ಅಂಬೇಡ್ಕರ್ ವಸತಿ ಶಾಲೆ ಸ್ಥಳಾಂತರ ಬೇಡ

2017ರಲ್ಲಿ ಹನಗೋಡು ವ್ಯಾಪ್ತಿಯ ಶೆಟ್ಟಳ್ಳಿ ಲಕ್ಕಪಟ್ಟಣ ಪುನರ್ವಸತಿ ಕೇಂದ್ರದ ಸಮೀಪದ ಸರ್ವೇ ನಂ.12ರಲ್ಲಿ 10 ಎಕರೆ ಭೂಮಿಯಲ್ಲಿ ಡಾ.ಬಿ.ಆರ್.ಅಂಬೇಡ್ಕರ್ ವಸತಿ ಶಾಲೆ ನಿರ್ಮಾಣಕ್ಕೆ ಸರ್ಕಾರ ಅನುಮೋದನೆ ನೀಡಿತು. ಅನುಸೂಚಿತ ಜಾತಿ, ಜನಾಂಗ ಮತ್ತು ಆದಿವಾಸಿ ಬುಡಕಟ್ಟು ಸಮುದಾಯವೇ ಹೆಚ್ಚಾಗಿರುವ ಈ ಭಾಗದಲ್ಲಿ ಅಂಬೇಡ್ಕರ್ ವಸತಿ ಶಾಲೆ ಅತ್ಯವಶ್ಯವಿದೆ. ಹೀಗಿದ್ದರೂ ಇದೀಗ ಶಾಲೆಯನ್ನು ಧರ್ಮಾಪುರ ಗ್ರಾಮಕ್ಕೆ ವರ್ಗಾಯಿಸಲಾಗಿದೆ. ಇದು ಶೋಷಿತ ಸಮಾಜವನ್ನು ಶಿಕ್ಷಣದಿಂದ ವಂಚಿತರನ್ನಾಗಿಸುವ ಕೃತ್ಯವಾಗಿದೆ ಎಂದು ಗುರುವಾರ ಸುದ್ದಿಗೋಷ್ಠಿಯಲ್ಲಿ ಆರೋಪಿಸಿದರು.

ಈ ಕುರಿತು ಶಾಸಕರಲ್ಲಿ ಹಲವು ಬಾರಿ ಮನವಿ ಮಾಡಿದರೂ ಪ್ರಯೋಜನವಾಗಿಲ್ಲ. ಆದಿವಾಸಿಗಳು ಮತ್ತು ದಲಿತರನ್ನು ಶಿಕ್ಷಣವಿಲ್ಲದೆ ಕತ್ತಲೆಯಲ್ಲೇ ಇರಿಸಬೇಕೆನ್ನುವ ದುರುದ್ದೇಶದಿಂದ ಈ ಕಾರ್ಯ ನಡೆಸಲಾಗಿದೆ. ಸೆ.5ರಂದು ತಾಲೂಕು ಆಡಳಿತದಿಂದ ಪಟ್ಟಣದಲ್ಲಿ ಆಯೋಜಿಸಿರುವ ಪ್ರಜಾ ಸೇವೆ ಕಾರ್ಯಕ್ರಮದಲ್ಲಿ ಪ್ರಸ್ತಾಪಿಸಿ ಶಾಲೆ ಸ್ಥಳಾಂತರಿಸದಿರುವಂತೆ ಪ್ರತಿಭಟನೆ ನಡೆಸಲಾಗುವುದು ಎಂದು ಇದೇ ವೇಳೆ ತಿಳಿಸಿದರು.

ಸುದ್ದಿಗೋಷ್ಠಿಯಲ್ಲಿ ಗಿರಿಜನ ಪುನರ್ವಸತಿ ಕೇಂದ್ರದ ಮುಖಂಡ ಜೆ.ಟಿ.ರಾಜಪ್ಪ, ಬಸವಣ್ಣ, ಮಹೇಶ್ ಇದ್ದರು.

ಶಾಲೆಯನ್ನು ತಾಲೂಕಿನಲ್ಲೇ ಉಳಿಸಿದ್ದೇನೆ: ಈ ಕುರಿತು ಪ್ರತಿಕ್ರಿಯೆ ನೀಡಿದ ಶಾಸಕ ಜಿ.ಡಿ.ಹರೀಶ್‌ಗೌಡ, ಹನಗೋಡಿನಲ್ಲೇ ವಸತಿ ಶಾಲೆ ನಿರ್ಮಾಣಕ್ಕೆ ಆದ್ಯತೆ ನೀಡಿ ಜಾಗ ಗುರುತಿಸಲಾಗಿತ್ತು. 2025ರಲ್ಲಿ ಸರ್ಕಾರದಿಂದ 22 ಕೋಟಿ ರೂ. ಅನುದಾನವನ್ನೂ ನಾನು ಮಂಜೂರು ಮಾಡಿಸಿದ್ದೇನೆ. ಈ ಜಾಗದಲ್ಲಿರುವ ಮರಗಳ ತೆರವಿಗೆ ಅಂದಿನ ಅರಣ್ಯ ಮಂತ್ರಿ ಈಶ್ವರ್ ಖಂಡ್ರೆ ಸಕಾರಾತ್ಮಕವಾಗಿ ಸ್ಪಂದಿಸಿ ಒಪ್ಪಿಗೆ ನೀಡಿದ್ದರು. ಆದರೆ ಭೂಮಿ ಡೀನೋಟಿಫೈ ಆಗಿಲ್ಲ ಎನ್ನುವ ಕಾರಣಕ್ಕೆ ಯಾವುದೇ ಕಾರಣಕ್ಕೂ ಮರಗಳ ತೆರವು ಸಾಧ್ಯವಿಲ್ಲವೆಂದು ಅರಣ್ಯ ಅಧಿಕಾರಿಗಳು ತಿಳಿಸಿದ್ದರು. ಇದರಿಂದ ವಸತಿ ಶಾಲೆಯನ್ನು ಅನಿವಾರ್ಯವಾಗಿ ಸ್ಥಳಾಂತರಿಸಲು ತೀರ್ಮಾನಿಸಲಾಗಿದೆ.