಯರು ಸಬಲೆಯರಾಗಿ ಕುಟುಂಬ ನಿರ್ವಹಣೆ ಮಾಡುವ ಜತೆಗೆ ಸಮಾಜಕ್ಕೆ ಕೈಲಾದಷ್ಟು ಕೊಡುಗೆ ನೀಡುತ್ತಿದ್ದಾರೆ. ಮಹಿಳೆಯರು ಮತ್ತು ಪುರುಷರು ಕುಟುಂಬ ನಿರ್ವಹಣೆ ಮಾಡಬೇಕಾದ ಕಾಲಘಟ್ಟದಲ್ಲಿ ನಾವಿದ್ದೇವೆ ಎಂದರು.

ದುಡಿಯಲು ಇಂದು ಅವಕಾಶವಿದ್ದರೂ ಯುವ ಸಮುದಾಯ ಕೆಲಸ ಮಾಡದೆ ಬೇರೆ ಬೇರೆ ಅಡ್ಡದಾರಿ ಹಿಡಿಯುವುದು ಸಲ್ಲ. ಬ್ಯಾಂಕ್‌ನಲ್ಲಿ ಕೆಲಸ ಮಾಡುತ್ತಿದ್ದ ವ್ಯಕ್ತಿಯೊಬ್ಬ ಕೆಟ್ಟ ಚಟಗಳಿಗೆ ದಾಸನಾಗಿ ಹೆಂಡತಿಯನ್ನು ಬಿಟ್ಟುಹೋದ. ಹೆಂಡತಿ ಯೋಚನೆ ಮಾಡದೆ ಟೇಲರಿಂಗ್ ಮಾಡಿಕೊಂಡು ಮಕ್ಕಳನ್ನು ಓದಿಸಿ ಇಂಜಿನಿಯರಿಂಗ್ ಮಾಡಿಸಿದ್ದಾಳೆ. ಏಕಾಂಗಿಯಾಗಿ ಛಲದಿಂದ ಓದಿಸಿದ್ದರಿಂದ ಇಂದು ಮಕ್ಕಳು 3 ಲಕ್ಷ ರೂ. ವೇತನ ಪಡೆಯುತ್ತಿದ್ದಾರೆ. ಇಂತಹ ಮಾದರಿಗಳು ಸಾಕಷ್ಟಿವೆ ಎಂದರು.

ಐಎಎಸ್ ಆಗಬೇಕು ಎನ್ನುವ ಆಸೆಯಿಂದ ನನ್ನ ಬಳಿ ಬಂದ ವಿದ್ಯಾರ್ಥಿನಿಯೊಬ್ಬಳು, ಎನ್‌ಐಇ ಕಾಲೇಜಿನಲ್ಲಿ ದಾಖಲಾಗಲು ಒಂದೂವರೆ ಲಕ್ಷ ಶುಲ್ಕ ಕಟ್ಟಬೇಕು ಎಂದು ಅಳಲು ತೋಡಿಕೊಂಡಳು. ಮಹಿಳೆಯರು ಮುಂದೆ ಬರಬೇಕು ಎಂದು ನಾನೇ ಕಾಲೇಜಿನ ಶುಲ್ಕ ಕಟ್ಟಿ ಪ್ರವೇಶ ಕೊಡಿಸಿದ್ದೇನೆ. ಈ ಮೂಲಕ ಪ್ರತಿಭೆಯನ್ನು ಪ್ರೋತ್ಸಾಹಿಸಿದ ತೃಪ್ತಿ ಇದೆ ಎಂದು ಹೇಳಿದರು.

ಹೆಣ್ಣು ಮಕ್ಕಳಿಗೆ ವಿದ್ಯಾಭ್ಯಾಸ ಕೊಡಿಸಬೇಕು. ಸ್ವಾಭಿಮಾನದಿಂದ ಬದುಕಲು ಗುರಿಹೊಂದಬೇಕು. ಮಹಿಳೆಯರು ಸ್ವಂತ ಗುಡಿ ಕೈಗಾರಿಕೆಗಳನ್ನು ಸ್ಥಾಪಿಸಿ ಬೇರೆಯವರಿಗೆ ಉದ್ಯೋಗ ನೀಡುವಂತೆ ಆಗಬೇಕು. ಸರ್ಕಾರದ ಸವಲತ್ತುಗಳನ್ನು ಸಮರ್ಪಕವಾಗಿ ಬಳಸಿಕೊಳ್ಳಬೇಕು ಎಂದರು.

ಗಾರ್ಮೆಂಟ್ಸ್ ವೃತ್ತಿಯಲ್ಲಿ ಸಾಕಷ್ಟು ಅವಕಾಶಗಳಿವೆ. ಮನೆಯಲ್ಲೇ ಬಟ್ಟೆಗಳನ್ನು ಹೊಲಿದರೆ ಕಂಪನಿಯವರು ಪಡೆಯುತ್ತಾರೆ. ಇದರಿಂದ ಮನೆಯಿಂದಲೇ ಹಣ ಸಂಪಾದನೆ ಮಾಡಬಹುದು ಎಂದರು.

ಎಸ್‌ಐಆರ್ ಪ್ರಕ್ರಿಯೆ ಸಂದರ್ಭದಲ್ಲಿ ಮತದ ಹಕ್ಕು ಕಳೆದುಕೊಳ್ಳದಂತೆ ಜನರು ಎಚ್ಚರವಹಿಸಬೇಕು. ಬಿಎಲ್‌ಒಗಳು ಮನೆಗೆ ತಂದು ಕೊಡುವ ಫಾರ್ಮ್‌ಗಳನ್ನು ಭರ್ತಿ ಮಾಡಿ ಕೊಡಬೇಕು ಎಂದು ತಿಳಿಸಿದರು.

ಡಿ.ದೇವರಾಜ ಅರಸು ಹಿಂದುಳಿದ ವರ್ಗಗಳ ಅಭಿವೃದ್ಧಿ ನಿಗಮದಿಂದ ಮಂಜುಳಾ, ಮೀನಾಕ್ಷಿ, ಸರೋಜಮ್ಮ, ವಸಂತಾ, ಸುಶೀಲಾ, ಜ್ಯೋತಿ, ಪ್ರಭಾವತಿ, ಶ್ವೇತಾ, ಯಶೋದಾ, ನಾಗರತ್ನಾ, ಲಿಂಗಮ್ಮ, ನಾಗಮಣಿ, ಇಂದುಶ್ರೀ, ದೀಪಿಕಾ, ಅಲಮ್ಮ, ಛಾಯಾ, ಲಕ್ಷ್ಮೀ, ಲೀಲಮ್ಮ, ಮೂಗನಹುಂಡಿ ಮೀನಾಕ್ಷಿ, ಪೂರ್ಣಿಮಾ, ಯಶೋದಾ ಮೋಹನ್, ಸೌಭಾಗ್ಯ ಗಂಗಾಧರ್ ಸೇರಿದಂತೆ 53 ಫಲಾನುಭವಿಗಳಿಗೆ ಹೊಲಿಗೆ ಯಂತ್ರ ವಿತರಿಸಲಾಯಿತು. ಡಿ.ದೇವರಾಜ ಅರಸು ಅಭಿವೃದ್ಧಿ ನಿಗಮದ ಜಿಲ್ಲಾ ವ್ಯವಸ್ಥಾಪಕ ತೇಜಸ್ ಇತರರರು ಇದ್ದರು.