ನೀರಿಗಿಳಿಯುವ ಮುನ್ನ ಇರಲಿ ಎಚ್ಚರ

ಬೇಸಿಗೆ ಸಂದರ್ಭದಲ್ಲಿ ನದಿ, ಕೆರೆ ಹಾಗೂ ಕಾಲುವೆಗಳಲ್ಲಿ ಮುಳುಗಿ ಮೃತಪಡುತ್ತಿರುವವರ ಸಂಖ್ಯೆ ವರ್ಷದಿಂದ ವರ್ಷಕ್ಕೆ ಹೆಚ್ಚುತ್ತಲೇ ಇದ್ದು, ಬೇಸಿಗೆ ಸಂದರ್ಭದಲ್ಲಿ ನೀರಿಗೆ ಇಳಿಯುವ ಮುನ್ನ ಎಚ್ಚರಿಕೆ ವಹಿಸುವುದು ಉತ್ತಮ.

ಬೇಸಿಗೆ ಕಾಲ ಆರಂಭವಾದಾಗ ತಾಪಮಾನ ಹೆಚ್ಚಾಗುವುದರಿಂದ ಜನರು ತಂಪಿಗಾಗಿ ನದಿ, ಕೆರೆ, ಕಾಲುವೆ, ಅಣೆಕಟ್ಟು ಪ್ರದೇಶಗಳಿಗೆ ತೆರಳುವುದು ಸಾಮಾನ್ಯ. ವಿಶೇಷವಾಗಿ ಮಕ್ಕಳು, ಯುವಕರು ಹಾಗೂ ಗ್ರಾಮೀಣ ಪ್ರದೇಶದ ಜನರು ಈ ಜಲಾಶಯಗಳಲ್ಲಿ ಸ್ನಾನ, ಈಜಾಟ ಅಥವಾ ಆಟವಾಡಲು ಹೋಗುತ್ತಾರೆ. ಆದರೆ ಪ್ರತಿವರ್ಷವೂ ಅನೇಕರು ಮುಳುಗಿ ಸಾವನ್ನಪ್ಪುವ ದುರ್ಘಟನೆಗಳು ಸಂಭವಿಸುತ್ತಿವೆ.

ಬೇಸಿಗೆ ಸಮಯದಲ್ಲಿ ನದಿ, ಕೆರೆ, ಕಾಲುವೆಗಳಲ್ಲಿ ಮುಳುಗು ಸಾವುಗಳು ಹೆಚ್ಚಾಗುವುದು ಮಾನವ ಅಜಾಗರೂಕತೆ, ಸುರಕ್ಷತಾ ಕೊರತೆ ಮತ್ತು ಜಾಗೃತಿ ಅಭಾವದಿಂದಾಗುತ್ತದೆ. ಸರಿಯಾದ ಮುನ್ನೆಚ್ಚರಿಕೆ ಕ್ರಮಗಳು, ಸಾರ್ವಜನಿಕ ಜಾಗೃತಿ ಹಾಗೂ ಆಡಳಿತದ ಕಟ್ಟುನಿಟ್ಟಿನ ಕ್ರಮಗಳಿಂದ ಅನೇಕ ಅಮೂಲ್ಯ ಜೀವಗಳನ್ನು ಉಳಿಸಬಹುದು. ಎಚ್ಚರಿಕೆ ಜೀವ ರಕ್ಷಣೆ ಎಂಬ ಸಂದೇಶವನ್ನು ಪ್ರತಿಯೊಬ್ಬರೂ ಮನಗಾಣಬೇಕು.

11 ಜನರು ಬಲಿ: ಜಿಲ್ಲೆಯಲ್ಲಿ ಏಪ್ರಿಲ್ ತಿಂಗಳಿನಲ್ಲಿ 11 ಜನರು ನೀರಿನಲ್ಲಿ ಮುಳುಗಿ ಮೃತಪಟ್ಟಿದ್ದಾರೆ. ಕೆ.ಆರ್. ನಗರ ಆರ್ಕೇಶ್ವರ ದೇವಾಲಯ ಸಮೀಪ ಆಯೋಜಿಸಿದ್ದ ಉರೂಸ್‌ನಲ್ಲಿ ಭಾಗವಹಿಸಲು ಏ.19 ರಂದು ರಾಜ್ಯದ ವಿವಿಧೆಡೆಯಿಂದ ಆಗಮಿಸಿದ್ದ ವಿವಿಧ ವಯೋಮಾನದ 6 ಜನರು ಮೃತಪಟ್ಟರು. ಏ.20 ರಂದು ಪಿರಿಯಾಪಟ್ಟಣ ತಾಲೂಕಿನ ದೊಡ್ಡಹರವೆ ಸಮೀಪ ಕಾವೇರಿ ನದಿಯಲ್ಲಿ ಈಜಲು ತೆರಳಿ ಇಬ್ಬರು ಯುವಕರು ಮೃತಪಟ್ಟರು. ಏ.21 ರಂದು ತಿ.ನರಸೀಪುರ ತಾಲೂಕಿನ ತಲಕಾಡು ನಿಸರ್ಗಧಾನಕ್ಕೆ ಪ್ರವಾಸಕ್ಕೆ ಆಗಮಿಸಿ ಕಾವೇರಿ ನದಿಯಲ್ಲಿ ಈಜಲು ತೆರಳಿದ್ದ ಇಬ್ಬರು ವಿದ್ಯಾರ್ಥಿಗಳು ಮೃತಪಟ್ಟರು. ಏ.22 ರಂದು ಎಚ್.ಡಿ. ಕೋಟೆ ತಾಲೂಕಿನ ಕಬಿನಿ ಹಿನ್ನೀರಿನಲ್ಲಿ ಅರಣ್ಯ ರಕ್ಷಕರೊಬ್ಬರು ಈಜಲು ತೆರಳಿ ಮೃತಪಟ್ಟರು.

ಪೊಲೀಸ್ ಇಲಾಖೆಯಿಂದ ಜಾಗೃತಿ: ಜಿಲ್ಲೆಯಲ್ಲಿ ನೀರಿನಲ್ಲಿ ಮುಳುಗಿ ಮೃತಪಡುತ್ತಿರುವವರ ಸಂಖ್ಯೆ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಪೊಲೀಸ್ ಇಲಾಖೆಯಿಂದ ಜನರಲ್ಲಿ ಜಾಗೃತಿ ಮೂಡಿಸುವ ಕಾರ್ಯ ನಡೆಯುತ್ತಿದೆ. ನೀರಿಗೆ ಇಳಿಯುವ ಮುನ್ನ ವಹಿಸಬೇಕಾಗಿರುವ ಕ್ರಮಗಳ ಕುರಿತು ಜನರಲ್ಲಿ ಅರಿವು ಮೂಡಿಸುವ ಕಾರ್ಯವನ್ನು ಪೊಲೀಸರು ಮಾಡುತ್ತಿದ್ದಾರೆ.

* ಬಹುತೇಕರು ಈಜು ಬಾರದಿದ್ದರೂ ನೀರಿಗೆ ಇಳಿಯುತ್ತಾರೆ.

* ನೀರಿನ ಆಳದ ಅರಿವಿಲ್ಲದೆ ನೀರಿಗೆ ಇಳಿದು ಮೃತಪಡುತ್ತಾರೆ

* ಕೆರೆ, ನದಿಯ ಮೇಲ್ನೋಟಕ್ಕೆ ಕಡಿಮೆ ಇದ್ದಂತೆ ಕಂಡರೂ ಒಳಗೆ ಅಪಾಯಕರ ಪ್ರದೇಶಗಳಿರುತ್ತವೆ

* ಕಾಲುವೆ, ನದಿ ಹಾಗೂ ಅಣೆಕಟ್ಟುಗಳ ಬಳಿ ನೀರಿನ ಹರಿವು ತೀವ್ರವಾಗಿರುತ್ತದೆ. ನೀರಿನ ಸೆಳೆತಕ್ಕೆ ಸಿಲುಕಿ ಮೃತಪಡುತ್ತಾರೆ

* ಕೆಲವರು ಮದ್ಯಪಾನ ಮಾಡಿದ ಬಳಿಕ ನೀರಿಗೆ ಇಳಿಯುತ್ತಾರೆ. ಇದರಿಂದ ಸಮತೋಲನ ಕಳೆದುಕೊಂಡು ಸಾವಿಗೀಡಾಗುತ್ತಾರೆ

* ಯುವಜನರು ಸ್ನೇಹಿತರ ಮುಂದೆ ಸಾಹಸ ತೋರಿಸಲು ಎತ್ತರದಿಂದ ಜಿಗಿತ, ದೂರ ಈಜು, ಆಳಕ್ಕೆ ಹೋಗುವುದು ಮುಂತಾದ ಅಪಾಯಕಾರಿ ಪ್ರದರ್ಶನದಿಂದ ಜೀವ ಕಳೆದುಕೊಳ್ಳುತ್ತಾರೆ

* ಅನೇಕ ಸ್ಥಳಗಳಲ್ಲಿ ಎಚ್ಚರಿಕೆ ಫಲಕಗಳು, ಕಂಬಿ ಬೇಲಿ, ರಕ್ಷಣಾ ಸಿಬ್ಬಂದಿ ಅಥವಾ ಜೀವ ರಕ್ಷಕ ಸಾಧನಗಳು ಇಲ್ಲದೆ ಇರುವುದು

* ಈಜು ಬಾರದವರು ನೀರಿಗೆ ಇಳಿಯಬಾರದು.

* ಒಬ್ಬರೇ ನದಿ ಅಥವಾ ಕೆರೆಯಲ್ಲಿ ಈಜಲು ಹೋಗಬಾರದು

* ಆಳ ತಿಳಿಯದ ಪ್ರದೇಶಗಳಲ್ಲಿ ಸ್ನಾನ ಮಾಡಬಾರದು

* ಮದ್ಯಪಾನ ಮಾಡಿ ನೀರಿಗೆ ಇಳಿಯಬಾರದು.

* ಮಕ್ಕಳನ್ನು ಒಂಟಿಯಾಗಿ ನೀರಿನ ಬಳಿ ಬಿಡಬಾರದು.

* ಅಪಾಯ ಸೂಚನೆ ಫಲಕಗಳನ್ನು ಕಟ್ಟುನಿಟ್ಟಾಗಿ ಪಾಲಿಸಬೇಕು.

* ಜೀವರಕ್ಷಕ ಜಾಕೆಟ್‌ಬಳಕೆ ಮಾಡಬೇಕು

* ಜಿಲ್ಲಾಡಳಿತ ಅಪಾಯಕಾರಿ ಜಲಾಶಯಗಳ ಬಳಿ ಎಚ್ಚರಿಕೆ ಫಲಕ ಅಳವಡಿಸಬೇಕು.

* ಬೇಲಿ, ತಡೆಗೋಡೆ ಮತ್ತು ಸುರಕ್ಷತಾ ಕಂಬಿ ವ್ಯವಸ್ಥೆ ಮಾಡಬೇಕು.

* ಬೇಸಿಗೆ ಅವಧಿಯಲ್ಲಿ ಪೊಲೀಸ್, ಸ್ಥಳೀಯ ಸಂಸ್ಥೆಗಳು ನಿಗಾವಹಿಸಬೇಕು.

* ಜೀವ ರಕ್ಷಕ ಸಿಬ್ಬಂದಿಯನ್ನು ನಿಯೋಜಿಸಬೇಕು.

* ಶಾಲಾ ಮಟ್ಟದಲ್ಲಿ ಈಜು ತರಬೇತಿ ಮತ್ತು ಜಾಗೃತಿ ಕಾರ್ಯಕ್ರಮ ನಡೆಸಬೇಕು.

* ತುರ್ತು ಸಹಾಯ ಸಂಖ್ಯೆಗಳ ಪ್ರಚಾರ ಮಾಡಬೇಕು.

*ರಜಾದಿನಗಳಲ್ಲಿ ಮಕ್ಕಳ ಚಟುವಟಿಕೆಗಳ ಮೇಲೆ ಗಮನ ಇರಬೇಕು.

ಮಲ್ಲಿಕಾರ್ಜುನ ಬಾಲದಂಡಿ, ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ