ಮೂವರು ಕಳ್ಳರನ್ನು ಬಂಧಿಸಿದ ಬೆಟ್ಟದಪುರ ಪೊಲೀಸರು

ಬೆಟ್ಟದಪುರ: ಬೆಟ್ಟದಪುರ ಪೊಲೀಸ್ ಠಾಣೆ ವ್ಯಾಪ್ತಿಯ ಬೆಟ್ಟದತುಂಗ ಗ್ರಾಮದಲ್ಲಿ ಸುಮಾರು 15 ಕ್ವಿಂಟಾಲ್ ಅಡಕೆ ಕದ್ದಿದ್ದ ಕಳ್ಳರನ್ನು ಪೊಲೀಸರು ಬಂಧಿಸಿದ್ದಾರೆ.

ಸರಗೂರು ತಾಲೂಕಿನ ಕೆ.ಬೆಳತ್ತೂರು ಗ್ರಾಮದ ಬಿ.ಕೆ ವಿವೇಕ್, ಮೈಸೂರಿನ ನಜರ್‌ಬಾದ್ ಮೂಲದ ಪ್ರಸನ್ನ ಹಾಗೂ ರಾಘವೇಂದ್ರನಗರದ ರಾಜೇಶ ಬಂಧಿತ ಆರೋಪಿಗಳು.

ಬೆಟ್ಟದತುಂಗ ನಿವಾಸಿ ಟಿ.ಆರ್.ಶ್ರೀನಾಥ್ ರಾಜೇ ಅರಸ್ ಎಂಬುವರು ತಮ್ಮ ಗೋಡೌನ್‌ನಲ್ಲಿ ಶೇಖರಿಸಿಟ್ಟಿದ್ದ 15 ಕ್ವಿಂಟಾಲ್ ಅಡಕೆ ಕಳ್ಳತನವಾಗಿರುವ ಬಗ್ಗೆ ಬೆಟ್ಟದಪುರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು. ಪೊಲೀಸರು ವಿಶೇಷ ತನಿಖೆ ಕೈಗೊಂಡು ಕಳ್ಳರನ್ನು ಬಂಧಿಸಿದ್ದಾರೆ.

ಬಂಧಿತ ಮೂವರು ಆರೋಪಿಗಳನ್ನು ಪಿಎಸ್‌ಐ ಅಜಯ್ ಕುಮಾರ್ ನೇತೃತ್ವದಲ್ಲಿ ವಿಚಾರಣೆ ನಡೆಸಲಾಯಿತು. ಈ ವೇಳೆ ಆರು ಪ್ರಕರಣಗಳಲ್ಲಿ ಭಾಗಿಯಾಗಿರುವ ಬಗ್ಗೆ ಆರೋಪಿಗಳು ತಪ್ಪೊಪ್ಪಿಕೊಂಡಿದ್ದಾರೆ. ಬೆಟ್ಟದಪುರ ಮತ್ತು ಬೈಲಕುಪ್ಪೆ ಠಾಣೆಗಳಲ್ಲಿ ತಲಾ ಒಂದೊಂದು ಪ್ರಕರಣ, ಸಾಲಿಗ್ರಾಮ ಠಾಣೆಯಲ್ಲಿ ಮೂರು ಪ್ರಕರಣಗಳು ಮತ್ತು ಮೈಸೂರಿನ ವಿಜಯನಗರ ಠಾಣೆಯಲ್ಲಿ ವ್ಯಾಪ್ತಿಯ ಒಂದು ಪ್ರಕರಣಗಳಾಗಿದ್ದು, 3 ಲಕ್ಷ ರೂ.ಬೆಲೆ ಬಾಳುವ ಟಾಟಾ ಏಸ್ ಗೂಡ್ಸ್ ವಾಹನ, ಜತೆಯಲ್ಲಿ 3 ಲಕ್ಷ ರೂ. ಮೌಲ್ಯದ ಬಟ್ಟೆಗಳು, ಒಟ್ಟು 8 ಲಕ್ಷ ರೂ.ಬೆಲೆ ಬಾಳುವ ಅಡಕೆ ಹಾಗೂ ಎರಡು ಲಕ್ಷ ರೂಪಾಯಿ ನಗದು ಮತ್ತು ವಸ್ತುಗಳನ್ನು ವಶ ಪಡೆದುಕೊಂಡಿದ್ದಾರೆ.

ಬೆಟ್ಟದಪುರ ಪೊಲೀಸರ ಕಾರ್ಯಕ್ಕೆ ಪೊಲೀಸ್ ಅಧೀಕ್ಷಕ ಮಲ್ಲಿಕಾರ್ಜುನ ಬಾಲದಂಡಿ ಸೇರಿದಂತೆ ಹಿರಿಯ ಅಧಿಕಾರಿಗಳು ಪ್ರಶಂಸೆ ವ್ಯಕ್ತಪಡಿಸಿದ್ದಾರೆ. ಕಾರ್ಯಾಚರಣೆಯಲ್ಲಿ ವೃತ್ತ ನಿರೀಕ್ಷಕ ದೀಪಕ್ ಎಂ.ಕೆ.ಬೆಟ್ಟದಪುರ ಪೊಲೀಸ್ ಠಾಣೆಯ ಪಿಎಸ್‌ಐ ಅಜಯ್ ಕುಮಾರ್ ಡಿ.ಎನ್, ಎಎಸ್‌ಐ ಮಂಜುನಾಥ, ಸಿಬ್ಬಂದಿ ಶಂಕರ್ ಎಸ್.ಎಸ್, ಪ್ರಭಾಕರ, ಅನಂತ, ಮಲ್ಲೇಶ, ಸತೀಶ ಕುಮಾರ್, ಪ್ರೇಮ್‌ಕುಮಾರ್, ಬಷಿರ್ ಅಹಮದ್, ಶತ್ರುಜ್ಞ, ಮಂಜುನಾಥ, ಹರ್ಷ, ಶಿವಪ್ಪ ಇದ್ದರು.