ಅಂಬೇಡ್ಕರ್, ಬಾಬೂಜಿ ಇಡೀ ದೇಶದ ನಾಯಕರು

ಕರ್ನಾಟಕ ರಾಜ್ಯ ಮುಕ್ತ ವಿಶ್ವವಿದ್ಯಾಲಯದ ಡಾ.ಬಾಬು ಜಗಜೀವನರಾಮ್ ಅಧ್ಯಯನ, ಸಂಶೋಧನಾ ಮತ್ತು ವಿಸ್ತರಣಾ ಕೇಂದ್ರದ ವತಿಯಿಂದ ಮುಕ್ತ ಗಂಗೋತ್ರಿಯ ಕಾವೇರಿ ಸಭಾಂಗಣದಲ್ಲಿ ಗುರುವಾರ ಆಯೋಜಿಸಿದ್ದ ‘ಡಾ.ಬಾಬು ಜಗಜೀವನರಾಮ್ ಅವರ ದೂರದೃಷ್ಟಿ ಮತ್ತು ಆಧುನಿಕ ಸಮಾಜಕ್ಕೆ ಅವರ ಕೊಡುಗೆಗಳು’ ಕುರಿತಾದ ಎರಡು ದಿನಗಳ ರಾಷ್ಟ್ರೀಯ ಸಮ್ಮೇಳನದಲ್ಲಿ ಮಾತನಾಡಿದರು.

ಈ ಇಬ್ಬರು ಮಹನೀಯರು ಆಧುನಿಕ ಭಾರತ ನಿರ್ಮಾಣಕ್ಕೆ ತಮ್ಮದೆಯಾದ ಕೊಡುಗೆ ನೀಡಿದ್ದಾರೆ. ಇದರೊಂದಿಗೆ ಶೋಷಿತರ ಪರವಾಗಿಯೂ ಕೆಲಸ ಮಾಡಿದ್ದಾರೆ. ಅವರ ಶ್ರಮದ ಫಲ ಇಡೀ ದೇಶಕ್ಕೆ ಲಭಿಸಿದೆ. ಹೀಗಾಗಿ, ಅವರಿಗೆ ಶೋಷಿತರ ನಾಯಕರು ಎಂಬ ಹಣೆಪಟ್ಟಿ ಸಮಂಜಸವಲ್ಲ ಎಂದರು.

ಭಾರತ ಭವಿಷ್ಯ ನಿರ್ಮಾಣಕ್ಕೆ ಅಂಬೇಡ್ಕರ್, ಬಾಬೂಜಿ ಕೊಡುಗೆ ಕೊಟ್ಟಿದ್ದು, ಇದು ಕೇವಲ ದಲಿತರಿಗೆ ಸೀಮಿತವಾಗಿರಲಿಲ್ಲ. ಆದ್ದರಿಂದ ಅವರು ಶೋಷಿತರ ಕಣ್ಮಣಿಯಷ್ಟೇ ಅಲ್ಲದೇ, ಇಡೀ ದೇಶದ ಕಣ್ಮಣಿಗಳು ಎಂದು ಹೇಳಿದರು.

ಅಸ್ಪಶ್ಯತೆ ಅನುಭವಿಸುವುದರೊಂದಿಗೆ ಬಡತನ, ದಾರಿದ್ರೃ, ಶಿಕ್ಷಣ, ಅಧಿಕಾರಿ, ಭೂಮಿ ಸೇರಿದಂತೆ ಇನ್ನಿತರ ಸೌಲಭ್ಯಗಳಿಂದ ದಲಿತರು ವಂಚಿತರಾಗಿದ್ದರು. ಸಮಾಜ ಮುಖ್ಯವಾಹಿನಿಯಿಂದ ದೂರ ಉಳಿದಿದ್ದ ಈ ತಳ ಸಮುದಾಯದೊಂದಿಗೆ ಗುರುತಿಸಿಕೊಂಡು, ಅವರ ಪರ ಕೆಲಸ ಮಾಡಿದರು. ಇದು ಇತರ ಸಮುದಾಯಗಳಿಗೂ, ದೇಶಕ್ಕೂ ಅನುಕೂಲವಾಯಿತು ಎಂದರು.

ಬಾಬೂಜಿ ಕುರಿತು ಪುಸ್ತಕಗಳು ಬಹಳ ಕಡಿಮೆ ಬಂದಿವೆ. ಅವರ ಆರ್ಥಿಕ ಚಿಂತನಗಳ ಬಗ್ಗೆ ಪುಸ್ತಕ ಬರೆಯಬೇಕು ಎಂದಾಗ ಸರಿಯಾದ ಮಾಹಿತಿ ನಮ್ಮಲ್ಲಿ ಸಿಗಲಿಲ್ಲ ಎಂದು ತಿಳಿಸಿದರು.

ಬಾಬೂಜಿ ಅವರು ಪದವಿ ಪಡೆಯುವುದಕ್ಕಿಂತ ಮುಂಚೆಯೇ ಕಲ್ಕತ್ತಾ, ಬಿಹಾರದಲ್ಲಿ ಸಂಭವಿಸಿದ ಭೂಕಂಪನದ ಪರಿಹಾರ ಕಾರ್ಯಕ್ರಮದಲ್ಲಿ ಸಕ್ರಿಯವಾಗಿದ್ದರು. ಅವರನ್ನು ಕಾಂಗ್ರೆಸ್ ನಾಯಕ ಬಾಬುರಾಜೇಂದ್ರ ಪ್ರಸಾದ್ ಗಮನಿಸಿದರು. ಅಂದಿನಿಂದ ಬಾಬೂಜಿ ಹಾಗೂ ಬಾಬು ರಾಜೇಂದ್ರ ಪ್ರಸಾದ್ ಒಡನಾಟ ಬೆಳೆಯಿತು. ಮುಂದೆ ನೆಹರು, ಗಾಂಧೀಜಿ ಅವರ ಸಂಪರ್ಕಕ್ಕೆ ಬಂದು ಶಹಬ್ಬಾಸ್ ಗಿರಿ ಪಡೆದರು. ಬಳಿಕ ಅವರು ಬಹಳಷ್ಟು ಕಾಂಗ್ರೆಸ್ ಅಧಿವೇಶದಲ್ಲಿ ಭಾಗವಹಿಸಿದ್ದರು. ಕಾಂಗ್ರೆಸ್‌ನಲ್ಲಿದ್ದ ಜ್ವಲಂತ ಸಮಸ್ಯೆಗಳನ್ನು ಆ ಪಕ್ಷದ ಹಿರಿಯ ನಾಯಕರ ಮುಂದೆ ಪ್ರಸ್ತಾಪಿಸುವ ಛಾತಿ ಬೆಳೆಸಿಕೊಂಡರು ಎಂದರು.

ಒಬ್ಬ ಯುವ ನಾಯಕರಾಗಿ ಸಾಮಾಜಿಕ ಕಳಕಳಿ ತೋರಿಸುವುದರ ಜತೆಗೆ ಅಂದಿನ ದಲಿತರ, ಶೋಷಿತರ ಕಾಳಜಿಯನ್ನು ಅನಾವರಣ ಮಾಡಿದರು. ಇಡೀ ಭಾರತ ನಿರ್ಮಾಣದಲ್ಲಿ ಶೋಷಿತರ ವರ್ಗಗಳಿಗೆ ತಮ್ಮ ಜೀವನವನ್ನು ಹೇಗೆ ಮುಡುಪಾಗಿಟ್ಟರು ಎಂಬುದನ್ನು ಅರ್ಥ ಮಾಡಿಕೊಳ್ಳಬೇಕು ಎಂದರು.

ಬೆಂಗಳೂರಿನ ಡಾ.ಬಾಬು ಜಗಜೀವನರಾಮ್ ಸಂಶೋಧನಾ ಸಂಸ್ಥೆಯ ನಿರ್ದೇಶಕ ರಾಜೇಶ್ ಜಿ.ಗೌಡ ಮಾತನಾಡಿ, ದೇಶದಲ್ಲಿ ದೀನ ದಲಿತರ ಕಾರಣಕ್ಕಾಗಿಯಲ್ಲದೆ, ಸಮಾಜದ ಹಿಂದುಳಿದವರ ಸಮಾನತೆಗಾಗಿ ಹೋರಾಡಿದ ಧೀಮಂತ ನಾಯಕ ಡಾ.ಬಾಬು ಜಗಜೀವನರಾಮ್ ಎಂದರು.

ಭಾರತದ ಶ್ರೇಷ್ಠ ನಾಯಕರು ಹೆಸರುಗಳನ್ನು ನೋಡಿದರೆ ಅದರಲ್ಲಿ ಡಾ.ಬಾಬು ಜಗಜೀವನರಾಮ್ ಕೂಡ ಒಬ್ಬರು. ಆಧುನಿಕ ಭಾರತಕ್ಕಾಗಲಿ ಅಥವಾ ಅವರ ಪ್ರಸ್ತುತ ಕಾಲದಲ್ಲಿ ಭಾರತಕ್ಕೆ ನೀಡಿದ ಕೊಡುಗೆ ಅಪಾರವಾದದ್ದು. ಶೈಕ್ಷಣಿಕ ಕ್ಷೇತ್ರದಲ್ಲಿರಬಹುದು, ಸಾಮಾಜಿಕ ಸಮಾನತೆ ಸೇರಿದಂತೆ ಪ್ರತಿಯೊಂದು ಕ್ಷೇತ್ರದಲ್ಲೂ ಅವರು ತಮ್ಮನ್ನು ತಾವು ತೊಡಗಿಸಿಕೊಂಡಿದ್ದರು ಎಂದು ತಿಳಿಸಿದರು.

ಕುಲಪತಿ ಪ್ರೊ.ಶರಣಪ್ಪ ವಿ.ಹಲಸೆ, ಕುಲಸಚಿವ ಎಸ್.ಕೆ.ನವೀನ್‌ಕುಮಾರ್, ಡೀನ್(ಶೈಕ್ಷಣಿಕ) ಪ್ರೊ.ಎಂ.ರಾಮನಾಥಮ್ ನಾಯುಡು, ಪರಿಕ್ಷಾಂಗ ಕುಲಸಚಿವ ಡಾ.ಸಿ.ಎಸ್.ಆನಂದ್‌ಕುಮಾರ್, ಹಣಕಾಸು ಅಧಿಕಾರಿ ಪ್ರೊ.ಎಸ್.ನಿರಂಜನ್ ರಾಜ್, ಡಾ.ಬಾಬು ಜಗಜೀವನರಾಮ್ ಅಧ್ಯಯನ, ಸಂಶೋಧನಾ ಮತ್ತು ವಿಸ್ತರಣಾ ಕೇಂದ್ರದ ನಿರ್ದೇಶಕಿ ಡಾ.ಆರ್.ಶರಣಮ್ಮ ಪಾಲ್ಗೊಂಡಿದ್ದರು